1-2. Sananguranyi kuti ngenyi ndhungamiriro jimweni jo Bhaibheri jinova jinosisira maningi mugariro wedu paunocinja.

 PA NJIKU yo mucadho wavo mujaha no musikane vanonasa kuteya njeve pa hurukuro yakacijikira mu Bhaibheri inobhuya ngo pamusoro po mucadho. Ndhungamiriro jinonangwa pa hurukuro iyi asipi jipsa kwavari. Asi kutangira pa njiku iyi kuenda mberi, masoko aya anova no revo imweni. Ngenyi? Ngokuti ivona vanozoshandisa ndhungamiriro iji mu mucadho wavo.

² Izvi ndizvona zvinoitikavo no varovorani vo Cikristu pavanova vabari. Ko makore akawanda ivona vakazwa hurukuro jakawanda jaibhuya ngo pamusoro po kurera vana. Asi wari uno ndhungamiriro iji jaakuva jinosisira maningi kwavari. Ivona vaakudikana kurera vana vavo. Uwu waamutoro wakakura maningi. Ngo kudaro zviro pazvinocinja mu upenyu hwedu, zvokadi ndhungamiriro jimweni jo Bhaibheri jinoguma pakuva jinosisira maningi kwatiri. Iri ndirona thangwe rinoita kuti vanamati va Jehovha vaverenge Matahwa, inga zvakavhunjwa majimambo o Iziraeri kuti vaite no kurangarijisisa ndiona “njiku jese” mu upenyu hwavo.—Deuteronòmio 17:19.

3. Ngozvapi zvatinoda kuzobhuya pa musoro uwu?

³ Vabari muna cidakajiso cakakura maningi co kujijsa vana venyu ngo pamusoro pa Jehovha. Asi amudi kuvajijisa basi ngo pamusoro pa Mwari. Imwimwi munoda kubesera vana venyu kuti vagume pakunasa kuda kamare Jehovha. Waro zvicinyi zvamungaita kuti vana venyu vade Jehovha ngo mwoyo wese? Pa musoro uwu, tinoda kuzobhuya ngo ndhungamiriro jinokwana kuita murongomuna jingamubesera inga mubari. (2 Timoti 3:16) Tinoda kuzovonazve kuti vabari vamweni vo Cikristu vakabesereka kudini ngo kushandisa ndhungamiriro iji jo Bhaibheri.

4. Ngoyapi ndhungamiriro yokutanga yo Bhaibheri ingabesera vabari kuti vabesere vana vavo kuti vade Jehovha ngo mwoyo wese? (Jakobo 1:5)

⁴ Ndhungamiro 1: Psakanyi besero ra Jehovha. Mukumbirenyi kuti amupe uzivi hwamunoda kuti mubesere vana venyu kuti vanase kuda Jehovha. (Verenganyi Jakobo 1:5.) Iyena ndiyena kamare Mundhu anokwanisa kumupa mazano. Tino mathangwe akawanda anotiita kuti tinange kudaro. Wari ngativone anokwana kuita maviri. Rokutanga, Jehovha ano zvizinji zvaanoziva zvakamuitikira inga mubari. (Nduyo 36:10) Rocipiri, mazano ake nguva jese anobesera.—Isaia 48:17.

5. (a) Sangano ra Jehovha riri kuitenyi kuitira kubesera vabari? (b) Inga zvinokhombijwa pa vhidhiyo, majijenyi ngo manera akarera varovorani ava vana vavo?

⁵ Ecishandisa Soko rake Bhaibheri no sangano rake, Jehovha ari kupa vabari masoko akawanda akacijikira mu Bhaibheri angavabesera kuti varere vana vavo kuti vade Jehovha. (Mateu 24:45) Inga muezaniso, mungakwanisa kuwana mazano anoshanda kamare mu mutevejwana jo musoro jinoti: “Mazano Okubatsira Mhuri” jinowanika mu Mukai! jedu jakasiyana-siyana. Jimweni jo musoro iji jiri kuwanika mu saiti yedu. Cimwenizve, pakabudiswa mavhidhiyo akawanda kuti abesere vabari kuti vashandise mazano avanopuwa ndi Jehovha pakurera vana vavo. *—Mazwi Akangwara 2:4-6.

