1. Muvhunjo wapi watingajiita?

NGUVA jimweni munogara mecithimwa-thimwa ngo kurangarira zviro zvinozoitika, zvakadari inga kupejwa ko zviara zvo kunyepa, kuhwisa ka Gogi wa Magogi no hondo yo Armagedhoni? Mungajivhunjisa kudari: ‘Panonga peciitika zviro izvi, kureva kuti ndinozokwanisa kuramba ndakagondeka?’ Kudari makamborangarira ngo pamusoro po shwiro iyi, magama akabhuiwa ndi Jesu anowanika pa vhesi yakacijikira musoro uu, anozomubesera. Jesu wakavhunja vajiji vake kudari: “Mucaregera mwoyo yenyu yecitambujika. Tendanyi Mwari; nditendenyivo.” (Johani 14:1) Rutendo hwakavanga hunozotibesera kuti tiramba takathiva azvinenyi kuti ngozvapi zvinozoitika kumbejiyo.

2. Tingaitisa kudini kuti tivangise rutendo hwedu? Ngozvapi zvatiri kuda kuvona pa musoro uu?

² Kudari tikarangarira zvatingaita wari uno patinosongana no zviro zvingaeja rutendo hwedu, tinozokwanisa kuziva kuti ngozvapi zvatingaita kuti tivangise rutendohwo. Patinorangarira ngo pamusoro pa izvi, tinozokwanisa kuvona mativi o rutendo hwedu anonga ecida kuvangiswa. Ngo kudaro, vhaza jese jatinocungirira muejo, rutendo hwedu hunovanga. Izvi zvinozotibeserazve kuti tikwanise kucungirira muejo jimweni jatinozosongana najo kumbeji. Pa musoro uu, tiri kuda kuvona mugariro murongomuna jakasongana no vajiji va Jesu, jinokhombija kuti ivona vaidikana kuva no rutendo hwakavanga. Tiri kuda kuvonazve kuti tingacungiririsa kudini zvineso zvakaezana nyamasi uno no kuvona manera azvingatinasirira kuitira muejo jo kumbeji.

3. Mateu 6:30, 33, ingatibesera kudini kuvona mativi atinodikana kuvangisa rutendo hwedu?

³ Ngo zvocibarihwe kuti musoro wo mbhuri, ade kupa zvokuha zvinokwana, zvokusimira no pokugara ku mukaji wake pomwe no vana. Nguva jese azvizivi kureruka kuzviita, mu njiku jino jokunesa. Pikija no kuvangisira kwese kwavanoita, hama jedu jiri kuruza mabasa no kutama kukwanisa kuwana amweni. Kuveni vamweni vari kuregera mabasa acikadikani kuithwa ngo Makristu. Pazvinoitika zviro zvakadari, tinodikana kuvangisa rutendo hwedu kuna Jehovha, toziva kuti iyena anozopa mbhuri yedu zvainoda. Jesu wakanasa kujekesa izvi kuno vajiji vake pa hurukuro yaakaita yo pa dundhu. (Verenganyi Mateu 6:30, 33.) Kudari tikakhohwa kamare kuti Jehovha aazotisii, tinozokwanisa kuramba tecimushandira. Patinovona kuti Jehovha ari kutibesera pa zvinodiwa zvedu zvo kunyama, tinozokhwedera maningi phedo naye, rutendo hwedu hunozovanga.

4-5. Ngozvapi zvakabesera mbhuri imweni yainga yecithimwa-thimwa ngo pamusoro po zvinodiwa zvayo zvokunyama?

⁴ Vonanyi kuti mbhuri imweni yo ku Vhenezuwera yakavonesa kudini besero ra Jehovha payainga yecithimwa-thimwa ngo zviro zvayainga yecida zvokunyama. Kareko, mbhuri ya hama Kastro yaiwana mare ngo kurima no kurera zvinyama mu kinta yavo. Tevere, mabhandidhu ainga no nvhuti akavatorera ndau yavo ovavangirija no mbhuri yavo kuti vabude mu ndau iyi. Baba vakona vanodanijwa Migeri vakati: “Itusu wari tiri kupona ngo kurima mu cindau cidoko catakashongejwa ngo vamweni. Ndinotanga ngo kuita mukumbiro njiku jese, ndecikumbira Jehovha kuti atipe zvatinoda pa njiku yondhoyo.” Upenyu huri kunesa maningi kuno mbhuri iyi. Asi ngo kuthemba Baba wavo vano rudo kuti vanovapekeja zvavanoda nguva jese, mbhuri ya hama Kastro nguva jese iri kwenda kumusongano no kuita basa ro kucumaera. Ivona vari kudira pa ndau yo kutanga zvinodiwa zvo Umambo mu upenyu hwavo. Ngo kudaro, Jehovha ari kuvapa zvavanoda.

