1. Mukuzwirana na Mateu 24:9, ngenyi atidikani kukahamara nyika painotinyenya?

JEHOVHA wakatisika kuti tide no kudiwa ngo vamweni. Ngo kudaro, mundhu paanotinyenya, itusu tinohwajihwa kamare i nguva jimweni tinogumira pakutothya. Inga muezaniso, hambzaji imweni inodanwa Jhorjhina inogara Europa, yakati: “Pandainga no gumi na marongomuna o makore, mai wangu vakatanga kundinyenya ngo kushandira Jehovha. Ndakanyangajwa maningi i ndojizwa ndiri ndoga. Izvo zvakandiita kuti nditange kurangarira kuti andicainga mundhu waushoni.” * Hama imweni inodanwa Dhaniro yakatara kudari: “Masoca paakanditaka no kundituka ngo kuva kwangu Capupu ja Jehovha, ndakamuka kunyowejeka kamare.” Patinotajwa ngo njira iyi ngo vamweni, azvitikahamaji ngokuti Jesu wakananga kuti itusu taizonyenyiwa.—Verenganyi Mateu 24:9.

2-3. Ngenyi vateveri va Jesu vanonyenywa?

² Nyika inonyenya vateveri va Jesu. Ngenyi? Ngokuti kudari inga ndi Jesu itusu “atiripi vo nyika yo pasi.” (Johani 15:17-19) Ngo kudaro, patinoreremeja utongi hwo vandhu itusu atiunamati nee atitonamativo zviro zvinovaimirira. Ngokuti itusu tinoda kunamata Jehovha basi. Itusu tinobesera citendehwa ca Mwari co kutonga vandhu vese, asi Sathana no “jinja” rake, vanoramba kuti Mwari ndiyena anocitendehwa condhoco. (Genesi 3:1-5, 15) Itusu tinocumaera kuti Umambo hwa Mwari ndiwona unozopeja zvineso zvo vandhu, i Umambo wondhohwo unozoparaja umambo hwese unohwisana nahwo. (Danieli 2:44; Apokalipsi 19:19-21) Masoko awo, anonga akanaka kuna vaya vanonga vakanaka asi anonga akashata kuno vakashata.—Nduyo 37:10, 11.

 ³ Itusu tinonyenywazve ngo ndava yokuti tinoshandisa ndhungamiriro jakarungama ja Mwari. Zviro zvinonanga Mwari kuti zvakanaka kana zvakashata, zvakasiyana kamare no zvinonangwa ngo vandhu kuti zvakanaka kana zvakashata. Inga muezaniso, vandhu vazinji nyamasi uno, vano murangariro wakaposeka ngo pamusoro po zvovatano inga zvakaitisaya kuti Mwari aparaje vandhu vo Sodhoma no Gomora! (Juda 1:7) Zvecivoneka kuti itusu tinozwira ndhungamiriro iji jo Bhaibheri jinorambisa zviito izvi, vazinji vanotishora no kutituka!—1 Pedru 4:3, 4.

4. Mugariro japi jinotivangisa patinonga tecinyenywa?

⁴ Zvicinyi zvingatibesera kucungirira, vandhu pavanotinyenya no kutituka? Tinodikana kuva no rutendo wakavanga kuna Jehovha kuti anokwanisa kuzotibesera. Inga muvhiko, rutendo hwedu ungakwanisa “kujima ndiwona mupaxa yese yakabwaka ya Sathana.” (VaEfeso 6:16) Asi kuva no rutendo azvikwani. Tinodikana kuva no rudo. Ngenyi? Ngokuti rudo “ahuceneki.” Iwona unoregerera no kucungirira zviro zvese. (1 VaKorinto 13:4-7, 13) Wari ngatende tivone kuti kuda Jehovha, vatinonamata navo no vavengi vedu, kunotibeseresa kudini kuti tikwanise kucungirira patinonyenywa.

5. Jesu wakakwanisa kuitenyi ngo kuda kwake Babake?

⁵ Pa usiku acito auraiwa ngo vavengi vake, Jesu wakavhunja vateveri vake kudari: “Inini ndinodisa Baba no kuita bzo ndakatumwa ndi Baba.” (Johani 14:31) Zvecivoneka kuti Jesu waida Jehovha, iyena wakakwanisa kucungirira zvineso zvakasiyana-siyana zvaakasongana nazvo. Kudari itusu tikada Jehovha, tinozoitavo zvakafanana.

