1. Vashandiri vamweni vakagondeka va Jehovha vangahwisana no mazwiro api?

 ZVINONYARAJA maningi kuziva kuti Jehovha anotendera vandhu vake inga cikwata. Bhaibheri rinoti: “Ngokuti Tenji Mwari anoda vandhu vake.” (Nduyo 149:4) Kazinji vamweni vanosuruvara, voguma pakujivhunjisa kudari: ‘Jehovha anonditendera pacangu?’ Vashandiri vazinji vakagondeka va Jehovha vo mu nguva jokare, vakambohwisanavo no murangariro jakasiyana-siyana.—1 Samueli 1:​6-10; Jobe 29:​2, 4; Nduyo 51:12.

2. Ndiani anotendehwa ndi Jehovha?

² Bhaibheri rinonasa kujekesa kuti vandhu vacizivi kukwana vangatendehwa ndi Jehovha. Kuitisa kudini? Tinodikana kuva no rutendo kuna Jesu no kubhabhatijwa. (Johani 3:16) Ngokuita kudaro, tinozokhombija pambhene kuti takhauya ku zvishaishi zvedu no kuita mbhiko kuna Mwari kuti tinozoita kuda kwake. (Mabasa o Vapostori 2:38; 3:19) Jehovha anodakara maningi patinoita mudanyu iji kuti tisakurire ushamwari hwedu naye. Patinonga tecienderera mberi teciita zvese zvatinokwanisa kuti tikwanirise mbhiko yatakaita, Jehovha anotitendera nokutivona inga shamwari jake jo phedo.—Nduyo 25:14.

3. Ngozvapi zvatiri kuda kuvona?

³ Ngenyi vamweni vanovona kuti Jehovha aavatenderi? Jehovha anovonesa kudini kutendera kwake? Mukristu angavangisa kudini kuthemba kwake kuti anotendehwa ndi Jehovha?

NGENYI VAMWENI VANGAVONA KUTI JEHOVHA AAVATENDERI?

4-5. Pikija tikava no mazwiro acikaripi aushoni, tingava no cokwadi cenyi?

⁴ Vazinji vedu kuvhira patainga vadoko tinojizwa kuti atisisiri. (Nduyo 88:16) Hama imweni inodanijwa kuti Adhiriyano yakati: “Ndinojizwa ndicikasisiri. Murangariro jangu jandainga najo pakutanga  jainga jo kukumbira kuti mbhuri yangu ive mu Paradhiso, pikija inini ndaijivona kuti andicaifanera kuva mu Paradhiso.” Hama Toni vakakura pa mbhuri iciripi Zvapupu vakati: “Vabari vangu avazivi kumbondivhunja kuti vaindida kana kuti vaidada ndini. Mabhuyo avo ainga okuti inini ndaikwanisa kuita zvaushoni basi ku mbhuri jo Zvapupu.”

⁵ Kudari mukuvo umweni tiri kuhwisana no mazwiro acizivi kunaka, tinodikana kuceukija kuti Jehovha kamare ndiyena wakatikwevera kwaari. (Johani 6:44) Jehovha anovona zvaushoni kwatiri zvokuti atikwanisi kuzvivona pacedu nokutizve iyena anoziva mwoyo jedu. (1 Samueli 16:7; 2 Kronike 6:30) Ngo kudaro, tingamuthemba paya paanotivhunja kuti itusu tinosisira.—1 Johani 3:​19, 20.

