MUSORO WO KUJIJA WO 22
Uzivi Unotitungamirira mu Upenyu Hwedu
“Ndi Tenji Mwari anopa uzivi.”—MAZWI AKANGWARA 2:6.
NDUMBO 89 Purutananyi, Zwiranyi Mukomborehwe
ZVATICAJIJA *
1. Ngenyi tese tinoda uzivi unovha kuna Mwari? (Mazwi Akangwara 4:7)
KUDARI makambotema civaringo cinosisira, pacina kukana-kana makaita mukumbiro mecikumbira uzivi. (Jakobo 1:5) Mambo Soromona wakatara kudari: ‘Uzivi hunosisira maningi kupinda zviro zvese.’ (Verenganyi Mazwi Akangwara 4:7, Sandujo yo Nyika Imbza, mu Cishona.) Izvokadi kuti Soromona aacaibhuya ngo pamusoro po uzivi hwo vandhu. Iyena wainga ecibhuya ngo uzivi unovha kuna Jehovha Mwari. (Mazwi Akangwara 2:6) Kunanga kuti uzivi unovhari kuna Mwari, unokwanisa kutibesera kuti tihwisane no zvineso zvatiri kusonganari nazvo nyamasi uno? Hina ungakwanisa, inga zvaticadari kuvona pa musoro uu.
2. Ngoyapi njira imwe ingatibesera kuti tive no uzivi?
2 Njira imwe ingatibesera kuti tive vandhu vano uzivi ngo yokujija no kushandisa zvakanangwa ngo vandhu vaviri vaireremejwa maningi ngo uzivi hwavo. Pokutanga tinozobhuya ndi Soromona. Bhaibheri rinoti: “Mwari wakapa Soromona uzivi no ungwaru hwakakurisisa.” (1 Majimambo 4:29) Pocipiri, tinozovona muezaniso wa Jesu, uwo wainga no uzivi wakakura maningi. (Mateu 12:42) Ngo pamusoro pa Jesu ciporofita cakati: “Panyezuru pake panozomata mwiha wa Tenji: mwiha wo uzivi no ungwaru.”—Isaia 11:2.
3. Ngozvapi zvaticazovona pa musoro uu?
3 Vecishandisa uzivi hwovakapuwa ndi Mwari, Soromona na Jesu vakapa mazano anobesera itusu tese. Pa musoro uu tinozovona zviro zvitatu: Tinodikana kuva takaezanana pamavonero atinoita mare, mavonero atinoita basa no manera atinojivona pacedu.
KUVA NO MAVONERO AKAEZANANA NGO PAMUSORO PO MARE
4. Mugariro wa Soromona waisiyana papi no wa Jesu?
4 Soromona wainga mundhu wakakhupuka, waingazve no nyumba yakaseja maningi. (1 Majimambo 10:7, 14, 15) Ngo divi rimweni, Jesu aacainga no zviro zvakawanda nee aacainga no nyumba yokugara. (Mateu 8:20) Pikija zvakadaro, vanarume ava vainga no mavonero akaezanana ngo pamusoro po zviro zvokunyama, ngokuti uzivi hwavo hwaivha ku mundhu endhowo, Jehovha Mwari.
5. Ngoapi mavonero akaezanana ainga na Soromona ngo pamusoro po mare?
5 Soromona waiziva kuti mare, i “cifindariro.” (Mucumaeri 7:12) No mare, tinokwanisa kutenga zviro zvatinoda. Pikija iyena wainga wakakhupuka, wakazwisisa kuti kuno zviro zvinosisira maningi kupinda mare. Inga muezaniso, iyena wakatara kudari: “Zina rakanaka riri nane kupinda upfumi hwakawanda.” (Mazwi Akangwara 22:1) Soromona wakananga kuti vandhu vanoda maningi mare, vanovoneka inga vakadakara, kuveni avazivi. (Mucumaeri 5:10, 12) Iyena wakatonangavo kuti atidikani kurangarira kuti mare inosisira maningi, ngokuti inopera ngo kukasika.—Mazwi Akangwara 23:4, 5.
