Ndicito ndamuvhunja zvakazoitika, ndaida kutanga ngo kumuverengera kuti ndakangwinisa kudini munguva yakazara.

Inini ndakabahwa mu gore ra 1942 ku Kurasau, cirundu cakaseja maningi co ku Karibhe. Babangu vakabahwa ku Suriname, ivona vakathutha kuenda ku Kurasau ngo ndava yo basa. Ko makore manganani ndicito ndabahwa, ivona vakava Capupu ca Jehovha cokutanga ku Kurasau. a Ivona vaijija Bhaibheri na itusu sumana jese, asi itusu aticaidepi kujija nguva jimweni. Pondainga no makore anokwana gumi na marongomuna, takadikana kuthutha kuenda Suriname, ngokuti babedu vaidikana kuenda kokorondha mai wavo vainga vaamusharuka.

Ku Suriname, ndakatanga kutamba no shamwari jaivangisira maningi mu ungano. Ivona vainga vakura padoko kupinda inini. Cimwenizve, vaishanda inga mapiyona o nguva jese. Ivona pavaiverenga zvaivaitikira mu basa ro kucumaera, ndaikwanisa kuvona kuti vainga no mudakaro wakakura maningi. Pakupera ko musongano inini no shamwari jangu tairamba tecibhuya ngo pamusoro po Bhaibheri, taibhuira kunja tecisota ndhondho jakazara mundenga. Ndivona vakandibesera kuti ndisane zvandaida mu upenyu, inini ndaida kushandira Jehovha. Ngo kudaro, ndakabhabhatijwa pondainga no gumi na matandhatu o makore. Perapo pandakaita makore anokwana gumi na masere, ndakatanga kushanda inga piyona wo nguva jese.

Ndakajijira zvakawanda maningi pandainga ndiri piyona. Ndizvona zvakandibesera mukuvo wese wandaishanda mu nguva yakazara. Inga muezaniso, ciro cokutanga candakajija ngo co kujijisa vamweni. Pandakatanga kushanda inga piyona, misiyonariyo umweni waidanijwa kuti Willem  van Seijl, wakandibesera maningi. b Iyena wakandijijisa manera andaidikana kuita mabasa mu ungano. Pamukuvo wondhowo andicaizwisisepi kuti zvandaijijiswaro zvaizondibesera. Pagore rakazotevera ndakazogajwa inga piyona anosisira, ndoenda kobesera zvikwata zvainga zvecigara ndhambo, pakati po gwasha ro Suriname, ndaingazve ndhambo no ungano jimweni. Ndinobonga maningi ngo zvese zvandakajijiswa ngo hama iyi no hama jimweni! Kuvhira pondhopo ndinovangisira kuti nditevejere muezaniso wavo ngo kujijisavo vamweni.

Ciro cocipiri candakajija ngo cokuti kupungura zvimweni mu upenyu no kuva wakanasa kurongeka zvinobesera maningi. Mukutanga ko mweji umwe nga umwe inini no hama yondaishanda nayo, taiita urongwa wo zviro zvotaizoda kushandisa ko sumana jaizoza, perapo umwe wedu waienda ku dhorobha kotenga zvotaida. Taidikana kunasa kuita urongwa, kuti zvimare zvotaipuwaro zvikwanise kupeja mweji wese. Itusu taigara pakati po gwasha, kudari tikatama ciri cese apana waizokwanisa kutibesera. Ndakavona kuti kuva no zvishoma mu upenyu no kuva ndakanasa kurongeka, pondainga ndiri mujaha zvakandibesera maningi kuti ndishandire Jehovha mu upenyu hwangu hwese.

Ciro cocitatu condakajija ngo cokuti kujijisa vandhu ngo ndumi yavo zvinosisira maningi. Ndakakura ndecibhuya ndumi yaibhuyiwa ku Oranda, Cingezi, Papiamento no Sranantongo, (iyona inozivikazve inga Sranani) ndumi inovereketwa maningi ku Suriname. Potaicumaera ku makwasha vandhu vaidakarira maningi masoko ataicumaera kudari taibhuya ngo ndumi yavo kamare. Zvaindinesera kuvereketa ndumi jakonayo, imweni yakona yainga Saramakani yainesa maningi ngo kuti mainga no ndau jimweni jaida kukhwijwa izwi no kuterejwa. Asi kuvangisira kwangu kwakabesera. Pakufamba ko nguva ndakakwanisa kucumaera vandhu vakawanda ngo ndumi yavo kamare.

Ngo zvokadi kuti nguva jimweni ndainyowejeka. Inga muezaniso, pa vhaza imweni ndakavhunjisa mujiji wangu wo Bhaibheri kuti uri kuzwa kudini, zvecivoneka kuti njiku yakapera wainga ecihwaja mundani. Asi zvandakamuvhunjisari, zvakazika inga kuti ndaimuvhunjisa kuti wainga no mimba kani! Iyena aazivi kudakarira nee padoko muvhunjo wandakaitari. Pikija no kuposa kwandaiitari, mukuvo wese ndaivangisira kuti ndiverekete ndumi yaibhuiwa ngo vandhu vokondhoyo.

