1-2. Mundhu acito abhabhatijwa anodikana kuitenyi?

 PAMAKORE mashanu apera, vandhu vanopindirija zviuru vakabhabhatijwa inga Zvapupu zva Jehovha. Vazinji vakona vakajijiswa cokwadi ‘kuvhira udoko hwavo’ inga mujiji wo muzana rokutanga Timoti. (2 Timoti 3:​14, 15) Vamweni vakazojija ngo pamusoro pa Jehovha pavainga vakura vamweni vainga vataamadhodha. Pa mukuvo wakapera, mwanakaji umweni wakajija Bhaibheri no Zvapupu zva Jehovha wakabhabhatijwa paainga no makore anokwana kuita 97.

² Kudari imwimwi muri mujiji wo Bhaibheri kana kuti muri kureriwa ngo vabari vokuti vari Zvapupu, muri kurangarira kubhabhatijwa? Ici ndi civaringo caushoni. Mucito mabhabhatijwa, imwimwi munodikana kujipira kuna Jehovha. Cijijo cino cinozosanangura zvinobatanijwa pakujipira. Cimwenizve, cijijo ici, cinozomubesera kuti mukwanise kuvona kuti apana thangwe rokutama kuita mudanyu uwu, kubatanijavo nokubhabhatijwa paya pamunonga makanasiririka kuti muzviite.

ZVINOREVENYI KUJIPIRA?

3. Ipanyi muezaniso jo mu Bhaibheri jo vandhu vakajipira kuna Jehovha.

³ Mu Bhaibheri, mundhu wainga akajipira kuna Jehovha wainga akakhethwa. Vaiziraeri vainga jinja rainga rakajipira kuna Jehovha, asi vandhu vamweni vo jinja iri vainga vakajipira kuna Jehovha ngo njira inosisira maningi. Inga muezaniso, Aroni waisimira “civoniso co kuceneswa kwakacena” pambeji po dhuku wakadira ruva ro ndarama. Ruva iri ro ndarama raikhombija kuti iyena wainga akagajwa kuti aite basa rinosisira maningi inga mupiri mukuru wo Vaiziraeri. (VaLevi 8:9) Vanaziri vaijipiravo kuna Jehovha ngo njira inosisira maningi. Gama rokuti  “Munaziri” rikasandujwa kuvha ku Cihebheru rinoreva kuti “Wakaparajaniswa” kana kuti “Wakajipira.” Vanaziri vaidikana kupona mukuzwirana no ndhungamiriro jainangwa ngo Mutemo wa Mosi.—Bziverengo 6:​2-8.

4. (a) Ngozvapi zvinobatanijwa pakujipira kuna Jehovha? (b) Zvinorevenyi “kujiramba”? (Vonanyi foto.)

⁴ Imwimwi pamunonga majipira kuna Jehovha, munonga makheta kuti muve mujiji wa Jesu Kristu nokuita kuti kuda ka Jehovha kuve ciro cinosisira maningi mu upenyu hwenyu. Kujipira ko Cikristu kunobatanijenyi kwamuri? Jesu wakati: “Wiya anoda kunditevera, ngaajirambe.” (Mateu 16:24) Gama rakasandujwa ro Cigiriki rokuti “ngaajirambe” rikasandujwa rinoreva “kutama kuita kuda kwako.” Inga mushandiri wa Jehovha wakajipira, imwimwi munodikana kuramba ciri cese cicikazwirani no kuda kwake. (2 Vakorinte 5:​14, 15) Izvi zvinobatanija kuramba “mabasa o nyama,” akadari inga kuita uhure. (Vagaratiya 5:​19-21; 1 Vakorinte 6:18) Kuzwira ndhungamiriro iji kungavisa cineso mu upenyu hwenyu? Kudari imwimwi munoda Jehovha nokuthemba kuti mutemo jake kuitira kugara ushoni kwenyu azvizoviisi cineso. (Nduyo 119:97; Isaia 48:​17, 18) Hama imweni inozwi Nikorau yakananga kudari: “Imwimwi mungasana kuvona ndhungamiriro ja Jehovha inga magaradhi o kadheya anomuita kuti mutame kubuda kuti muite ciri cese camunoda kana kuti kuvona kuti magaradhi anomujivirira kuti mutame kurumwa ngo mbhondoro.”

5. (a) Mundhu anoitisa kudini kuti ajipire kuna Jehovha? (b) Ngowapi musiyano wokujipira no kubhabhatijwa? (Vonanyi foto.)

