1. Ngocapi civaringo cinosisira cinodikana kutemwa ngo vandhu vese?

 NYAMASI uno vandhu vese vanodikana kutema civaringo cinosisira. Kunanga kuti ivona vanozobesera Jehovha uwo anocitendehwa cokutonga nyezuru no pasi kana vanozobesera muvengi wake Sathana Dhiyabhu? Vese vanodikana kusana divi ravanodikana kubesera. Azvinenyi kuti ngo capi civaringo cavanozotema, icona cinozopsasa kumbeji kwavo kwenda no kwenda. (Mateu 25:31-33, 46) Pa “dambujiko guru,” ivona vanozova no citatijo cokuti vanozopona kana vanozoparajwa.—Apokaripsi 7:14; 14:9-11; Ezekieli 9:4, 6.

2. (a) Vahebheru 10:35-39 inotivangisa kuti tiitenyi? (b) Bhuku ra Apokaripsi ringatibeseresa kudini?

² Verenganyi Vahebheru 10:35-39. Kudari imwimwi masana kubesera utongi hwa Jehovha, matema civaringo caushoni. Wari imwimwi munoda kubeseravo vamweni kuti vateme civaringo caushoni. Kuti mukwanise kuita izvi, mungashandisa masoko anowanika mu bhuku ra Apokaripsi kuti muvabesere. Bhuku iri rinoshamaisa, rinovonesa kuti ngozvapi zvinozoitikira vaya vanoramba kubesera Jehovha no makomborero anozowana vaya vanobesera no kugondeka kwese utongi hwake. Tinodikana kujija zvokadi izvi zvinosisira. Kuita kudaro, kunozovangisa cido cedu cokwenderera mberi tecishandira Jehovha. Mukuengejera, tingashandisa zvatajijari kuti tibesere vamweni kuti vashandire Jehovha no kwenderera mberi vecimushandira.

3. Ngozvapi zvatinozovona mu musoro uwu?

³ Mu musoro uwu, tinozodavira muvhunjo iji: Ngozvapi zvinozoitika no vaya vanobesera utongi hwa Mwari? Ngo divi rimweni, ngozvapi zvinozoitika no vaya vanosana kubesera cikara cokupsuka cinonangwaya mu bhuku ra Apokaripsi?

4. Ngocapi cikwata cakavoniwa ndi mupostori Johani cainga na Jesu kumatenga?

⁴ Mupostori Johani, wakavona zvikwata zviviri zvaibesera utongi hwa Jehovha no kuashira makomborero okuzopona kwenda no kwenda. Cikwata cokutanga cino vandhu vanokwana 144.000. (Apokaripsi 7:4) Ivona vakavha pa nyika pano kuti vaende koumba utongi kana Umambo na Jesu Kristu kumatenga. Pamwepo na Jesu, ivona vanozotonga pasi pano. (Apokaripsi 5:9, 10; 14:3, 4) Pa civoniso, Johani wakavavona vakaima pamwepo na Jesu kumatenga pa Dundhu ro Zioni.—Apokaripsi 14:1.

5. Zvicinyi zvinozoitika sambiri pano no vakasara vo 144.000?

⁵ Kuvhira mu nguva yo vapostori mbhera wari, zviuru zvo vandhu zviri kusaniwa kuti zviite divi ro 144.000. (Ruka 12:32; Varoma 8:17) Asi Johani, wakavhunjwa kuti mutengo mushoma wo vakasara ava, vaizopona mu njiku jino jokupejisira. “Vakasara” ava, vanozoashira “cinamiro” cokupejisira cokutendehwa ndi Jehovha dambujiko guru ricito ratanga. (Apokaripsi 7:2, 3; 12:17) Perapo, mukuvo mushomani dambujiko guru ricito ratanga, vakasara ava vanozotohwa kwenda kudenga kuti vabatane no vamweni vo 144.000 vakafa vakagondeka. Kondhoyo ivona vanozova majimambo pamwepo na Jesu Kristu mu Umambo hwa Mwari.—Mateu 24:31; Apokaripsi 5:9, 10.

6-7. (a) Ngocapi cikwata cimweni cakavoniwa ndi Johani, tinojijenyi ngo pamusoro paco? (b) Ngenyi vakasara vo 144.000 no “vandhu vakawanda maningi vacikaverengeki” vanodikana kudakarira zvinonangwa pana Apokaripsi cipauko 7?

