1-2. (a) Muvhunjo japi jatinozodavira? (b) Ngozvapi zvinokhombija kuti Jehovha anoda kutibesera?

 JEHOVHA angatibesera kuti tihwisane no zvineso zvatiri kusongana nazvo mu upenyu hwedu no kutibeserazve kuti tiwane mudakaro patinonga tecimushandira. Jehovha anozviitisa kudini? Waro itusu ngozvapi zvatingaita kuti tinase kubesereka ngo besero raanotipari? Jijo iyi, inozotibesera kuti tiwane mupinguro jo muvhunjo iji? Asi ticito tadavira muvhunjo iji, ngatiambe tadavira muvhunjo uwu: Kunanga kuti Jehovha anodadi kamare kutibesera?

² Pa karata yake ku Vahebheru mupostori Pauro wakashandisa gama ringatibesera kuti tiwane mupinguro wo muvhunjo uwu. Iyena wakatara kudari: “Jehovha ndiyena mubeseri wangu. Andizothyi. Mundhu angandiitenyi?” (Vahebheru 13:6) Vandhu vamweni vanojija ngo zvo Bhaibheri, vakananga kuti revo yo gama rakashandiswa pa vhesi iyi ro kuti “mubeseri,” rinonangira mundhu anogogoma ecienda kobesera mundhu umweni wawihwa ngo ngozi. Rangariranyi Jehovha ecienda kobesera mundhu wawihwa ngo ngozi. Pacina kukana-kana, zvavakanangari zvinozwirana kamare no zvaari Jehovha, iyena anoda maningi kutibesera. Ngo besero ra Jehovha tinokwanisa kucungirira zvineso zviri zvese takadakara.

3. Ngojapi njira ndhatu jinoshandiswa ndi Jehovha kuti atibesere kucungirira takadakara?

³ Ngojapi njira jinoshandiswa ndi Jehovha kuti atibesere kucungirira zvineso zvedu takadakara? Kuti tidavire muvhunjo uwu ngatende tivone mativi manganani o bhuku ra Isaya. Ngenyi? Ngokuti zviporofita zvizinji zvakafemehwa Isaya kuti atare, zvinoshanda kwatiri nyamasi uno. Kusiyapo zvondhozvo, kazinji Isaya wakabhuya ngo pamusoro pa Jehovha mu njira icikanesi  kuzwisisa. Inga muezaniso, vonanyi cipauko 30 ca Isaya. Mu cipauko ici, iyena wakashandisa njira jakawanda jinovonesa matajire anoita Jehovha vandhu vake. Anoita zvondhozvo, (1) ngo kunasa kupurukira mukumbiro jedu no kujidavira, (2) ngo kutipa ndhungamiriro no (3) ngo kutipa makomborero wari no kumbejiyo. Wari ngativone zviro zvitatu izvi zvatinopuwari ndi Jehovha kuti atibesere.

4. (a) Jehovha wakananga kuti Vajudha vo mu njiku ja Isaya vainga vandhu vakadini, ngozvapi zvaakatendera kuti zviitike kwavari? (b) Ngoyapi vetero yakapa Jehovha kuno Vajudha vainga vakagondeka? (Isaia 30:18, 19)

