1. Ngoapi makomborero atinobusa ngokuita divi ro sangano ra Jehovha?

 TIRI kukomborehwa maningi ngokuita divi ro sangano iri ra Jehovha mu mukuvo uwu wo njiku jino jokupejisira jinonesa. Upenyu mu nyika ino uri kwenderera mberi wecishatisisa, asi Jehovha wakatipekeja hama no hambzaji kuti jitibesere. (Nduyo 133:1) Iyena anotibesera kuti tive no upenyu unodakajisa pamwepo no mbhuri iyi. (Vaefeso 5:33–6:1) Iyena anotipekeja uzivi hwatinoda kuti tihwisane no kuthimwa-thimwa no kuva no mudakaro.

2. Ngozvapi zvatinodikana kuita, ngenyi?

² Ngo kudaro, tinodikana kuvangisira kuti tienderere mberi tecishandira Jehovha notakagondeka. Ngenyi? Ngokuti nguva jimweni tingakhugunyika ngo kutama kukwana ko vamweni. Cimwenizve, pamukuvo umweni itusu tingavora mwoyo ngo ndava yo zvishaishi zvedu, maningi-ningi paya patinophinda kuposa zvatakamboposazve. Tinodikana kucungirira paya patinonga tecishandira Jehovha, cokutanga hama kana kuti hambzaji painotikhugunya, cocipiri, wotakacadha naye paanoita zviro zvinotisiya takasuruvara no cocitatu, patinonga takasuruvara ngo shwiro jedu pacedu. Mu cijijo cino, tinozobhuya ngo ciro cimwe nga cimwe co zviro zvitatu izvi. Cimwenizve tinozovona kuti tingajijenyi kuvha ku ciitiko co mundhu anonangwa mu Bhaibheri wakagondeka.

ENDERERANYI MBERI MAKAGONDEKA KUNA JEHOVHA PIKIJA HAMA KANA HAMBZAJI IKAMUKHUGUNYA

3. Zvineso zvapi zviri kuhwisana no vashandiri va Jehovha?

³ Cineso. Hama jimweni no hambzaji jino undhu unotinyangajisa. Vamweni vangaita zviro zvingatisiya takasuruvara, kutitaja ngo njira iciripi iyona kana iciripi yo rudo. Vaya vanotungamirira vangatoposavo. Kutama kukwana uku kungaita kuti vamweni  vakane-kane kuti iri i sangano ra Jehovha kana kuti haiwa. Kunja ko kwenderera mberi vecishandira Jehovha “vakabatana” no hama no hambzaji vangaima kushamwarijana no vaya vakavakhugunya kana kutotama kwenda kumusongano. (Sofoniya 3:9) Izvi ngo zvoungwaru? Ngativone kuti ngozvapi zvatingajija kuvha ku ciitiko cimweni co mu Bhaibheri co mundhu wakasonganavo no mugariro jakaezana.

4. Zvineso zvapi zvakahwisana no mupostori Pauro?

⁴ Muezaniso wo mu Bhaibheri. Mupostori Pauro waizviziva kuti hama no hambzaji jake vainga vari vandhu vacizivi kukwana. Inga muezaniso, vamweni avacaithemba kuti iyena wainga mujiji pavakamuvona. (Mabasa o Vapostori 9:26) Vamweni vaibhuya zviro zvakashata ngo pamusoro pake kuitira kuti vamweni vatame kumuthemba. (2 Vakorinte 10:10) Pauro wakatovona hama imweni yaishanda inga mukuru yecitema civaringo caizokhugunya vamweni. (Vagaratiya 2:​11, 12) Umwe mudoni wake waaishanda naye waizwi Marko, wakaita zviro zvakamukhugunya. (Mabasa o Vapostori 15:​37, 38) Pauro waizotendera kuti umwe wo mugariro iji umuitise kuti atame kuvazve no ushamwari no vandhu vondhovo. Ngo kudaro, iyena wakaenderera mberi eciva no mavonero akanaka ngo pamusoro po hama no hambzaji jake pakushandira kwake Jehovha. Zvicinyi zvakabesera Pauro kuti acungirire?