6. Mupostori Pauro wakajizwa kudini paakarangarijisisa ngo pamusoo po zvaakaposa kare?

⁶ Ticito tajija cokwadi, vazinji vedu takaita zviro zvokuti nyamasi uno tingatoguma pakujipekeja ndava ngo pamusoro pazvo. (1 Pedhru 4:3) Vamweni vari kushandira Jehovha vakagondeka, vaciri kutohwisanavo no kurembejeka. Imwimwivo keni, kazinji munojizwa inga kuti Jehovha aangamuregereri? Kudari zvakadaro, zivanyi kuti vashandiri vamweni vakagondeka va Jehovha vatori kuhwisanavo no mazwiro akaezana no enyu. Inga muezaniso, mupostori Pauro paairangarijisisa ngokutama kukwana kwake iyena wakajizwa acina mudakaro. (Varoma 7:24) Zvakajeka kuti Pauro wainga akhauya, pikija zvakadaro, iyena waijivona ‘ari mudoko ku vapostori vese’ no kujivona ‘ari mushaishi kupinda vese.’—1 Vakorinte 15:9; 1 Timoti 1:15.

7. Ngozvapi zvatinodikana kuva nazvo mu murangariro ngo pamusoro po zvotakaposa kare?

⁷ Baba wedu vokudenga vanogondesa kutiregerera kudari tikakhauya. (Nduyo 86:5) Ngo kudaro, kudari itusu takhauyadi kamare ku zvishaishi zvedu zvatakaita, tingathemba kamare kuti Jehovha zvaanonanga ngozvokadi, nokutizve watiregerera.—Vakorose 2:13.

8-9. Tinganyisisa kudini mazwiro okuti narini atizokwanisi kuita zviro kuti tidajise Jehovha?

⁸ Tese tinoda kuita zvese zvatinokwanisa kuti tishandire Jehovha. Mukusiyana, tinojizwa inga kuti atikwanisi kuita zvese zvatinokwanisa kuti titendehwe ndi Jehovha. Hambzaji imweni inodanijwa kuti Amanda yakati: “Ndinorangarira kuti kupa zvese zvandinokwanisa kuna Jehovha, zvinoreva kuita zvakawanda. Ndinoanja kuvetera zvakawanda kwandiri kupinda zviya zvandinokwanisa kuita. Pandinoposa ndinorangarira kuti Jehovha wasuruvara ngo zvandaita.”

⁹ Tinganyisisa kudini mazwiro okuti narini atizokwanisi kuita zvakakwana kuti tidakajise Jehovha? Ceukijanyi kuti Jehovha anozwisisa. Zivanyi kuti narini iyena aazotikumbiri kuita zvaticikakwanisi. Iyena anosotesesa zvese zvatinomuitira basi teciita zvese zvatinokwanisa. Kunja kwa zvondhozvo, rangarijisisanyi ngo pamusoro po muezaniso jo mu Bhaibheri ja vaya vakashandira Jehovha ngo mwoyo wese. Amborangariranyi ngo pamusoro pa Pauro. Iyena wakavangisira no kushanda ngo simba ko makore akawanda eciita hwendo wainga no makiromita akawanda no kufunungura ungano jakawanda. Waro mugariro pajakaita kuti iyena atame kubudirira mu basa ro kucumaera, kureva kuti iyena wakaruza kutendehwa ndi Jehovha? Haiwa. Iyena wakaenderera mberi eciita zvese zvaaikwanisa. Jehovha wakamukomborera. (Mabasa o Vapostori 28:​30, 31) Mu njira yakaezana, zviro zvatingapa Jehovha zvingava zvakasiyana mukuvo umweni. Asi cinosisira kwaari ngocokuti ngenyi itusu tinoita zvondhozvo. Waro ngatende tivone njira jimweni manera Jehovha anokhombija kutitendera kwaanotiita.

JEHOVHA ANOKHOMBIJISA KUDINI KUTENDERA KWAKE?

