1. Bhaibheri rinosanangurisa kudini rudo hwokadi?

 RUDO wakadari inga “murazvu wo muriro, mpharipari ya Tenji Mwari. Kumwa yakawanda aizokwanisi kujima rudo, nokuti murambo kuhubumija.” b (Ndumbo jo rudo 8:6, 7) Magama aya anonasa kusanangura rudo hwokadi! Iwona anovangisa kamare vandhu vakarovorana: Imwimwi mungakwanisavo kuva no rudo ucikaperi.

2. Varovorani vanodikana kuitenyi kuti rudo hwavo utame kutondhora?

² Kudari varovorani vanodavo kuva no rudo ucikaperi vecipona vese, zvinofira kwavari. Inga muezaniso, muriro unogara wecibwaka ushoni kudari ukaenderera mberi wecikhwindijihwa. Kudari iwona ukatama kukhwindijihwa unojima. Mu njira yakaezana, rudo wo mukaji no mwamuna kuti uenderere mberi wakavanga, vanodikana kushanda vese vakabatana. Nguva jimweni, varovorani vangavona kuti rudo hwavo uri kutondhora, maningi-ningi kudari vano zvineso zvo mare, kuhwaja no manera ovangarera vana vavo. Kudari imwimwi makacadha, mungaitisa kudini kuti ‘murazvu ya Tenji Mwari’ irambe iripo mu mucadho wenyu? Mu cijijo cino, tinozojija njira ndhatu jinobesera kuti mucadho wenyu urambe wakavanga no kuva makadakara. c

3. Ushamwari hwakavanga na Jehovha ungabeseresa kudini varovorani kuti rudo hwavo urambe hwakavanga? (Mucumaeri 4:12) (Vonanyi foto.)

³ Kuti ‘murazvu ya Tenji Mwari’ irambe iripo, mwese munodikana kushanda ngo simba kuti muve no ushamwari hwakavanga na Jehovha. Waro, ushamwari uwu na Jehovha ungabeseresa kudini mucadho wenyu? Varovorani pavanovangisa ushamwari hwavo na Jehovha, ngo kukasika ivona vanoshandisa mazano ovanopuwa ndiyena, zvinozovabesera kuti vanyise zvineso zvinoita kuti rudo hwavo utondhore. (Verenganyi Mucumaeri 4:12.) Vandhu vakaivha kumujimu vanovangisira kuti vatevejere Jehovha no kusakurira mugariro jaanokhombija, jakadari inga kunaka mwoyo, kusengerera no kuregerera. (Vaefeso 4:32–5:1) Kudari varovorani vakakhombijirana izvi, zvinozovarerukira maningi kuti rudo hwavo huvange. Hambzaji imweni inodanijwa kuti Rena yakacadha ko makore anokwana kuita 25, yakananga kudari: “Zvakareruka maningi kuda no kureremeja mundhu wakaivha kumujimu.”

4. Ngenyi Jehovha wakasana Josefa na Mariya kuti vave vabari va Mesiya?

⁴ Vonanyi muezaniso uwu wo mu Bhaibheri. Jehovha paaida kusana varovorani vaizobara Mesiya, iyena wakasana Josefa na Mariya pakati po vandhu vakawanda vo mubarihwana hwa Dhavhidhi. Ngenyi? Ngokuti vovaviri vainga no ushamwari na Jehovha, cimwenizve Jehovha waiziva kuti ivona vaizovangisa mucadho wavo ngo ndava yo ushamwari hwovaingari nawo. Varovorani, ngozvapi zvamunojija kuvha ku muezaniso wa Josefa na Mariya?