Mu gore ro 1970, ndakagajwa inga muvonereri wo ndharaundha. Mu gore rondhoro inini ndakakhombija ma siraidhi ainga no musoro waiti, “Visita à Sede Mundial das Testemunhas de Jeová” ku zvikwata zvizinji zviri ndhambo kamare, mu makwasha. Kuti tigume ku ndau iji inini no hama jimweni taidikana kuita hwendo mu makwasha takapakira ngarava. Mu ngarava iyi, tainga takatora jheradhori, dheka rainga rakazara ngo mafuta, kandeya no mucini jimweni jaidikana kuti tikwanise kuvonesa ma siraidhi aya. Potaiguma kwataienda taidikana kuthwara zvese izvi zvataivhari nazvo kuti tiendese kundau kwataizovonesaro urongwa uwu. Candiri kunasa kuceukija mbhera wari pa hwendo hwataiitari, ngo cokuti  vandhu vo mundharaundha iji vaidakarira maningi kuvona urongwa uhu. Ndaidakara maningi ngo kujijisa vandhu ngo pamusoro pa Jehovha no sangano rake ro pasi pano. Kuvona vandhu veciva no ushamwari wo phedo na Jehovha zvakandiita kuti ndidakare maningi ngo zvese zvandaingari ndeciita.

Ndaizviziva kuti kuva mundhu acikazivi kucadha zvaindibesera mu basa rangu. Asi ndaidavo kuwana mundhu anosisira. Ngo kudaro, ndakatanga kuita mukumbiro kuna Jehovha kuti andibesere kuwana mukaji, uwo waizokwanisa kushanda akadakara pikija no zvineso zvaiviiswa ngo basa randaiita. Pasure po gore rimwe, ndainga ndecinamorari na Ethel, umwe piyona anosisira waivangisira maningi. Kuvhira paainga musikana, Ethel waishamisika maningi ngo muezaniso wo mupostori Pauro. Ngo iyo ndava iyena waidavo kuvangisira mu basa rake ro kucumaera inga ndiyena. Itusu takacadha mu mweji wa Setembro wo 1971, totanga kushanda tese inga muvonereri wo ndharaundha.

Ethel wakakurira pa mbhuri icina zviro zvakawanda ku divi ro kunyama. Ngo kudaro, aazivi kuneseka maningi kuti azwiranise upenyu hwake no basa rotaiita inga muvonereri wo ndharaundha mu makwasha. Inga muezaniso potaivhakacira ungano jo mu makwasha taitora zviro zvishoma basi. Itusu taipaja nguvo jedu no kugeza mu murambo. Cimwenizve, itusu takajijira kuha ciri cese cavaitipa konayo kubatanija ndere, hove, kana ciri cese haco cavainyanga mu makwasha. Patainga ticina paratu, itusu taihira pa masakane o mukobo. Patainga ticina cipunu kana kuti garufu, itusu taiha ngo nyara. Inini no mukaji wangu takavona kuti zvese zvataiitari kuti tienderere mberi tecishandira Jehovha zvakavangisa maningi mucadho wedu, zvoita kuti iwona uve bote rakakoswa rutatu. (Mucumaeri 4:12) Nozvaikwanisika kuhwirira sure, itusu taizoitazve zviro zvese izvi!

Zviro zvandanangaya pakutanga zvakaitika potainga tecivha ku hwendo hwatainga takaita mu makwasha. Potakafamba ngo divi rimweni rinothyisa ro murambo, ngarava yedu yakandondomera,  ngo kukasika yobudazve. Zvinodakajisa ngo zvokuti itusu atizivi kundondomera, ngokuti tainga takasimira khoreti sarvha vhidha. Pikija zvakadaro, ngarava yedu yakazara ngo kumwa. Kuti tikwanise kubudisa kumwa yaingari yakazara mu ngarava, takadikana kushandisa poto jotaibikira.

Asi kuti tikwanise kuita izvi, pakutanga takadikana kusveja saja rese raingaro mupoto. Zvecivoneka kuti tainga tapeja kusveja saja redu, takatanga kuveja. Asi aticaikwanisa kubata ciri cese. Ngo kudaro, takaita mukumbiro kuna Jehovha, tecikumbira kuti atipe zvokuha kuitira njiku iyana. Patakapera kuita mukumbiro hama imweni yotainga nayo yakakhandira civejo yobata hove imwe. Iyona yainga yakakura zvokuti vandhu vashanu vakakwanisa kuha usikuhwo vonasa kuguta.

