1. Tingaitisa kudini kuti tive vandhu vakarinda? (2 Timoti 4:5)

 PATINOSONGANA no zvineso mu upenyu, kugondeka kwedu kuna Jehovha no kuno sangano rake kungava pamuejo. Waro zvicinyi zvatingaita? Tinodikana kuva vandhu vakarinda, vakangwara no vakavanga mu rutendo. (Verenganyi 2 Timoti 4:5.) Tinokwanisa kuva vandhu vakarinda kudari tikava vandhu vakathiva, vanonasa kurangarira no vanovangisira kuti vavone zviro manera Jehovha anozvivona. Tikaita kudaro, murangariro wedu auzopsaswi ngo mazwiro edu.

2. Ngozvapi zvatinozovona pa cijijo ici?

² Mu cijijo cakapera, takavona zvineso zvitatu zvingaviiswa ngo vandhu vacikaripi hama jedu. Mu cijijo ici, tinozovona zvineso zvitatu zvingaviiswa ngo hama no hambzaji jedu, zvingaeja kugondeka kwedu kuna Jehovha. (1) Patinorangarira kuti hama yashaisha kutitaja, (2) patinoashira mbhangiro no (3) patinotinonesehwa kuzwiranisa no cinjo yaitwa ngo sangano. Kudari tikasongana no cimwe co zvineso izvi, ngozvapi zvatinodikana kuita kuti tienderere mberi takarinda no kuva takagondeka kuna Jehovha no kuno sangano rake?

3. Ngozvapi zvingaitika kudari tikavona kuti hama kana hambzaji yashaisha kutitaja?

³ Imwimwi makambonyangajwa ngo zviro zvakanangwa ngo hama iri yese, kana mukuru wo mu ungano? Zvingaita kuti iyena aacaidepi kumunyangajisa. (Varoma 3:23; Jakobo 3:2) Pikija zvakadaro, imwimwi makanyangajwa ngo zvakaitikaro. Kangaije zvondhozvo zvakatomuita kuti mutame kuvata ushoni. Kana makatoguma pakutojivhunjisa kudari: ‘Kudari hama ingaguma pa kuita  zviro zvakadari, kureva kuti iri ndi sangano ra Jehovha kamare?’ Sathana anoda kuti itusu tirangarire kudaro kamare. (2 Vakorinte 2:11) Kurangarira ngo njira iyi, kungatotiita kuti tisiye kushandira Jehovha no kusiya sangano rake. Waro, kudari tikavona kuti hama kana hambzaji yashaisha kutitaja, ngozvapi zviro zvingatibesera kuti tirambe takarinda no kutama kurangarira zviro zvakashata?

4. Josefa wakaitisa kudini kuti aenderere mberi wakarinda pikija paakashaisha kutajwa? Tinojijenyi ngo muezaniso wake? (Genesi 50:19-21)

⁴ Mucadoviga bundu. Josefa paainga mujaha, hama jake jakashaisha kumutaja. Ivona vaimunyenya, vamweni vavo, vaitoda kumuuraya. (Genesi 37:4, 18-22) Pejisire, ivona vakamutengesa inga muranda. Muviyo wakona ngo wokuti, ko gumi ro makore no makore matatu Josefa wakasongana no zvineso zvakawanda maningi. Kangaije iyena waitojivhunjisa kudari, kureva kuti Jehovha anondida? Ngenyi iyena wandisiya ndega pa mukuvo uwu wandinodari besero rake? Josefa aazivi kuva mundhu wakashata. Kusiyapo zvondhozvo, wakaenderera mberi wakarinda no kuthiva. Paakava no mukana wokuhwirijira zvese zvakashata zvaakaitihwa ngo hama jake, wakavakhombijira rudo no kuvaregerera. (Genesi 45:4, 5) Iyena wakaita kudaro ngokuti wainasa kurangarira. Kusiyapo kusotesesa zvineso zvaaisongana nazvo, wakaeja kusota zvese zvaibatanijwepo, wovona zviro manera Jehovha anozvivona. (Verenganyi Genesi 50:19-21.) Waro, tinojijenyi? Pamunoshaisha kutajwa ngo hama iri yese, mucapa ndava Jehovha nee mucarangarira kuti iyena wamusiya. Kusiyapo zvondhozvo, ejanyi kuvona manera Jehovha ari kumubesera kuti mucungirire cineso condhoco. Pamunoshaisha kutajwa ngo vamweni, ivanyi mundhu anoregerera moceukija kuti rudo unopfukija zvishaishi zvakawanda.—1 Pedhru 4:8.