6. Mukuzwirana no VaRoma 5:3-5, vashandiri va Jehovha vanozwa kudini nyika painovanyenya?

⁶ Kuda Mwari, kazinji kunokwanisa kubesera vashandiri va Jehovha kuti vakwanise kucungirira pavanonga veciteverehwa. Inga muezaniso, vapostori pavakavhunjwa ngo utongi hwo Cijudha kuti avacaidikanazve kucumaera, rudo hwavo kuna Mwari wakavaita kuti vazwire “Mwari kupinda vandhu.” (Maitiro o Vapostori 5:29; 1 Johani 5:3) Rudo hwakavanga kudari kuna Mwari, uri kubeseravo hama jedu nyamasi uno jiri kuteverehwa, kuti jikwanise kuramba jakagondeka. Nyika painotinyenya, itusu atisuruvari asi tinodakara.—Maitiro o Vapostori 5:41; verenganyi VaRoma 5:3-5.

7. Zvicinyi zvatinodikana kuita ukama hwedu paunotiteverera?

⁷ Zvingatinesa maningi kucungirira patinoteverehwa ngo vopaukama hwedu. Patinotanga kujija ngo pamusoro pa Jehovha, vamweni vo paukama hwedu vangatotanga kurangarira kuti tiri kucengejwa. Vamweni vangatorangarira kuti itusu tiri kutopenga kamare. (Ezanisanyi na Marco 3:21.) Izvo zvingaita kuti ivona vatange kutinyenya. Asi kuteverehwa uku akudikani kutikahamaja. Ngenyi? Jesu wakati: “Vakorore vo mundhu vanozova vo mbhuri yake.” (Mateu 10:36) Zvokadi kamare, pikija ukama hwedu ukatitaja mu njira yakashata, itusu ativavoni inga vavengi vedu. Mukusiyana, patinoengejera kuda kwedu Jehovha, kuda kwedu vandhu kunoengejekavo. (Mateu 22:38, 39) Asi itusu atisii kuzwira mutemo no ndhungamiriro jo mu Bhaibheri ngo kuda basi kudakajisa vandhu.

8-9. Zvicinyi zvakabesera hambzaji Jhorjhina kuti varambe vakavanga pikija veciteverehwa?

⁸ Hambzaji Jhorjhina vanangwaya pakutanga, vakakwanisa kuenderera mberi vakavanga pikija pavaiteverehwa ndi mai wavo. Ivona vakati: “Inini na mai wangu, takatanga  kujija Bhaibheri no Zvapupu. Asi no papera mweji mutandhatu, pondaida kutanga kwenda kumusongano, mai wangu vakatanga kunditeverera. I ndakazovona kuti ivona vaibhuya no vapanduki, perapo vaishandisa zvaivereketwaro ndivona kuti vabhuye na inini. Cimwenizve, ivona vaiindituka, vaikweva vhuji rangu, i vaikhandira kunja mabhuku angu. Pandakaita gumi ro makore na makore mashanu, ndakabhabhatijwa. Mai wangu vakaeja kuita zviri zvese kuti ndisiye kushandira Jehovha, voenda kondidira pa nyumba yaigahwa ngo vasikane basi, vamweni vavo vaishandisa mutombo jinodhakwisa no kuita zvimweni zvakashata. Kuteverehwa, kunonesa maningi kucungirira kudari kwecivha ku mundhu anotida no kutikorondha.”

⁹ Zvicinyi zvakabesera hambzaji Jhorjhina kuti vacungirire? Ivona vakati: “Njiku yondakatanga kuteverehwa ndi mai wangu, ndainga ndapeja kuverenga Bhaibheri rese. Ndainga ndino gwinyiso kamare kuti ndawana cokwadi, indaijizwa kuti ndainga phedo na Jehovha. Ndaiita mukumbiro vhaza jakawanda kuna Jehovha, iyena waindizwa. Pondainga ndecigara pa nyumba yondakaendaya koodihwa, hambzaji imweni yakandikoka kuti ndiyende kumuzi kwayo tojija Bhaibheri tese. Pa mukuvo wondhowo, ndakavangiswa maningi ngo hama no hambzaji ku Nyumba yo Umambo. Ivona vakandiita kuti ndive divi kamare yo mbhuri yavo. Ndakakwanisa kuvona kamare kuti Jehovha anosimba maningi kupinda vavengi vedu, azvinenyi kuti ndiyani.”

10. Tingava no cokwadi cokuti Jehovha anozoitenyi nguva jese?

¹⁰ Mupostori Pauro wakatara kuti apana cingakwanisa “kutiparajanisa ku rudo hwa Mwari, mwa Kristu Jesu Tenji wedu.” (VaRoma 8:38, 39) Pikija tikatambujika pa mukuvo wakati kuti, Jehovha nguva jese ari kudivi redu kuti ativangise. Inga zvatavona pa muezaniso wa hambzaji Jhorjhina, Jehovha angatibesera ecishandisa hama no hambzaji jedu jo mu ungano.

