1. Jehovha anoda kuti tiitenyi?

RUDO ucingacinji unosisira maningi kuna Jehovha. (Hoseya 6:6) Iyena anoda kuti vashandiri vake vavonevo kuti rudo ucingacinji unosisira maningi. Ecishandisa muporofita Mika, Mwari wakati: ‘Idanyi rudo ucingacinji.’ (MIKEYA 6:8, Sandujo yo Nyika Imbza, masoko o pasi mu Cishona.) Zvakajeka kuti ticito taita izvi, tinodikana kuziva kuti rudo ucingacinji icinyi.

2. Icinyi rudo ucingacinji?

² Icinyi rudo ucingacinji? Gama ro kuti rudo ucingacinji rinowanika mu ndau jakawanda mu Sandujo yo Nyika Imbza yo Matahwa Akacena, mu Cishona. Icinyi kamare rudo ucingacinji? Mukuzwirana no “Kusananguhwa ko Magama o mu Bhaibheri” anowanika mu sandujo iyi, gama ro kuti “rudo ucingacinji, rinoda kureva rudo unovha pa kujipira, kugondeka no kudisa maningi mundhu. Kazinji irona rinoshandiswa pa rudo una Mwari kuno vandhu no rudo unokhombijirana vandhu ngocavo.” Jehovha imuezaniso mukuru kamare wo mundhu anokhombija rudo ucingacinji. Pa musoro uwu, tiri kuda kuvona kuti Jehovha anokhombijisa kudini rudo ucingacinji kuno vandhu. Pa musoro unotevera, tinozovona kuti tingatevejeresa kudini Jehovha pa kukhombijirana rudo ucingacinji.

3. Jehovha wakanangenyi ngo pamusoro pake ecivhunja Mosi?

³ Vaiziraeri novacina nguva yakareba no vabuda mu Ejipita, Jehovha wakavhunja Mosi ngo pamusoro po zina rake no mugariro jake. Iyena wakati: “Tenji Mwari! Tenji Mwari. Mwari anounyaxa no usizi, anononoka kuceneka, wakazara ngo rudo [ucingacinji], anongwarira rudo hwake ku bziuru bzo mubarihwana,  anokungurira uposi, uxaixi no uphambanisi.” (Exodo 34:6, 7) Ngo magama aya anodakajisa maningi ngo pamusoro po mugariro jake, Jehovha wakavhunja Mosi ciro cinosisira maningi co rudo hwake ucingacinji. Ngocapi?

4-5. (a) Jehovha wakanangenyi ngo pamusoro pake? (b) Muvhunjo japi jatinoda kudavira pa musoro uwu?

⁴ Jehovha aazivi kunanga basi kuti iyena ano rudo ucingacinji, asi iyena wakananga kuti “wakazara ngo rudo [ucingacinji].” Magama aya o kuti “wakazara ngo rudo [ucingacinji,” anowanika vhaza jakawanda mu Bhaibheri. (Bziverengo 14:18; Neemia 9:17; Nduyo 86:15; 103:8; Joeli 2:13; Jona 4:2) Pese panonga pecinangwa magama aya anonga ecinangira Jehovha haiwa vandhu. Azvidakajisi kuziva kuti Jehovha wakaita kuti rudo hwake ucingacinji uzivike? Pacina kukana-kana, rudo ucingacinji unosisira maningi kwaari. Izvi ndizvona zvakaita kuti Mambo Dhavhidhi anange kudari: “Tenji Mwari, rudo hwenyu [ucingacinji unoguma] mu gore, . . . Rudo hwenyu Mwari, huno mutengo mukuru! Ngokudaro vana va Adamu vanojithavira pasi po mapapiro enyu.” (Nduyo 36:6, 8) Dhavhidhi waibongesera maningi ngo rudo ucingacinji hwa Mwari. Kureva kuti itusu tinavo mazwiro akafanana here?

⁵ Kuti tinase kuzwisisa kuti rudo ucingacinji icinyi, ngatende tidavire muvhunjo muviri: Jehovha anokhombijira ani rudo hwake ucingacinji? Rudo hwondhohwo unotibeseresa kudini?

6. Jehovha anokhombija rudo ucingacinji kuno ani?

⁶ Jehovha anokhombija rudo ucingacinji kuna ani? Bhaibheri rinonanga kuti itusu tingada zviro zvakawanda, zvakadari inga ‘kurima,’ “doro no mafuta” pomwe no ‘uzivi,’ kuverenga kuda. (2 Kronike 26:10; Mazwi Akangwara 12:1; 21:17; 29:3) Asi atikwanisi kukhombija rudo ucingacinji kuno zviro, zvinokwanisika basi kukhombija rudo uhu kuno vandhu. Asi Jehovha aakhombiji rudo hwake ucingacinji kuno mundhu ari wese. Iyena anokhombija rudo uhu kuno vaya vari shamwari jake jo phedo kamare. Mwari wedu wakagondeka kuno shamwari jake. Iyena anocidisiso cinoshamaisa maningi kuno shamwari jake, narini aazombovasii.

