1-2. Tecibhuya ngo pamusoro po mukumbiro, muvhunjo japi jatingajiita?

 MAKAMBOJIVHUNJISA kuti Jehovha ari kudavira mukumbiro jenyu? Kudari makamboita izvi, amuripi mwega. Hama no hambzaji jakawanda, jakavonesavo mazwiro aya maningi-ningi pojainga jecisongana no mugariro unonesa. Kudari tiri kutambujika tinganesehwa maningi kuvona kuti Jehovha ari kudavira mukumbiro jedu kana kuti haiwa.

² Tinozovona kuti ngenyi tingava no cokwadi cokuti Jehovha anozodavira mukumbiro jo vanamati vake. (1 Johani 5:15) Perapo tinozodavira muvhunjo iji: Ngenyi nguva jimweni zvinovoneka inga kuti Jehovha aaripi kudavira mukumbiro jedu? Jehovha ari kudavirisa kudini mukumbiro jedu nyamasi uno?

3. Ngenyi Jehovha anoda kuti tiite mukumbiro kwaari?

³ Bhaibheri rinotigondesa kuti Jehovha anotida maningi nokuti tinosisira kwaari. (Agayo 2:7; 1 Johani 4:10) Ngo iyo ndava anotikoka kuti tikumbire besero rake ngo kuita mukumbiro. (1 Pedhru 5:6, 7) Iyena anoda kutibesera kuti tigare phedo naye no kutibeserazve kuti tihwisane no zvineso zvatiri kusongana nazvo.

4. Tinozvizivisa kudini kuti Jehovha anodavira mukumbiro jo vanamati vake? (Vonanyi foto.)

⁴ Mu Bhaibheri, kazinji tinoverenga kuti Jehovha wakadavira mukumbiro jo vanamati vake. Munokwanisa kurangarira muezaniso umwe? Tingati kudini ngo muezaniso wa Mambo Dhavhidhi? Iyena wakahwisana no vavengi vakashata maningi mu upenyu hwake, kazinji wakaita mukumbiro ecikumbira besero ra Jehovha. Pa vhaza imweni, iyena wakaita mukumbiro eciti: “Tenji Mwari, izwanyi munamato wangu, purutananyi kupota kwangu, ngo ndava yo ugondeki hwenyu ndidavirenyi, ngo ururami  hwenyu!” (Nduyo 143:1) Jehovha wakadavira mukumbiro wakaithwari ndi Dhavhidhi. (1 Samueli 19:10, 18-20; 2 Samueli 5:17-25) Dhavhidhi wakakwanisa kunanga no kuthemba kwese kuti Jehovha, “ari phedo po vese vanomudanija.” Itusu tingavavo no kuthemba kondhoko.—Nduyo 145:18.

5. Kureva kuti vanamati va Jehovha vo mu nguva yo kare vakadavihwa mukumbiro javo ngo manera ovaivetera? Ipanyi muezaniso. (Vonanyi foto.)

⁵ Zvingaita kuti Jehovha aadaviri mukumbiro jedu mu njira yataivetera. Izvi ndizvona zvakaitika no mupostori Pauro. Iyena wakakumbira kuti Mwari amuvhise “muzwa mu muviri.” Pauro wakatoita mukumbiro ko vhaza ndhatu ngo pamusoro po shwiro iyi. Waro Jehovha wakadavira mukumbiro iji? Hina, asi wakadavira mu njira yainga icikavetehwi ndi mupostori Pauro. Kusiyapo kuvhisa cinesoco, Jehovha wakamupa simba raaida kuti akwanise kwenderera mberi ecimushandira akagondeka.—2 Vakorinte 12:7-10.

6. Nguva jimweni, ngenyi zvingavoneka kuti Jehovha aaripi kudavira mukumbiro jedu?

⁶ Itusuvo nguva jimweni tingaashira mupinguro wakasiyana no wataivetera. Tingava no cokwadi cokuti Jehovha anoziva ushoni manera okutibesera. Iyena anokwanisa kuita “zvinopinda zviro zvese zvatinokumbira kana zvatinorangarira, mukuzwirana no simba rake riri kushanda mwatiri.” (Vaefeso 3:20) Ngo iyo ndava, mupinguro jo muvhunjo jedu jingaviya pa nguva kana ngo manera atainga ticikaveteri.