10. Tingaitisa kudini kuti “tizwe” Jehovha ecikhombija kutitendera kwake? (Johani 16:27)

¹⁰ Ecishandisa Bhaibheri. Jehovha anopsaka njira jokukhombija ndijona kuno vandhu vake  kuti anovada nokutizve anodakara ngo zviro zvavanomuitira. Bhaibheri rinonanga ko vhaza mbiri jokuti Iyena wakavhunja Jesu kuti wainga Mwana wake anodiwa no anomudakajisa. (Mateu 3:17; 17:5) Imwimwi maidakarira kuzwa Jehovha ecimuvhunja kuti ari kudakara ndimwi? Jehovha aativhunji zvondhozvo tecizvizwa kamare ngo izwi rake asi anotivhunja ecishandisa Bhaibheri. Tinokwanisa kuzwa izwi rokutendehwa ndi Jehovha patinoverenga masoko a Jesu mu Mavhangeri. (Verenganyi Johani 16:27.) Jesu wairangarijisisa maningi ngo pamusoro po undhu hwa Baba wake. Ngo kudaro, patinoverenga kuti Jesu wakakhombija kutendera kwake vajiji vake vacizivi kukwana asi vakagondeka, tinokwanisavo kurangarira Jehovha ecinangavo magama o ndhowo kwatiri.—Johani 15:​9, 15.

11. Ngenyi kusongana no zvineso azvirevi kuti taruza kutendehwa ndi Jehovha? (Jakobo 1:12)

¹¹ Ngo zviito zvake. Jehovha wakanasiririka kuti atibesere. Inga muezaniso, ngokutipa zvinodiwa zvedu zvokunyama. Mukuvo jimweni Jehovha angatendera kuti itusu titambujike ngo zvineso inga manera aakaita no mururami Jobe. (Jobe 1:​8-11) Patinosongana no muejo azvirevi kuti itusu taruza kutendehwa ndi Jehovha, mukusiyana jinotipa mukana wokukhombija rudo hwedu hwokadi kuna Jehovha no kumuthemba kwatinoita. (Verenganyi Jakobo 1:12.) Tinozovona rudo hwake no besero rake paya paanotibesera kuti ticungirire.

12. Tinojijenyi kuvha ku muezaniso wa hama Dhimitri?

¹² Vonanyi muezaniso wo hama imweni inogara ku Aziya inozwi Dhimitri. Ivona vakaruza basa nokutizve vakapeja mweji jakawanda vacizivi kuwanazve basa. Ngo kudaro, ivona vakatema civaringo cokuengejera nokupeja nguva zinji mu basa rokucumaera no kukhombija kuthemba kwavo Jehovha. Pakapinda mweji jakawanda ivona vacizivi kuwana basa. Ivona vainga no ndhendha inonesa maningi zvokuti avacaitokwanisepi kumuka pakama. Vakatanga kurangarira kuti avacaingepizve baba vaushoni no mwamuna waushoni no kutojivhunjisa kuti Jehovha wainga aciri kuvatendera kana kuti haiwa. Ngo kudaro, pa usiku humweni mwana wavo wo musikane wakaimprimiri phepha rainga no masoko a Isaia 30:15 okuti: “Simba renyu rinozova pakuenderera kwenyu mberi makagajana no kuthemba inini.” Iyena wakatora phepha raakaimprimi weya oenda naro ngo kumusoro kwavo o vavhunja kuti: “Baba, paya pamunotama kujizwa ushoni ceukijanyi matahwa aya.” Hama Dhimitri vakazwisisa kuti ngo makomborero a Jehovha mbhuri yavo yainga icino zvokuha, zvokusimira no pokugara paushoni. Ivona vakati: “Zvandaidikana  kuita ngozvokuramba ndakagajana no kwenderera mberi ndecithemba Mwari wangu.” Kudari imwimwi muri kuhwisana no cineso cakaezana, mungathemba kuti Jehovha anoneseka ndimwi nokutizve anozomubesera kuti mucungirire.

