1. Jehovha anokoka vanamati vake kuti vaitenyi? (Vonanyi foto.)

 TINGAKUMBIRA ani paya patinoda ndhungamiriro no vangiso? Tinoziva mupinguro wo muvhunjo uwu. Tingakumbira Jehovha ngo kuita mukumbiro kwaari. Iyena anotikoka kuti tiite zvondhozvo. Bhaibheri rinonanga kuti itanyi “mukumbiro mukuvo wese.” (1 Vatesaronika 5:17) Izvi zvinokhombija kuti tinodikana kugara teciita mukumbiro. Tingakhwedera phedo kwaari no takasujunuka ngo kuita mukumbiro no kupsaka ndhungamiriro jake mu zvese zvatinoda kuita mu upenyu hwedu. (Mazwi Akangwara 3:5, 6) Zvecivoneka kuti Jehovha ndi Mwari anokova maningi, iyena anotivhunja kuti tiite mukumbiro ko vhaza jese jatinoda.

2. Tinozovonenyi mu cijijo cino?

² Tinobongesera maningi Jehovha ngo kutitendera kuti tiite mukumbiro kwaari. Ngo kudaro, pa zvese zvatinoda kuita, tinodikana kupsaka mukuvo kuti tiitevo mukumbiro. Cimwenizve, tingatovona kuti tinodikana kuitisa nane manera o kuita mukumbiro jedu. Zvinodakajisa ngo zvokuti itusu tingakwanisa kuwana vangiso no ndhungamiriro mu Matahwa. Mucijijo cino, tinozovona kuti tingawana mukuvo wo kuita mukumbiro tecirangarijisisa ngo muezaniso wa Jesu. Perapo, tinozobhuisana kuti tingaitisa kudini nane mukumbiro jedu ngo kubatanija zviro zvishanu zvinosisira maningi.

3. Jesu wakazwisisenyi ngo pamusoro po mukumbiro?

³ Jesu waizwisisa kuti mukumbiro jedu jinosisira maningi kuna Jehovha. Acito aviya pasi pano, iyena wakavona Baba wake vecidavira mukumbiro jo vanarume no vanakaji vakagondeka. Inga muezaniso, Jesu wainga pamwepo na Baba wake pavakadavira mukumbiro jakaithwa ndi Ana, Dhavhidhi, Eriya  no vamweni. (1 Samueli 1:10, 11, 20; 1 Majimambo 19:4-6; Nduyo 32:5) Izvi ndizvona zvakaitisa kuti Jesu ajijise vajiji vake kuti vaite mukumbiro mukuvo wese vecithemba kuti jaizodavihwa.—Mateu 7:7-11.

4. Tinojijenyi ngo mukumbiro jakaithwa ndi Jesu?

⁴ Jesu wakagaja muezaniso waushoni kuno vajiji vake kuvha kumukumbiro jaiita kuna Jehovha. Paiita mushando wake, Jesu wakaita mukumbiro ko vhaza jakawanda. Waidikana kupsaka mukuvo wo kuita mukumbiro ngokuti wainga no mabasa akawanda no kutendenejwa ngo vandhu vazinji. (Marko 6:31, 45, 46) Iyena waimuka fumi comangwanani kuti apsake nguva yo kuita mukumbiro no ari ega. (Marko 1:35) Pa vhaza imweni, wakapeja usiku hwese eciita mukumbiro acito atema civaringo cinosisira. (Ruka 6:12, 13) Cimwenizve, Jesu wakaita mukumbiro kuphinda no kuphinda pa usiku acito afa paainga ecivangisira kuti akwanirise divi rinonesa maningi ro basa raakaviya koita pasi pano.—Mateu 26:39, 42, 44.

5. Tingatevejeresa kudini muezaniso wa Jesu patinonga teciita mukumbiro?

⁵ Muezaniso wa Jesu unotijijisa kuti azvinenyi kuti takabatikana kudini, tinodikana kupsaka nguva kuti tiite mukumbiro. Inga ndi Jesu, tinodikana kupsaka nguva yo kuita mukumbiro, kangaije tingatodikana kumuka sedho comangwanani kana kuvata usiku kamare. Tikaita kudaro, tinokhombija kuna Jehovha kuti tinoreremeja cipo ici cinosisira. Hambzaji imweni inodanwa Rina, inoceukija manera yakadakara maningi payakajija pa vhaza yo kutanga ngo pamusoro po cipo ici co kuita mukumbiro. Iyona yakati: “Pondakaziva kuti ndingabhuya na Jehovha pa mukuvo uri wese, zvakandibesera kuti ndimuvone inga shamwari yo phedo no kuda kuitisa nane mukumbiro jangu.” Pacina kukana-kana, vazinji vedu vanojizwavo kudaro. Ngo kudaro, tinoda kubhuya ngo zviro zvishanu zvinosisira zvatingabatanija pa mukumbiro jedu.