7. Jehovha wakakhombijisa kudini rudo kuno vandhu vese?

⁷ Jehovha wakakhombija rudo kuno vandhu vese. Jesu wakananga kudari kuno mwanarume umweni anodanwa Nikodhemo: “Mwari wakadisa vandhu vo nyika ino, ngo kudaro, wakavapa Mwana wake, wakabahwa ari ega, kuti vese vanomutenda vatame kuparajwa, asi vawane upenyu hucikaperi.”—Johani 3:1, 16; Mateu 5:44, 45.

8-9. (a) Ngenyi Jehovha anokhombija rudo ucingacinji kuno vashandiri vake? (b) Ngozvapi zvatinoda kuvona wari?

 ⁸ Inga zvotavonaya pakutanga, Jehovha anokhombija rudo hwake ucingacinji basi kuno vaya vano ushamwari hwo phedo maningi naye, vashandiri vake. Izvi tinokwanisa kuzvivona kuvha pa zvakatahwa ndi Mambo Dhavhidhi no muporofita Dhaniyeri. Inga muezaniso, Dhavhidhi wakati: “Munopa unyaxa hwenyu vaya vanomuziva.” “Asi rudo hwa Tenji Mwari huriyo kubvira kare no kare, hunozondogara mbhera narini, kuna vaya vanomuthya.” Dhanieri wakati: “Yowe, Tenji Mwari mukuru no wokuthisa, munongwarira Citenderano no rudo ko vanomuda, voteveja mupango yenyu.” (Nduyo 36:11; 103:17; Danieli 9:4) Mukuzwirana no masoko aya akafemehwa, Jehovha anokhombija rudo hwake ucingacinji kuno vashandiri vake, ngokuti ivona vanomuziva, vanomuthya, vanomuda no kungwarira mupango yake. Rudo ucingacinji imugariro unokhombijwa ndi Jehovha kuno vanamati vake basi.

⁹ Ticito tashandira Jehovha iyena waitikhombijira rudo waanokhombijira vandhu vese. (Nduyo 104:14) Asi patakava vanamati vake iyena wakatanga kutikhombijira rudo hwake ucingacinji. Zvokadi kamare, Jehovha anogondesa vashandiri vake kuti: “Rudo hwangu komuri ahuzophinduki.” (Isaia 54:10) Dhavhidhi wakavona kuti izvi zvainga zvokadi kamare, paakati: “Tenji Mwari anoitira muxamaiso vatendi vake.” (Nduyo 4:4) Zvecivoneka kuti Jehovha anotitaja ngo njira inosisira, izvo zvinotivangisa kuti tiitenyi? Mutari wo nduyo wakati: “Ndiani muzivi? Ngaavone ibzi, anozwisisa unaki hwa Tenji Mwari!” (Nduyo 107:43) Tecirangarira zano iri rakafemehwa ro Bhaibheri, ngativone zviro zvitatu zvingaizwa ngo vashandiri va Jehovha kuti vabesereke ngo rudo ucingacinji unokhombijwa ndiyena.

10. Tinobesereka kudini ngo kuziva kuti rudo ucingacinji hwa Jehovha auzoperi? (Nduyo 31:8)

¹⁰ Rudo ucingacinji hwa Jehovha auzoperi. Magama aya anosisira o rudo ucingacinji anonangwa vhaza jinokwana kuita makumaviri na tandhatu mu bhuku ra Nduyo 136. Pa vhesi yokutanga tinoverenga kudari: Bonganyi  “Tenji Mwari ngokuti wakanaka, ngokuti rudo hwake [ucingacinji] ahuzoperi.” (Nduyo 136:1) Pa vhesi yo 2 mbhera 26, tinoverenga magama okuti: “Rudo hwake [ucingacinji] ahuzoperi.” Kuveni patinonga teciverenga mavhesi amweni o nduyo iyi, tinoshamaiswa ngo kuvona njira jakasiyana-siyana jo kuti Jehovha anokhombija rudo hwake ucingacinji, zvokuti narini aazosii kuzviita. Magama okuti “rudo hwake [ucingacinji] ahuzoperi,” anotikhohwesa kuti rudo hwa Mwari kuno vandhu vake ngo wo kugondeka. Zvinodakajisa maningi kuziva kuti Jehovha aazombosii vashandiri vake. Kusiyapo zvondhozvo, iyena anotaja vashandiri vake no kugara ku divi ravo, maningi-ningi pa nguva javanonga vecisongana no zvineso. Tinobesereka kudini? Kuziva kuti Jehovha anotitaja, zvinotipa mudakaro no simba ratinoda kuti tikwanise kuhwisana no zvineso zvedu no kwenderera mberi tecifamba mu gwanja ro upenyu.—Verenganyi Nduyo 31:8.