5. Zvicinyi zvakabesera Pauro kuti atame kuramwa hama no hambzaji jake? (Vakorose 3:​13, 14) (Vonanyi foto.)

⁵ Pauro waida hama no hambzaji. Rudo hwainga na Pauro kuno hama no hambzaji wakamubesera kuti atame kubatikana pakutama kukwana kwavo asi pamugariro javo jaushoni. Rudo uwu wakamubesera kuti aite mukuzwirana no zvaakatara pana Vakorose 3:​13, 14. (Verenganyi.) Kuti muvone kuti izvi ndizvona, vonanyi manera Pauro wakaregerera Marko. Pikija Marko wakasiya Pauro ega pa hwendo hwake hwokutanga hwo umisiyonariyo, Pauro aazivi kuviga bundu. Pakufamba ko nguva, Pauro paakatara karata ku ungano yo Korose iyena wakavangisa Marko inga mudoni wake wo basa anosisira uwo ‘wakamunyaraja maningi.’ (Vakorose 4:​10, 11) Paakadihwa mukadheya ku Roma, Pauro wakakumbira Marko kuti aviye kuzomubesa. (2 Timoti 4:11) Zvokadi Pauro aazivi kuramba hama jake. Ngozvapi zvatinojija kuvha ku muezaniso wa Pauro?

6-7. Tingakhombijisa kudini rudo ku hama no hambzaji jedu pikija no kutama kukwana kwavo? (1 Johani 4:7)

⁶ Zvatinojija. Jehovha anoda kuti tienderere mberi tecikhombija rudo ku hama no hambzaji jedu. (Verenganyi 1 Johani 4:7.) Kudari hama kana hambzaji ikatitaja ngo njira yokuti Mukristu aacaidikanepi kuita kudaro, tingava no cokwadi cokuti cinangwa cake acicaingepi  cokutikhugunya asi ari kuita zvese zvaanokwanisa kuti aite zvinonangwa ndi Jehovha kuti zvakanaka. (Mazwi Akangwara 12:18) Jehovha anoda vashandiri vake vakagondeka pikija no kutama kwavo kukwana. Pikija patinoposa iyena anoenderera mberi ari shamwari yedu nokutizve aatinyangajwiri. (Nduyo 103:9) Zvinosisira maningi kutevejera Baba wedu vanoregerera.—Vaefeso 4:32–5:1.

⁷ Ceukijanyi kuti mugumo wo nyika ino paunonga wecikhwedera, zvinosisira maningi kuti tirambe takabatana no hama no hambzaji jedu. Tinovetera kuti kuteverehwa kunozoengejeka. Tingazotodihwa mukadheya ngo ndava yo rutendo hwedu. Izvi pazvinoitika tinoda maningi besero ro hama no hambzaji jedu kupinda kare. (Mazwi Akangwara 17:17) Vonanyi zvakaitika na hama Josefa, a umwe mukuru wo ku Espanya. Ivona no hama jimweni vakadihwa mukadheya ngo ndava yokutama kwavo kuva no kwavakapeyamira. Ivona wakati: “Mukadheya ndainga pa ngozi yokunyangajwa ngo ndava yo hama jondaingari najo ngokuti taigara pamwepo. Tinodikana kucungirirana umwe kuno umweni no kuregererana no mwoyo wese ngokuti zvinotibesera kuti tive takabatana no kujivirirana umwe kuno umweni. Tainga takatendenejwa no vasungwi vamweni vainga vacikashandiri Jehovha. Pa vhaza imweni mukono wangu wainga wakakhuvazika zvokuti andicaikwanisa kuita zviro zvimweni. Hama imweni yakandibesera kupaja nguvo jangu no kuita zviro zvimweni. Inini ndakavona kamare rudo pamukuvo wiya wokunesa.” Itusu tino mathangwe aushoni kuti tibesane pakutonga cineso ciri cese cingamuka ngokukasika.