⁴ Pa magama okutanga o cipauko 30 ca Isaya, Jehovha anosanangura Vajudha inga “vana vaphanduki” avo ‘vaiengejera uxaixi no uxaixi.’ Iyena wakaengejera eciti: “Vandhu ava vari vapandukiri, . . . vana vanoramba kupurukira Mupango wa Tenji.” (Isaia 30:1, 9) Isaya wakaporofita kuti Jehovha waizotendera kuti vandhu ava vatambujwe, ngokuti vakaramba kupurukira zvaainanga. (Isaia 30:5, 17; Jeremia 25:8-11) Ndizvona kamare zvakazoitika. Ivona vakatohwa voenda koita varanda ku Bhaibhironiya. Asi Vajudha vamweni vainga vakagondeka kuna Jehovha. Isaya wainga no masoko aizovapa vetero. Iyena wakananga kuti njiku iri yese, Jehovha waizovatendera kuti vahwirirezve ku Jerusarema. (Verenganyi Isaia 30:18, 19.) Jehovha wakakwanirisa cigondiso ici paakasujunura vandhu vake kuvha ku uranda ku Bhabhironiya. Izvi azvizivi kuitika ngo kukasika. Magama okuti “Tenji anogarira mukuvo wo kumuvonesa unyaxa hwake,” aivonesa kuti Jehovha waizosujunura vandhu vake pakukhirira makore akawanda. Vajudha vakagara makore anokwana kuita 70 ku Bhabhironiya, vamweni vavo vacito vatendehwa kuhwirira ku Jerusarema. (Isaia 10:21; Jeremia 29:10) Vajudha povakava varanda ku Bhabhironiya, ivona vaicema ngo ndava yo kusuruvara, asi povakahwirira Jerusarema vakacema ngokuti vainga vakadakara maningi.

5. Masoko api anovangisa atinowana pa Isaia 30:19?

⁵ Nyamasi uno, itusu tingavangiswa maningi ngo magama okuti: “Ecizwa kukhuwa kwako, anozokuitira unyaxa.” (Isaia 30:19) Ngo magama aya Isaya ari kutigondesa kuti Jehovha anonasa kutipurukira patinokumbira besero rake. Cimwenizve, iyena anodavira ngo kukasika mukumbiro jatinomuitira. Isaya wakaengejera eciti: “Ecikuzwa, anozokudavira.” Magama aya anovangisa, anoticeukija kuti Baba wedu vo kudenga vanoda kubesera vaya vanokhwedera phedo navo. Kuziva izvi kunotibesera kuti ticungirire takadakara.

6. Zvakanangwa ndi Isaya zvinokhombija kudini kuti Jehovha anopurukira mukumbiro jinoitwa ngo mushandiri umwe nga umwe wake?

⁶ Ngoapi masoko amweni anovangisa atinowana pa vhesi iyi ngo pamusoro po mukumbiro jedu? Jehovha anonasa kupurukira mukumbiro jatinomuitira. Ngenyi tingananga kudaro? Pa mavhesi okutanga o cipauko 30 co bhuku ra Isaya, Jehovha anobhuya ngo pamusoro po vandhu vake ecishandisa gama rokuti “imwimwi” kana kuti anonga ecivananga inga cikwata. Asi pa vhesi ya 19 Jehovha anoshandisa gama rokuti “iwewe” ngokuti anoda kuzivisa masoko ake kuno mushandiri umwe nga umwe wake. Isaya wakatara kudari: “Iwewe . . . auzocemibze”; “anozokuitira unyaxa”; “ecikuzwa, anozokudavira.” Inga Baba vano rudo, Jehovha aacaizovhunja vana vake kudari, “iwewe unodikana kuvanga inga hama jako.” Mukusiyana, iyena anoneseka nesu, anodavira mukumbiro jo mundhu umwe nga umwe.—Nduyo 116:1; Isaia 57:15.

7. Isaya na Jesu vakakhombijisa kudini kuti tinodikana kuva vandhu vanovangirira pa kuita mukumbiro?

⁷ Patinoita mukumbiro ngo pamusoro po cineso ciri cese catiri kusongana naco, kangaije  ciro cokutanga catinopuwa ndi Jehovha isimba rokukwanisa kucungirira cinesoco. Asi kudari cineso ici cikaenderera mberi, kangaije tingatodikana kukumbira simba mukuvo wese kuti tikwanise kucungirira. Kunasa kunanga Jehovha anoda kuti itusu tiite zvondhozvo. Tinokwanisa kuvona izvi pa magama akatahwa ndi Isaya. Iyena wakati: ‘Mucamuzoroja.’ (Isaia 62:7) Izvi zvinoda kurevenyi? Zvinoda kureva kuti tinodikana kuita mukumbiro mukuvo wese zvoita kuti Jehovha atame kuzorora. Zvakanangwari ndi Isaya zvinoticeukija zvakananga Jesu ngo pamusoro po mukumbiro pana Ruka 11:8-10, 13. Pa vhesi iji Jesu anotivhunja kuti tinodikana kuita mukumbiro no “kuvangirira” ‘tecikumbira’ mujimu mucena. Tingakumbira kuti Jehovha atipe uzivi kuti titeme zvivaringo zvaushoni.