11. Mukuzwirana na Nduyo 86:5, zvicinyi zvinoita kuti Jehovha ade kuregerera?

¹¹ Rudo ucingacinji hwa Jehovha unomuita kuti aregerere. Jehovha anovona kamare mushaishi paanokhauya no kusiya kuita zvakashata. Pa mugariro iji, rudo hwake ucingacinji unomuita kuti aregerere. Mutari wo nduyo Dhavhidhi wakananga kudari ngo pamusoro pa Jehovha: “Aatiitiri ngokuteveja kuposa kwedu, aatihwirijiri inga bzinofanera bzixaixi bzedu.” (Nduyo 103:8-11) Dhavhidhi pacake waizviziva kuti zvinohwaja maningi kuva no hana inorema. Asi iyena waizivazve kuti Jehovha wakanasiririka kuti ‘akungurire.’ Zvicinyi zvinoita kuti Jehovha aregerere? Mupinguro tinouwana pana Nduyo 86:5. (Verenganyi.) Ndizvona kamare, inga zvakananga Dhavhidhi pa mukumbiro wake, Jehovha anoregerera ngokuti kukura ko rudo hwake ucingacinji kunomuita kuti iyena aite izvi kuno vaya vanokumbira kuregerehwa.

12-13. Zvicinyi zvingatibesera kudari tikagara takasuruvara ngo zvishaishi zvotakaita kare?

¹² Patinoita cishaishi, zvokadi kamare zvinotodikana izvakanaka kujipa ndava. Kuva no mazwiro aya kunozotibesera kuti tikhauye no kuita zvinodikana kuti tisiye kuita zvakashata. Asi vashandiri vamweni va Mwari vanojipa  maningi ndava ngo zviro zvavakaita kare. Ivona vanorangarira kuti Jehovha aazivi kuvaregerera ngo zviro zvavakaita, azvinenyi kuti ivona vakakhauisa kudini. Makambovavo no mazwiro akadari inga aya? Kudari ndizvona, ceukijanyi kuti Mwari wakanasiririka kuti akhombije rudo hwake ucingacinji kuno vashandiri vake.

¹³ Tinobesereka kudini? Pikija no kutama kukwana kwedu, tingava no mudakaro ngo kushandira Jehovha no hana yakacena. Izvi zvinokwanisika ngokuti “ngazi ya Jesu, Mwana wake, inotisuka ku zvishaishi zvese.” (1 Johani 1:7) Kudari nguva jimweni munogara makasuruvara ngo ndava yo cishaishi co makaita, ceukijanyi kuti Jehovha wakanasiririka kuti aregerere mushaishi anokhauya. Iyena anoda kuzviitadi kamare. Vonanyi basi manera Dhavhidhi wakaezanisa rudo ucingacinji hwa Jehovha no kuregerera. Iyena wakatara kudari: “Inga denga rakakura panyezuru po nyika, ngokudaro hwakakura rudo hwake kuno vanomuthya. Inga kumabvazuva kuri ndhambo no kumavirira, ngokudaro anoreesa kotiri bzokuposa bzedu.” (Nduyo 103:11, 12) Izvi zvinovonesa kuti Jehovha “anokungurisisa” kamare.—Isaia 55:7.

14. Dhavhidhi wakasanangurisa kudini jiviriro yatinopuwa ngo rudo ucingacinji hwa Jehovha?

¹⁴ Rudo ucingacinji hwa Mwari unotijivirira. Paainga eciita mukumbiro kuna Jehovha, Dhavhidhi wakati: “Ndimwi citiziro cangu, munondingwarira pa bonezi; munonditendeneja ngo ndumbo jo rusujunuko . . . vaya vanogonda Tenji Mwari vanodiswa ngo rudo hwake [ucingacinji].” (Nduyo 32:7, 10) Mu nguva jo kare, madhorobha aigara akatendenejwa ngo mufimbiji kuitira kujivirira vandhu kuno vavengi vavo. Mu njira yakafanana, rudo ucingacinji hwa Jehovha, wakadari inga mufimbiji unotijivirira kuno ciri cese cingakhuvaza ushamwari hwedu naye. Kusiyapo zvondhozvo, rudo ucingacinji hwa Jehovha unotikwevera kwaari.—Jeremia 31:3.