⁵ Mungaitisa kudini kuti mujipire kuna Jehovha? Ngokuita mukumbiro mecigondesa Jehovha kuti munozoshandira iyena basi nokutizve kuita kuda kwake kunozova pakutanga mu upenyu hwenyu. Kunasa kunanga, munonga mecigondesa Jehovha kuti munozoenderera  mberi mecimuda ‘ngo mwoyo wenyu wese, upenyu hwenyu hwese, murangariro wenyu wese no simba renyu rese.’ (Marko 12:30) Kujipira uku munokuita pa ndau yamuri mega imwimwi na Jehovha basi. Mukusiyana, kubhabhatijwa ikona kunoithwa pambhene mecivonesa kuno vandhu kuti imwimwi mapera kujipira kuna Jehovha. Kujipira ndi mbhiko inosisira maningi, ngo iyo ndava Jehovha anovetera kuti muite zvese zvamunokwanisa kuti muikwanirise.—Mucumaeri 5:​4, 5.

NGENYI TINODIKANA KUJIPIRA KUNA JEHOVHA?

6. Icinyi cinoita kuti mundhu ajipire kuna Jehovha?

⁶ Ciro cokutanga cinomuita kuti mude kujipira kuna Jehovha, ngo cokuti munomuda. Rudo uwu asipi mazwiro amunova nawo perapo otopera. Asi akacijikira mu “zivo yakarungama” no “zwisiso yo kumujimu” kana kuti ngo zviro zvamakajija ngo pamusoro pa Jehovha zvoita kuti mumude maningi. (Vakorose 1:9) Pomakajija Bhaibheri imwimwi makakhohwa kuti cokutanga, Jehovha ndi mundhu wokadi, cocipiri Bhaibheri ndi Soko raakafemera no cocitatu, iyena anoshandisa sangano rake kuti aite zvaanoda.

7. Tinodikana kuitenyi ticito tajipira kuna Jehovha?

⁷ Vaya vanojipira kuna Jehovha vano zivo yakatikuti ngo pamusoro po Bhaibheri no kupona mukuzwirana no mutemo jake. Ivona vanoita zvese zvavanokwanisa kuti vavhunjevo vamweni ngo pamusoro pa zviya zvavakajija. (Mateu 28:​19, 20) Zvecivoneka kuti rudo hwavo kuna Jehovha unoengejeka, ivona vanoda kumunamata ngo mwoyo wese. Munojizwavo kudaro? Kudari mukada Jehovha kamare amuzozvipiri no kubhabhatijwa ngo kuti munoda kudajisa mujijisi wenyu wo Bhaibheri kana vabari  venyu nokutizve shamwari jenyu jakabhabhatijwa.

8. Kuitisa kudini kubongesera kungamundundira kuti muteme civaringo cokujipira kuna Jehovha? (Nduyo 116:​12-14)

⁸ Pamunorangarira ngo zvese zvakamuitira Jehovha, munoguma pakuda kumubongesera maningi motojipira kwaari. (Verenganyi Nduyo 116:​12-14.) Bhaibheri rinonanga kuti Jehovha ndiyena anotipa “cipo cese cakanaka no cipo cese cakakwana.” (Jakobo 1:17) Pa zvipo zvese zvaakatipa, cipo cinosisira maningi caakatipa ngo co muripo wo Mwana wake Jesu. Amborangariranyi basi. Muripo ndiwona wakaita kuti mukwanise kuva no ushamwari hwo phedo na Jehovha. Kusiyapo izvi, Jehovha wakatipazve mukana wokurarama kwenda no kwenda. (1 Johani 4:​9, 10, 19) Pamunopira upenyu hwenyu kuna Jehovha amuvonesi basi kubongesera ngo muripo waakamupa asi ngo manera aari kumukomborera. (Deuteronòmio 16:17; 2 Vakorinte 5:15) Izvi ndizvona zvatinojija pa cijijo 46 fundo ro 4 mu bhuku Dakaranyi Kwenda no Kwenda! munowanikavo vhidhiyo yo museswa mutatu inoti Ipanyi Jehovha Zvipo Zvenyu.

MAKANASIRIRIKA KUTI MUJIPIRE NO KUBAHABHATIJWA?