6. Vabari vamweni vakabesereka kudini ngo ndhungamiriro javakaashira kuvha ku sangano ra Jehovha?

⁶ Vabari vazinji vakabongesera maningi ngo besero ravakapuwa ndi Jehovha ecishandisa sangano rake. Mubari umweni anodanjwa kuti Jowe wakati: “Kurera vana vatatu mu cokwadi azvizivi kureruka. Inini no mukaji wangu nguva jese, taiita mukumbiro kuna Jehovha kuti atibesere. Kazinji taivona kuti musoro jaibudiswa mu saiti no mavhidhiyo, zvaibuda pa nguva kwayo kamare kuitira kutibesera kuhwisana no mugariro watainga nawo. Nguva jese taithemba ndhungamiriro ja Jehovha.” Jowe no mukaji wake vakavona kuti musoro iji no mavhidhiyo zvainga zvecibesera vana vavo kuti vakhwedere phedo na Jehovha.

7. Ngenyi zvinosisira maningi vabari vagaje muezaniso wakanaka kuno vana vavo? (Varoma 2:21)

 ⁷ Ndhungamiriro 2: Jijisanyi vana venyu ngo muezaniso wenyu. Vana vanosotesesa maningi zvinoitwa ngo vabari vavo, kazinji vanovatevejera. Ngo zvokadi kuti akuna mubari wakakwana. (Varoma 3:23) Pikija zvakadaro, vabari vano uzivi vanoita zvese zvavanokwanisa kuti vagaje muezaniso wakanaka kuno vana vavo. (Verenganyi Varoma 2:21.) Ecibhuya ngo pamusoro po vana, umwe mubari wakati: “Ivona vakadari inga ciponja cinotora zvese.” Wakaengejera eciti: “Ivona vanotivhunja kudari muezaniso wedu auripi kuzwirana no zvatinojijisa.” Ngo kudaro, kudari tecida kuti vana vedu vade Jehovha, tinodikana kuvonesa kuti rudo hwedu kwaari hwakavanga.

8-9. Ngozvapi zvamunojija kuvha ko zvakanangwa ndi Andreya na Ema?

⁸ Kuno njira jakawanda jo kuti vabari vangajijisa vana vavo kuti vade Jehovha. Vonanyi zvakanangwa ngo mujaha umweni ano makore anokwana 17 anodaninjwa Andreya. Iyena wakati: “Nguva jese vabari vangu vaindijijisa kuti kuita mukumbiro kunosisira maningi. Njiku jese co usiku, baba vaiita mukumbiro na inini pikija kuti ndaitokwanisavo kuita ndega. Vabari vangu vaindiceukija kuti: ‘Unodikana kubhuya na Jehovha nguva jese jaunonga wecida.’ Ngo ndava ya izvi kuita mukumbiro kwakava kunosisira maningi kwandiri. Wari zvakandirerukira maningi kuita mukumbiro no kuvona kuti Jehovha ndi Baba vano rudo vanondida.” Vabari, nguva jese ceukijanyi kuti rudo hwenyu kuna Jehovha hunobesera kuti vana venyu vadevo Jehovha ngo mwoyo wese.

⁹ Vonanyi muezaniso wa hambzaji Ema. Baba wavo povakasiya mbhuri yavo, ivona vakasiya magava aizopagahwi ndi mai wa hambzaji Ema. Iyona yakati: “Pakava no mukuvo muzinji wokuti mai wangu vainga vacina mare. Asi nguva jese ivona vaitivhunja kuti Jehovha anotaja no kubesera vashandiri vake. Ndakakwanisa kuvona ngo manera avaipona kuti ivona vaitenda izvi kamare. Mai wangu vaishandisa zviyana zvavainga vecicumaera.” Tinojijenyi? Vabari mungakwanisa kujijisa vana venyu ngo muezaniso pikija pa mugariro jinonga jecinesa.—Vagaratiya 6:9.

10. Ngojapi mukana muzinji jainga jino vabari vo Vaiziraeri kuti vabhuisane no vana vavo? (Deuteronòmio 6:6, 7)

¹⁰ Ndhungamiriro yo 3: Nguva jese bhuyanyi no vana venyu. Jehovha wakavhunja Vaiziraeri kuti nguva jese vaidikana kubhuya no vavo ngo pamusoro pake. (Verenganyi Deuteronòmio 6:6, 7.) Vabari ava vainga no mukana jakawanda maningi jokuti vabhuye no vana vavo pa njiku no kuvabesera kuti vashandire Jehovha ngo mwoyo wavo wese. Inga muezaniso, cimujaha co Ciziraeri caipeja nguva yakawanda cecibesera baba waco pakurima no pakukotora mbeu. Kuveni cimusikane caipeja nguva yakawanda cecibesera mai waco pakusona, kuruka zviro no kuita mabasa amweni o pamuzi. Vabari no vana pavaishanda pamwepo vaikwanisa kubhuya shwiro jinosisira jakasiyana-siyana. Inga muezaniso, ivona vaibhuya ngo mugariro jakanaka ja Jehovha no kuvona manera aari kubesera mbhuri yavo.