CUNGIRIRANYI PAYA POKUTI WOMAKACADHA NAYE WAMUKHUGUNYA

8. Zvineso zvapi zviri kuhwisana no vakacadha?

⁸ Cineso. Mucadho jese jinozvineso. Bhaibheri rinonanga kuti vaya vakacadha “vanozova no dambujiko mu upenyu hwavo.” (1 Vakorinte 7:28) Ngenyi? Ngokuti mucadho unoumbhwa ngo vandhu vaviri vacizivi kukwana, vano mugariro no zviro zvakasiyana, zvavanodakarira no zvavacikadakariri. Vakarovorana vakavha mu mugariro jakasiyana-siyana no zvirovejeso zvakasiyana-siyana. Pakufamba ko nguva, vanozovona mugariro jokuti vacito vacadha avacaizviziva kuti mudoni wavo ndijona jaainga najo. Cimwe co zviro izvi cingamusa zvineso. Kunja kokuziva kuti umwe nga umwe wavo anodikana kuita divi rake kuitira kutonga cineso cinonga camuka nokushanda ngo simba kuti vaitise nane, ivona vangapekejana ndava ngocavo. Ivona vangatoguma pakuvona kuti kuparajana kana kurambana ndikona kungatotonga cineso. Kureva kuti kurambana ndikona kutonga cineso? b Ngatende tijije ngo ciitiko cimweni co mu Bhaibheri co mundhu wakacungirira zvineso zvakakura maningi mu mucadho.

9. Cineso capi cakahwisana na Abhigairi?

⁹ Muezaniso wo mu Bhaibheri. Abhigairi wainga akacadha na Nabhari uwo anonangwa ngo Bhaibheri kuti wainga mundhu anonesa no acikaiti zviro ngo njira kwayo. (1 Samueli 25:3) Zvingaita kuti zvainga zvecinesa maningi kuna Abhigairi kupona no mundhu wakadaro. Abhigairi wainga no mukana wokupeja mucadho uwu? Hina, iyena wakawana mukana uwu apo Dhavhidhi Mambo waizotevera wo Vaiziraeri, paakaviya kuzouraya mwamuna wake ngokumutuka kwaakaita pamwepo no vanarume vake. (1 Samueli 25:​9-13) Abhigairi waizotiza kuti Dhavhidhi akwanirise zvaaida. Asi iyena aazivi kuita zvondho, wakatoita zviri zvese kuti Dhavhidhi atame kuuraya Nabhari. (1 Samueli 25:​23-27) Ngenyi iyena wakaita izvi?

10. Ngozvapi kangaije zvakabesera Abhigairi kuti acungirire pa mucadho wake pikija no cineso?

 ¹⁰ Abhigairi waida Jehovha nokureremeja ndhungamiriro jake ngo pamusoro po mucadho. Pacina kukana-kana, iyena waiziva zvainga zvakanangwa ndi Mwari kuna Adhamu na Evha paakaita mucadho wokutanga. (Genesi 2:24) Abhigairi waiziva kuti Jehovha waivona mucadho inga nasiriro yakacena. Iyena waida kudakajisa Jehovha izvi zvakamuitisa kuti aite zviri zvese zvaaikwanisa kuti aponese vese vo pamuzi pake kubatanijavo no mwamunake. Iyena wakaita zviri zvese ngokukasika kuti Dhavhidhi atame kuuraya Nabhari. Abhigairi waitonga akanasiririka kuti akumbire kuregerehwa pa zviro zvakashata zvaainga acizivi kuita. Zvakajeka kuti Jehovha waida mwanakaji uwu waingari akacunga no acina ucengejeri. Mukaji no mwamuna vangajijenyi kuvha ku muezaniso wa Abhigairi?

11. (a) Ngozvapi zvinovetera Jehovha ku vandhu vakacadha? (Vaefeso 5:33) (b) Ngozvapi zvamajija kuvha pakuvangisira kwa hambzaji Karmen kuti vajivirire mucadho wavo? (Vonanyi foto.)