9. Ngenyi mundhu aadikani kujizwa ecivangirijwa kuti ajipire?

⁹ Kangaije mungatovona kuti amuto manasirira kuti mujipire no kubhabhatijwa. Kangaije mucada kuita cinjo mu upenyu hwenyu kuti muzwire ndhungamiriro ja Jehovha kana mucadazve mukuvo kuti muvangise rutendo hwenyu kuna Jehovha. (Vakorose 2:​6, 7) Mujiji umwe nga umwe anoenderera mberi kudivi ro umwari ngo njira yakasiyana-siyana. Cimwenizve, asipi majaha ese anojipira no kubhabhatijwa no ndanga yondhoyo. Zvinosisira maningi kuzwisisa kuti ngojapi cinjo jamunodika kuita perapo itanyi divi renyu kusiyapo kujiezanisa no vamweni.—Vagaratiya 6:​4, 5.

10. Ngozvapi zvamungaita kudari mukavona kuti amuto manasiririka kuti mujipire no kubhabhatijwa? (Vonanyivo bhokiso rino musoro unoti: “ Kuna Vaya Vari Kurehwa Mucokwadi.”)

¹⁰ Kudari mukavona kuti amuto manasiririka kuti mujipire kuna Jehovha, endereranyi mberi muno cido conaco. Kumbiranyi Jehovha kuti amubesere kuti muite cinjo jamunodaro kuita. (Vafiripi 2:13; 3:16) Mungava no cokwadi cokuti Jehovha anozopurukira mukumbiro wenyu no kumubesera.—1 Johani 5:14.

NGENYI VANDHU VAMWENI VANOTHYA KUJIPIRA NO KUBHABHATIJWA?

11. Jehovha anotibeseresa kudini kuti tienderere mberi takagondeka kwaari?

¹¹ Vandhu vamweni vatopera kutema civaringo cokujipira no kubhabhatijwa, vaciri kukana-kana kuti dangani vanodikana kuzviita kana kuti haiwa. Vamweni vanojivhunjisa kudari: ‘Kudari ndikapera kubhabhatijwa ndoita cishaihsi cikuru ndogumira pakujingwa keni?’ Kudari ndizvona zviri kumuitisa kuti muthye ivanyi no cokwadi cokuti Jehovha anozomupa zvese zvamunoda kuti “mufambe ngo manera anokuja Jehovha, kuti munase kumudakajisa.” (Vakorose 1:10) Iyena anozomubesera kuti muite zviro zvakarungama. Jehovha wakambobeseravo vandhu vazinji kuti vave vakagondeka kwaari. (1 Vakorinte 10:13) Ngo iyo ndava, asipi nguva jese vandhu vanondojingwa mu ungano. Jehovha anotipa zvese zvatinoda kuti tienderere mberi takagondeka kwaari.

12. Tingaitisa kudini kuti titame kuita zvishaishi zvikuru?

¹² Itusu tese tinoejwa kuti tiite zviro zvakashata. (Jakobo 1:14) Asi imwimwi mungasana zvamungaita pamunonga meciejwa. Kunasa kunanga imwimwi munonga meciziva zvamunoda kuita mu upenyu. Vandhu vamweni vanonanga kuti azvikwanisiki kuvonerera  zvatinoita no manera atinojizwa. Asi izvi ngo zvokunyepa. Imwimwi mungajijira kuvonerera zvido zvenyu zvakashata. Ngo iyo ndava, pa vhaza jese jamungaejwa imwimwi mungasana kutama kuita zvakashata. Asi kuti mukwanise kuita zviro izvi munodikanavo kuita zviri zvese. Zvakadari inga kuita mukumbiro, kujija Bhaibheri njiku jese, kwenda kumusongano no kushandisa mukana wamunova navo kuti muvhunje vamweni ngo pamusoro po masoko akanaka. Kudari mukaita izvi munozokwanisa kucungirira moenderera mberi makagondeka kuna Jehovha. Narini mucakanganwa kuti Jehovha anozomubesera kuti muite izvi.—Vagaratiya 5:16.

13. Josefa wakatisiira muezaniso wapi waushoni?

¹³ Zvinozova zvakamurerukira maningi kuti muenderere mberi makagondeka kudari mukaziva zvamungaita mucito maejwa pacino nguva. Bhaibheri rinonangavo ngo vandhu vazinji vakaitavo izvi vaingavo vacizivi kukwana inga ndisu. Inga muezaniso, mukaji wa Potifari paakavangirija Josefa kuti avate naye, Josefa wakanyisa muejo uwu ngokuti waizviziva zvaiidikana kuita. Bhaibheri rinonanga kuti “iyena wakaramba” wakatoguma pakunanga kudari: “Waro ndingaitisa kudini cishaishi cakakura kudari, ndoshaishira Mwari?” (Genesi 39:​8-10) Zvakajeka kuti Josefa waiziva zvaaidikana kuita acito aejwa ngo mukaji wa Potifari. Ngo iyo ndava, paakaejwa iyena waizviziva kuti waidikana kuita zviro zvakarungama.