5. Majimwamuna anojijenyi ngo muezaniso wa Josefa?

⁵ Josefa wakashandisa ndhungamiriro ja Jehovha, izvi ndizvona zvakamuita kuti ave mwamuna waushoni. Pa vhaza jinokwana kuita ndhatu, iyena wakaashira ndhungamiriro yaivha kuna Mwari pa zviro zvaadikana kuita no mbhuri yake. Pa vhaza jese, iyena waizwira zvaaivhunjwa, pikija kuti zvaireva kuita cinjo yakakura maningi. (Mateu 1:20, 24; 2:13-15, 19-21) Ecizwira ndhungamiriro ja Mwari, Josefa wakangwarira Mariya, kumubesera no kumupa zvaaida. Pacina kukana-kana, zvakaizwari ndi Josefa zvakaita kuti Mariya amude maningi no kumureremeja. Majimwamuna, munodikana kutevejera muezaniso wa Josefa ngo kupsaka ndhungamiriro jakacijikira mu Bhaibheri ngo pamusoro po kutaja mbhuri yenyu. d Pamunoshandisa ndhungamiriro iyi pikija zvecireva kuita cinjo yakakura, imwimwi munonga mecikhombijira kuti munoda mukaji wenyu no kuvangisa mucadho wenyu. Hambzaji imweni yo ku Vhanuatu yakacadha ko makore anokwana kuita 20, yakati: “Mwamunangu pavanopsaka no kushandisa ndhungamiriro ja Jehovha, ndinovareremeja maningi,  ndinojizwa ndakajiviririka no kuthemba zvivaringo zvavanotema.”

6. Vakaji vanojijenyi ngo muezaniso wa Mariya?

⁶ Mariya wainga no ushamwari na Jehovha, rutendo hwake aucaifira pa zvaiithwa ndi Josefa. Iyena wainasa kuziva Matahwa. (Ruka 1:46) Iyena wakapsaka mukuvo kuti arangarijisise. (Ruka 2:19, 51) Pacina kukana-kana, kuvangisira kwaiita kudivi ro kumujimu kwakamubesera kuti ave mukaji waushoni. Nyamasi uno, vakaji vazinji vari kuvangisira kuti vaite zvaiizwa ndi Mariya. Inga muezaniso, hambzaji imweni inodanijwa Emiko yakati: “Pondainga ndicito ndarovohwa, ndainga no urongwa hwangu wo kujija. Asi pondakapera kurovohwa, mwamunangu ndivona vaiita mukumbiro kuna itusu no kutungamirira pa kunamata ko mbhuri. Ngo kudaro, rutendo hwangu wakatanga kucijikira pa zviro zvovaiitari. Inini ndaidikana kuvangisa ushamwari hwangu na Jehovha ndega. Wari, ndinopsaka nguva yokugara na Jehovha ndeciita mukumbiro, ndeciverenga Bhaibheri no kurangarijisisa.” (Vagaratiya 6:5) Vakaji, pamunoenderera mberi mecivangisa ushamwari hwenyu na Jehovha, zvinozoita kuti mwamunenyu vamukuje no kumuda maningi.—Mazwi Akangwara 31:30.

7. Varovorani vangajijenyi ngo kunamata vari pamwepo kuvha ku muezaniso wa Josefa na Mariya?

⁷ Josefa na Mariya vakashanda pamwepo kuti varambe vano ushamwari hwakavanga na Jehovha. Ivona vakazwisisa kuti zvinosisira maningi kunamata Jehovha no vari pamwepo inga mbhuri. (Ruka 2:22-24, 41; 4:16) Zvaizonesa maningi kuti vazviite, maningi-ningi paya pokuti mbhuri yavo yainga yecikura, asi vakazvikwanisa. Uwu i muezaniso wakanaka maningi kuno varovorani nyamasi uno. Inga ndi Josefa na Mariya, kudari muno vana, cingava cineso kwenda kumusongano kana kutogaja nguva kuti muite jijo yo mbhuri. Zvinganesazve maningi kugaja nguva yo kujija no kuita mukumbiro no muri pamwepo inga varovorani. Asi ceukijanyi kuti kunamata Jehovha no muri pamwepo, zvinomuita kuti muve phedo kuno umwe no umweni. Ngo kudaro, kunamata kwenyu Jehovha ngakuve kokutanga mu upenyu hwenyu.