¹¹ Zvatinojija. Jehovha anoda kuti vakacadha vatame kuparajana pikija umwe wavo ecinesa kupona naye. Jehovha anodakara maningi paanovona vandhu vakacadha vecishanda ngo simba kuti vatonge zvineso, kukhombijirana rudo no nderemejo kuno umwe no umweni. (Verenganyi Vaefeso 5:33.) Vonanyi muezaniso wa hambzaji Karmen. Pasure po makore matandhatu no vapera kucadha, hambzaji Karmen vakatanga kujija Bhaibheri no Zvapupu zva Jehovha, pakufamba ko nguva ivona vakazobhabhatijwa. Ivona vakati: “Mwamuna wangu avazivi kudakarira civaringo candaingari ndatema.” “Zvokuti ivona wakatoguma pakunyangajwira Jehovha. Ivona waindituka, waindinesa nokutondivhunja kuti vaizondisiya.” Pikija zvakadaro, hambzaji Karmen vakacungirira zvineso izvi. Ko 50 o makore ivona vakashanda ngo simba kuti mucadho wavo uve wakacijikira pa rudo no nderemejo. “Ko makore akawanda, ndakajijira kuzwisisa mazwiro o mwamu wangu no kubhuya navo ngo njira yaushoni. Ndeciziva kuti mucadho wakacena pa meso pa Jehovha, ndakaita zvese zvandaikwanisa kuti ndiujivirire. Andizivi kumboramwija mucadho wangu ngokuti ndinoda Jehovha.” c Kudari mukava no zvineso mu mucadho wenyu, munodikana kuthemba kuti Jehovha anozomubesera kucungirira zvineso zvenyu.

MUCASIYA KUSHANDIRA JEHOVHA PAMUNOITA ZVISHAISHI ZVIKURU

12. Cineso capi catinohwisana naco patinoita cishaishi cikuru?

¹² Cineso. Tingasuruvara ngo ndava yo zviro zvatinonga taposa. Bhaibheri rinonanga kuti zvishaishi zvedu zvinotisiya ‘takakwiiwa no kuphwanyika.’ (Nduyo 51:17) Hama imweni yakashanda ngo simba ko makore akatikuti kuti  ikwanirise kushanda inga mubeseri wo ungano. Mukusiyana, ivona vakaita cishaishi cikuru cakavaita kuti vazwisise kuti ivona vainga vasiya Jehovha. Ivona vakati: “Pandakazwisisa zvandainga ndaita, hana yangu yakanditonga maningi.” “Izvi pazvakaitika, ndakazwa mundani mecihwaja. Ndakacema ndoita mukumbiro kuna Jehovha. Ndinoceukija kuti ndakamborangarira kuti Mwari narini aazoneseki ngokuda kundipurukira. Ngenyi iyena anoita kudaro? Ndakasuruvara.” Kudari tikabatikana pacishaishi cedu, tingaguma pakusuruvara ngokuti mwoyo wedu wakakhuvazika unotenda kuti Jehovha watisiya. (Nduyo 38:5) Kudari mecizwa kudaro, rangariranyi ngo muezaniso wo mu Bhaibheri wo mundhu wakagondeka wakakwanisa kwenderera mberi ecishandira Jehovha pikija no zvishaishi zvikuru zvaainga akaita.

13. Cishaishi capi cikuru cakaizwa ndi mupostori Pedhru, zvicinyi zvakamuitisa kuti aite zvondhozvo?

¹³ Muezaniso wo mu Bhaibheri. Pa usiku Jesu acito afa, Pedhru wakaita zvishaishi zvakawanda maningi nokutizve ngo ndava yo zvishaishi zvondhozvo iyena wakaita cishaishi cikuru. Pakutanga, Pedhru waijithemba maningi ecijicengejera kuti waizoenderera mberi akagondeka pikija vapostori vamweni vakaramba Jesu. (Marko 14:​27-29) Tevere, iyena paainga ari mu munda wo Gezemani, Pedhru wakaposa kuphinda no kuphinda ngo kukonehwa kuramba akangwarira. (Marko 14:​32, 37-41) Ngo kudaro, mbhungano payakaviya kuzosunga Jesu, Pedhru wakamuramba. (Marko 14:50) Pakupejisira Pedhru wakaramba Jesu kovhaza jinokwana kuita ndhatu, ecinanga kuti aacaimuzivepi, wakatoguma pakupika ecinanga kuti andimuzivi, aya ainga manyepo. (Marko 14:​66-71) Pedhru wakaitenyi paakaziva makurire ainga akaita cishaishi ici? Iyena wakacamwa no kuhwajihwa maningi ngo ndava yo cishaishi caaingari aita. (Marko 14:72) Rangariranyi mazwiro akava na Pedhru shamwari yake Jesu payainga yaurawa. Pedhru wakajizwa acikasisiri.

