1-2. Mundhu paanopera kubhabhatijwa, ngoapi makomborero aanozoashira?

 ZVINODAKAJISA maningi kubhabhatijwa no kuita divi ro mbhuri ya Jehovha. Vaya vakaita izvi vogumira pakuva no ushamwari hwakavanga na Jehovha vanotenderana no magama a Dhavhidhi uwo wakati: “Unomucena wiya wo munosana no kukhwedeja, kuti agare mu maberere enyu.”—Nduyo 65:5.

² Jehovha anonasa kungwarira acito asana mundhu kuti aite divi ro mbhuri yake. Inga zvatavona mu cijijo caperaya, iyena anokwevera basi vandhu vaya vanoda kuva no ushamwari hwophedo naye. (Jakobo 4:8) Pamunopira upenyu hwenyu kuna Jehovha no kubhabhatijwa, munoguma pakuva no ushamwari unosisira maningi naye. Ivanyi no cokwadi cokuti, mukapera kubhabhatijwa Jehovha ‘anozomudururira makomborero mbhera mutame cinomucotera.’—Marakiya 3:10; Jeremia 17:​7, 8.

3. Ngowapi mutoro uno Mukristu wese wakajipira no kubhabhatijwa? (Mucumaeri 5:​4, 5)

³ Ndizvona kuti kubhabhatijwa ndi matangiro basi. Imwimwi munodikana kuita zvese zvamunokwanisa kuti mukwanirise zvamakagondesa pikija pamunosongana no muejo. (Verenganyi Mucumaeri 5:​4, 5.) Inga mujiji wa Jesu, imwimwi munodikana kuita zvese zvamunokwanisa kuti mutevejere muezaniso wake. (Mateu 28:​19, 20; 1 Pedhru 2:21) Jijo iyi inozomubesera kuti muite izvi.

‘ENDERERANYI MBERI MECITEVERA’ JESU PIKIJA NO ZVINESO

4. Mu njira yapi vateveri va Jesu vanodikana ‘kuthwara mutanda wokutambujikira’? (Ruka 9:23)

⁴ Mucadorangarira kuti pamunopera kubhabhatijwa amuzosonganizve no zvineso mu upenyu hwenyu. Jesu wakanasa kujekesa  kuti vajiji vake vaizodikana ‘kuthwara mutanda wokutambujikira.’ Ivona vaizodikana kuita izvi “njiku no njiku.” (Verenganyi Ruka 9:23.) Izvi zvaida kureva kuti vajiji va Jesu vaizotambujika njiku jese here? Haiwa andizvopi. Iyena waida kujekesa kuti kusiyapo basi kuashira makomborero, vateveri vake vaizosonganavo no zvineso. Zvimwe zvo zvineso zvondhozvo zvaizonesa maningi.—2 Timoti 3:12.

5. Jesu wakagondesa kupa makomborero api ku vaya vanosiya zvese kuti vamutevere?

⁵ Zvingaita kuti imwimwi makamboteverehwa ngo umwe wo paukama hwenyu kana makatosiya zvimweni zvokunyika kuti mudire Umambo hwa Mwari pakutanga. (Mateu 6:33) Pamugariro wakadari, ivanyi no cokwadi cokuti Jehovha anoziva zvese zvamakaita. (Vahebheru 6:10) Kangaije munotenderana no magama a Jesu okuti: “Wese wiya wakasiya nyumba, hama no hambzaji kana mai na baba, vana kana maminda ngo ndava yo zina rangu no masoko akanaka, anozowana mu mukuvo uno, nyumba, hama, hambzaji, mai, vana no maminda zvinodarika zana kupinda zvaainga nazvo, pamwepo no kuteverehwa. Wozowana upenyu hucikaperi pa nguva inozari.” (Marko 10:​29, 30) Pacina kukana-kana, makomborero amakaashira akawanda maningi kupinda zviro zvamakasiya sure.—Nduyo 37:4.

6. Pamunopera kubhabhatijwa, ngenyi munodikana kuenderera mberi mecihwisana no “zvido zvo muviri”?

⁶ Pakupera kubhabhatijwa imwimwi munodikana kuenderera mberi mecihwisana no “zvido zvo muviri.” (1 Johani 2:16) Kunasa kunanga imwimwi muri mubarihwana ucikazivi kukwana wa Adhamu. Nguva jimweni mazwiro enyu angatovavo akaezana no akava no mupostori Pauro. Iyena wakatara kudari: “Inini ndinodakarira mutemo wa Mwari mukuzwirana no zvadinoda mu mwoyo mwangu, asi ndinovona mutemo umweni mu muviri wangu wecihwisana no mutemo wo murangariro wangu, wondiitisa muranda ku mutemo wo cishaishi uri mu muviri wangu.” (Varoma 7:​22, 23) Nguva jimweni imwimwi mungatosuruvara ngo ndava yokutama kukwana kwenyu. Asi kuceukija cigondiso camakaitira Jehovha pamakajipira kwaari, zvinozomupa simba rokunyisa muejo uri wese. Kunasa kunanga, paya pamunohwisana no muejo, mbhiko yenyu yamakaita kuna Jehovha inozomubesera. Kuitisa kudini?