5. Hama Mikeya vakaitisa kudini kuti vaenderere mberi vakarinda pavakanyangajiswa?

⁵ Vonanyi zvakaitika no hama imweni inodanwa Mikeya, b inogara ku Amerika dhu Suri. Hama jimweni jaitungamirira mu ungano, jakaita zviro zvakaita kuti iyona inyangajwe maningi. Iyona yakati: “Andizivi kumbonyangajwa kudari mu upenyu hwangu. Ndainga ndecithimwa-thimwa maningi. Andicaikwanisa kuvata, ndakagumira pa kucema kamare, ngokuti andicaiziva cokuita.” Pikija zvakadaro, hama Mikeya vakava mundhu wakarinda no anoshanda ngo simba kuti angwarire mazwiro ake. Vakazviitisa kudini izvi? Nguva jese ivona vaiita mukumbiro kuna Jehovha vecikumbira mujimu mucena no simba kuti vakwanise kucungirira. Cimwenizve, ivona vakapsakisisa mu mabhuku edu. Tinojijenyi? Kudari hama kana hambzaji yananga zviro zvatinyangajisa, tinodikana kuva mundhu wakathiva no kutama kurangarira zviro zvakashata. Zvingaita kuti zviripo zvaitika mu upenyu wo hama yondhoyo, zvaiitaro kuti iite zviro mu njira yondhoyo. Ngo kudaro, itanyi mukumbiro kuna Jehovha, mecikumbira kuti iyena amubesere no kueja kuvona zviro manera mundhu endhoo anozvivona. Tikaita kudaro, zvinozotirerukira maningi kuti tive vandhu vanoregerera no kuita kuti titame kuva vandhu vanorangarira kuti hama yedu yatinyangajisa yecida. (Mazwi Akangwara 19:11) Ceukijanyi kuti Jehovha anoziva zvese zvamuri kusongana nazvo, anozomupa simba ramunoda kuti mukwanise kucungirira.—2 Kronike 16:9; Mucumaeri 5:7.

6. Ngenyi zvinosisira kuvona kupangihwa kwatinoitwa ndi Jehovha inga citatijo co rudo hwake? (Vahebheru 12:5, 6, 11)

⁶ Jehovha paanotipangira itusu tingahwajihwa maningi kamare. Asi kudari tikabatikana maningi pa manera atiri kuzwa, tingatanga tarangarira kuti kupangihwa asipi ciro caushoni kana aticaifanera kupangihwa nokuti ikona kunohwaja maningi. Tikaita kudaro, tinonga tecikanganwa ciro cinosisira maningi, cokuti kupangihwa  kwatinoitwa ndi Jehovha kunovonesa kuti iyena anotida. (Verenganyi Vahebheru 12:5, 6, 11.) Kudari tikatendera kuti mazwiro edu akashata atitungamirire, tinonga tecipa Sathana mukana kuti atieje. Iyena anoda kuti itusu tirambe kupangihwa, zvakashatisisa kupinda izvi, iyena anoda kuti tisiye kushandira Jehovha no kusiya sangano rake padoko ngo padoko. Kudari imwimwi makapangihwa, mungaitisa kudini kuti muenderere mberi makarinda?

7. (a) Inga zvatiri kuvona pa foto, Pedhru paakatendera kupangihwa, Jehovha wakamushandisa kuti aitenyi? (b) Majijenyi ngo muezaniso wa Pedhru?

⁷ Tenderanyi kupangihwa no kuita cinjo jinodikana. Jesu wakapangira Pedhru ko vhaza jakawanda pamberi po vapostori vamweni. (Marko 8:33; Ruka 22:31-34) Zvingaita kuti Pedhru wakanyowejeka maningi. Asi iyena wakaenderera mberi wakagondeka kuna Jesu. Iyena wakatendera kupangihwa, wojijira ngo zvaakaposa. Inga muviyo, Jehovha wakakomborera kugondeka ka Pedhru ngo kumupa mabasa anosisira mu ungano. (Johani 21:15-17; Mabasa o Vapostori 10:24-33; 1 Pedhru 1:1) Ngozvapi zvatinojija ngo muezaniso wa Pedhru? Kudari tikatama kusotesesa kunyowejeka kwatingaita, totendera kupangihwa no kuita cinjo jinodikana, itusu pamwepo no hama jedu tinozobesereka maningi. Ngo kudaro, tinozoshandiswa ushoni ndi Jehovha pomwe no hama jedu.