6. Mukuzwirana na Apokaripsi 4:10, 11, Jehovha anofanera kuashirenyi?

⁶ Kukuja Jehovha. Mu civoniso caakava naco, mupostori Johani wakavona vakuru vanokwana kuita 24 kudenga vecinamata Jehovha. Ivona vaikuja Mwari veciziva kuti iyena waifanera “kureremejwa, kukujwa no  kuva no simba.” (Verenganyi Apokaripsi 4:10, 11.) Ngirozi jakagondeka jino mathangwe akawanda anojiita kuti jide kureremeja no kukuja Jehovha. Ijona jiri kudenga na iyena ngo kudaro jinonasa kumuziva. Ijona jinokwanisa kuvona mugariro jake jaushoni kuvha pa zviya zvaanoita. Pajinovona manera Jehovha anoita zviro, jinogumira pa kumukuja.—Jobe 38:4-7.

7. Tingakuja Jehovha ngo pamusoro penyi?

⁷ Itusu tinodavo kukuja Jehovha mu mukumbiro jedu, tecikhombija kuti tinomuda no kumureremeja. Pamunonga meciverenga no kujija Bhaibheri, ejanyi kuvona mugariro ja Jehovha jamunodakarira maningi. (Jobe 37:23; Varoma 11:33) Perapo vhunjanyi Jehovha manera munojizwa ngo pamusoro po mugariro jondhojo. Cimwenizve, tingakuja Jehovha ngo manera aanotibesera no manera aanobesera mbhuri yedu yo kumujimu. Iyena nguva jese aripo kuti atibesere no kutijivirira.—1 Samueli 1:27; 2:1, 2.

8. Ngoapi mathangwe manganani anotiita kuti tibongesere Jehovha? (1 Vatesaronika 5:18)

⁸ Bonganyi Jehovha. Tino mathangwe akawanda maningi anotiita kuti tibongesere Jehovha patinonga teciita mukumbiro. (Verenganyi 1 Vatesaronika 5:18.) Tingamubongazve ngo zviro zvese zvakanaka zvatinazvo, ngokuti cipo cese cakanaka cinovha kwaari. (Jakobo 1:17) Inga muezaniso, tingabongesera ngo kuseja kwakaita nyika yedu no zviro zvakasikwa zvinoshamaisa. Tingabongeserazve ngo upenyu hwedu, mbhuri yedu, shamwari jedu no vetero yedu. Tingabongeserazve Jehovha ngo kutitendera kuti tive shamwari jake.

9. Ngenyi tinodikana kuenderera mberi tecibonga Jehovha?

⁹ Kangaije tingatodikana kuvangisira kuti tikwanise kurangarira mathangwe atinawo pacedu kuti tibongesere Jehovha. Tiri kupona mu nyika ino vandhu vacikabongi. Vandhu vazinji mu nyika ino vari kubatikana maningi pa zviya zvavanoda, kusiyapo kubongesera ngo zviya zvavanazvo. Kudari tikatevejera mugariro uwu, mukumbiro jedu jinozodari inga rista yo zvatinoda kukumbira basi. Kuti izvi zvitame kuitika, tinodikana kuenderera mberi tecibongesera ngo zvese zvatinoitihwa ndi Jehovha.—Ruka 6:45.

10. Kuva mundhu anobongesera kwakabesera kudini hambzaji imweni kuti ikwanise kucungirira? (Vonanyi foto.)

¹⁰ Kuva vandhu vanobongesera kungatibesera kuti tikwanise kucungirira pa mukuvo wo zvineso. Vonanyi muezaniso wa hambzaji Kyung-sook, unowanika mu Murindiri wa 15 wa janeiro wo 2015. Ivona vakavoniwa kuti vano kanseri yo mumazazo kana mumaphapo. Ivona vakati: “Izvi zvakandisuruvarisa maningi. Ndakavona kuti ndainga ndaruza zvese, ndainga ndecithya maningi.” Zvicinyi zvakavabesera kuti vakwanise kuhwisana no ndhendha iyi? Ivona vakananga kuti usiku hwese vacito vaenda kovata, vaigara pa vharanda ro nyumba yavo veciita mukumbiro  ngo izwi guru vecibongesera ngo zviro zvishanu zvavainga vaitihwa ndi Jehovha pa njiku yondhoyo. Izvi zvakaita kuti ivona vagare vakagajana no kuvaita kuti vakhombije rudo hwavo kuna Jehovha. Ivona vakavona kuti Jehovha anobesera kudini vashandiri vake vakagondeka pavanosongana no zvineso, vakazozwisisa kuti tino makomborero akawanda maningi mu upenyu hwedu kupinda zvineso. Inga ndi hambzaji Kyung-sook, itusu tino mathangwe akawanda kuti tibongesere Jehovha pikija tecisongana no zvineso. Kukhombija kubongesera kwedu Jehovha ngo pamusoro po kuita mukumbiro, kunotibesera kuti tikwanise kucungirira no kuva vandhu vakaezanana.