⁶ Pasure pokuvona cikwata cokudenga, Johani wakavonavo “vandhu vakawanda maningi vacikaverengeki.” Mukusiyana no 144.000, cikwata ici cainga no vandhu vacikaziviki mutengo wavo. (Apokaripsi 7:9, 10) Ngozvapi zvatinojija ngo pamusoro pavo? Johani wakavhunjwa kudari: “Vandhu ava, vanovha pa dambujiko guru, ivona vakapaja nguvo javo jakareba, vojicenesa ngo ngazi yo Vhuta.” (Apokaripsi 7:14) Pasure po kupona pa dambujiko guru, “vandhu vakawanda maningi vacikaverengeki” ava, vanozopona pasi pano no kuzoashira makomborero anodakajisa.—Nduyo 37:9-11, 27-29; Mazwi Akangwara 2:21, 22; Apokaripsi 7:16, 17.

⁷ Azvinenyi dangani takasanwa kuti tiende kudenga kana kupona pasi pano, kunanga kuti tinokwanisa kuvona kukwanirisika ko zviporofita zvinonangwa mu cipauko 7 co bhuku ra Apokaripsi? Hina tinokwanisa. Unozova mukuvo unodakajisa maningi ku zvikwata zvese izvi zvo vashandiri va Mwari. Itusu tinozodakara ngo kusana kubesera utongi hwa Jehovha. Waro ngozvapi zvimweni zvatinovhunjwa ngo bhuku ra Apokaripsi ngo pamusoro po dambujiko guru?—Mateu 24:21.

8. Dambujiko guru rinozotangisa kudini, vandhu vazinji vanozoitenyi?

⁸ Inga zvakanangwa pa musoro waperari, vandhu vanobesera zvomatongehwe o nyika ino ngo kukasika vanozoparaja Bhabhironi Guru, cine ro pasi pese ro manamatiro o kunyepa. (Apokaripsi 17:16, 17) Izvi zvinozoita kuti dambujiko guru ritange. Waro kunanga kuti vandhu vanozosana kushandira Jehovha? Haiwa. Mukusiyana, bhuku ra Apokaripsi cipauko 6, rinovonesa kuti pa mukuvo uwu wokunesa, vandhu vacikashandiri Jehovha vanozopsaka kujivirihwa ngo vatongi vo nyika ino no vanoita zvonyagoso, avo vanoezaniswa no matundhu. Kudari vandhu vondhovo vakatama kubesera Umambo hwa Jehovha, iyena anozoenderera  mberi ecivavona inga vavengi vake.—Ruka 11:23; Apokaripsi 6:15-17.

9. Vashandiri va Jehovha vanozovonesa kudini kusiyana no vamweni pa dambujiko guru, ngo wapi unozova muviyo wakona?

⁹ Zvokadi kamare, vashandiri vakagondeka va Jehovha, vanozoenderera mberi vakasiyana no vandhu vamweni pamukuvo uwu wokunesa wo dambujiko guru. Ndivona basi vanozosara vecishandira Jehovha pa nyika no kuramba kubesera “cikara.” (Apokaripsi 13:14-17) Ngo ndava yokuramba kwavo vakagondeka kuna Jehovha, vavengi va Jehovha vanozonyangajwa maningi. Inga muviyo, kubatana ko majinja kunozohwisa vandhu vese va Mwari pasi pano. Kuhwisa uku, kunonangwa mu Bhaibheri inga kuhwisa ka Gogi wa Magogi.—Ezekieli 38:14-16.

10. Inga zvinosananguhwa pana Apokaripsi 19:19-21, Jehovha anozoitenyi panonga pecihwiswa vandhu vake?

¹⁰ Jehovha anozoitenyi no kuhwisa uku kwakashata? Iyena wakativhunja kudari: “Uxungu hwangu hunozobwaka.” (Ezekieli 38:18, 21-23) Apokaripsi cipauko 19 inonanga zvinozoitika. Jehovha anotumira Mwana Wake kuti ajivirire vandhu vake no kunyisa vavengi vavo. Jesu anozonghwinira pakuhwisa uku no “zvikwata zvo masoca okudenga” ijo jiri ngirozi jakagondeka pamwepo no vo 144.000. (Apokaripsi 17:14; 19:11-15) Hondo iyi inozoperesa kudini? Vandhu vese no zvikwata zvese zvicikabeseri Jehovha zvinozoparajwa kamare.—Verenganyi Apokaripsi 19:19-21.