8-9. Hama Bhernardho pavakapera kupangihwa, vakajizwa kudini pakutanga, asi zvicinyi zvakavabesera kuti vacinje manera avo okurangarira?

⁸ Vonanyi zvakaitika na hama Bhernardho vanogara Mosambiki. Ivona vakaruza cidakajiso cavo co kushanda inga mukuru. Pakutanga vakajizwa kudini? Ivona vakati: “Ndaigara ndakanyangajwa ngokuti andicaitenderana no mbhangiro yondakapuwa.” Ivona vaigara vecirangarira kuti hama mu ungano jaizovavona kudini. Ivona vakatizve: “Zvakatora mweji jakawanda kuti ndive no mavonero akanaka ngo pamusoro po kupangihwa kondakaitwaro no kuthembazve Jehovha no sangano rake.” Zvicinyi zvakabesera hama Bhernardho kuti vacinje murangariro wavo?

⁹ Ivona vakati: “Pondainga mukuru ndaishandisa Vahebheru 12:7 kuti ndibesere vandhu kuti vave no mavonero akanaka ngo pamusoro po kupangihwa kwatinoita ndi Jehovha. Asi ndakajivhunjisa kudari: ‘Ndiyani anodikana kushandisa vhesi iyi?’ Ndi vashandiri vese va Jehovha, kubatanijavo inini.” Tevere ivona vakaita cinjo jimweni jaidikana kuti vakwanisezve kuthemba Jehovha no sangano rake. Vakatangazve kuva no cirovejeso co kuverenga Bhaibheri njiku jese  no kurangarijisisa. Asi vainga vacaneseka ngo mavonero avaiitwa ngo hama no hambzaji mu ungano, pikija zvakadaro vaishanda na ivona mu basa ro kucumaera no kupa mupinguro pa musongano. Pa kufamba ko nguva, hama Bhernardho vakagajwazve inga mukuru. Kudari imwimwi makapangihwa inga ndi hama Bhernardho, mucagara mecirangarira maningi ngo pamusoro pazvo, tendereranyi mazano omapuwaro moita cinjo jinodikana. c (Mazwi Akangwara 8:33; 22:4) Mukaita kudaro, mungava no cokwadi cokuti Jehovha anozomukomborera ngo kuva makagondeka kwaari no kuno sangano rake.

10. Ngoyapi cinjo yakaitwa yakaeja kugondeka ko Vaiziraeri vamweni?

¹⁰ Cinjo jinoitwa ngo sangano ra Jehovha, jingaeja kugondeka kwedu. Kudari tikatama kungwarira tingatosiya kushandira Jehovha. Inga muezaniso, Vaiziraeri vamweni vakapsaswa ngo cinjo yakaitwa. Vacito vaashira Mutemo wa Mosi, musoro jimweni jo mbhuri jaiita zviro zvokuti wari zvaidikana kuitwa basi ngo vapiri. Ivona vaivaka mandadiro no kuita mupiro jo zvinyama kuitira mbhuri javo. (Genesi 8:20, 21; 12:7; 26:25; 35:1, 6, 7; Jobe 1:5) Asi Mutemo powakatanga kushanda, ivona vaidikana kusiya zvese zvavaiitari. Jehovha wakagaja vapiri vo ukama wa Aroni kuti vaite mupiro. Pasure po cinjo iyi, kudari musoro wo mbhuri waiita mupiro inga kuti iyena ndi mupiri kuveni iyena asipi wo mubarihwana wa Aroni, waidikana kuuraiwa. d (VaLevi 17:3-6, 8, 9) Kureva kuti izvi ndizvona zvakaita kuti Koraa, Dhatani, Abhirami no vatungamiriri vanokwana kuita 250, vamukire Mosi na Aroni? (Bziverengo 16:1-3) Atinasi kuzviziva. Azvinenyi hazvo, Koraa no vese vaya vaimubesera avazivi kwenderera mberi vakagondeka kuna Jehovha. Kudari cinjo inoitwa mu sangano ikapsasa kugondeka kwenyu, ngozvapi zvamungadikana kuita?

