1-2. Ngorapi thangwe rimwe rinotiita kuti tidakarire bhuku ra Apokaripsi?

 MAKAMBOKOKWA kuti muende kovona foto jakawanda jo mundhu ari wese? Pamainga mecivona foto iji, makavona vandhu vamweni vakawanda vamucikazivi. Asi pano foto imwe yamakasotesesa maningi. Ngenyi? Ngokuti imwimwi muripovo pa foto yondhoyo. Pamainga meciisotesesa, makaeja kuceuja ndau yamakavhiswa foto yondhoyo no njiku yoyakavhiswa. Makaejazve kuziva mundhu umwe nga umwe ari pa foto yondhoyo. Foto iyi inosisira maningi kwamuri.

² Bhuku ra Apokaripsi rakadari inga foto iyi. Ngenyi? Ngo mathangwe anokwana kuita maviri. Rokutanga, bhuku iri ro Bhaibheri rakatarihwa itusu. Pa vhesi yokutanga yo bhuku iri, tinoverenga kuti: “Izvi ndizvona zvakavonesa Jesu Kristu, iyena wakazvipuwa ndi Mwari, kuti avonese varanda vake zviro zvinoda kuitika ngo kukasika.” (Apokaripsi 1:1) Ngo kudaro, zvakatahwa mu bhuku iri azvizivi kutarihwa vandhu vese, asi itusu vandhu va Mwari vakajipira. Inga vandhu va Mwari atidikani kushamaisika ngokuti itusu tinobatanijwavo pa kukwanirisika ko zviporofita zvinowanika mu bhuku iri. Ngo kudaro, patinonga teciverenga bhuku iri ra Apokaripsi, tinoverenga zviro zvinotipsasa.

3-4. Mukuzwirana no zvinonangwa mu bhuku ra Apokaripsi, zviporofita izvi zvaizokwanirisika rini, perapo izvona zvinodikana kupsasisa kudini umwe nga umwe wedu?

³ Thangwe rocipiri rinobatanija nguva yaizokwanirisika zviporofita izvi. Mupostori Johani wakananga ngo nguva yaizokwanirisika zviro izvi paakati: “Ndakava mu njiku ya Mambo ngo kufemehwa.” (Apokaripsi 1:10) Johani paakatara magama  aya mu gore ra 96 Kristu Aviya, “njiku ya Mambo” yainga iri ndhambo maningi. (Mateu 25:14, 19; Ruka 19:12) Asi mukuzwirana no ciporofita co Bhaibheri, njiku iyi yakatanga mu gore ra 1914 apo Jesu wakagajwa inga Mambo mugore. Kuvha mu gore iri, zviporofita zvo bhuku ra Apokaripsi zvinobatanija vandhu va Mwari, zvakatanga kukwanirisika. Hina, wari tiri kupona “mu njiku ya Mambo”!

⁴ Zvecivoneka kuti tiri kupona pa mukuvo unodakajisa, tinodikana kunasa kuteya njeve pa mbhangiro yo rudo inowanika pana Apokaripsi 1:3, inoti: “Anodakara mundhu anoverenga ngo izwi guru na vaya vanozwa masoko o uporofeti no kuteveja masoko akatahwemo, ngokuti nguva yakagajwa iri kukhwedera.” Zvokadi kamare, tinodikana ‘kuverenga ngo izwi guru,’ kuti ‘tizwe masoko o uporofeti no kuateveja.’ Ngoapi amwe o masoko aya atinodikana kuteveja?