11. Iciitiko capi cinodakajisa cinopejisira kunangwa mu bhuku ra Apokaripsi?

¹¹ Amboejanyi kurangarira kuti vandhu vese vakagondeka vanozojizwa kudini pasure po kuparajwa ko vavengi vese va Mwari. Uwu unozova mukuvo unodakajisa maningi. Pikija kuti kudenga kunozova no mudakaro mukuru ngo kuparajwa ko Bhabhironi Guru, panazve ciro cimweni cinoita kuti kondhoyo kuve no mudakaro wakakurazve maningi. (Apokaripsi 19:1-3) Icona, iciitiko cinodakajisa cinowanika mu bhuku ra Apokaripsi, “mucadho wo Vhuta.”—Apokaripsi 19:6-9.

12. Inga zvinokhombijwa pana Apokaripsi 21:1, 2, mucadho wo Vhuta unozoitwa rini?

¹² Mucadho uwu unozoitwa rini? Vese vo 144.000 vanonga vari kudenga hondo yo Armagedhoni icito yatanga. Asi uwu andiwopi mukuvo unozoitwa mucadho wo Vhuta. (Verenganyi Apokaripsi 21:1, 2.) Mucadho wo Vhuta unozoitwa pakupera ko hondo yo Armagedhoni apo vavengi vese va Mwari vanonga vapera kuparajwa.—Nduyo 45:4, 5, 14-18.

13. Zvicinyi zvinozoitika pa mucadho wo Vhuta?

¹³ Zvicinyi zvinozoitika pa mucadho wo Vhuta? Bhem, kudari inga mucadho unobatanija mwanarume no mwanakaji, mucadho uwu wokuezanisira unobatanija Mambo Jesu Kristu pamwepo no “murovohwi” wake, vo 144.000. Ciitiko ici cinozotangisa utongi hupsa hunozotonga pa nyika ko 1.000 co makore.—Apokaripsi 20:6.

14-15. Apokaripsi cipauko 21 cinoezanisa vo 144.000 no cinyi? (Vonanyi foto yo pakapa.)

¹⁴ Tevere, mu bhuku ra Apokaripsi cipauko 21 cinoezanisa vo 144.000 no dhorobha rakaseja maningi rinodanijwa “Jerusarema Ibza.” (Apokaripsi 21:2, 9) Dhorobha iri rainga rakacijikira pa mapuwe anokwana kuita gumi na maviri aitahwa “gumi ro mazina no mazina maviri o vapostori vo Vhuta.” Ngenyi Johani wakadakarira maningi zvaakavonari? Ngokuti iyena wakavona zina rake rakatahwa pa rimwe ro mapuwe aya. Ici cakava cidakajiso cikuru maningi!—Apokaripsi 21:10-14; Vaefeso 2:20.

 ¹⁵ Dhorobha iri rokuezanisira rainga ricizivi kuezana no madhorobha amweni. Irona rainga no makwanja akaitwa ngo goridhi rakaperera, rainga no gumi no muviri jo musuvo jakaitwa ngo maperora, mupfimbiji no maambo akona ainga akaitwa ngo mapuwe o mutengo mukuru. Zvese izvi zvainga zvakanasa kupimwa kamare. (Apokaripsi 21:15-21) Asi Johani wakavona kuti painga no cimweni cainga cecicota. Vonanyi basi zvaakazonanga: “Andizivi kuvona themberi mukati maro, ngokuti Jehovha Mwari wo Masimba Ese, ndiyena themberi yakona pamwepo no Vhuta. Mu dhorobhemo, mainga mucingadi zuva no mweji kuti zvivheneke, ngokuti rukujo hwa Mwari hwaivheneka. Vhuta ndirona ruvheneko hwakona.” (Apokaripsi 21:22, 23) Vese vanoita divi ro Jerusarema Ibza vanonga vari pamwepo na Jehovha. (Vahebheru 7:27; Apokaripsi 22:3, 4) Zvokadi, Jehovha na Jesu ndivona themberi yo dhorobha iri.