11. Jesu paakahwirira kudenga, ngenyi vajiji vake vaida cicunge?

¹¹ Kumbiranyi Jehovha cicunge kuti mukwanise kucumaera. Mukuvo mushoma acito ahwirira kudenga, Jesu wakaceukija vajiji vake ngo pamusoro po basa ravo ro kuita ucapupu ngo pamusoro pake “mu Jerusarema, mu Judheya mwese no mu Samariya, mbhera ku ndau jiri ndhambo jo pasi pano.” (Mabasa o Vapostori 1:8; Ruka 24:46-48) No papera mukuvo mushoma vatungamiriri vo Cijudha, vakasunga mupostori Pedhru na Johani vovatora kwenda navo ku Sinedhriyo, vovavhunja kuti vaime kuita basa ravo ro kucumaera no kuvashupha. (Mabasa o Vapostori 4:18, 21) Waro Pedhru na Johani vakaitenyi?

12. Mukuzwirana no Mabasa o Vapostori 4:29, 31, vajiji vakaitenyi?

¹² Pedhru na Johani vakadavira kudari kuno vatungamiriri vo ciyara vo Cijudha: “Kudari mecirangarira kuti zvakanaka pamberi pa Mwari, kuzwira imwimwi kuciripi iyena Mwari, izvo ngozvenyu. Asi itusu atikwanisi kuregera kuvereketa zviro zvatakavona no zvatakazwa.” (Mabasa o Vapostori 4:19, 20) Pedhru na Johani pavakasujunuhwa, ivona vakaita mukumbiro kuna Jehovha ngo izwi guru vecida kuita kuda kwake. Ivona vakati: ‘Itanyi kuti varanda venyu vaenderere mberi vecibhuya soko renyu ngo kucunga kwese.’ Jehovha wakadavira mukumbiro uwu wakaithwari ngo mwoyo wese.—Verenganyi Mabasa o Vapostori 4:29, 31.

13. Ngozvapi zvatinojija ngo muezaniso wa hama Jin-hyuk?

¹³ Tingatevejera muezaniso wo vajiji kudari utongi ukatirambisa kucumaera. Vonanyi muezaniso wa hama Jin-hyuk, avo vakasungwa ngo ndava yo kuva kwavo vacina kovakapeyamira. Pavainga mukadheya, ivona vakagajwa kuti vabesere vasungwi vamweni, asi ivona vaitendehwa kubhuya navo ngo zviro zvavaida basi, avacitendehwa kubhuya navo ngo pamusoro po Bhaibheri. Ivona vakakumbira cicunge kuti vakwanise kucumaera pa mukana jese javaizova najo. (Mabasa o Vapostori 5:29) Ivona vakati: “Jehovha wakadavira mukumbiro jangu ngo kundipa cicunge no uzivi kuti nditangise jijo jo Bhaibheri jo museswa mushanu ndakaima pa musuvo wo kadheya. Perapo, cousiku ndaitara karata kuti ndizopekeje vasungwi vamweni pa njiku yaitevera.” Inga ndi hama Jin-hyuk, tingaitavo mukumbiro tecikumbira cicunge no uzivi, tecithemba kuti Jehovha anozotibesera kuti tikwanirise basa redu ro kucumaera.

14. Ngozvapi zvinozotibesera kudari tiri kusongana no zvineso? (Nduyo 37:3, 5)

¹⁴ Kumbiranyi besero ra Jehovha kuti mukwanise kuhwisana no zvineso. Vazinji vedu tiri kuhwisana no ndhendha, kufihwa ngo vadiwa vedu, zvineso pa mbhuri, kuteverehwa no zvimwenivo. Zviro zvakadari  inga mutungu no hondo, zvakaita kuti tinesehwe kucungirira pa zvineso izvi. Vhunjanyi Jehovha zvamuri kuzwaro. Muvhunjenyi zvamuri kusongana nazvo inga manera amaizovhunja shamwari yenyu yo phedo. Ivanyi no cokwadi cokuti Jehovha ‘anozomubesera.’—Verenganyi Nduyo 37:3, 5.