8. Magama anowanika pana Isaia 30:20, 21, akakwanirisika kudini?

⁸ Verenganyi Isaia 30:20, 21. Masoca o Bhabhironiya paakapeja gore no meya akatendeneja Jerusarema, vandhu vakasongana no zvineso zvakakura maningi. Asi mukuzwirana no zvinonangwa pa vhesi ya 20 no 21, Jehovha wakagondesa kuti kudari Vajudha vakakhauya vocinja mufambiro wavo, iyena waizovabesera. Isaya wakadanija Jehovha kuva “Mujijisi” Mukuru, wovhunja vandhu kuti Jehovha waizovajijisa manera aushoni ovaizomunata ndiwona. Izvi zvakakwanirisika Vajudha povakasujunuhwa kuvha ku uranda ku Bhabhironiya. Pacina kukana-kana, Jehovha wakavadi kamare Mujijisi Mukuru kuno Vajudha. Vecitungamirihwa ndi Jehovha ivona vakakwanisa kumusijira kunamata kwakacena. Nyamasi uno, itusu tinobeserekavo manigi ngo kuva na Jehovha inga Mujijisi wedu Mukuru.

9. Ngoyapi njira imwe inoshandiswa ndi Jehovha kuti atipe ndhungamiriro nyamasi uno?

⁹ Pa mavhesi aya, Isaya anonanga kuti itusu takadari inga vajiji vanojijiswa ndi Jehovha njiku jese. Jehovha anotijijisa ecishandisa njira mbiri. Isaya anotivhunja ngoyapi njira yokutanga yaanoshandisa Jehovha, paanoti: “Majiso ako anozovona Mujijisi wako” Mukuru. Kuezanisira uku, kwakadari inga kuti vajiji vari kutovona mujijisi wavo pambeji pavo kamare. Itusu takadari inga vajiji ava. Tino cidakajiso cikuru co kujijiswa ndi Jehovha. Iyena anotijijisa kudini? Anoita zvondhozvo ecishandisa sangano rake. Tinodakara maningi ngo kuashira ndhungamiriro jecivha ku sangano ra Jehovha. Zvese zvatinojijiswa pa musongano jedu, magungano, mu mabhuku, mu jw Bhrodhikastingi no njira jimweni, zvinotibesera kuti ticungirire zvineso zvatinosongana nazvo takadakara.

10. Itusu tinozwa “izwi [ra Mwari] sure” kwedu ngo njira yapi?

 ¹⁰ Isaya wakanangazve njira yo cipiri inoshandiswa ndi Jehovha kuti atijijise, paakati: “Njeve jako jinozozwa izwi sure kwako.” Apa Isaya ari kusanangura Jehovha inga mujijisi anonasa kupurukira anonga ecifamba sure ko vajiji vake, ecivatatija gwanja ravanodikana kutevera. Nyamasi uno, itusu tinozwa izwi ra Mwari ngo sure kwedu. Kuitisa kudini? Masoko akafemehwa a Mwari atinowana mu Bhaibheri, akatahwa kamare. Ngo kudaro, patinoverenga Bhaibheri zvakadari inga kuti tiri kuzwa izwi ra Mwari ecivereketa sure kwedu.—Isaia 51:4.

11. Kuti tikwanise kucungirira takadakara, ngozvapi zviro zviviri zvatinodikana kuita, ngenyi tinodikana kuita zvondhozvo?