7. Kuitisa kudini kujipira kwamakaita kuna Jehovha kungamubesera kuti muenderere mberi makagondeka kwaari?

⁷ Pamunojipira kuna Jehovha munonga mecijiramba pacenyu. Izvi zvinoreva kuti munozoramba kuita ciri cese cinonyangajisa Jehovha. (Mateu 16:24) Ngo iyo ndava, pamusongana no zvineso amudikani kupeja nguva yakawanda mecipsaka kuziva kuti ngozvapi zvamunodikana kuita. Ngokuti imwimwi munozviziva kuti munodikana kuenderera mberi makagondeka kuna Jehovha. Munozotema civaringo cokudakajisa Jehovha. Pamugariro wakadari munozodikana kuita inga ndi Jobe, pikija waisongana no zvineso zvakashatisisa maningi, iyena wakati: “Andizosiyi kugondeka kwangu.”—Jobe 27:5.

8. Kurangarijisisa ngo mukumbiro wenyu wokujipira kungamubesera kudini kuti munyise muejo?

⁸ Kurangarira ngo mukumbiro wamakaitira Jehovha pamainga mecijipira kwaari kunozomupa simba kuti mucijikire muejo uri wese. Inga muezaniso, imwimwi maizovonesa kuti munoda mundhu kuveni iyena wakacadha? Haiwa. Imwimwi makagondesa Jehovha kuti amucaizoita zviro zvakadaro. Kudari mukatama kutendera kuti murangariro jakashata jinghwine mu mwoyo menyu, imwimwi amuzodikani kuwana basa rokuzojivhisa pakufamba ko nguva. Ngokuita izvi munonga ‘mecifunduruka’ mu ‘gwanja rakashata.’—Mazwi Akangwara 4:​14, 15.

9. Kurangarijisisa ngo mukumbiro wenyu wokujipira kungamubeseresavo kudini kuti mudire zviro zvoumwari pakutanga?

⁹ Waro kudari mukawana basa raizomuita kuti mutame kuenda kumusongano mukuvo wese, ngozvapi zvamaizoita? Imwimwi munozviziva kamare zvamunodikana kuita. Ngokuti mucito  mawana basa rondhoro mainga matema civaringo cokuti amucaizotendera kuti ciri cese cimuphingaije kutama kwenda kumusongano. Amuzotenderi basa iri mecirangarira kuti munozopsaka manera okunamata ndiwona Jehovha. Kurangarira ngo muezaniso wa Jesu kungatibesera maningi pamugariro uwu. Ngokuti iyena wakatema civaringo cokuita zvese zvaaikwanisa kuti adakajise Baba wake, itusu tatemavo civaringo cokuitavo zvondhozvo.—Mateu 4:10; Johani 8:29.

10. Jehovha anozomubeseresa kudini kuti ‘muenderere mberi mecitevera’ Jesu pasure pokubhabhatijwa?

¹⁰ Kunasa kunanga, zvineso zvamuri kusongana nazvo zvinovonesa kuti munoda ‘kwenderera mberi mecitevera’ Jesu. Mungava no cokwadi cokuti Jehovha anozomubesera kuti muite izvi. Bhaibheri rinoti: “Mwari wakagondeka, iyena aazotenderi kuti muejwe mbhera pamucikakwanisi kucungirira. Iyena anozomubesera kuti mukwanise kucungirira muejo iji.”—1 Vakorinte 10:13.

MUNGAITISA KUDINI KUTI MUENDERERE MBERI MECITEVERA JESU?