⁵ Pa mukuvo uu wokunesa, hama Migeri no mukaji wavo hambzaji Yurai, vakathemba kamare kuti Jevhovha waizovakorondha. Nguva jimweni, Jehovha waishandisa hama no hambzaji kuti vavape zvavanoda no kubesera hama Migeri kuti vawane basa. Nguva jimwenizve Jehovha waishandisa betheri kuti rivape zvimweni zvavainga vecida. Jehovha aazivi kumbovasiya, inga muviyo ivona vakavona rutendo hwo mbhuri yavo hwecikura. Pavakapera kuvona manera avakabesehwa ndi Jehovha, mwanavo wo dangwe Yoserini wakati: “Zvinovangisa maningi kuvona manera atakabesehwa ndi Jehovha. Iyena i shamwari yangu, nguva jese ndinothemba kuti anozondibesera.” Yoserini wakaengejera eciti: “Zvineso zvatakasongana nazvo inga mbhuri, zvakatinasirira kuitira muejo jatinozosongana najo kumbeji.”

6. Mungavangisa kudini rutendo hwenyu pamunonga mecisotana no cineso co kutama mare?

⁶ Muri kusongana no cineso co kutama mare here? Kudari ndizvona, uwu i mukuvo unonesa maningi kwamuri. Asi pamunonga mecisongana  no mugariro uu, mungatoshandisa nguva iyi kuti muvangise rutendo hwenyu. Itanyi mukumbiro kuna Jehovha no kuverenga masoko a Jesu anowanika pana Mateu 6:25-34 no kumarangarijisisa. Vonanyi muezaniso ja wari jinovonesa kuti Jehovha anobesera vaya vanoramba vakabatikana mu zviro zvo umwari. (1 VaKorinte 15:58) Izvo zvinozovangisa kuthemba kwedu kuti kudari Jehovha wakabesera vamweni vainga no mugariro jakadari, iyena anozotibeseravo. Iyena anoziva zviro zvamunoda no kuziva manera aangamupa zvirozvo. Pamunovona besero ra Jehovha mu upenyu hwenyu, rutendo hwenyu hunozokura, mozokwanisa kucungirira zvineso zvakawanda kumbejiyo.—Habakuki 3:17, 18.

7. Mukuzwirana na Mateu 8:23-26, “zibepo” rakaejesa kudini rutendo hwo vajiji va Jesu?

⁷ Jesu no vajiji vake pavakasongana no mbhepo mu jombe, iyena wakashandisa ciitiko ici kuti avabesere kuvona mativi avaidikana kuengejera rutendo hwavo. (Verenganyi Mateu 8:23-26.) Mbhepo iyi yainga yakavanga zvokuti kumwa yakatozaja ngarava yavo, asi Jesu wainga akatonasa kuvata hake. Vajiji pavainga vecithya vecienda kuna Jesu vecimukumbira kuti avaponese, iyena wakavavhunjisa kudari: “Munothya ngenyi, imwimwi vandhu vacina rutendo hwakavanga?” Vajiji vaithyaya vaidikana kuzwisisa kuti Jehovha waizongwarira Jesu na vaya vaainga navo kuti vatame kukhuvazika. Tinojijenyi nga izvi? Rutendo hwakavanga hungatibesera kuti tikwanise kucungurira “zibepo” kamare kana cineso ciri cese cakadari inga zibepo.

8-9. Rutendo hwa hambzaji Aneri wakaejeswa kudini, zvicinyi zvakavabesera?