14. Zvicinyi zvakabesera Pedhru kuti acungirire paaishandira Jehovha? (Vonanyi foto yo .)

¹⁴ Pedhru wakakwanisa kucungirira no kushandira Jehovha ngo mathangwe mazinji. Pedhru aazivi kugara ega kusiyapo izvi iyena wakagara no hama no hambzaji jo kumujimu. Ijona jakamunyaraja maningi. (Ruka 24:33) Kusiyapo izvi, Jesu paakamuswa wakasongana na Pedhru kangaije kuti amuvangise. (Ruka 24:34; 1 Vakorinte 15:5) Pakufamba ko nguva, kusiyapo kutonga Pedhru ngo kuposa kwake, Jesu wakavhunja shamwari yake iyi kuti waizoashira mabasa makuru. (Johani 21:​15-17) Pedhru waizviziva kuti wainga aita cishaishi cikuru, asi wakaenderera ecieja kuita zviro zvakanaka. Ngenyi? Ngokuti iyena waithemba kuti mujijisi wake Jesu aacaingepi amusiya. Cimwenizve, hama jokumujimu ja Pedhru  jakaenderera mberi jecimubesera. Ngozvapi zvatinojija kuvha ku muezaniso wa Pedhru?

15. Jehovha anoda kuti tive no cokwadi cenyi? (Nduyo 86:5; Varoma 8:​38, 39) (Vonanyi foto.)

¹⁵ Zvatinojija. Jehovha anoda kuti itusu tithembe kuti iyena anotida nokutizve iyena wakanasiririka kuti atibesere. (Verenganyi Nduyo 86:5; Varoma 8:​38, 39.) Patinoshaisha tinojizwa tino ndava, kana kuti zvakareruka kuzwa kudaro. Mukusiyana, atidikani kurangarira kuti Jehovha aatidi kana kuti aatiregereri. Kunja kwa izvi, tinodikana kupsaka besero ngokukasika. Hama Robhert vambonangwaya pakutanga vakananga kudari: “Inini ndakawira mucishaishi ngo ndava yo kuthemba simba rangu kuti ndihwisane no muejo.” Vakazozwisisa kuti vaidikana kubhuya no vakuru. Ivona vakati: “Pandakaita mudanyu uwu ngokukasika ndakavona rudo hwa Jehovha ecishandisa vakuru ava. Vakuru avazivi kundiramwa. Ivona vakandibesera kuti ndithembe kuti Jehovha aazivi kundisiya.” Itusu tinodikanavo kuthemba kuti Jehovha anotida maningi nokutizve anotiregerera paya patinokhauya ku zvishaishi zvedu. Tinopsaka besero rinodikana nokuita zvese zvatinokwanisa kuti titamezve kuwira mucishaishi ciya. (1 Johani 1:​8, 9) Kudari tikathemba kuti Jehovha anotida nokutizve anotiregerera, atizosiyi kumushandira pikija paya patinonga taposa.

16. Ngenyi matema civaringo cokucungirira mu basa ra Jehovha?

¹⁶ Jehovha anodakara maningi paanotivona tecivangisira kuti timushandire maningi-ningi mu njiku jino jokunesa. Ngo besero ra Jehovha itusu tingakwanisa kucungirira pikija takasuruvara. Tinodikana kusakurira rudo ku hama no hambzaji no kuvaregerera pikija paya pavanotishaishira. Tinokhombija rudo hwedu hwakakura kuna Jehovha no nderemejo ku nasiriro jake nokuita zvese zvatinokwanisa kuti titonge zvineso zvingamuka mu mucadho medu. Patinoita cishaishi, tinodikana kupsaka besero ra Jehovha nokutendera rudo hwake hwokutiregerera nokwenderera mberi tecimushandira. Tingava no cokwadi cokuti tinozoashira makomborero akawanda maningi kudari ‘tikatama kuremba kuita zvakanaka.’—Vagaratiya 6:9.