7. Ngenyi tinodikana kucinja zvatinokumbira pa mukumbiro jedu? Ipanyi muezaniso.

⁷ Nguva jimweni tingatodikana kucinja zvatinokumbira patinonasa kuzwisisa zvinoda Jehovha. Vonanyi muezaniso wa hama Martin Poetzinger. No papera mukuvo mushoma no vacadha, hama Martin Poetzinger vakasungwa voenda kogara ku ndau yaidihwa vasungwi ku Nazista. Pakutanga, ivona vakakumbira kuti Jehovha avabesere kuti ivona vabude mu ndau yaigararo vasungwi, kuti vaende kotaja mukaji wavo no kuenderera mberi veciita basa ro kucumaera. Asi nopapera sumana mbiri, apana caivonesa kuti Jehovha wainga ecivabesera kuti vasujunuhwe. Ngo kudaro, vakatanga kudeketera kuna Jehovha veciti: “Jehovha ndapota, ndikhombijenyi zvandinodikana kuita.” Kuvhira pondhopo vakatanga kurangarira ngo zvainga zvecisongana no hama jimweni jakasungwa. Hama zinji jainga jecineseka ngo pamusoro po vakaji vavo no vana. Hama Martin Poetzinger, vakaenderera mberi vecikumbira kudari: “Jehovha,  ndabonga ngo basa iri ibza. Ndibeserenyi kuti ndikwanise kuvangisa no kuembezera hama jangu.” Makore mafumbhamwe avakapeja vakafungihwa ivona vaiita izvi kamare.

8. Ngozvapi zvatinodikana kurangarira patinoita mukumbiro?

⁸ Tinodikana kuceukija kuti Jehovha ano zviro zvaanodikana kukwanirisa pa nguva yaakagaja. Zviro izvi zvinobatanija kupeja mukuperera zviro zvese zvinoita kuti vandhu vatambujike nyamasi uno, zvakadari inga ngozi jinoitika jega, ndhwaji no rufu. Jehovha anozokwanirisa kuda kwake ecishandisa Umambo hwake. (Dhanyeri 2:44; Apokaripsi 21:3, 4) Asi mbhera ugume mukuvo uwu, Jehovha aciri kutendera kuti Sathana atonge nyika ino. b (Johani 12:31; Apokaripsi 12:9) Kudari Jehovha akaeja kupeja zvineso zviri kusonganari no vandhu nyamasi uno, zvaizodari inga kuti utongi wa Sathana uri kubudirira mbhera pakati kuti. Pikija tecivetera kuti Jehovha akwanirise zvigondiso zvimweni, izvi azvirevi kuti iyena anozosiya kutibesera. Ngatende tivone njira nganani jinoshandisa Jehovha kuti atibesere.

9. Jehovha angatibeseresa kudini patinoda kutema civaringo? Ipanyi muezaniso.

⁹ Iyena anotipa uzivi. Jehovha anogondesa kutipa uzivi hwatinoda kuti tikwanise kutema zvivaringo zvaushoni. Tinodikana kuva no uzivi hwo umwari kuti tikwanise kutema zvivaringo zvinopsasa upenyu hwedu hwese, zvakadari inga kucadha kana kutama kucadha. (Jakobo 1:5) Vonanyi muezaniso wa hambzaji imweni icizivi kurovohwa inodanwa Mariya. c Ivona vainga vakadakara vecishanda inga piyona wo nguva jese pavakazivana no hama imweni. Ivona vakati: “Ushamwari hwedu powaivanga, taijizwa tiri phedo umwe no umweni. Ndaizviziva kuti ndaidikana kutema civaringo cinosisira. Ngo kudaro, ndakaita mukumbiro ko nguva yakareba ndecibhuya ngo pamusoro po shwiroyo. Inini ndaida ndhungamiriro ya Jehovha, asi ndaizivazve kuti Jehovha aacaizonditemera civaringo.” Iyona yakavona kuti Jehovha wakadavira mukumbiro jayo. Kuitisa kudini? Yakanasa kupsakisisa mu mabhuku edu, yowana musoro jakaibesera kamare ngo shwiro yoyaipsakari. Yakanasazve kuzwira mazano oyakavhunjwa ndi mai wayo. Mazano aya akabesera hambzaji Mariya kuti vanase kusotesesa mazwiro ovaingari nawo. Pakupejisira iyona yakazonasa kutema civaringo caushoni.