14. Tingaitenyi kuti titame kuwira mu muejo?

¹⁴ Tingaitisa kudini kuti tiite zviro zvakafanana no zvakaithwa ndi Josefa? Imwimwi mungapsaka kuziva wari kuti ngozvapi zvamungazoita kudari mukazosongana no muejo. Mucatendera kuita zviro zvinonyangajisa Jehovha nee mucatozvirangarira. (Nduyo 97:10; 119:165) Kudari mukaita izvi mungazokwanisa kuziva zvamungaita kuti muhwisane no muejo wamunozosongana nawo nokuzokwanisa kuunyisa.

15. Mundhu angakhombijisa kudini kuti ari kupsaka Jehovha “ngo mwoyo wese”? (Vahebheru 11:6)

¹⁵ Zvingaita kuti makakhohwa kuti mainga mawana cokwadi nokutizve maida kushandira Jehovha ngo mwoyo wenyu wese. Asi kangaije zvingaita kuti amuto manasiririka kuti mujipire no kubhabhatijwa kuna Jehovha. Pamugariro wakadari, imwimwi mungaita zvakaithwa ndi Mambo Dhavhidhi. Iyena wakadeketerera Jehovha eciti: “Ndipoporenyi, Mwari, zivanyi mwoyo wangu. Ndiejenyi, zivanyi mikarakajo yangu. Vonanyi kudari ndinoenda mu gwanja ro rufu, ndisesejenyi mu gwanja ricikaperi.”  (Nduyo 139:​23, 24) Jehovha anokomborera vaya “vanomupsaka ngo mwoyo wese.” Pamunovangisira kuti mujipire no kubhabhatijwa munovonesa kuti munonga meciita izvi.—Verenganyi Vahebheru 11:6.

ENDERERANYI MBERI MURI PHEDO NA JEHOVHA

16-17. Kuitisa kudini vaya vari kurehwa mucokwadi vangakwevehwa ndi Jehovha? (Johani 6:44)

¹⁶ Jesu wakananga kuti vajiji vake vanokwevehwa ndi Jehovha. (Verenganyi Johani 6:44.) Rangariranyi manera azvinodakajisa no manera azvinopsasa upenyu hwedu. Jehovha anovona zviro zvaushoni ku mundhu umwe nga umwe waanokwevera mucokwadi. Iyena anovona umwe nga umwe wo vashandiri vake inga “pfuma yake kamare” kana kuti “pfuma inosisira.” (Deuteronòmio 7:6) Jehovha anomuvonavo kudaro.

¹⁷ Zvingaita kuti muri mujaha ari kurehwa mucokwadi. Zvingaitazve kuti imwimwi muri kujizwa kuti muri kushandira Jehovha ngokuti vabari venyu vari kumushandiravo haiwa ngokuti Jehovha wakamukwevera mu sangano rake. Asi Bhaibheri rinoti: “Khwederanyi kuna Mwari, iyena anozokhwederavo kwamuri.” (Jakobo 4:8; 1 Kronike 28:9) Pamunotema civaringo cokukhwedera kuna Jehovha, iyena anoitavo divi rake kuti akhwedere kwamuri. Jehovha aamuvoni inga divi ro cikwata basi. Jehovha anokhwedera ku mundhu umwe nga umwe kusiyapo basi inga cikwata, pikija ku vaya vakatorehwa mu cokwadi. Mundhu paanotema civaringo cokukhwedera kuna Jehovha anonga eciita zviri pana Jakobo 4:8.—Ezanisiranyi no 2 Vatesaronika 2:13.

18. Ngozvapi zvatinozovona mu cijijo cinotevera? (Nduyo 40:9)

¹⁸ Pamunojipira kuna Jehovha mobhabhatijwa, munonga mecitevejera Jesu. Jesu wainga no cido cokuita zvese zvaaikumbihwa ndi Baba wake. (Verenganyi Nduyo 40:9; Vahebheru 10:7) Mu cijijo cinotevera, tinozovona zviro zvinotibesera kuti tienderere mberi tecishandira Jehovha notakagondeka pasure pokubhabhatijwa.