Kunanga kuti zviro zvokunyama zvinoita kuti tinesehwe kudira Umambo pa kutanga mu upenyu hwedu? (Vonanyi ndima 6-7) *
6. Jesu wainga no mavonero api akaezanana ngo pamusoro po zviro zvokunyama? (Mateu 6:31-33)
6 Jesu wainga no mavonero akaezanana ngo pamusoro po zviro zvokunyama. Iyena waidakarira maningi kuha no kumwa. (Ruka 19:2, 6, 7) Pa vhaza imweni, wakaita vhinyu yainaka maningi pa mushamaiso wake wokutanga. (Johani 2:10, 11) Pa njiku yaakafa, iyena wainga akasimira nguvo yaidhura maningi. (Johani 19:23, 24) Asi Jesu aazivi kutendera kuti zviro zvokunyama zvive zvinosisira maningi mu upenyu hwake. Iyena wakati kuno vateveri vake: “Apana anokwanisa kushandira vandhu vaviri . . . Amukwanisi kushandira Mwari pamwepo no Upfumi.” (Mateu 6:24) Jesu wakajijisa kuti kudari tikatanga kupsaka Umambo hwa Mwari, Jehovha anozotipa zvimweni zvatinoda.—Verenganyi Mateu 6:31-33.
7. Hama imweni yakabesereka kudini ngo kuva no mavonero akaezanana ngo pamusoro po mare?
7 Hama no hambzaji jedu jakawanda, jakabesereka maningi ngo kushandisa uzivi unovha kuna Mwari ngo pamusoro po kushandisa mare. Vonanyi muezaniso wo hama inodanijwa Dhanyeri icikazivi kurovora. Iyona yakati: “Pandainga mujaha, ndakatema civaringo co kudira zviro zvo umwari pa ndau yo kutanga mu upenyu hwangu.” Zvecivoneka kuti hama iyi yainga yapungura zvimweni mu upenyu hwayo, yakakwanisa kushandisa nguva yayo no simba kuti ibesere panoitika ngozi jinoitika joga no kushanda pa Bheteri. Iyona yakati: “Kunasa kunanga, andizvidembi ngo civaringo condakatema. Kudari nondicizivi kutema civaringo ici cinosisira maningi, ndaizova no mare yakawanda. Asi kureva kuti kuva no mare yakawanda kwaizondibesera kuti ndive no shamwari jandinajo wari? Kwaizondibesera kuti ndive no mudakaro wandinawo wari ngo kudira Umambo pakutanga? Akuna mare yaizokwanisa kundipa makomborero andinawo wari, andakapuwa ndi Jehovha.” Zvakajeka kuti tinobesereka maningi patinodira Umambo hwa Mwari pakutanga, kusiyapo mare.
KUVA NO MAVONERO AKAEZANANA NGO PAMUSORO PO BASA
8. Tinozvizivisa kudini kuti Soromona wainga no mavonero akaezanana ngo pamusoro po basa? (Mucumaeri 5:18, 19)
8 Soromona wakadanija kushanda kwedu ngo simba kuva “cipuo ca Mwari.” (Verenganyi Mucumaeri 5:18, 19.) Iyena wakatara kuti: “Mu mixando yese muno kubeswa.” (Mazwi Akangwara 14:23) Soromona waizviziva kuti izvi ndizvonadi. Iyena waishanda maningi ngo simba. Wakavaka nyumba, wakasima miti jo muvhinyu, wakaita majhardhim no kuca mwimbo. Iyena wakavakazve madhorobha. (1 Majimambo 9:19; Mucumaeri 2:4-6) Iri rainga basa rakakura maningi, asi pacina kukana-kana, iyena wakadakara kamare. Iyena wakazwisisa kuti aacaizodakara ngo kuita basa iri basi. Waidikana kuita zvizinji kuna Jehovha. Inga muezaniso, wakatungamirira pa kuvakwa ko themberi kuitira kunamata Jehovha, ko makore anokwana kuita manomwe. (1 Majimambo 6:38; 9:1) Pakupera kuita zviro zvizinji, Soromona wakazwisisa kuti ciro cinosisira maningi cinodikana kuitwa ngo mundhu, ikushandira Jehovha. Iyena wakatara kuti: “Kupera ko mazwi. Bzese bzazwiwa. Ithyai Mwari no kuteveja mipango yake.”—Mucumaeri 12:13.
