Tingaregerehwa zvishaishi zvedu basi ngo ndava yo muripo wakariphwa ngo ngazi ya Jesu. (Vaefeso 1:7) Ngo kudaro, Bhaibheri rinoti: “Ngokuti iyena anononoka kunyangajwa, eciregerera zvishaishi zvakaithwa kare,” izvi ndipaya pokuti Jesu wainga acito apira upenyu hwake. (Varoma 3:25) Jehovha waizoitisa kudini kuti aregerere zvishaishi muripo ucito wariphwa, perepo iyena oenderera mberi ari Mwari wakarurama?

Jehovha wakagondesa “mubarihwana” waizoponesa vaya vaizova no rutendo kwaari no ku zvigondiso zvake. Paakaita cigondiso ici, zvaitodari inga kuti muripo watopera kuriphwa. (Genesi 3:15; 22:18) Jehovha wainasa kuthemba kuti Mwana wake no kujipira kwese waizopa muripo pa mukuvo wokuti Mwari waida kuti azviite. (Vagaratiya 4:4; Vahebheru 10:​7-10) Paainga ari pasi pano inga muimiriri wa Mwari, Jesu wainga no citendehwa co kuregerera zvishaishi muripo ucito wapihwa. Jesu waizoregerera zvishaishi zvo vaya vainga no rutendo ngokuti waizviziva kuti muripo waizofukija zvishaishi zvavo zvese.—Mateu 9:​2-6.