10. Mukuzwirana no Vafiripi 4:13, Jehovha anozoitenyi kuti abesere vanamati vake? Ipanyi muezaniso. (Vonanyi foto.)

¹⁰ Iyena anotipa simba kuti tikwanise kucungirira. Inga zvaakaita na mupostori Pauro, Jehovha anotipa simba ratinoda kuti  tikwanise kucungirira zvineso zvedu. (Verenganyi Vafiripi 4:13.) Rangariranyi manera Jehovha wakabesera hama imweni inodanwa Bhenjamini kuti icungirire pa zvineso zvimweni zvoyaisongana nazvo. Poyainga iri mujaha iyona no mbhuri yayo yakapeja mukuvo muzinji iri kundau inogara vatizi vo hondo ku Afrika. Hama Bhenjamini vakati: “Ndakaita mukumbiro kuna Jehovha, ndecikumbira kuti andipe simba ro kuita zvinomudakajisa. Jehovha wakadavira mukumbiro jangu ngo kundiita kuti ndive wakathiva no kuva no cicunge co kuenderera mberi ndecicumaera no kundipa mabhuku aizondibesera kuti ndienderere mberi ndakavanga ku divi ro umwari.” Ivona vakaengejera veciti: “Kuverenga ngo zviitiko zvo Zvapupu zvimweni zva Jehovha no kujija manera avakabesehwa ndi Jehovha kuti vaenderere mberi vakagondeka, zvakavangisa cido cangu co kuenderera mberi ndakagondeka kwaari.”

11-12. Jehovha angashandisa kudini mbhuri yedu yo kumujimu kuti adavire mukumbiro jedu? (Vonanyi foto.)

¹¹ Iyena anoshandisa mbhuri yedu yo kumujimu. Pa usiku acito apira upenyu hwake, Jesu wakaita mukumbiro ngo mwoyo wese. Iyena wakadeketerera Jehovha kuti amubesere atame kuvoniwa inga mundhu waituka Mwari. Kusiyapo kuita zvondhozvo, Jehovha wakabesera Jesu ngo kutumira ngirozi kuti iyende komuvangisa. (Ruka 22:42, 43) Jehovha anozotibeseravo ecishandisa hama kuti jitifonere kana kutivhakacira kuti jitivangise. Tese tingapsaka mukana wo kubhuya “izwi rakanaka” kuno vanamati doni vedu.—Mazwi Akangwara 12:25.

¹² Vonanyi muezaniso umweni wa hambzaji Miriami. No papera sumana nganani mwamuma wavo no vafa, hambzaji Miriami vainga vari vega, zvoita kuti vajizwe vakasuruvara. Ivona vaicema vacikanyarari no kuda kubhuya no ari wese. Ivona vakati: “Andicainga no simba ro kudanija ari wese, ngo kudaro, ndakaita mukumbiro kuna Jehovha. Pandainga ndecicema no kuita mukumbiro, ndakafonehwa. Wainga mukuru wo ungano yangu waifonari.” Hambzaji Miriami vakaembezehwa maningi ngo mukuru wiya no mukaji wake. Ivona vaikhohwa kamare kuti Jehovha ndiyena waingaro akaita kuti hama iyi ivafonere.

13. Nanganyi muezaniso unovonesa kuti Jehovha angashandisa vandhu vacikamunamati kuti adavire mukumbiro jedu.

 ¹³ Iyena angashandisa vandhu vacikamunamati. (Mazwi Akangwara 21:1) Nguva jimweni, Jehovha angadavira mukumbiro jedu ngo kushandisa vandhu vacikamunamati kuti vabesere vandhu vake. Inga muezaniso, iyena wakashandisa Mambo Atarsheshe kuti akwanise kudavira zvakakumbihwa ndi Neemiya zvokuhwirira ku Jerusarema kuti akwanise kubesera pa kuvakisa dhorobha. (Neemia 2:3-6) Nyamasi uno, Jehovha angashandisavo vandhu vacikamunamati kuti vabesere vashandiri vake.