9. Jesu wakaitisa kudini kuti ave no cokwadi co kuti basa rake ro kunyama aricaengepi pa ndau yo kutanga?
9 Jesu wainga mundhu waishandavo ngo simba. Pa makore okutanga o upenyu hwake pasi pano, iyena wakashanda inga muvezi. (Marko 6:3) Pacina kukana-kana, vabari vake vaidakarira maningi besero raaipa kuti mbhuri yavo yainga yakakura, iwane zvokuha. Inga muvezi, mwanarume uwu wainga wakakwana Jesu, waiitavo zviro zvakakwana. Kangaije vandhu vazinji vaidakarira maningi zvaiita. Jesu waidakara maningi ngo basa rake. Pikija waishanda ngo simba, nguva jese waipsaka nguva kuti ashandire Jehovha. (Johani 7:15) Pakufamba ko nguva, paainga ecicumaera, wakavhunja vandhu vaimupurukira kudari: “Mucashandira zvokuha zvinopera. Asi shandiranyi zvokuha zvinogara mbhera ku upenyu hucikaperi.” (Johani 6:27) Pa hurukuro yake yo pa dundhu, Jesu wakati: “Unganijanyi upfumi hwenyu kumatenga.”—Mateu 6:20.
Tingaitisa kudini kuti tive takaezanana ngo pamusoro po basa redu no mabasa o umwari? (Vonanyi ndima 10-11) *
10. Ngocapi cineso cinosongana no vamweni pavanonga veciita mabasa avo?
10 Patinoshandisa uzivi hwa Mwari, tinozova no mavonero akaezanana ngo pamusoro po basa redu. Inga Makristu takajijiswa kuti tinodikana ‘kubata basa . . . , teciita zvakanaka.’ (Vaefeso 4:28) Kazinji majipatarau edu, paanovona kuti itusu takagondeka, tinoshanda ngo simba, iwona kangaije angatonanga kuti anoreremeja maningi basa ratinoita. Izvi zvingatiita kuti tishande nguva jakawanda, ngokuti tinoda kuti patarau wedu varangarire zvaushoni ngo pamusoro po Zvapupu zva Jehovha. Asi kudari tikaita kudaro, atizowani nguva yakawanda kuti tigare no mbhuri yedu kana kutoita zvimweni pa kushandira kwedu Jehovha. Ngo kudaro, tinodikana kuita cinjo kuti tive takaezanana.
11. Hama Wiriamu vakajijenyi ngo kuva no mavonero akaezanana ngo pamusoro po basa?
11 Hama imweni inodanwa Wiriamu, yakajijira ngo muezaniso wo hama yoyaishandira kuti kudira basa pa ndau kwayo kunosisira maningi. Hama Wiriamu vakati: “Hama iyi imuezaniso mukuru maningi wo mundhu anokwanisa kuva no mavonero akaezanana ngo pamusoro po basa. Iyona inoshanda ngo simba, inazve ushamwari waushoni no makriyente ayo ngokuti inoita basa raushoni. Asi pakupera ko njiku, iyona inosiya basa, yoshandisa nguva no simba rayo kuitira mbhuri yayo na Jehvoha. Munoziva, iyona ihama yakadakara maningi yandinoziva.” *