13. Jehovha angashandisa ani kuti akhombije kutitendera kwake, nokutizve kuitisa kudini?

¹³ Ecishandisa hama no hambzaji jedu. Jehovha anoshandisa hama no hambzaji jedu kuti akhombije kutitendera kwaanoita. Inga muezaniso, iyena angaita kuti hama jimweni jibhuye magama anovangisa pamukuvo kwawo. Hambzaji imweni inogara ku Aziya, yakaeja izvi pamukuvo wokuti yainga ino esteresi. Yainga yaruza basa nokutizve yainga no ndhendha inonesa maningi. Tevere mwamuna wayo wakaita cishaishi cakakura o ruza cidakajiso cokushanda inga mukuru. Ivona vakati: “Inini andicaikwanisa kuzwisisa kuti ngenyi izvi zvaiitika.” “Ndakarangarira kuti dangani ndainga ndaita hangu ciro cakashata kana kuti ndainga ndatoruza kutendehwa kwangu ndi Jehovha.” Hambzaji iyi yakadeketerera Jehovha kuti ainyaraje no kuitendera. Jehovha wakazviitisa kudini? Hambzaji iyi yakati: “Vakuru vo ku ungano kwangu vakaviya kobhuya na inini no kundinyaraja ngo rudo hwa Jehovha.” Pakufamba ko nguva, ivona vakakumbirazve Jehovha kuti avabesere. Ivona vakati: “Pa njiku imweyo, ndakaashira karata yo cikwata co hama no hambzaji jo ku ungano kwangu.” “Ndeciverenga magama anonyaraja a Jehovha ndakavona kuti iyena wainga wandipurukira.” Hina, nguva jimweni Jehovha anovonesa kutendera kwake ecishandisa magama aushoni o vamweni.—Nduyo 10:17.

14. Ngoapi manera amweni anokhombija Jehovha kutitendera kwake?

¹⁴ Jehovha anokhombijazve kutitendera kwake ngo kushandisa hama no hambzaji kuti jitipekeje mazano patinongaya tecimada. Inga muezaniso, muzana rokutanga ro makore Jehovha wakashandisa mupostori Pauro kuti atare karata  jinokwana 14 jakafemehwa ku hama no hambzaji jimweni. Karata iji jaibatanija mbhangiro jakavanga asi jo rudo. Ngenyi Jehovha wakafemera Pauro kuti atare mbhangiro iji? Jehovha ndi Baba wakanaka iyena anopangira vana vake ‘vanodiwa.’ (Mazwi Akangwara 3:​11, 12) Ngo kudaro, kudari tikaashira mbhangiro yakacijikira mu Bhaibheri, cingava citatijo cinovonesa kuti itusu tiri kutendehwa ndi Mwari haiwa kuti taruza kutendehwa ndiyena. (Vahebheru 12:6) Ngojapi njira jimweni jinokhombija kuti itusu ticiri kutendehwa ndi Jehovha?

NJIRA JIMWENI JINOVONESA KUTI JEHOVHA ACIRI KUTITENDERA

15. Jehovha anopa ani mujimu wake mucena, nokutizve ngenyi zvingatiita kuti tithembe?

¹⁵ Jehovha anopa mujimu wake mucena kuna vaya vaanotendera. (Mateu 12:18) Tingajivhunjisa kudari: ‘Ndakakwanisa kukhombija mucero wo mujimu mucena wa Mwari mu upenyu hwangu here?’ Ndiri kuzwisisa kuti wari uno ndiri kusengerera maningi ku vamweni kupinda pandainga ndicito ndaziva Jehovha? Kunasa kunanga, pamunoenderera mberi mecikwanisa kukhombija mucero yo mujimu mucena wa Mwari, munozokwanisa kuvonavo kuti muri kutendehwa ndi Jehovha.—Vonanyi bhokiso rinoti: “Mucero jo Mujimu nga iji . . . ”

16. Jehovha anoshandisa ani kuti acumaere masoko akanaka, zvondhozvo zvinomuita kuti mujizwe kudini? (1 Vatesaronika 2:4)