⁸ Vonanyi kuti hambzaji Aneri vacizivi kurovohwa vanogara ku Porto Riko, vakavangisa kudini rutendo hwavo pakupera kusongana no cineso. Ivona vakasongana no “zibepo” kamare. Cineso ici cakatanga mu gore ro 2017 apo zibepo raidanwa Mariya porakaphwanya nyumba yavo. Inga muviyo wo zibepo iri, ivona vakaruza basa. Hambzaji Aneri vakati: “Mu njiku iji jinonesa, ndaithimwa-thimwa maningi, asi ndakajijira kuita mukumbiro kuna Jehovha. Andizivi kutendera kuti kuthimwa-thimwa, kundiimise kuita zvandaidikana kuita.”

⁹ Hambzaji Aneri vakananga kuti kuzwira kwakavabesera kuti vahwisane no zvineso zvavaisongana nazvo. Ivona vakati: “Kuteverera ndhungamiriro jo sangano ra Jehovha kwakandibesera kuti ndirambe ndakagajana. Jehovha wakandibesera ecishandisa hama no hambzaji. Ivona vakandivangisa no kundipa zvandaida kuti ndikwanise kupona.” Ivona vakaengejera veciti: “Jehovha wakandipa zvakawanda maningi kupinda zvandaida. Izvi zvakavangisa maningi rutendo hwangu.”

10. Ngozvapi zvamungaita kudari mukasongana no “zibepo”?

¹⁰ Imwimwi muri kusongana no “zibepo” mu upenyu hwenyu? Kangaije muri kutambujika ngo ngozi jinoitika jega. Kana mutori no zibepo ro kuezanisira, rakadari inga cineso co uhomi cinomuita kuti mugare makasuruvara mokonehwa kuziva cokuita. Nguva jimweni mungathimwa-thimwa, asi mucatendera kuti kuthimwathimweko kumuite kuti mutame kuthemba  Jehovha. Kwederanyi phedo naye ngo kuita mukumbiro ngo mwoyo wese. Vangisanyi rutendo hwenyu ngo kurangarijisisa ngo manera omakabesehwa ndi Jehovha kareko. (Nduyo 77:12, 13) Ivanyi no cokwadi co kuti iyena aazomusii, kutangira wari uno no kumbejiyo.

11. Ngenyi tinodikana kutema civaringo co kuzwira vaya vanotungamirira?

¹¹ Zvicinyi zvamungaitazve zvingamubesera kuti mukwanise kucungirira zvineso? Hambzaji Aneri vakananga ciro cimwe, kuzwira. Jijiranyi kuthemba vaya vanothembwa ndi Jehovha na Jesu. Nguva jimweni, vaya vakagajwa kuti vatungamirire vangatipa ndhungamiriro jatingavona kuti ajishandi. Asi Jehovha anokomborera vandhu vanozwira. Tinoziva izvi kuvha mu Soko rake no muezaniso wo hama no hambzaji jedu. (Exodo 14:1-4; 2 Kronike 20:17) Rangarijisisanyi ngo pamusoro po muezaniso iji. Kurangarijisisa uku, kunozomubesera kuti mukwanise kuzwira ndhungamiriro jo sangano wari uno pomwe no kumbejiyo. (Vahebheru 13:17) Imwimwi amuna no thangwe riri rese ro kuthya dambujiko guru riri kuviyari.—Mazwi Akangwara 3:25.

12. Kuitisa kudini Ruka 18:1-8, inotibesera kuvona kuzwirana ko rutendo no kucungirira kushaisha kutajwa?

¹² Jesu waizviziva kuti kushaisha kutajwa cainga cineso caizoeja rutendo hwo vajiji vake. Kuti avabesere kunyisa cineso ici, iyena wakavaitira muezaniso unowanika mu bhuku ra Ruka. Jesu wakavavhunja ngo shitoriya yo noni yaideketerera mambo acizivi kururama kuti atonge shwiro yayo. Noni iyi, yainga no cokwadi co kuti kudari noyaienderera mberi yecideketera, mambo waizoipurukira. Pakupejisira, mambo uwu wakatonga shwiroyo. Tinojijenyi? Jehovha asipi mundhu acizivi kururama inga mutongi wo pa muezaniso wa Jesu. Jesu wakati: “Waro, Mwari aazotongi ngo njira yakarurama ku vasanwi vake vanokhuwa kwaari usiku no masikati?” (Verenganyi Ruka 18:1-8.) Perapo Jesu wakaengejera eciti: “Mwana wo mundhu paanozoviya anozokhanda kamare rutendo hwakadari pa nyika?” Patinonga tecishaisha kutajwa, tinodikana kuvonesa ngo kusengerera kwese no kucungirira kuti tino rutendo hwakavanga inga hwo noni iya. Ngo rutendo hwakadari, tingathemba kamare kuti pa nguva iri yese Jehovha anozotibesera. Tinodikana kuthemba kuti mukumbiro jina simba maningi. Nguva jimweni mukumbiro jedu jingatodavihwa ngo njira yoticingaveteri.