KUVA NO MAVONERO AKAEZANANA PA MANERA ATINOJIVONA PACEDU
12. Soromona wakakhombijisa kudini kuti wainga no mavonero akaezanana ngo pamusoro pake, asi ngozvapi zvakaitika?
12 Soromona paainga munamati wakagondeka wa Jehovha, iyena wainga no mavonero akaezanana ngo pamusoro pake. Paainga mujaha, iyena waizviziva kuti wainga no paanogumira. Ngo kudaro, waikumbira ndhungamiriro ja Jehovha. (1 Majimambo 3:7-9) Paakatanga kutonga, Soromona waiziva kuti kujikuja kwakashata maningi. Iyena wakatara kudari: “Theka rinotungamirira rufu; mwiha uno baya unotungamirira uwisi.” (Mazwi Akangwara 16:18) Zvinosuruvarisa ngo zvokuti, pakufamba ko nguva iyena aazivi kushandisa ngwajo iyi. Makore manganani pakutonga kwake, iyena wakajikuja woguma pa kutama kuzwira mutemo ja Mwari. Inga muezaniso, umwe wo mutemo waacikazivi kuzwira, wainga wokuti mambo wo Cihebheru “aabviri kucada vanakaji vazinji, kuti mwoyo wake utame kupauka.” (Deuteronòmio 17:17) Iyena aazivi kuzwira mutemo uwu, woguma pa kurovora vanakaji vanokwana kuita 700 no vanakaji vamweni vanokwana kuita 300, vazinji vavo vacikanamati Jehovha. (1 Majimambo 11:1-3) Kangaije Soromona wairangarira kuti zvaaingari eciita zvainga zvicizivi kushata. Asi pakufamba ko nguva wakava no muviyo wakashata ngo kutama kwake kuzwira Jehovha.—1 Majimambo 11:9-13.
13. Ngozvapi zvatingajija ngo kurangarijisisa ngo kujidodokesa ka Jesu?
13 Jesu wakaenderera mberi ano mavonero akaezanana no okujidodokesa. Acito aviya pasi pano, iyena wakaita zviro zvizinji zvinoshamaisa paaishanda na Jehovha. Pecishandiswa Jesu, “zviro zvese zvakasikwa, zviri kumatenga no zviri pasi pano.” (Vakorose 1:16) Paainga ecibhabhatijwa, iyena wakaceukija zviro zvese zvaakaita paainga na Baba wake. (Mateu 3:16; Johani 17:5) Asi zvese zvaaizivari azvizivi kuita kuti iyena ajikuje. Mukusiyana, iyena aazivi kumbojivona kuti anosisira maningi kupinda vandhu vamweni. Iyena wakatovhunja vajiji vake kuti paakaviya pasi pano, “aazivi kuviya koshandihwa, asi wakaviya koshandira no kupira upenyu hwake kuti aponese vandhu vazinji.” (Mateu 20:28) Wakatonanga kuti zvese zvaiita waibesehwa ndi Jehovha. (Johani 5:19) Izvi zvinovonesa kuti Jesu waijidodokesa maningi. Uwu imuezaniso waushoni watingatevejera.
14. Ngozvapi zvatingajija ngo pamusoro po zvakananga Jesu ngo manera atinodikana kujivona?
14 Jesu wakajijisa vajiji vake kuti vajivone ngo njira yakaezanana. Pa vhaza imweni iyena wakavagondesa kuti: “Vhuji rese ro mu musoro menyu rakaverengwa.” (Mateu 10:30) Magama aya anotivangisa maningi, kudari itusu tino mavonero okujishora. Izvi zvinovonesa kuti Baba wedu vokudenga vanotida nokutizve itusu tinosisira maningi kwavari. Narini atidikani kushora matongero a Jehovha, ngo kurangarira kuti itusu atisisiri kuti tive vanamati vake no kuashira upenyu mu nyika imbza yaakatigondesa.
Ngozvapi zvinoitika kudari tikatama kuva no mavonero akaezanana ngo pamusoro pedu? (Vonanyi ndima 15) *
15. (a) Murindiri umweni wakanangenyi ngo pamusoro po mavonero atinojiita pacedu? (b) Inga zvinokhombijwa pa foto iri pa pheji 24, kudari tikajisotesesa maningi pacedu, ngoapi makomborero atinoruza?