16. Zvicinyi zvinozoitika ku vandhu vese pa Kutonga ko Ciuru co Makore co Umambo hwa Mwari?

¹⁶ Vokuzojwa vanodakara maningi pavanorangarira ngo dhorobha iri. Asi vese vaya vano vetero yo kuzopona pasi pano vano thangwevo rokudakara maningi ngo dhorobha iri. Kutonga ko Ciuru co Makore ko Umambo hwa Mwari, Jerusarema Ibza rinozoviisa makomborero akawanda maningi. Johani wakavona makomborero aya eciviya inga “murambo wo kumwa yo upenyu.” Cimwenizve, ngo mativi maviri o murambo uwu mainga no “miti yo upenyu” yaibudisa masakani “airapa majinja.” (Apokaripsi 22:1, 2) Vandhu vese vanonga vecipona mundau iyi, vanozova no mukana wokubesereka ngo makomborero ese aya. Padoko ngo padoko, vandhu vese vanozwira vanozoguma pakuva vakakwana. Akuzovizve no ndhendha, kuhwajihwa kana kucema ngo ndava yo kusuruvara.—Apokaripsi 21:3-5.

17. Inga zvinokhombijwa pana Apokaripsi 20:11-13, ndiyani anozobesereka pa Kutonga ko Ciuru co Makore?

¹⁷ Ndiyani anozobesereka ngo nasiriro iyi yese? Pakutanga, ndi vandhu vakawanda maningi vacingaverengeki vanozopona pa Armagedhoni pamwepo no vana vanobahwa mu nyika imbza. Asi bhuku ra Apokaripsi cipauko 20 rinogondesa kuti vakafa vanozomuswavo. (Verenganyi Apokaripsi 20:11-13.) “Vakarurama” vakafa vakagondeka pamwepo no “vacizivi kururama” avo vacizivi kuva no mukana wokujijira ngo pamusoro pa Jehovha vanozomuswavo kuti vapone munyika.  (Mabasa o Vapostori 24:15; Johani 5:28, 29) Waro izvi zvinoda kureva kuti mundhu wese wakafa, anozomuswa pa Kutonga ko Ciuru co Makore? Haiwa. Vese vaya vakaramba kamare mukana wokushandira Jehovha vacito vafa, avazomuswi. Ivona vakava no mukana wokushandira Jehovha, asi vakavonesa kuti avasisiri kuzopona mu Paradhiso pasi pano.—Mateu 25:46; 2 Vatesaronika 1:9; Apokaripsi 17:8; 20:15.

18. Ngowapi unozova mugariro wo nyika pakupera ko 1.000 co makore?

¹⁸ Mukupera ko 1.000 co makore vese vanonga vecipona mu nyika vanozova no upenyu hwakakwana. Akuna na umwezve anonga ecipona panguva yondhoyo anozopsaswa ngo ushaishi hwakavha kuna Adhamu. (Varoma 5:12) Ushaishi uhu hwatakagarari utaka hunonga hwapera kuvhiswa. Ngo njira iyi, vese vanonga vari mu nyika vanozova no “upenyu” hwakakwana mbhera kupera ko 1.000 co makore.—Apokaripsi 20:5.

19. Ngenyi panodikana kuva no kuejwa ko kupejisira?

¹⁹ Tinoziva kuti Jesu wakacungirira muejo ja Sathana ijo jaizomuita kuti atame kuva mundhu wakagondeka. Iyena wakaramba wakagondeka pikija wainga eciejwa. Asi kureva kuti mundhu wese anonga akakwana angakwanisa kuitavo zvondhozvo Sathana paanomueja? Umwe na umwe wedu anozokwanisa kudavira muvhunjo uwu, Sathana paanozosujunuhwa kuvha murindi rakajikisisa pakupera ko 1.000 co makore. (Apokaripsi 20:7) Vese vaya vanoramba vakagondeka pakuejwa uku ko kupejisira vanozoashira upenyu hucingaperi no kudakajihwa ngo kuva no rusujunuko hwokadi. (Varoma 8:21) Vese vanozopandukira Jehovha, vanozoparajwa mbhera narini pamwepo na Sathana no madhimoni ake.—Apokaripsi 20:8-10.

20. Muri kuzwa kudini pakupera kuvona zviporofita zvese zvinowanikari mu bhuku ra Apokaripsi?

²⁰ Muri kuzwa kudini pakupera kuvona zvese izvi zviri wari mu bhuku ra Apokaripsi? Muri kudakajihwa ngo kupona panguva yokukwanirisika ko zviporofita izvi? Izvona zvamuvangisa kuti muve no cido co kwenda kokokavo vamweni kuti vaviye kobatana na itusu pakunamata kwakacena ka Mwari? (Apokaripsi 22:17) Pakupera kuvona zvese izvi zvinozoitikari kumbeji kwedu tiri kudakajihwa no kuda kubhuyavo masoko akabhuiwa ndi mupostori Johani o kuti: “Ameni! Izanyi, Mambo Jesu.”—Apokaripsi 22:20.