11. Mukana wapi umweni ungashandiswa ngo vabari vo Cikristu kuti vabhuye no vana vavo?

¹¹ Wari uno upenyu hwakasiyana no zvainga zviriyo kare. Nyika zinji, vabari no vana avapeji nguva zinji vari pamwepo pa njiku. Vabari vanonga vari kubasa kuveni vana vanonga vari kushikora. Inga muviyo, vabari vanodikana kupsaka mukuvo wokuti vabhuisane no vana vavo. (Vaefeso 5:15, 16; Vafiripi 1:10)  Kunamata ko mbhuri ndi umwe wo mukana iji jingabesera. Mujaha umweni anodanijwa kuti Arishandre wakati: “Nguva jese baba wangu vanoita nasiriro kuitira kunamata ko mbhuri, ivona avatenderi kuti ciri cese ciphingaije mukana uwu. Pasure po kujija tinowana mukuvo wokubhuisana ngo shwiro iri yese hayo.”

12. Musoro wo mbhuri anodikana kurangarirenyi paanoitisa kunamata ko mbhuri?

¹² Kudari muri musoro wo mbhuri, ngo zvapi zvamaizoita kuti kunamata ko mbhuri kudakajise vana venyu? Zvainga zvakadini kujija no vana venyu bhuku redu imbza rinoti Mungadakara Kwenda no Kwenda! Bhuku iri raizomubesera kuti muve no mabhuyo aushoni. Imwimwi munoda kuti vana venyu vamuvhunje mazwiro avo no zviri kuvanesa. Ngo kudaro, mucadoshandisa nguva iyi yo kunamata ko mbhuri kuti muvashore kana kuvapangira. Mucadonyangajwa vana venyu pavanonanga mavonero akasiyana no zvinojijiswa ngo Bhaibheri. Perapo vabongeserenyi maningi ngo kumuvhunja kwavaita mazwiro avo no kuvavangisa kuti nguva jese vaenderere mberi vecita kudaro. Mungakwanisa ushoni kubesera vana venyu pamunoziva zviyana zvavanorangarira.

13. Ngowapi mukana umweni ungashandiswa ngo vabari kuitira kubesera vana vavo kuti vakhwedere phedo na Jehovha?

¹³ Vabari, psakanyi mukana jakasiyana-siyana pa njiku kuti mubesere vana venyu kukwedera phedo na Jehovha. Mucadovetera basi njiku yamunojija navo Bhaibheri kuti muvajijise ngo pamusoro po Mwari wedu ano rudo. Vonanyi basi zvakanangwa ndi mai vamweni vanodanijwa Riza. Ivona vakati: “Itusu tinoshandisa zvakasikwa kuti tijijise vana vedu ngo pamusoro pa Jehovha. Inga muezaniso, imbwa yedu painonga yecitamba, vana vedu voseka, tinoshandisa zvondhozvo kuitira kuvajijisa kuti Musiki wedu, anodakara nokutizve anoda upenyu inga zvatinoita itusu.”

14. Ngenyi zvinosisira maningi kuno vabari kubesera vana vavo kuti vanase kusana shamwari? (Mazwi Akangwara 13:20)

¹⁴ Ndhungamiriro yo 4: Beseranyi vana venyu kuti vasane shamwari jaushoni. Soko ra Mwari rinonasa kujekesa kuti shamwari jedu jingakwanisa kutiita kuti tiite  zvaushoni kana kuita zvakashata. (Verenganyi Mazwi Akangwara 13:20.) Vabari, munoziva shamwari jo vana venyu? Munonasa kuvaziva no kumbopeja nguva na ivona? Zvicinyi zvamungaita kuti mubesere vana venyu kuti vave no shamwari jinoda Jehovha? (1 Vakorinte 15:33) Mungakwanisa kubesera vana venyu kuti vasane shamwari jaushoni ngo kukoka vamweni vano ushamwari hwakanaka na Jehovha kuti vaviye kumuzi kwenyu kotamba na imwimwi.—Nduyo 119:63.