13. Mukumbiro wakabeseresa kudini mbhuri yainga yecishaisha kutajwa?

¹³ Vonanyi zvakaitika no hambzaji inodanijwa Vhero, inogara ku Repubrika Dhemokratika dhu Khongo. Hambzaji Vhero, mwamuna wavo vacikaripi Capupu no mwana wavo wokaji wo dangwe ano gumi na mashanu o makore, vakadikana kutiza ku ndharaudha yavaigara ngokuti kwainga kwecihwiswa ngo masoca. Pavainga vari mu gwanja mbhuri iyi yakaimiswa ngo masoca vovavhunja kuti vaida kuvauraya. Hambzaji Vhero povakatanga kucema, mwana wavo wokaji wakavanyaraja ngo kuita mukumbiro ngo izwi guru no kunanga zina ra Jehovha ko vhaza jakawanda pa mukumbiro wake. Iyena paakapeja kuita mukumbiro,  mutungamiriri wo cikwata co masoca wakamuvhunjisa kudari, “Iwe cimusikanewe, ndiyani wakakujijisa kuita mukumbiro?” Iyena wakadavira kuti, “Mai wangu ndivona vakandijijisa, vecishandisa muezaniso unowanika pana Mateu 6:9-13.” Mutungamiriri wo masoca wakati, “Pindai no vabari vako mu runyararo, Jehovha Mwari wenyu ngaamungwarire.”

14. Zvicinyi zvingaeja rutendo hwedu, ngozvapi zvingatibesera kucungirira?

¹⁴ Muezaniso jakadari inga iji, jinotijijisa kuti narini ticadokanganwa kuti mukumbiro jinoshanda. Waro, tingati kudini kudari mukumbiro jenyu jikanonoka kudavihwa kana kutotama kudavihwa ngo njira inoshamaisa? Inga noni yo pa muezaniso wa Jesu, rambanyi meciita mukumbiro mecithemba kuti Mwari wedu narini aazomusii. Cimwenizve, pa nguva iri yese ngo njira iri yese anozodavira mukumbiro jenyu. Endereranyi mberi mecikumbira kuti Jehovha amupe mujimu wake mucena. (Vafiripi 4:13) Ceukijanyi kuti ngo kukasika Jehovha anozomukomborera maningi, mozokanganwa matambujiko ese omakasongana nawo. Pamunocungirira zvineso ngo besero ra Jehovha munozova vakavanga, mozokwanisa kucungirira zvineso kumbejiyo.—1 Pedhru 1:6, 7.

15. Mukuzwirana na Mateu 17:19, 20, cineso capi cakasongana no vajiji va Jesu?

¹⁵ Jesu wakajijisa vajiji vake kuti rutendo unozovabesera kunyisa cineso ciri cese cingaviya. (Verenganyi Mateu 17:19, 20.) Pa vhaza imweni, ivona vakakonehwa kugogomera dhimoni, pikija kuti vainga vakakwanisa kuzviita pa vhaza imweni. Ngocapi cainga cineso? Jesu wakananga kuti ivona vaidikana kuva no rutendo hwakakura. Iyena wakavavhunja kuti kudari novainga no rutendo hwakakura, vaizokwanisa kunyisa zvineso zvakadari inga dundhu. Nyamasi uno, tingasonganavo no zvineso zvingavoneka inga kuti zvinonesa maningi kuzvicungirira.