5. Bhuku ra Apokaripsi rinokhombijisa kudini kuti zvinosisira kuti manamatiro edu atendehwe ndi Jehovha?

⁵ Kuvha mu cipauko cokutanga co bhuku ra Apokaripsi, tinoziva kuti Jesu anoziva zvese zvinoitika mu ungano jo vandhu vake. (Apokaripsi 1:12-16, 20; 2:1) Jesu wakakhombija izvi ngo masoko aakatumira ku ungano jinokwana kuita nomwe jo ku Aziya Menori. Pa masoko aya, iyena wakapa ndhungamiriro yakajeka yaibesera Makristu o mu zana rokutanga ro makore kuti vave no cokwadi cokuti kunamata kwavo kuri kutendehwa ndi Jehovha. Cimwenizve, masoko aakanangaro anoshandavo ku vandhu va Mwari nyamasi. Ngozvapi zvatinojija? Mutungamiriri wedu Jesu Kristu, anoneseka maningi ngo magarire akaita ushamwari hwedu na Jehovha. Zvecivoneka kuti tiri kujivirihwa ngo mutungamiriri wedu Jesu, akuna na ciro cimwe caacikavoni. Iyena anoziva kuti ngozvapi zvatinoda kuti tienderere mberi tecitendehwa ndi Jehovha. Ngoyapi ndhungamiriro yaanotipa yatinodikana kutevejera nyamasi uno?

6. (a) Mukuzwirana no masoko a Jesu ari pana Apokaripsi 2:3, 4, cineso capi cainga no ungano yo Efeso? (b) Ngozvapi zvatinojija kuvha pa cineso ici?

⁶ Verenganyi Apokaripsi 2:3, 4. Atidikani kuruza rudo hwatainga nahwo pakutanga na Jehovha. Masoko a Jesu ku ungano yo Efeso aikhombija kuti ivona vainga vakavonesa kucungirira no kuenderera mberi vecishandira Jehovha pikija vainga vecisotana no zvineso zvakasiyana-siyana. Pikija zvakadaro, ivona vainga varuza rudo hwavainga nahwo pakutanga. Vaidikana kukhwijirija rudo hwondhohwo kuitira kuti kunamata kwavo Jehovha kutendehwe ndiyena. Ngo njira yakaezana, nyamasi uno tinodikana kuita zvizinji kusiyapo kucungirira. Tinodikana kucungirira ngo mathangwe akanaka. Mwari wedu aadakajihwi basi ngo zviro zvatinoita asi ngo thangwe rinotiita kuti tiite zvondhozvo. Thangwe rinotiita kuti tiite zviro, rinosisira maningi kwaari ngokuti iyena anoda kuti kunamata kwedu kucijikire pa rudo no kubongesera.—Mazwi Akangwara 16:2; Marko 12:29, 30.

7. (a) Inga zvinokhombijwa pana Apokaripsi 3:1-3, cineso capi cainga no ungano yo Sardhi cakavoniwa ndi Jesu? (b) Ngozvapi zvatinodikanavo kuita?

⁷ Verenganyi Apokaripsi 3:1-3. Tinodikana kuenderera mberi takangwara. Vandhu vainga vari mu ungano yo Sardhi vainga vano cineso cimweni cakasiyana. Pikija kuti ivona vainga vakashandira Jehovha kareko, asi vakatanga kurembejeka. Ngo kudaro, Jesu wakavangwaja ngo kuvavhunja kuti vaidikana “kungwara.” Ngwajo iyi inotijijisenyivo? Zvokadi kamare, Jehovha aakanganwi basa redu.  (Vahebheru 6:10) Asi pikija zvakadaro, atidikani kurangarira kuti, ngokuti takashandira Jehovha kareko atidikanizve kumushandira wari uno. Kangaije tingatova no zvineso zvingatiphingaija pa kuita zvizinji, asi tinodikana kubatikana mu “basa ra Mambo,” toramba takangwara mugumo paunonga wecikhwedera.—1 Vakorinte 15:58; Mateu 24:13; Marko 13:33.