8. Varovorani vano zvineso mu mucadho wavo vangaitenyi kuti vanase kubesereka ngo kunamata ko mbhuri?

⁸ Ngozvapi zvamungaita kudari muno zvineso mu mucadho wenyu? Pa mugariro wakadari, mungatama kudakarira kunamata ko mbhuri. Kana zvakadaro, tanganyi ngo kubhuya zviro zvakafupika zvinodakarihwa ngo vandhu vese, zvinoita kuti mwese mutame kuvereketesana. Kuita zvese zvaperari kunangwa, zvingavangisa ushamwari hwenyu no kuvangisa cido cokuda kuita zviro zvokumujimu inga varovorani.

9. Ngenyi mukaji no mwamuna vanodikana kupeja nguva no vari vese?

⁹ Varovorani, imwimwi mungavangisazve rudo hwenyu ngo kupeja mukuvo no muri mwese. Pamunoita izvi zvinozomubesera kuti mukwanise kuziva zvinorangarihwa no zvinozwa mudoni wenyu. (Genesi 2:24) Vonanyi zvakaitika na hambzaji Ririyani na hama Rujhirani pasure pokupeja makore anokwana 15 no vakacadha. Hambzaji Ririyani vakati: “Takazwisisa kuti aticaizopeja mukuvo wakawanda no tiri tese inga zvotairangarira. Nguva yedu yaipera ngo basa rotaiita, basa ro pamuzi no kurera vana. Takazwisisa kuti kudari tikatama kupsaka nguva kuti tigare tese inga varovorani, zvaizoita kuti tigare ndhambo kuno umwe no umweni.”

10. Varovorani vangashandisa kudini ndhungamiriro inowanika pana Vaefeso 5:15, 16?

¹⁰ Mukaji no mwamuna vanodikana kuitenyi kuti vawane nguva yo kuva pamwepo?  Vanodikana kuita urongwa. (Verenganyi Vaefeso 5:15, 16.) Hama imweni inogara ku Nijheriya inodanijwa Uzondu yakati: “Pandinoita urongwa wo basa rangu, ndinobatanijavo nguva yandinoda kupeja no mukaji wangu tiri tese, nguva yandinosanari ndinoidira pakutanga.” (Vafiripi 1:10) Vonanyi muezaniso wa hambzaji Anastansiya, mukaji wo muvonereri wo ndharaundha wo ku Mordhavhiya, manera avanoshandisa nguva yavo. Ivona vakati: “Ndinoeja kuronga mabasa angu, mwamunangu pavanonga vakabatikana ngo mabasa avo. Ngo kudaro, tinozowana nguva yokuzova tiri pamwepo.” Waro ngozvapi zvamungaita kudari urongwa hwamuri kuita auripi kumubesera kuti mukwanise kuwana nguva yo kugara mwese?

11. Akira na Prisira vaiita mabasa api no vari vese?

¹¹ Mukaji no mwamuna nyamasi uno vangajijavo zvakawanda maningi ngo muezaniso wa Akira na Prisira, varovorani vaidakarihwa maningi ngo Makristu o muzana ro kutanga. (Varoma 16:3, 4) Pikija kuti Bhaibheri arinangi zvizinji zvaiitika mu mucadho wavo, irona rinonanga kuti ivona vaishanda, vaicumaera no kubesera vandhu vamweni no vari vese. (Mabasa o Vapostori 18:2, 3, 24-26) Zvokadi kamare, Bhaibheri mukuvo wese parinobhuya ngo pamusoro pa Akira na Prisira, rinovananga no vari vese.