14. Ngozvapi zvamadakarira pazvakaitikari na hambzaji Soo Hing? (Vonanyi foto.)

¹⁴ Hambzaji imweni inodanwa Soo Hing yakavona kuti Jehovha wakaibesera ecishandisa medhiko wayo. Mwana wayo anoneseka maningi ngo ndhendha zinji jo mumusoro. Iyena paakaita asidhenti, ivona no mwamuna wavo vakasiya basa ravo kuti vaende komukorondha. Inga muviyo, vakava no cineso co mare. Hambzaji Soo Hing vakagumira pakunanga kuti avacaikwanisazve kucungirira zvineso zvese zvaiitikari. Ivona vakaita mukumbiro kuna Jehovha kuti akwanise kuvabesera. Medhiko wavo wakapsaka manera okubesera ivona no mbhuri yavo. Ngo ndava yazvo, vakagumira pa kuashira besero ro utongi kuti vawane ndau yaushoni yokugara. Pasure pazvo, hambzaji Soo Hing vakananga kudari: “Takavona Jehovha ecitibesera kamare. Pacina kukana-kana iyena ndi ‘muzwi wo munamato.’”—Nduyo 65:3.

15. Zvicinyi zvakabesera hambzaji imweni kuti ivone kuti Jehovha wainga ecidavira mukumbiro jayo?

¹⁵ Kazinji mukumbiro jedu ajidavihwi mu njira inoshamaisa. Asi mupinguro jatinoashira ndijona kamare jatinoda kuti tikwanise kwenderera mberi takagondeka kuna Baba wedu vo kudenga. Ngo kudaro, sotesesanyi manera Jehovha anodavira mukumbiro jenyu. Hambzaji imweni inodanwa Yoko, yaivona inga kuti Jehovha aaripi kudavira mukumbiro jayo, ngo kudaro yakatanga kuita rista yo zviro zvese zvoyakakumbira Jehovha. No papera mukuvo wakati kuti, yakaenda kosota rista yoyakaitaya yovona kuti Jehovha wainga wadavira mukumbiro muzinji jo yainga yakaita no jimweni joyainga yakanganwa. Nguva no nguva,  tinodikana kuima torangarira manera Jehovha ari kudavira mukumbiro jedu.—Nduyo 66:19, 20.

16. Tecibhuya ngo mukumbiro, tingakhombijisa kudini rutendo? (Vahebheru 11:6)

¹⁶ Tinokhombija kuti tino rutendo kuciripi basi ngo kuita mukumbiro kuna Jehovha, asi ngo kutendera mupinguro jaanotipa azvinenyi kuti ijona jinoviya ngo njira yapi. (Verenganyi Vahebheru 11:6.) Vonanyi muezaniso wa hama Mike no mukaji wavo Krisi. Ivona vaida maningi kushandira pa Bheteri. Hama Mike vakati: “Inga varovorani itusu takaita mukumbiro ko vhaza jakawanda ngo pamusoro pazvo, asi atizivi kumbokokwa kwenda ku Bheteri.” Hama Mike no mukaji wavo vakaenderera mberi vecithemba kuti Jehovha waiziva manera aaizovashandisa pa basa rake. Ivona vakaenderera mberi veciita zvese zvovaikwanisa, vecishanda inga mapiyona wo nguva jese kunodiwa maningi vacumaeri no kubesera basa ro kuvaka. Nyamasi uno ivona vari kuita basa ro kuvhakacira ungano. Hama Mike vakati: “Asipi nguva jese Jehovha wakadavira mukumbiro jedu ngo njira yotaivetera, asi iyena wakajidavira mu njira yakatonakisisa kupinda zvotairangarira.”

17-18. Mukuzwirana na Nduyo 86:6, 7, ngozvapi zvatingathemba?

¹⁷ Verenganyi Nduyo 86:6, 7. Mutari wo nduyo Dhavhidhi wainga no cokwadi cokuti Jehovha waizwa mukumiro jake no kujidavira. Imwimwi mungavavo no kuthemba kondhoko. Muezaniso jabhuiwa mu cijijo cino jinotibesera kuzwisisa kuti Jehovha angatipa uzivi no simba ratinoda kuti tikwanise kucungirira. Iyena angashandisa mbhuri yedu yo kumujimu no vandhu vacikamunamati kuti vakwanise kutibesera ngo njira jakasiyana.

¹⁸ Pikija teciziva kuti Jehovha aadaviri mukumbiro jedu nguva jese mu njira yotaivetera, tinozviziva kuti iyena anozotidavira. Anozotipa zvatinoda pa nguva kwayo kamare. Ngo kudaro, endereranyi mberi meciita mukumbiro, mecithemba kuti Jehovha anozomupa zvamunoda wari ‘no kuzogutisa zvese bzinorarama’ mu nyika imbza iri kuviyari.—Nduyo 145:16.