15. Ngenyi rudo ucingacinji hwa Jehovha ungaezaniswa no citiziro pomwe no rusingo hwakavanga?

¹⁵ Dhavhidhi wakaita muezaniso umweni kuti asanangure jiviriro inoashira vandhu va Mwari. Iyena wakatara kudari: “Ngokuti makaita rusingo hwangu, Mwari wondinoda.” Dhavhidhi wakanangazve kudari ngo pamusoro pa Jehovha: “Ndiyena rudo hwangu, simba rangu, rusingo hwangu hwakavanga, musujunuri wangu, muthavo wo ndinotizira, anondipa simba ro kunyisa vandhu.” (Nduyo 59:17; 144:2) Ngenyi Dhavhidhi wakaezanisa rudo ucungacinji hwa Jehovha no citiziro pomwe no rusingo hwakavanga? Azvinenyi kuti ngokwapi kwatinogara, Jehovha anogondesa kuti, kudari tikava vashandiri vake iyena anozojivirira ushamwari hwedu naye. Tinowanazve cigondiso ici pana Nduyo 91. Mutari wo nduyo iyi wakati: “Bvunjai Tenji kuti: ‘Ndimwi citiziro cangu, rusingo hwangu.’” (Nduyo 91:1-3, 9, 14) Mosi wakaezanisiravo Jehovha no citiziro. (Nduyo 90:1) Mukuvo mushoma acito afa, Mosi wakaengejera ciro cinosisira maningi, iyena wakati: ‘Mwari ndiyena citiziro kuvhira kare, nyara jake jicikagumi jiri pasi pako.’ (Deuteronòmio 33:27, Sandujo yo Nyika Imbza, mu Cishona) Magama okuti ‘nyara jake jicikagumi jiri pasi pako,’ anotijijisenyi ngo pamusoro pa Jehovha?

16. Ngoapi makomborero maviri atinao? (Nduyo 136:23)

¹⁶ Patinoita kuti Jehovha ave citiziro cedu, tinojizwa takangwaririka. Pikija zvakadaro, njiku jimweni tingajizwa takarembejeka kamare ticikatokwanisi no kumuka. Jehovha anotibeseresa kudini pa mugariro wakadari? (Verenganyi Nduyo 136:23.) Iyena anotibata ngo mukono wake, wotimusa no kutibesera kuti tirambe takaima. (Nduyo 28:9; 94:18)  Tinobesereka kudini? Kuziva kuti tingakwanisa kuwana besero ra Mwari, zvinoticeukija makomborero maviri atinao. Makomborero okutanga ngo okuti, tinonga tino citiziro cakangwaririka azvinenyi kuti ngokwapi kwatinonga teciponera. Makomborero ocipiri ngo okuti, Baba wedu vo kudenga vanoneseka maningi ndisu.

17. Tingava no cokwadi capi ngo pamusoro po rudo ucingacinji hwa Jehovha? (Nduyo 33:18-22)

¹⁷ Inga zvataperari kuvona, tingava no cokwadi co kuti kudari tikasongana no cineso ciri cese, Jehovha anozotibesera kuti tienderere mberi takagondeka kwaari. (2 VaKorinte 4:7-9) Muporofita Jeremiya wakati: ‘Rudo ucingaciji hwa Jehovha ndiwona wakaita kuti ticapejwa, ngokuti usizi hwake auzoperi.’ (Macumbiro 3:22, Sandujo yo Nyika Imbza, mu Cishona) Tingava no cokwadi co kuti rudo ucingacinji hwa Jehovha unozogara na itusu, ngokuti mutari wo nduyo wakatigondesa kuti: “Jiso ra Tenji Mwari riri panyezuru pa vaya vanomuthya, panyezuru pa vaya vanovetera rudo hwake [ucingacinji].”—Verenganyi Nduyo 33:18-22.

18-19. (a) Ngozvapi zvatinodikana kuramba teciceukija mukuvo wese? (b) Tinoda kuzovonenyi pa musoro unotevera?

¹⁸ Ngozvapi zvatinodikana kuramba teciceukija mukuvo wese? Ticito tatanga kushandira Jehovha iyena waitikhombijira rudo waikhombija kuno vandhu vese. Asi patakava vashandiri vake, iyena wakatanga kutikhombijira rudo ucingacinji. Ecindundihwa ngo rudo, Jehovha wakatingwarira mu nyara jake jinongwarira. Iyena anozoramba nguva jese ana itusu no kukwanirisa zvese zvaagondesa. Jehovha anoda kuti itusu tinase kubudirira kamare. (Nduyo 46:2, 3, 8) Ngo kudaro, azvinenyi kuti izvineso zvapi zvatiri kusongana nazvo, Jehovha anozotipa simba ratinoda kuti tienderere mberi takagondeka kwaari.

¹⁹ Mbhera wari tavona kuti Jehovha anokhombijisa kudini rudo ucingacinji kuno vashandiri vake. Iyena anovetera kuti itusu tikhombijevo rudo ucingacinji kuno vamweni. Tingazviitisa kudini zvondhozvo? Musoro unotevera unozobhuya ngo pamusoro po shwiro iyi inosisira maningi.