12. Ngozvapi zvingaithwa ngo mukaji no mwamuna kuti vapeje nguva no vari vese? (Vonanyi foto.)

¹² Varovorani vangatevejeresa kudini muezaniso wa Akira na Prisira? Amborangariranyi ngo zviro zvizinji zvamungaita no wamakarovorana naye. Kunanga kuti maizoita mabasa amarangarirari muri mwese inga varovorani kusiyapo kumaita mwega? Inga muezaniso, Akira na Prisira vaicumaera vese. Imwimwi munoitavo urongwa hwakafanana? Akira na Prisira vaishandazve vese. Zvingaita kuti imwimwi no wamakarovorana naye amuiti mabasa ondhowo, asi kunanga kuti imwimwi maizokwanisa kuita mwese mabasa o pamuzi? (Mucumaeri 4:9) Pamunobesana kuti muite mabasa muri mwese, munojizwa makabatana no kuva no mukana wo kubhuisana. Hama Robherto na hambzaji Rinda, vaano makore anopindirija 50 no vakacadha. Hama Robherto vakati: “Kunasa kunanga itusu atiwani maningi mukuvo wo kubungaija tiri tese. Asi pandinonga ndecisuka paratu iyena eciomesa kana pandinonga ndecirima pa ruvanje iyena woviya kondibesa, ndinodakara maningi. Kuita zviro tiri pamwepo zvinoita kuti tibatane. Rudo hwedu hunoenderera mberi wecikura.”

13. Mukaji no mwamuna vanodikana kuitenyi kuti vave vakabatana kamare?

¹³ Ceukijanyi kuti, kupeja nguva no muri mwese azvikwani kuti muve vandhu vakabatana. Hambzaji imweni inogara ku Bhraziri, yakananga kudari: “Nyamasi uno ngo ndava yo zviro zvizinji zvingatiphingaija, tingatotanga kurangarira kuti tiri kupeja nguva tiri tese basi ngokuti tinogara mu nyumba yondhoyo. Ndakajijira kuti tinodikana kuita zvizinji  kusiyapo kupeja nguva tiri tese. Cimwenizve, ndinodikana kupa wandakarovorana naye zvese zvaanoda.” Vonanyi kuti hama Bhruno no mukaji wavo Taijhi, vanoitenyi kuti vakwanise kupa zvinodiwa ngo umweni pavanonga vari vese. Hama Bhruno vakati: “Mukuvo watinopeja tiri tese tinoviga foni jedu totanga ngo kudakajihwa ngo kuva tese.”

14. Kudari varovorani avadakariri kupeja nguva no vari vese, ngozvapi zvavangaita?

¹⁴ Ngozvapi zvamunodikana kuita kudari amudakariri kupeja nguva no wamakarovorana naye? Kangaije munoda kuita zviro zvakasiyana kana amunesi kunyangajisana. Waro ngozvapi zvamunodikana kuita? Amborangariranyi ngo muezaniso wo muriro wambonangwaya pakutanga. Iwona aubwaki ngo simba pa mukuvo ondhowo, unoda kukhwindijihwa padoko ngo padoko kuri kudira huni. Ngenyi amupeji nguva nganani muri mwese? Munodikana kuita zviro zvinoita kuti mudakare, kuciripi kuita zviro zvinoita kuti munesane. (Jakobo 3:18) Pamunotanga padoko ngo padoko munokwanisa kuita kuti rudo hwenyu hukure.

15. Ngenyi nderemejo inosisira maningi kuti varovorani varambe vecidisana?

¹⁵ Kureremejana kunosisira maningi mu mucadho. Nderemejo yakadari inga okisijheniyo. Iyona inotendera kuti muriro ubwake ngo simba. Pacina okisijheniyo muriro unojima. Mukufananavo, pacina nderemejo, rudo uno mukaji no mwamuna ungatanga kutondhora ngo kukasika. Ngo divi rimweni, mukaji no mwanamuna vanovangisira kuitira kukhombijirana nderemejo vanonga vecishanda pamwepo kuti rudo hwavo urambe hwecikura. Cinosisira asipi kuti dangani muri kukhombija nderemejo, asi ngo cokuti wamakarovorana naye ari kujizwa kuti ari kureremejwa kana kuti haiwa. Hama Peni na hambzaji Areti, vakacadha ko makore anokwana kuita 25. Hambzaji Areti vakananga kudari: “Itusu tinoreremejana pa muzi pedu. Tinojizwa takasujunuka kunanga mazwiro edu no mavonero edu ngokuti tinoreremejana.” Waro ngozvapi zvamungaita kuitira kubesera wamakarovorana naye kuti ajizwe ecireremejwa? Vonanyi muezaniso wa Abhirahama na Sara.