¹⁶ Jehovha anodakara maningi patinocumaera masoko akanaka kuna vaya vaanotendera. (Vereganyi 1 Vatesaronika 2:4.) Vonanyi kuti hambzaji inodanijwa kuti Joseryn yakabesereka ngokucumaera masoko akanaka ku vamweni. Njiku imweni hambzaji Joseryn vakamuka vakasuruvara. Ivona vakati: “Ndakajizwa kuti apana candinaco kuti ndipekeje.” “Asi pa njiku iyi ndakaenda kocumaera, iyi yakava njiku yangu yo basa yakadakajisa maningi. Ngo kudaro ndakaita mukumbiro perapo ndoenda ku basa.” Pa njiku yondhoyo comangwanani hambzaji Joseryn vakaziva mwanakaji umweni anodanijwa kuti Mariya, iyena wainga akanaka mwoyo zvokuti wakatendera kujija Bhaibheri. No padarika mweji jakatikuti, Mariya wakananga kuti iyena wainga eciita mukumbiro kuna Mwari ecikumbira besero rake pa njiku iyani yokuti hambzaji Joseryn vakagogoja musuvo wake. Vecirangarijisisa ngo izvi zvese, hambzaji Joseryn vakati: “Ndakazwa Jehovha ecindivhunja kudari: ‘Inini ndinokutendera.’” Zvakajeka kuti asipi vese vanodavira patinonga tiri mu basa rokucumaera asi tingava no cokwadi cokuti Jehovha anodakara maningi patinoita zvese zvatinokwanisa kuti ticumaere masoko akanaka ku vandhu vamweni.

17. Munojijenyi kuvha ku magama akanangwa ndi hambzaji Vhiky ngo pamusoro po muripo? (Nduyo 5:13)

 ¹⁷ Jehovha anoshandisa kusisira ko muripo kuna vaya vaanotendera. (1 Timoti 2:​5, 6) Asi tingati kudini kudari ticikavoni kuti tinotendehwa ndi Jehovha pikija tino rutendo ku muripo no kubhabhatijwa? Ceukijanyi kuti asipi mukuvo wese watinodikana kuthemba mazwiro edu, asi tinodikana kuthemba Jehovha. Iyena anovona vaya vano rutendo ku muripo inga vandhu vakarurama pa meso pake nokutizve anogondesa kuvakomborera. (Verenganyi Nduyo 5:13; Varoma 3:26) Kurangarijisisa ngo pamusoro po muripo zvakabesera hambzaji Vhiky. Njiku imweni novapera kurangarijisisa ngo pamusoro po muripo, ivona vakazwisisa kudari: “Jehovha wava anosengerera maningi na inini ko mukuvo wakareba . . . Mukusiyana, inini ndainga ndecimuvhunja kamare kuti: ‘Rudo hwenyu auzivi kukura zvakakwana kuti undinyise. Jehovha wainga ecieja ko mukuvo wakareba maningi kuti avonese kuti waindida.’” Vecirangarijisisa ngo pamusoro po muripo uwu, ivona vakatanga kuzwisisa kuti Jehovha waivada. Itusu tinozojizwavo tecidiwa ndi Jehovha no kuvona kuti tinotendehwa ndiyena patinorangarijisisa ngo pamusoro po muripo.

18. Tingathembenyi kudari tikaenderera mberi tecida Baba wedu vo kudenga?

¹⁸ Pikija kuti tingavangisira kuti tishandise zvatajija mu cijijo cino, mukuvo umweni tingasuruvara no kujivhunjisa kuti dangani ticiri kutendehwa ndi Jehovha kana kuti haiwa. Kudari izvi zvikamuitikira, ceukijanyi kuti iyena anoenderera mberi ecitendera “vaya vanoenderera mberi Vecimuda.” (Jakobo 1:12) Ngo kudaro, endereranyi mberi mecikhwedera phedo na Jehovha no kuvona kuti muciri kutendehwa ndiyena. Garanyi meciziva kuti Jehovha “aaripi ndhambo na itusu.’—Mabasa o Vapostori 17:27.