11. Ngoyapi njira imwe ingamubesera kuti muenderere mberi mecitevera Jesu? (Vonanyi foto.)

¹¹ Jesu wakashandira Jehovha ngo mwoyo wese no kuita mukumbiro kwaari mukuvo wese. (Ruka 6:12) Kudari munoda kuenderera mberi mecitevera Jesu pasure pokubhabhatijwa, zvaushoni maningi kuita zviro zvinoita kuti muve no ushamwari hwo phedo na Jehovha. Bhaibheri rinoti: “Azvinenyi no makurire ataita, ngatirambe tecifamba mu gwanja rondhoro.” (Vafiripi 3:16) Pakufamba ko nguva munozozwa ngo pamusoro po zviitiko zvo hama no hambzaji jakaengejera kushandira kwajo Jehovha. Kangaije ivona vakatokurusari cikora co Vavhangeri vo Umambo kana kutoenda ku ndau inodiwa maningi vacumaeri. Kudari mugariro wenyu wecitendera, mungatogajavo zvido zvakadari inga izvi. Vandhu va Jehovha vanopsaka manera okuita zvizinji mu basa rokucumaera. (Mabasa o Vapostori  16:9) Asi kudari mugariro wenyu aumutenderi kuita izvi keni? Amudikani kurangarira kuti imwimwi amusisiri kupinda hama jinokwanisaya kuita zvizinji. Cinosisira maningi ngo cokuti imwimwi muri kukwanisa kuenderera mberi mecicungirira. (Mateu 10:22) Narini mucadokanganwa kuti Jehovha anoreremeja maningi zviya zvamunokwanisa kuita mukuzwirana no mugariro wenyu. Izvi ndizvona zvinozomubesera kuti muenderere mberi mecitevera Jesu pasure pokubhabhatijwa.—Nduyo 26:1.

12-13. Ngozvapi zvamungaita kudari mukazwisisa kuti muri kurembejeka pakushandira kwenyu Jehovha? (1 Vakorinte 9:​16, 17) (Vonanyi bhokiso rinoti: “ Endereranyi Mberi Mecigogoma.”)

¹² Mungaitenyi kudari mukavona kuti amucaripi kuita mukumbiro ngo mwoyo wese kana amucatoripi kudakarira basa renyu rokucumaera? Mungaitenyizve kudari amucadakariri kuverenga Bhaibheri inga zvamaiita kare? Kudari izvi zvikamuitikira pasure pokubhabhatijwa kwenyu, mucadorangarira kuti amucina besero ro mujimu mucena wa Jehovha. Zvecivoneka kuti tiri vandhu vacizivi kukwana, mazwiro edu anocinja pakufamba ko nguva. Kudari kuvangisira kwamaaita kukapunguka, rangariranyi ngo muezaniso wo mupostori Pauro. Iyena waivangisira kuti atevejere Jesu, pikija nguva jimweni waizviziva kuti aacaizova no cido cokuita zvaaidikana kuita. (Verenganyi 1 Vakorinte 9:​16, 17.) Iyena wakati: “Pikija ndikazviita ndicikadi, ndiciri nawo mutoro wondakapuwa.” Ngo magama amweni, Pauro wakatema civaringo cokukwanirisa basa raakagajwa rokucumaera pikija pamukuvo wokunesa.

¹³ Mu njira yakafanana, mucadotema zvivaringo mukuzwirana no manera amuri kujizwa itanyi zvese zvamunokwanisa kuti muite zvakanaka pikija andiopi manera amuri kujizwa. Kudari mukaenderera mberi meciita zvaushoni, mazwiro enyu anozocinja pakufamba ko nguva. Kuita zviro zvakadari inga jijo yo mundhu ega, kwenda kumusongano, kuita mukumbiro no kwenda  kocumaera, zvinozomubesera kuti muenderere mberi mecitevera Jesu pasure pokubhabhatijwa. Kusiyapo izvo, hama pajinovona kuti muri kucungirira pakushandira kwenyu Jehovha, ijona jinozovangiswa maningi.—1 Vatesaronika 5:11.

“ENDERERANYI MBERI MECIJIPOPORA . . . RAMBANYI MECIJIEJA”

14. Ngenyi tinodikana kujipopora nguva jimweni? (2 Vakorinte 13:5)

¹⁴ Ciro cimweni cingamubesera kuti muenderere mberi pakupera kubhabhatijwa, ngo cokujipopora nguva jese. (Verenganyi 2 Vakorinte 13:5.) Nguva jimweni zvaushoni kumbosotesesa upenyu hwenyu movona dangani muri kuita mukumbiro njiku jese, kuverenga no kujija Bhaibheri, kwenda kumusongano pamwepo nokwenda kocumaera. Psakanyi manera okunasa kubesereka ngo zviro zvaperari kunangwa. Inga muezaniso, jivhunjisenyi kudari: ‘Kureva kuti ndinokwanisa kusanangurira vamweni jijiso jokutanga jo Bhaibheri? Kureva kuti zviripo zvandingaita kuti ndinase kudakajihwa ngo kuita basa rokucumaera? Pandinoita mukumbiro, ndinonasa kunanga zvandinoda, ndovonesa kuti ndinothemba Jehovha mukuperera? Ndinoenda kumusongano mukuvo wese? Kudari ndecienda, ngozvapi zvandinodikana kuita kuti ndiitise nane kupurukira kwandinoita no kupavo mupinguro?’