11. Ngozvapi zvatinojija ngo muezaniso wo Varevhi vamweni vo jinja ra Kohati?

¹¹ Nasanyi kubesera cinjo iri yese inoitwa mu sangano. Pa mukuvo wovainga muzvipare, Varevhi vo jinja ra Kohati vainga no basa rinosisira maningi. Mukuvo wese wokuti Vaiziraeri vaivha ku ndau yovainga vecienda ku ndau imweni, Varevhi vamweni vo jinja ra Kohati vainga no basa ro kuthwara bhokiso ro citenderano pamberi po vandhu vese. (Bziverengo 3:29, 31; 10:33; Joxwa 3:2-4) Iri rainga basa rinodakajisa maningi! Asi zviro zvakacinja, Vaiziraeri povakaenda mu Nyika Yocipikihwa. Bhokiso ro citenderano aricaidikana kugara recithwahwa mukuvo wese. Pa mukuvo wa mambo Soromona, Varevhi vamweni vo jinja ra Kohati vakagajwa kuita basa ro kuimba, kungwarira musuvo no kungwarira munogara zviro zvokuha. (1 Kronike 6:31-33; 26:1, 24) Mu Bhaibheri apana cinovonesa kuti Vakohati vakan’gun’guta kana vakakumbira kuva no mabasa amweni anosisira ngokuti kare ivona vainga no makomborero okuthwara bhokiso ro citenderano. Tinojijenyi? Sangano ra Jehovha parinoita cinjo tinodikana kubesera ngo mwoyo wese, pikija zvondhozvo zvecipsasa basa rotakagajwa. Zvinosisira maningi kuva no mudakaro pa basa riri rese ratinogajwa. Ceukijanyi kuti imwimwi munosisira kuna Jehovha kuciripi ngo ndava yo basa ramakagajwa. Cinosisira maningi kuna Jehovha kupinda basa ramakagajwa, ikuzwira kwenyu.—1 Samueli 15:22.

12. Hambzaji Zaina vakajizwa kudini povakabuda pa Bheteri?

¹² Vonanyi muezaniso wo hambzaji imweni inodanwa Zaina, iyo yakaashira cinjo pa basa  royaidakarira maningi. Pasure po kupeja makore anokwana kuita 23 yecishandira pa Bheteri iyona yakagajwa kuti iyende koshanda inga piyona. Iyona yakati: “Kucinjwa kwandakaitwa basa rangu, kwakandihwaja maningi. Ndaijivona inga kuti andishandi. Ndaijivhunjisa kudari: ‘Ngozvapi zvondakaposa?’” Zvinosuruvarisa ngo zvokuti hama no hambzaji jimweni mu ungano, jakaivhunja kudari: “Kudari no mainga mundhu waushoni, amucaizobuda pa Bheteri.” Hambzaji Zaina vainga vakasuruvara maningi zvokuti vaigara vecicema usiku hwese. Ivona vakanangazve kudari: “Andizivi kutendera kuti zviro izvi zvindiite kuti nditame kuthemba sangano ra Jehovha no rudo una Jehovha kwandiri.” Hambzaji Zaina vakaitisa kudini kuti vaenderere mberi vakarinda?

13. Zvicinyi zvakabesera hambzaji Zaina kuti vanyise mazwiro avo akashata?

¹³ Hambzaji Zaina vakakwanisa kunyisa mazwiro avo acikabesi. Vakazviitisa kudini? Ivona vakaverenga musoro jakawanda jinowanika mu mabhuku edu, jinovonesa zvineso zvakafanana no zvavainga vecisongana nazvo. Umwe wo musoro wakavabesera maningi unowanika mu Murindiri 1 wa Fevereiro wo 2001 uno musoro unoti: “Unogona Kurarama Nokuora Mwoyo!” mu Cishona. Musoro uwu unovonesa kuti mutari wo Bhaibheri anodanwa Marko, kangaije wakasonganavo no zvineso zvakafanana paakasongana no cinjo mu basa raaita. Hambzaji Zaina vakati: “Muezaniso wa Marko wakadari inga mutombo wakapeja kusuruvara kwandainga nako.” Ciro cimweni cakabesera hambzaji Zaina ikuva phedo no shamwari javo. Ivona avazivi kugara vega nee kugara vecijizwira pena. Vakaguma pa mbhejiso yokuti mujimu mucena unobesera pa zvisungo zvinoitwa mu sangano nokutizve hama jainga jecitungamirira jaineseka maningi ndivona. Ivona vakazwisisavo kuti cinosisira maningi kuno sangano ra Jehovha ngo cokuti basa ra Jehovha riitwe mu njira yakanakisisa.