15. Zvicinyi zvingaitwa ngo vabari kuti vabesere vana vavo kuti vave no shamwari jaushoni?

¹⁵ Vonanyi zvakanangwa ndi baba vamweni vanodanijwa Toni. Ivona no mukaji wavo vakananga kuti vakaita zvese zvavaikwanisa kuti vabesere vana vavo kuti vave no shamwari jaushoni. Ivona vakati: “Ko makore akawanda inini no mukaji wangu taikoka hama no hambzaji jo mupira wakasiyana no vanovha mu nyika jakasiyana-siyana kuti vaviye pa muzi pedu. Taiha navo, taiitazve na ivona kunamata ko mbhuri. Iyi yakava njira yakanakisisa yo kuziva vaya vanoda no kushandira Jehovha no mudakaro. Takavazve no makomborero o kuva no vavonereri vo ndharaundha, mamisiyonariyo no vamweni vaiviya kogara pa muzi pedu. Vana vedu vakajija zviro zvakawanda maningi kuvha pa zviro zvavainanga, kuvangisira kwavakhombija no kushanda ngo simba kovaiita mubasa ra Jehovha. Zvese izvi zvakabesera vana vedu kuti vakhwedere phedo na Jehovha.” Vabari, temanyi civaringo cokubesera vana venyu kuti vave no shamwari jaushoni.

16. Zvicinyi zvamaizoita kudari mwana wenyu akananga kuti aadi kushandira Jehovha?

¹⁶ Tingati kudini ngo kuvangisira kwese kwamuri kuita kuti mubesere vana venyu, asi umwe wavo wonanga kuti aadi kushandira Jehovha? Mucadoguma pambhejiso yo kuti inga mubari makaposa ciri cese. Jehovha wakapa tese kubatanijavo no vana venyu cipo cokujikhetera. Ngo kudaro, ivona vangasana kuti vanoda kushandira Jehovha kana kuti haiwa. Kudari mwana wenyu akasana kusiya Jehovha, mucadoperehwa ngo vetero ngokuti njiku iri yese iyena angazoviyazve. Ceukijanyi  muezaniso wo mwana mupanduki. (Ruka 15:11-19, 22-24) Mujaha uwu wakaita zviro zvizinji zvakashata, asi pakupejisira iyena wakaviya. Vamweni vangananga kuti “uwu muezanisovo hawo.” “Zvingaitikadi kamare mu upenyu?” Zvokadi kamare, izvi zvingaitika. Izvi ndizvona kamare zvakaitika no mujaha umweni anodanijwa Eriya.

17. Muezaniso wa Eriya unomuvangisa kudini?

¹⁷ Eriya wakananga kudari ngo pmusoro po vabari vake: “Ivona vakaita zvese zvavaikwanisa kuti vandijijise kuda Jehovha no Soko raka Bhaibheri. Pondainga no gumi na mashanu o makore o kubahwa, ndakatanga kupanduka.” Eriya wakatanga kuva no upenyu huviri no kuramba zvese zvaaijijiswa ngo vabari vake pikija no kuvangisira kovaiita kudivi ro kunamata. Pasure po kubuda pamuzi, iyena wakatanga kuva no mufambiro wakashata. Pikija zvakadaro, nguva jimweni waibhuya no shamwari jake ngo pamusoro po Bhaibheri. Eriya wakati: “Pondaibhuya maningi ngo zva Jehovha no shamwari yangu, ndaiengejera maningi kurangarira kwandaiita ngo pamusoro pake. Padoko ngo padoko, mbeu yo cokwadi yainga iri mu mwoyo mangu yakasimwa ngo vabari vangu, yakatanga kukura.” Pakufamba ko nguva Eriya wakahwirira mu cokwadi. * Amborangariranyi mudakaro wakava no vabari vake ngo kumujijisa ko vakaita kuvha aciri cimujaha kuti ade Jehovha.—2 Timoti 3:14, 15.

18. Munovona kudini ngo vabari vanoshanda ngo simba kuti vajijise vana vavo kuda Jehovha?

¹⁸ Vabari, makapuwa cipo cinosisira maningi cokurera vana venyu kuti vave vanamati va Jehovha. (Nduyo 78:4-6) Izvi azvizivi kureruka. Tinomusimba maningi ngo kushanda kwenyu ngo simba kuti mubesere vana venyu. Kudari mukaenderera mberi meciita zvese zvamunokwanisa kuti mubesere vana venyu kuti vade Jehovha no kuvajijisa kuti vamuzwire, mungava no cokwadi cokuti Baba wedu vano rudo vari kudenga vanozodakara maningi.—Vaefeso 6:4.