15-16. Ngozvapi zvamajija kuvha ku muezaniso wa hama Robhert ngo pamusoro po kunyisa muejo?

¹⁵ Ciro cimweni cinosisira, ikunasa kuziva pamakarembera. Hama imweni inodanwa Robhert yakasumura zvakaitika zvinovonesa kamare izvi. Iyona yakati: “Pandainga no makore anokwana kuita 20, ndakawana basa asi andicaishanda njiku yese. Njiku imweni musikane wandaishanda naye wakandikoka kuti ndiende kumuzi kwake iyena wakananga kuti ‘tinozogara toga tovaviri tobungaija maningi.’ Pakutanga ndakananga kuti andicaizokwanisa asi pakupejisira ndakatonanga kamare kuti andidi, ndomusanangurira kuti ngenyi ndaidavira kudaro.” Zvinodakajisa ngozvokuti hama Robhert vakazokwanisa kunyisa muejo uwu. Pakufamba ko nguva, vecirangarira zvaingari zvakaitika, hama Robhert vakavona kuti vaidikana kuita zviro mu njira yakasiyana. Ivona vakati: “Ndaidikana kutomuvhunja pondhopo kuti andicaidepi inga manera zvaakaita Josefa paakavhunjirihwa ngo mukaji wa Potifari. (Genesi 39:​7-9) Kunasa kunanga, zvakandishamaisa maningi kuvona kuti zvakandinesera kuramba mukoka uwu. Izvo zvakandibesera kuvona kuti ndinodikana kuvangisa ushamwari hwangu na Jehovha.”

¹⁶ Inga ndi hama Robhert, zvinosisira maningi kujipopora kuti muvone kuti ngoapi mazwiro enyu pamunosongana no muejo umwe nga umwe. Pikija mukakwanisa kunyisa muejo umwe  nga umwe, jivhujisenyi kudari: ‘Kureva kuti andizivi kunonoka pakunanga kuti andidi?’ Kudari mukavona kuti munodikana kuitisa nane mucadojipa ndava. Mukusiyana, dakaranyi ngokuti makwanisa kuziva kuti ngopapi pamakarembera pacino nguva. Itanyi mukumbiro kuna Jehovha nokuita zviri zvese kuti muvangise cido cenyu cokuda kuzwira ndhungamiriro ja Jehovha.—Nduyo 139:​23, 24.

17. Patinoenderera mberi takagondeka kuna Jehovha zvinobesera kudini pakuceneswa ko zina rake?

¹⁷ Tingajijazve zviro zvimweni ngo muezaniso wa hama Robhert. Ivona vakati: “Pandakapera kuramba mukoka wandakaithwaya ngo musikane wandaishandaya naye, iyena wakati: ‘Makorokoto wakwanisa kucungirira muejo.’ Perapo ndakamuvhunjisa kuti waida kunangenyi. Iyena wakananga kuti shamwari yake imweni yainga yakambova Capupu ca Jehovha yakamuvhunja kuti majaha ese o Zvapupu zva Jehovha anoita zvakashata ngo cifise-fise paya paanonga ano mukana wokuita zvondhozvo. Ngo kudaro, iyena wakavhunja shamwari yake iya kuti waizondieja. Ndakadakara maningi ngokuziva kuti ndakwanisa kukuja zina ra Jehovha.”

18. Matema civaringo cokuitenyi pasure pokubhabhatijwa? (Vonanyi bhokiso rinoti: “Musoro Jamunozodakarira.”)

¹⁸ Pamunopira upenyu hwenyu kuna Jehovha nokubhabhatijwa munonga mecivonesa kuti munoda kucenesa zina rake azvinenyi kuti ngozvapi zvinozoitika. Ivanyi no cokwadi cokuti Jehovha anoziva muejo jese jamuri kusongana najo. Cimwenizve, anozokomborera kuvangisira kwenyu kuti muenderere mberi makagondeka. Ivanyi no cokwadi cokuti ecishandisa mujimu mucena, iyena anozomupa simba ramunoda. (Ruka 11:​11-13) Ngo besero ra Jehovha, imwimwi munozokwanisa kwenderera mberi mecitevera Jesu pasure pokubhabhatijwa.