Pasure po makore mashanu inini no mukaji wangu tecishanda inga muvonereri wo ndharaundha, takaashira makomborero aticaivetera. Mukaji wangu wainga no mimba, ndakadakara maningi pondakazwa masoko aya. Asi andicaiziva kuti izvi zvaizopsasisa kudini upenyu hwedu. Inini no mukaji wangu, taidakarira maningi kuenderera mberi tiri mu nguva yakazara kudari zvecikwanisika. Mwana wedu wokutanga anodanijwa kuti Ethniel wakabahwa mugore ra 1976. Nopapera makore maviri no meya, mwana wedu wocipiri anodanwa Giovanni wakabahwavo.

Pa mukuvo uwu basa rainga rakawanda maningi ku Suriname. Ngo kudaro, Bheteri ro ku Suriname rakatitendera kuti tienderere mberi tecishanda inga muvonereri wo ndharaundha, pikija tecirera vana vedu. Vana vedu pavainga vadoko ndakagajwa kuti ndifambire ndharaundha yainga no ungano shoma. Izvi zvainditendera kuti ndikwanise kuenderera mberi ndecishanda inga muvonereri wo ndharaundha ko sumana nganani, pa sumana jimweni ndaienderera mberi ndecishanda inga piyona wo nguva jese ku ungano yotainga takagajwa. Ungano jondaienda kovhakacira kudari jainga phedo no kwataigara, mukaji wangu no vana vaienda neni. Kudari ungano jondaivhakacira no magungano aiizwa mu makwasha ndaienda ndega.

Kuti ndikwanise kuita ushoni mabasa andakagajwa ndaidikana kunasa kuita urongwa waushoni. Ndaiita urongwa wo kujija Bhaibheri no mbhuri yangu sumana jese. Pandainga ndecivhakacira ungano jiri mu makwasha, mukaji wangu waiita jijo yo mbhuri no varimbwane. Pikija zvakadaro, taieja kuita zviro zvakasiyana-siyana no  mbhuri pazvaikwanisika weya. Inini no mukaji wangu nguva jese taieja kuita zviro zvinodakajisa no vana vedu, zvakadari inga kutamba gemi no kuenda kopasiyari. Kazinji ndaidikana kuenda kovata waausiku kamare ngokuti ndaidikana kunasirira hurukuro no mabasa amweni. Zvecivoneka kuti mukaji wangu wainga akangwara inga mwanakaji anonangwa pana Mazwi Akangwara 31:15, iyena waimuka uciri usiku kuti anasirire zvokuha no kukwanisa kuita kunamata ko mangwanani vana vedu vacito vaenda kucikora. Ndinobonga maningi Jehovha ngo kundipa mwanakaji waushoni, anondida no anondibesera kuti ndiite mabasa ese andinogajwa mu sangano.

Inga vabari, taishanda ngo simba kuti tibesere vana vedu kuti vade Jehovha no kuda kucumaera. Itusu taida kuti vana vedu vashande munguva yakazara, haiwa kuti vatidakajise asi ngokuda kwavo. Nguva jese taibhuya naivona tecivavhunja kuti kushanda munguva yakazara kunodakajisa maningi. Pikija no zvineso zvataisongana nazvo, Jehovha waibesera mbhuri yedu. Taibeserazve vana vedu kuti vashamwarijane no hama jaidira Jehovha pakutanga mu upenyu hwajo.

Jehovha wakapa mbhuri yedu zvese zvataida kudivi rokunyama. Asi ndaiitavo divi rangu kuti ndibesere mbhuri yangu. Pamukuvo wandaishanda inga piyona anosisira mumakwasha, ndakajijira kuviga mare kuti tizoishandise pamukuvo wataizoida. Pikija no kuvangisira kwataiita, nguva jimweni aticaingepi no mare yokutenga zvese zvataida. Mu mukuvo uwu, ndinotenda kamare kuti Jehovha wakatibesera. Inga muezaniso, kutangira mugore ra 1980 mbhera kutanga ko gore ra 1990, kwakava no hondo ku Suriname. Mu makore awo, zvainesa maningi kuwana zviro zvishomani zvo njiku ngo njiku. Asi Jehovha wakatipa zvataida.—Mateu 6:32.

Mu upenyu hwedu hwese Jehovha nguva jese wakatikorondha no kutipa mudakaro. Vana vedu imakomborero kwatiri, kuvarera kuti vashandire Jehovha zvinodakajisa maningi. Takadakara maningi ngo kuziva kuti ivona vakasanavo kunghwina mu basa ro mu nguva yakazara. Mwana wedu Ethniel pamwepo Giovanni vakaenda kuzvikora zvoumwari. Wari vari kushandira ku Bheteri ro Suriname pamwepo no vakaji vavo.

Wari inini no mukaji wangu taavasharuka, asi takabatikana pakushandira Jehovha inga mapiyona anosisira. Kunasa kunanga, ndakabatikana inga kare zvokuti andito ndawana mukuvo wokujijira kusambirira. Asi andizvidembi. Ndecirangarira ngo zvakaitika mu upenyu hwangu, ndinovona kuti kutema civaringo co kunghwina mu basa ro mu nguva yakazara pondainga mujaha, cakava ciro caushoni maningi candakaita.