15. Mukumbiro ungatibeseresa kudini kuti “ticungirire mu matambujiko”? Ipanyi muezaniso.

¹⁵ Kuita mukumbiro “mukuvo wese” kunozotibesera kuti tikwanise kucungirira patinotambujika. (Varoma 12:12) Jehovha anoziva zviri kusongana no vanamati vake, iyena “anozwa kukhuwa kwavo.” (Nduyo 145:18, 19) Hambzaji imweni inoshanda inga piyona ino makore anokwana kuita 29 inodanijwa kuti Kristina, yakavona kuti izvi ngo zvokadi. Ngo civhumbu ivona vakatanga kuva no zvineso zvikuru zvo uhomi. Inga muviyo, ivona vakatanga kugara vakasuruvara. No papera mukuvo mushoma, ivona vakaziva kuti mai vakona vainga no ndhendha yaizoita kuti ivona vafe. Hambzaji Kristina vakananga kudari: “Ndakaita mukumbiro kuna Jehovha ndicikarembi, ndecikumbira kuti andipe simba ro kucungirira njiku imwe nga imwe. Ndakaeja kubatikana mu zviro zvo umwari, ngo kwenda kumusongano mukuvo wese no kuita jijo yo mundhu ega.” Ivona vakaengejera veciti: “Mukumbiro wakandibesera kuti ndikwanise kucungirira mukuvo wokunesa. Ndaiziva kuti Jehovha waingepo mukuvo wese kuti andibesere, kuziva izvi kwakanditondhoja maningi. Pikija kuti zvineso zvangu zvo uhomi azvizivi kupera ciripo-ripoco, Jehovha wakadavira mukumbiro jangu no kundipa runyararo hwo mukati.” Narini atidikani kukanganwa kuti Jehovha anokwanisa “kuvhisa vatendi vake mu zviejo.”—2 Pedhru 2:9.

16. Ngenyi tinoda besero ra Jehovha kuti tikwanise kucungirira muejo?

¹⁶ Kumbiranyi besero ra Jehovha kuti mukwanise kucungirira pa muejo. Inga vandhu vacizivi kukwana, tinodikana kuhwisana no muejo wokuda kuita zviro zvakashata.  Sathana ari kueja kuita zvese zvaanokwanisa kuti izvi zvitame kukwanisika. Njira imwe yaanoshandisa kuti akwanise kusvipisa murangariro wedu ngo yo mabungaijo akashata. Mabungaijo akadari, angazaja murangariro wedu ngo ngo zviro zvicikazivi kunaka, zvotiita kuti titame kuva no runyararo hwo mukati totogumira pa kuita zvishaishi zvikuru.—Marko 7:21-23; Jakobo 1:14, 15.

17. Patinopera kuita mukumbiro tecikumbira besero, ngozvapi zvatinodikana kuita? (Vonanyi foto.)

¹⁷ Tinoda besero ra Jehovha kudari tikada kunyisa muejo wo kuita zvakashata. Pa mukumbiro wokuezanisira, Jesu wakabatanija magama aya: “Mucatisiya teciwira mu muejo, asi tiponesenyi mu nyara jo wakashata.” (Mateu 6:13) Jehovha anoda kutibesera, asi kuti atibesere tinodikana kumukumbira. Tinodikanazve kuita mukuzwirana no mukumbiro jedu. Tinodikana kutiza mugariro jinotiita kuti tide kuita zvakashata, zvinoithwa ngo nyika ino ya Sathana. (Nduyo 97:10) Tingazaja murangariro wedu ngo zviro zvaushoni ngo kuverenga no kujija Bhaibheri. Kwenda kumusongano no kuita basa ro kucumaera kunobeserazve kuti titame kuzaja murangariro wedu ngo zviro zvakashata. Inga muviyo, Jehovha anogondesa kuti aazotisiyi kuti tiejwe mbhera paticikakwanisi kucungirira.—1 Vakorinte 10:12, 13.

18. Tecibhuya ngo pamusoro po mukumbiro, ngozvapi zvinodikana kuithwa nga umwe na umwe wedu?

¹⁸ Umwe nga umwe wedu tinodikana kuita mukumbiro kuti tienderere mberi takagondeka kuna Jehovha mu njiku jino jokupejisira jinonesari. Psakanyi nguva pa njiku yokuita mukumbiro ngo mwoyo wese. (Nduyo 62:9) Kujanyi Jehovha no kumubonga ngo zvese zvaanomuitira. Mukumbirenyi kuti amubesere kuti muve no cicunge mu basa ro kucumaera. Deketeranyi kuti amubesere kuhwisana no cineso ciri cese camuri kusongana naco no kucinyisa. Mucatendera kuti ciricese nee ari wese amuite kuti mutame kuita mukumbiro kuna Jehovha mukuvo wese. Waro, Jehovha anodavirisa kudini mukumbiro jedu? Tinozodavira muvhunjo uwu unosisira mu cijijo cinotevera.