14. Hama Vradho vakadikana kuita cinjo kuti vazwirane no cinjo yapi yakaitwa mu sangano? Zvicinyi zvakavabesera kuti ivona vaite zvondhozvo?

¹⁴ Hama imweni yo ku Esrovheniya inodanwa Vradho ino makore anokwana kuita 73 inoshanda inga mukuru, yakanesehwa maningi kuzwisisa kuti ngenyi ungano yayo yakabatanijwa no ungano imweni perapo Nyumba yo Umambo yavaienda yofungwa. Ivona vakati: “Kwandiri zvainesa maningi kuzwisisa kuti ngenyi Nyumba yo Umambo yakaseja yakadikana kufungwa. Ndakasuruvara ngokuti tainga tapera kuinasirira-nasirira. Inini ndiri muvezi, ngo kudaro, ndainga ndapera kuita zviro zvimweni  zvipsa zvaidiwa mu Nyumba yedu yo Umambo. Cimwenizve, kubatanija ungano mbiri iji, yakava cinjo huru maningi kuno hama jaavasharuka.” Zvicinyi zvakabesera hama Vradho? Ivona vakati: “Kuita zviri zvese kuti tizwirane no cinjo jinoitwa ngo sangano ra Jehovha, nguva jese kunoviisa makomborero. Kunasa kunanga, cinjo dokowane jiri kuithwari nyamasi uno jiri kutinasirira kuitira cinjo huru jinozoitika kumbejiyo.” Kureva kuti imwimwi macinjwa basa ramaiita kana kuti ungano yenyu yabatanijwa no ungano imweni? Azvizivi kureruka kuhwisana no cinjo jakadari. Ivanyi no cokwadi cokuti Jehovha anozwisisa mazwiro enyu. Kudari mukabesera ngo mwoyo wese cinjo jiri kuitwari, moenderera mberi makagondeka kuna Jehovha no ku sangano raanoshandisa, mungava no cokwadi cokuti iyena anozomukomborera maningi.—Nduyo 18:25.

15. Tingaitisa kudini kuti tienderere mberi takarinda patinosongana no zvineso zvinoviiswa ngo hama no hambzaji jedu?

¹⁵ Mugumo wo nyika ino paunonga wecikhwedera, tingavetera kusongana no zvineso zvingaviiswa ngo hama no hambzaji jedu. Zvineso zvondhozvo zvingatoeja kugondeka kwedu kuna Jehovha. Ngo iyo ndava, tinodikana kwenderera mberi takarinda. Kudari hama iri yese ikamunyangajisa, mucadoviga bundu. Kudari maashira mbhangiro, mucasotesesa basi zvaitikaro, tenderanyi mazano omapuwaro no kuita cinjo jinodikana. Sangano ra Jehovha parinoita cinjo jinopsasa upenyu hwenyu, jitenderenyi ngo mwoyo wese no kujizwira.

16. Mungaitisa kudini kuti muenderere mberi makagondeka kuna Jehovha no kuno sangano rake?

¹⁶ Mungakwanisa kwenderera mberi mucithemba Jehovha no sangano rake kugondeka kwenyu pakunoejwa. Kuti mukwanise kuita izvi, munodikana kuva mundhu wakarinda, kana kuti kuva mundhu wakagajana, anonasa kurangarira no anovona zviro manera Jehovha anozvivona. Ciro cinomubesera kuti muite izvi, ngo co kujija ngo pamusoro po vandhu vanonangwa mu Bhaibheri vakasongana no zvineso zvakafanana no zvamuri kusongana nazvo no kurangarijisisa ngo muezaniso wavo. Kumbiranyi besero ra Jehovha ngo kuita mukumbiro. Mucagara ndhambo no hama jo mu ungano. Mukadaro, azvinenyi kuti ngozvapi zvingaitika, Sathana aazokwanisi kumuparajanisa kuna Jehovha no kuno sangano rake.—Jakobo 4:7.