8. Ngozvapi zvatinojija kuvha ku masoko a Jesu aakatumira ku hama jo ku Raodhiseya anowanika pana Apokaripsi 3:15-17?

⁸ Verenganyi Apokaripsi 3:15-17. Tinodikana kuva vandhu vanovangisira no kunamata ngo mwoyo wese. Masoko a Jesu ku ungano yo Raodhiseya anovonesa kuti iyona yainga no cineso cimweni. Kunamata kwavo kwainga ‘kwecijiya.’ Ngo ndava yo kuvanga kwavo musoro, Jesu wakavavhunja kuti vainga vari pa mugariro wo “kutambujika [no] unoitisa pena.” Ivona vaidikana kuvonesa kuvangisira kwavo pa kunamata Jehovha. (Apokaripsi 3:19) Ngozvapi zvatinojija? Kudari tikavona kuti kuvangisira kwedu kuri kurembejeka, tinodikana kubongesera ngo zvese zvakanaka zvatakaitihwa ndi Jehovha no sangano rake. (Apokaripsi 3:18) Narini, atidikani kutendera kuti zviro zvokunyama zvitiphingaije, zvoita kuti kunamata kwedu Jehovha kuve pa ndau yocipiri.

9. Inga zvinokhombijwa ngo masoko a Jesu aakatumira ku ungano yo Pergamu no Tiyatira, ingozi yapi yatinodikana kutiza?

⁹ Tinodikana kuramba jijiso jo vapanduki. Jesu wakashora vamweni vainga mu ungano yo Pergamu ngo kubara kwavo kuparajana pakati po hama. (Apokaripsi 2:14-16) Iyena wakasimba hama jainga mu ungano yo Tiyatira avo vakaramba “zviro zvakajika zva Sathana,” ovangwaja kuti ‘vabatisise’ cokwadi. (Apokaripsi 2:24-26) Makristu aingaya akaremba akatevera majijisiro o kunyepa, aidikana kukhauya. Waro tingativo kudini nyamasi uno? Tinodikana kuramba majijisiro ese acikazwirani no murangariro ja Jehovha. Vapanduki “vanojiita inga vanonamata Mwari asi vanokonehwa kurarama mukuzwirana no simba rakwo.” (2 Timoti 3:5) Zvakareruka maningi kuvona majijisiro okunyepa kudari tinovangisira kujija Soko ra Mwari.—2 Timoti 3:14-17; Judha 3, 4.

10. Ngozvapi zvatingajijazve kuvha ku masoko akanangwa ndi Jesu ku ungano yo ku Pergamu no Tiyatira?

¹⁰ Tinodikana kuramba muitiro wese wo uhure. Mu ungano yo Pergamu no Tiyatira mainga no cineso cimweni. Jesu wakashora  vamweni vainga mu ungano iyi ngo kutama kuramba kwavo zvo uhure. (Apokaripsi 2:14, 20) Ngozvapi zvatinojija? Atidikani kuvetera kuti Jehovha anozotendera kuti tiite zvakashata ngokuti taano makore akawanda tecimushandira kana kuti takagajwa mabasa akawanda mu sangano rake. (1 Samueli 15:22; 1 Pedhru 2:16) Iyena anovetera kuti tirambe takabatisisa ndhungamiriro jake jakakhwirira, azvinenyi kuti nyika iyi iri kuenderera mberi yecishatisisa.—Vaefeso 6:11-13.

11. Ngozvapi zvatajija mbhera wari? (Vonanyi bhokiso rinoti “ Zvatinojija Nyamasi Uno.”)

¹¹ Ngozvapi zvatajija mbhera wari? Takwanisa kuvona kuti tinodikana kuva no cokwadi cokuti manamatiro edu ari kutendehwa ndi Jehovha. Kudari tikaita ciri cese cinoita kuti kunamata kwedu kutame kuashihwa, tinodikana kuita cinjo ngo kukasika. (Apokaripsi 2:5, 16; 3:3, 16) Asi Jesu wakagogomejera ciro cimweni cinosisira maningi pa masoko ake ku ungano iji. Ngocapi ciro condhoco?