11. Rudo wakanangwa ndi Jesu pana Johani 15:12, 13, wakabeseresa kudini vajiji vake? Ipanyi muezaniso.

¹¹ Pa usiku acito afa, Jesu wakavhunja vajiji vake kuti vadisane ngocavo. (Verenganyi Johani 15:12, 13.) Iyena waizviziva kuti rudo hwake hwokujiramba, hwaizovabesera kuti varambe vakabatana no kucungirira povaizonyenywa  ngo nyika. Vonanyi muezaniso wakaitika mu ungano yo Tesaronika. Ungano iyi poyakaumbwa, ivona vainga veciteverehwa. Hama no hambzaji jo ungano iyi, jakava muezaniso wakanaka wo kucungirira no kukhombija rudo. (1 VaTesalònika 1:3, 6, 7) Pauro wakavavangisa kuti ‘vaenderere mberi’ vecikhombija rudo inga zvovaiita. (1 VaTesalònika 4:9, 10) Rudo waizovaita kuti ivona vakwanise kuvangisa vaya vakarembejeka. (1 VaTesalònika 5:14) Ivona vakatevera mbhangiro ya Pauro inowanika pa karata yake yoshipiri yaakatara makore akatevera, paakati: “Rudo hwo munodisana ndihwona huri kureba momuri mwese.” (2 VaTesalònika 1:3-5) Rudo hwavo, hwakavabesera kuti vacungirire povaishaisha kutajwa no kuteverehwa.

12. Pa nguva yo hondo, hama no hambzaji jo nyika imweni jakakhombijisa kudini kuti jaidisana ngocavo?

¹² Vonanyi muezaniso wa hama Dhaniro no mukaji wavo vanangwaya pakutanga. Pa nguva yokuti ku dhorobha ravaigara kwainga kweciitika hondo, ivona vakaenderera mberi vaciyenda kumusongano, veciita zvese zvavaikwanisa kuti vacumaere no kupekeja hama no hambzaji zvokuha zvavainga nazvo. Njiku imweni hama Dhaniro vakagumihwa ngo masoca pamuzi pavo. Ivona vakati: “Masoca iya akandivhunja kuti ndisiye kuva Capupu. Pondakaramba ivona vakanditaka, vondithyisijira ngo kurija nvuti. Vacito vapinda, ivona vakaeja kujipa mukaji wangu. Ngo kukasika, hama jakatitora joenda kotidira ku dhorobha rimweni. Narini andikanganwi rudo wakava no hama iji. Potakaguma ku dhorobha iri, hama jo kondhoyo jakatipekeja zvokuha no kutibesera kuwana basa. Inga muviyo pa kufamba ko nguva itusu takakwanisa kubeseravo Zvapupu zvimweni zvakatiza hondo.” Muezaniso wakadari inga uwu, unokhombija kuti rudo hwo Makristu doni ungatibesera kuti tikwanise kucungirira patinonyenywa.

13. Mujimu mucena unotibeseresa kudini kuti ticungirire patinonga tecishandira Jehovha pikija patinonyenywa?

¹³ Jesu wakavhunja vajiji vake kuti vade vavengi vavo. (Mateu 5:44, 45) Kunanga kuti izvi zvakareruka here? Haiwa! Tinozvikwanisa basi ngo kubesehwa ngo mujimu mucena wa Mwari. Mucero wo mujimu mucena wa Mwari unobatanija rudo, kusengerera, kunaka mwoyo, unyasha no kujibata. (VaGalàsia 5:22, 23) Mugariro iji, jinokwanisa kutibesera  kuti ticungirire patinonyenywa. Vandhu vazinji vakasiya kutiteverera ngokuti mwamuna, mukaji, vana kana wocigarisano wakakhombija mugariro iji. I vazinji vavo vakatoguma pakuva hama no hambzaji jedu. Ngo kudaro, pamunovona kuti zvinonesa kuda vaya vanomunyenya ngo kushandira kwenyu Jehovha, kumbiranyi mujimu mucena. (Luka 11:13) Cimwenizve, ivanyi no cokwadi cokuti kuzwira Mwari nguva jese i ciro caushoni camungaita.—Mazwi Akangwara 3:5-7.

14-15. VaRoma 12:17-21, yakabeseresa kudini hambzaji Ajhimini kuti vakhombije kuti vanoda mwamunavo pikija ecivateverera?

¹⁴ Vonanyi muezaniso wa hambzaji Ajhimini vanogara ku Medhiyo Oriente. Ivona pavakava Capupu ca Jehovha, mwamunavo vakarangarira kuti ivona vacengejwa, i vakaeja kuvaita kuti vasiye kushandira Mwari. Iyena wakavatuka no kuvhunja ukama, mutungamiriri wo ciara pomwe no muroi kuti vamuitire ciri cese cakashata no kumupumbha kuti iyena wainga ecipwanya mbhuri yake. Mwamunevo atee vakatotuka hama, musongano pawainga weciitwa! Kazinji hambzaji Ajhimini vairira ngo kutajwa mu njira iyi yakashata.