16. Majimwamuna anojijenyi kuvha ku muezaniso wa Abhirahama? (1 Pedhru 3:7) (Vonanyi foto.)

¹⁶ Abhirahama waitaja Sara ngo nderemejo. Iyena waireremeja mazwiro no mavonero a Sara. Pa vhaza imweni, Sara wakanyangajwa maningi wonanga zvese zvaaizwari kuna Abhirahama no kutomupazve ndava. Kunanga kuti Abhirahama wakashaisha kumudavira? Haiwa. Iyena waiziva kuti Sara wainga mukaji anozwira no anobesera. Abhirahama wakamupurukira no kueja kumubesera. (Genesi 16:5, 6) Ngozvapi zvatinojija? Majimwamuna, imwimwi muno mutoro wo kutema zvivaringo ku mbhuri yenyu. (1 Vakorinte 11:3) Ngo kudaro, manera aushoni o kukhombijira rudo, ngo o kuzwa mavonero o mukaji wenyu  mucito matema civaringo, maningi-ningi kudari civaringoco caizomupsasa. (1 Vakorinte 13:4, 5) Pa mukuvo umweni, mukaji wenyu angajizwa aciripi ushoni no kuda kunanga manera aari kujizwa. Imwimwi munoreremeja mazwiro ake pamunonga mecimupurukira? (Verenganyi 1 Pedhru 3:7.) Hambzaji Anjhera no mwamuna wavo Dhimitri, vakacadha ko makore anokhwedera 30. Ivona vanosanangura manera mwamunavo vanoreremeja mazwiro avo, povakati: “Mwamunangu nguva jese wakanasiririka kuti andipurukire pandinonga ndakanyangajwa kana pandinonga ndecida kunanga mazwiro angu. Iyena anosengerera na inini, pandinonga ndicizivi kunasa kugajana.”

17. Vakaji vangajijenyi kuvha ku muezaniso wa Sara? (1 Pedhru 3:5, 6)

¹⁷ Sara waireremeja maningi Abhirahama no kubesera zvivaringo zvake. (Genesi 12:5) Pa vhaza imweni, Abhirahama waida kuashira varendo vakaguma ngo civhumbu. Iyena wakakumbira Sara kuti aregere basa raaita kuti aende konasirira pau jakawanda. (Genesi 18:6) Sara wakaita izvi ngo kukasika no kubesera civaringo ca Abhirahama. Vakaji, mungatevejera muezaniso wa Sara ngo kubesera zvivaringo zvo mwamuna wenyu. Pamunoita izvi, munonga mecivangisa mucadho wenyu. (Verenganyi 1 Pedhru 3:5, 6.) Hama Dhimitri, vanangwaya pa ndima yapera, vanosanangura zvinoithwa ngo mukaji wavo kuti vajizwe vecireremejwa. Ivona vakati: “Ndinobongesera kuvangisira kwa Anjhera ngo kundibesera pa zvivaringo zvandinotema, pikija zvinonga zvakasiyana no zvake. Kudari zvikatama kubuda ngo manera otaivetera, iyena aandishori.” Zvakareruka maningi kuda wiya anokureremeja.

18. Varovorani vanobesereka kudini kudari vakashanda ngo simba kuti vavangise rudo hwavo?

¹⁸ Nyamasi uno, Sathana ari kuda kupeja rudo uno vandhu vakacadha. Iyena anoziva kuti kudari rudo hwavo ukapera, vanozotanga kusiya ushamwari hwavo na Jehovha. Asi rudo hwokadi, narini ahuzoperi. Ngo kudaro, rudo mu mucadho wenyu ngaudari inga wakatahwa mu bhuku ro Ndumbo jo Rudo. Ivanyi makasunga kudira Jehovha pa ndau yokutanga mu mucadho wenyu, mopsaka nguva yo kuva pamwepo, moreremejana ngocenyu no kutaja zvinodiwa zvo umweni. Mukaita kudaro, mucadho wenyu unozokuja Cinyuke co rudo hwokadi-kadi, Jehovha. Cimwenizve, kudari inga muriro unobwaka ushoni ngo kukhwindijihwa, rudo hwenyu hunozoenderera mberi hwecivanga mbhera narini.