16. Rutendo wakabeseresa kudini hambzaji Geidhi kuti vacungirire pasure po kuurawa ko mwamunavo?

¹⁶ Vonanyi muezaniso wa hambzaji Geidhi, vanogara ku Gwatemara. Mwamuna wayo Edhi, wakauraiwa paainga ecivha kumusongano ecienda kumuzi. Rutendo wakabeseresa kudini hambzaji Geidhi kuti vahwisane no kusuruvara uku? Ivona vakati: “Kuita mukumbiro kwakaita kuti ndithure muthwaro wangu kuna Jehovha, zvoita kuti ndive no runyararo. Jehovha wakanditaja ecishandisa mbhuri yangu pomwe no shamwari jo ku ungano. Kubatikana pa kushandira Jehovha kwakandiita kuti nditame kuhwajihwa maningi. Zvakandibesera kuti ndipone njiku imwe nga imwe ndicikathimwi-thimwi ngo zvamangwana. Kuvha pa zvandakasonganari nazvo, ndakajija kuti tinozokwanisa kucungirira zvineso zvingazoviya kumbeji ngo besero ra Jehovha, Jesu no sangano.”

17. Ngozvapi zvamungaita kudari mukasongana no zvineso zvakadari inga dundhu?

¹⁷ Makasuruvara ngo kufa ko mundhu wamunoda here? Psakanyi mukuvo wo kuvangisa rutendo hwenyu ngo pamusoro po vetero  yo vakafa, ngo kuverenga zviitiko zvo Bhaibheri zvinobhuya ngo vaya vakamuswa. Makasuruvara ngo ndava yo umwe wo pa mbhuri penyu wakajingwa? Jijanyi kuti mukhohwe kuti mbhangiro yatinopuwa ndi Mwari nguva jese yakanaka. Azvinenyi kuti cineso capi camuri kusongana naco, shandisanyi cinesoco inga mukana wo kuvangisa rutendo hwenyu. Vhunjanyi Jehovha zvese zvamuri kuzwa. Mucadogara mwega, rambanyi muri phedo no hama no hambzaji jenyu. (Mazwi Akangwara 18:1) Itanyi mabasa anomubesera kuti mucungirire, pikija mungamaita meciceukija zviro zvinomusuruvarisa. (Nduyo 126:5, 6) Endereranyi mberi mecienda kumusongano, kuita basa ro kucumaera no kuverenga Bhaibheri. Rambanyi mecisotesesa makomborero amuri kugondeswa ndi Jehovha kumbejiyo. Kudari mukavona manera amuri kubesehwa ndi Jehovha, rutendo hwenyu hunozovanga maningi.

18. Pamunovona kuti rutendo hwenyu huri kurembejeka, ngozvapi zvamungadikana kuita?

¹⁸ Kudari zvineso zvomakasongana nazvo kare no zvamuri kusongana nazvo wari, zviri kurembesa rutendo hwenyu, mucadosuruvara. Zvivonenyi inga mukana wokuvangisa rutendo hwenyu. Itanyi cikumbiro cakaezana no cakaitwa ngo vapostori va Jesu, povakati: “Engejeranyi rutendo hwedu.” (Ruka 17:5) Cimwenizve, rangariranyi ngo muezaniso jotabhuya pa musoro uwu. Inga ndi hama Migeri na hambzaji Yurai, ceukijanyi mukuvo wese wo makabesehwa ndi Jehovha. Inga ndi mwana wokaji wa hambzaji Vhero na hambzaji Aneri, itanyi mukumbiro kuna Jehovha mucikarembi, maningi-ningi pamunonga mecisongana no zvineso zvakakura. Inga ndi hambzaji Geidhi, zivanyi kuti Jehovha angamupa zvamunoda ecishandisa vo pa mbhuri no shamwari. Pamunotendera kuti Jehovha amubesere kucungirira zvineso zvamuri kusongana nazvo wari, munozova no cokwadi co kuti iyena anozomubesera kuti mukwanise kucungirira zvineso zvamungasongana nazvo kumbejiyo.

19. Jesu waithembenyi, imwimwi mungava no cokwadi cenyi?

¹⁹ Jesu wakabesera vajiji vake kuti vavone mativi avaidikana kuitisa nane rutendo hwavo. Asi wainga acikakani-kani kuti Jehovha, waizovabesera kuti vakwanise kunyisa zvineso zvavaizosongana nazvo kumbejiyo. (Johani 14:1; 16:33) Iyena waithemba kuti rutendo hwakavanga waizoita kuti vandhu vakawanda vakwanise kupona pa dambujiko guru. (Apokaripsi 7:9, 14) Imwimwi munozovavo umwe wo vandhu ava here? Ngo besero ra Jehovha imwimwi munozova umwe wavo, kudari mukaita zvese zvamunokwanisa wari kuti muvangise rutendo hwenyu.—Vahebheru 10:39.