12. Ngozvapi zvatinojija kuvha ku masoko a Jesu aakavhunja ungano yo Esmirna no Firadhefiya? (Apokaripsi 2:10)

¹² Ngatende tivone masoko a Jesu aakatumira ku ungano yo Esmirna no Firadhefiya. Iyena wakavhunja Makristu aya kuti aacaidikana kuthya kuteverehwa ngokuti kugondeka kwavo kwaizofuphwa. (Verenganyi Apokaripsi 2:10; 3:10) Ngozvapi zvatinojija nyamasi uno? Tinodikana kuvetera kuteverehwa, tova no cido co kucungirira. (Mateu 24:9, 13; 2 Vakorinte 12:10) Ngenyi izvi zvinosisira?

13-14. Vandhu va Mwari vanopsasiswa kudini ngo zviitiko zviri mu bhuku ra Apokaripsi cipauko 12?

¹³ Bhuku ra Apokaripsi rinotizivisa kuti vandhu va Mwari vanozoteverehwa mu njiku jedu jino kana “mu njiku ya Mambo.” Cipauko 12 ca Apokaripsi cinovonesa hondo yakaitika kudenga, Jesu paakapera kugajwa Mambo hwo Umambo hwa Mwari. Mikaeri kana Jesu Kristu no masoca ake vakahwisana na Sathana no madhimoni. (Apokaripsi 12:7, 8) Inga muviyo, vavengi vese va Mwari vakakhandihwa pasi, zvoita kuti vandhu vese vari mu nyika vatambujike maningi. (Apokaripsi 12:9, 12) Waro ngozvapi zvakaitika kuno vandhu va Mwari?

¹⁴ Bhuku ra Apokaripsi rinotivhunja ngo zvakaitwa ndi Sathana pasure po hondo iyi. Iyena aazivi kuzokwanisazve kuhwirira kudenga, ngo kudaro iyena wakabatikana pa kuhwisa vashandiri va Mwari vokuzojwa vari pasi pano, avo vanoimirira vandhu va Mwari “no kuita ucapupu ngo pamusoro pa Jesu.” (Apokaripsi 12:17; 2 Vakorinte 5:20; Vaefeso 6:19, 20) Ciporofita ici cakakwanirisika kudini?

15. Ndiyani waiimirira ‘zvapupu zviviri’ zvinonangwa pana Apokaripsi cipauko 11, ngozvapi zvakavaitikira?

 ¹⁵ Sathana wakaita kuti vavengi va Mwari vahwise hama jokuzojwa jaitungamirira basa ro kucumaera pa nguva yondhoyo. Vanarume ava vakaimirira ‘zvapupu zviviri’ zvinonangwa mu bhuku ra Apokaripsi kuti zvaizouraiwa. * (Apokaripsi 11:3, 7-11) Mu gore ro 1918, hama sere jainga jecitungamirira sangano pa nguva iyi, jakanyepehwa jonangwa kuti jainga jino ndava no kudihwa mu kadheya ko makore akawanda. Vandhu vazinji vairangarira kuti basa raiithwa ngo vanarume ava vokuzojwa rainga ratoima.

16. Izviro zvapi zvinoshamaisa zvakaitika mu gore ra 1919, asi Sathana ari kuenderera mberi eciitenyi kuvhira pa mukuvo wondhowo?

¹⁶ Ciporofita cinowanika mu bhuku ra Apokaripsi cipauko 11, cinovonesazve kuti ‘zvapupu zviviri’ zvaizovazve no upenyu pasure po mukuvo mushoma. Ciporofita ici cakakwanirisika mu njira inoshamaisa, pasure po mukuvo mushoma basi hama iji no jadihwa mu kadheya. Mu kutanga ko gore ra 1919 hama iji jakavhiswa mukadheya, kunyepehwa kwavaitwaya kwakapera. Ngokukasika ijona jakatangazve kutungamirira basa ro kucumaera. Asi Sathana aazivi kuima kuhwisa vandhu va Mwari. Kuvhira pa mukuvo wondhowo, Sathana ari kuenderera mberi eciteverera vandhu va Mwari. (Apokaripsi 12:15) Zvokadi kamare, “izvo zvinoda kucungirira no rutendo” ku umwe na umwe wedu.—Apokaripsi 13:10.