15 Gumi na mashanu o makore akapera, Murindiri umweni wakagogomejera kuti kuva no mavonero akaezanana pa manera atinojivona kunosisira maningi, powakati: “Zvokadi kamare atidi kurangarira maningi ngo pamusoro pedu togumira pa kujikuja, nee atidivo kurangarira kuti atisisiri. Kusiyapo zvondhozvo, tinoda kubatikana pa kuva no mavonero akaezanana ngo pamusoro pedu kana kuti kurangarira kuti pano zvatinokwanisa kuita no zvimweni zvaticikakwanisi. Hambzaji imweni yo Cikristu yakasanangura izvi ngo njira iyi: ‘Andiripi mundhu wakashata nee andiripivo mundhu anosisira maningi. Ndino mugariro jakanaka no jakashata inga vandhu vese.’” * Izvi zvinonasa kujekesa kamare kuti kuva no mavonero akaezanana ngo pamusoro pedu, kwakanaka maningi.
16. Ngenyi Jehovha anotipa ndhungamiriro jo ungwaru?
16 Ecishandisa Soko rake, Jehovha anotipa ndhungamiriro jo ungwaru. Iyena anotida, anodavo kuti itusu tidakare. (Isaia 48:17, 18) Ciro cakanakisisa maningi catingaita no cingatiita kuti tidakare, ikuita zviro zvinodakajisa Jehovha. Patinozviita atizovi no zvineso zvizinji zvinosongana no vandhu vanopsakaya maningi mare, vanobatisisa maningi mabasa avo no kujisotesesa maningi pacavo. Umwe nga umwe wedu anodikana kutema civaringo co kuva no uzivi no kuita kuti Jehovha adakare.—Mazwi Akangwara 23:15.
NDUMBO 94 Tinobonga Maningi ngo Soko ra Mwari
^ Soromona na Jesu vainga no uzivi hwakakura maningi. Uzivi uhu hwaivha kuna Jehovha Mwari. Pa musoro uwu, tinozovona zvatinojija ngo mazano akafemehwa akanangwa ndi Soromona na Jesu ngo kuva vandhu vakaezanana ngo pamusoro po mare, basa no manera atinojivona pacedu. Tinozovonazve kuti hama no hambzaji jedu, jakabesereka kudini ngo kushandisa mazano aya anowanika mu Bhaibheri mu mativi aya o upenyu.
^ Vonanyi musoro unoti: “Zvaungaita Kuti Ufarire Kushanda Nesimba” mu Murindiri wo 1 wa Fevereiro wo 2015, mu Cishona.
^ Vonanyi musoro unoti: “Bhaibheri Rinogona Kukubatsira Kuti Ufare” mu Murindiri wo 1 wa Agosto wo 2005, mu Cishona.
^ KUDURUJIHWA KO FOTO: Johani na Tomasi imajaha maviri ari mu ungano yondhoyo. Johani anopeja nguva yake ecinasirira-nasirira karu yake. Asi Tomasi anoshandisa karu yake kuti abesere vamweni kuti vaende kocumaera no kwenda ku musongano jo ungano.
^ KUDURUJIHWA KO FOTO: Johani ari kushanda mbhera usiku. Iyena aadi kunyangajisa patarau wake. Ngo kudaro, patarau wake pavakamukumbira kuti ashande mbhera usiku, iyena wakatendera. Pa usiku wondhowo, Tomasi uwo anoshanda inga mubeseri wo ungano, ari kuperekeja mukuru umweni kuti vavhakacire hambzaji. Kare, Tomasi wainga akavhunja patarau wake kuti waizoshandisa usiku umweni pa sumana kuti ashandire Jehovha, kuciripi kushanda.
^ KUDURUJIHWA KO FOTO: Johani ari kubatikana maningi pacake. Tomasi ari kuita kuti Jehovha ave mundhu anosisira maningi mu upenyu hwake. Inga muviyo iyena wakakwanisa kuva no shamwari jipsa paanonga ecibesera kunasirira-nasirira Nyumba jo Magungano.