¹⁵ Pa Nyumba yo Umambo hambzaji Ajhimini vaivangiswa no kuembejehwa ngo hama no hambzaji. Vakuru vakavavhunja kuti vashandise magama anowanika pana VaRoma 12:17-21. (Verenganyi.) Hambzaji Ajhimini vakati: “Izvo zvainesa. Asi ndakakumbira Jehovha kuti andibesere, indakaita zvese zvandaikwanisa kuti ndishandise zvainangwa ngo Bhaibheri. Ngo kudaro, mwamunangu pavaisvipisa kuzinya inini ndaipukuta, pavaindituka, ndaivataja ngo njira yokunaka mwoyo. I pavaihwaja, inini ndaivakhorondha.”

16-17. Tinojijenyi ngo muezaniso wa hambzaji Ajhimini?

¹⁶ Hambzaji Ajhimini vakakomborehwa ngo kukhombija rudo kuno mwamunavo. Ivona vakati: “Mwamunangu vakatanga kundithemba ngokuti vaizviziva kuti nguva jese ndaizobhuya zvokadi. Iyena wakatanga kundireremeja potaibhuya tese ngo pamusoro po zvokunamata, i takatanga kuva no runyararo pamuzi. Wari aacandirambisi kwenda kumusongano. Wari inini no mwamunangu taanoushamwari waushoni i pamuzi pedu paanorunyararo. Ndinovetera kuti mwamunangu vatendere cokwadi kuti tishandire tese Jehovha.”

¹⁷ Muezaniso wa hambzaji Ajhimini unokhombija kuti rudo, “hunokungurira bzese, . . . hunovetera bzese, hunovangirira ku bzese.” (1 VaKorinto 13:4, 7) Kunyenywa kunohwaja, asi  rudo unosimba maningi. Kudari tikada vamweni, ivona vangacinja manera avo okurangarira ngo pamusoro pedu i ngo pamusoro pa Jehovha, votoima kamare kutiteverera. Izvi zvinoita kuti Jehovha adakare maningi. Asi pikija vavengi vedu vakaenderera mberi vacitinyenya, itusu tingava no mudakaro. Kuitisa kudini?

18. Ngenyi tingadakara patinonga teciteverehwa?

¹⁸ Jesu wakati: “Muno mucena kudari vandhu vakazomunyenya.” (Luka 6:22) Asipi itusu tinosana kuti vandhu vatinyenye. Itusu atidakari vandhu pavanotiteverera ngo ndava yo rutendo hwedu. Waro, ngenyi tingananga kuti tingadakara patinoteverehwa? Vonanyi mathangwe matatu. Rokutanga, patinocungirira tinotendehwa ndi Mwari. (1 Pedru 4:13, 14) Rocipiri, rutendo hwedu unoguma pakusisira maningi wovanga. (1 Pedru 1:7) Rocitatu, tinozoashira mupfupo wedu unoshamaisa, upenyu ucikaperi.—VaRoma 2:6, 7.

19. Ngenyi vapostori vainga vakadakara pasure po kutakwa?

¹⁹ Jesu naapera kumuswa, vapostori vakasongana no zviro zvakananga Jesu kuti zvaizoitika. Pavakapera kutakwa no kuvhunjwa kuti avacaidikana kucumaira, ivona vainga vakadakara. Ngenyi? “Ngokuti vainga vakanakira kutambujwa ngo njio yo zina ra Jesu.” (Maitiro o Vapostori 5:40-42) Ivona vaida maningi Mambo wavo kupinda kuthya kunyenyiwa ngo vavengi vavo. Ivona vakakhombija rudo hwavo ngo kucumaera masoko akanaka ‘vacikazorori.’ Uzinji wo hama jedu nyamasi uno, vari kuenderera mberi vecishandira Jehovha vakagondeka pikija no zvineso zvavari kusongana nazvo. Ivona vanoziva kuti Jehovha aazokanganwi basa ravakaita no rudo hwovakakhombija ku zina rake.—Vaheberi 6:10.

20. Zvicinyi zvatinozovona pa musoro unotevera?

²⁰ Mugumo wo nyika iyi paunonga wecikhwedera, nyika inozoenderera mberi yecitinyenya. (Johani 15:19) Asi itusu atidikani kuthya. Inga zvatinozovona pa musoro unotevera, Jehovha ‘anozotivangisa no kutingwarira’ inga vagondeki vake. (2 VaTesalònika 3:3) Ngo kudaro, ngatienderere mberi tecida Jehovha, hama no hamzaji jedu pomwe no vavengi vedu. Patinotevera mbhangiro iyi, tinozoenderera mberi takabatana, i rutendo hwedu unozovanga tokuja Jehovha no kukhombija kuti rudo unosimba maningi kupinda kunyenywa.