17. Ngorapi besero rinoashihwa ngo vandhu va Mwari pikija no kuteverera kuri kuita Sathana?

¹⁷ Apokaripsi cipauko 12 cinovonesavo kuti vandhu va Mwari vaizoashira besero ro vandhu vo vainga vacikaveteri. Irona rinosanangurazve kuti “pasi” paizomija “kumwa” inoimirira vandhu vanoteverera vashandiri va Mwari. (Apokaripsi 12:16) Izvi ndizvona kamare zvakaitika. Nguva jimweni, vandhu vamweni vo nyika ino ya Sathana, vakadari inga vanotonga shwiro mu matribhunari, vanobesera vandhu va Mwari. Ko vhaza jakawanda, vashandiri va Jehovha vanowina shwiro jakawanda mu matribhunari, vototendehwa kuva no rusujunuko mbhera pakati kuti. Waro ivona vanoshandisa kudini rusujunuko uhu? Ivona vanoshandisa mukana wese o vanova navo kuti vakwanise kuita basa rovakapuwa  ndi Jehovha. (1 Vakorinte 16:9) Basa iri rinobatanijenyi?

18. Ngorapi basa ratinodikana kudira pakutanga mu njiku jino jokupejisira?

¹⁸ Jesu wakananga kuti vajiji vake vaizotokotesa “masoko akanaka o Umambo” hwa Mwari pasi pese, mugumo ucito waguma. (Mateu 24:14) Pavanonga veciita basa iri, vanobesehwa ngo ngirozi imwe kana ngo zvikwata zvo ngirozi zvinonangwaya kuti zvino “masoko akanaka aidikana kutokoteswa ku vandhu vanogara pasi pano; vo majinja ese, vo mavhumbo ese, vo ndimi jese no vandhu vese.”—Apokaripsi 14:6.

19. Ngoapi masoko amweni anodikana kucumaehwa ngo vandhu vanoda Jehovha?

¹⁹ Vashandiri va Mwari avatokotesi basi masoko o Umambo. Ivona vanodikanavo kubesera ngirozi pa basa rinosananguhwa pana Apokaripsi cipauko 8 mbhera 10. Ngirozi iji jinozivisa zvineso zvakawanda zvinozosongana na vaya vanoramba Umambo hwa Mwari. Hina, Zvapupu zva Jehovha zvinozozivisa masoko o rutongeso, akadari inga “nvura yo mapuwe no muriro” vecisanangura matongehwe anozoitwa nyika ino yakashata ya Sathana. (Apokaripsi 8:7, 13) Vandhu vanodikana kuziva kuti mugumo waa phedo, ngo kudaro vanodikana kuita cinjo mu upenyu hwavo kuti vakwanise kupona pa njiku yo ushungu hwa Jehovha. (Sofonia 2:2, 3) Asi kuzivisa masoko aya azvizovi zvakareruka. Zvinozoda cicunge kuti itusu tiite zviro izvi. Panonga peciitika dambujiko guru, kuzivisa masoko o rutongeso zvinozoda cicunge kamare.—Apokaripsi 16:21.

20. Ngozvapi zvatinozovona pa musoro muviri jinotevera?

²⁰ Zvokadi kamare, itusu tinodikana kuteveja “masoko o uporofeti” ngokuti tinobatanijwavo pa kukwanirisika ko zviya zvatinoverenga mu bhuku ra Apokaripsi. (Apokaripsi 1:3) Asi tingaitisa kudini kuti tienderere mberi takagondeka patinonga tecicungirira no kuita divi redu pa kuzivisa masoko aya ngo cicunge? Tinozovangiswa ngo zviro zviviri: Cokutanga, ngo zviya zvinonangwa mu bhuku ra Apokaripsi ngo pamusoro po vavengi va Mwari, cocipiri, makomborero atinozowana kumbejiyo kudari tikaenderera mberi takagondeka. Tinozovona shwiro iji pa musoro muviri jinotevera.