¹¹ Zvicinyi zvatinodikana kuita kuti tinase kubesereka ngo ndhungamiriro jatinopuwa ndi Jehovha ecishandisa sangano rake no Bhaibheri? Vonanyi kuti Isaya wakabhuya ngo zviro zviviri. Ciro cokutanga ngo cokuti, “nga iri gwanja.” Cocipiri ngo cokuti, “fambai ndirona.” (Isaia 30:21) Asi kuziva basi kuti “nga iri gwanja” azvikwani. Itusu tinodikana ‘kufamba ndirona.’ Tecishandisa Soko ra Mwari no zvatinojijiswa ngo sangano rake, tinokwanisa kuziva kuti ngozvapi zvinoda Jehovha kwatiri. Cimwenizve, Jehovha anotijijisa kushandisa zviya zvatinojija. Kuti tikwanise kucungirira takadakara pa kushandira kwedu Jehovha, tinodikana kuziva kuti ngorapi gwanja tofamba ndirona. Tikaita kudaro, tingava no cokwadi cokuti Jehovha anozotikomborera.

12. Mukuzwirana na Isaia 30:23-26, Jehovha waizokomboreresa kudini vandhu vake?

¹² Verenganyi Isaia 30:23-26. Ciporofita ici cakakwanirisika kudini kuno Vajudha vakahwiriraya ku nyika yavo pasure po kupeja makore akawanda vari varanda ku Bhabhironiya? Ivona vakaashira makomborero akawanda ku divi ro kunyama no kumujimu. Vecikomborehwa ndi Jehovha vandhu vakava no zvokuha zvakawanda. Cinosisira maningi pa zvese izvi ngocokuti Jehovha wakakomborera vandhu vake ngo kuvapa zvokuha zvakawanda zvo umwari. Izvi zvakaita kuti ivona vahwirirezve kunamata Jehovha mu njira yaanotendera. Makomborero ese akava no vandhu va Mwari pa nguva iyi akapindirija zviro zvese zvaushoni zvavakambova nazvo. Pa vhesi ya 26 panovonesa kuti Jehovha wakabesera maningi vandhu vake ku divi ro umwari, kana kuti wakavabesera kuti vanase kuzwisisa Soko rake. (Isaia 60:2) Jehovha wakakomborera vashandiri vake ngo kuvabesera kuti vaenderere mberi vecimushandira ngo simba ngo ndava yo kudakara “mu mwoyo mavo.”—Isaia 65:14.

13. Ciporofita ngo pamusoro po kunamata kwakacena cakakwanirisika kudini nyamasi uno?

 ¹³ Kureva kuti ciporofita ngo pamusoro po kunamata kwakacena cinoshandavo kwatiri nyamasi uno? Hina. Ngo njira yapi? Kuvhira mu gore ra 1919, zviuru zvo vandhu zvakasiya kuva varanda vo Bhabhironiya Guru, cine ro pasi pese ro manamatiro okunyepa. Ivona vakaendeswa ku ndau yakanaka maningi kupinda Nyika Yakagondeswa yo Iziraeri yokare. Ivona vakaendeswa ku paradhiso yo kumujimu. (Isaia 51:3; 66:8) Icinyi paradhiso iyi yo kumujimu?

14. Icinyi paradhiso yokumujimu, ndiyani ari kugara imonamo nyamasi uno? (Vonanyi Kusananguhwa ko Magama.)

¹⁴ Kuvhira mu gore ra 1919, vokuzojwa vari kugara mu paradhiso yokumujimu. b Pa kufamba ko nguva, vaya vano vetero yo kupona pasi pano, vo “mavhuta amweni” vakatangavo kugara mu paradhiso iyi yo kumujimu veciashira makomborero akawanda anovha kuna Jehovha.—Johani 10:16; Isaia 25:6; 65:13.

15. Paradhiso iyi yokumujimu, tingaiwanira kwapi?

¹⁵ Paradhiso iyi yokumujimu, tingaiwanira kwapi nyamasi uno? Vandhu va Jehovha vangawanika mu mativi ese o nyika. Ngo kudaro, tingatonanga kuti paradhiso iyi iri mu nyika yese kamare. Azvinenyi kuti ngokwapi kwatinogara, itusu tingava mu paradhiso iyi kudari tikabesera kunamata ko cokwadi.

16. Ngozvapi zvatinodikana kuita kuti tivone kuseja ko paradhiso yedu yokumujimu?

¹⁶ Kuti tienderere mberi tiri mu paradhiso iyi yokumujimu, tinodikana kuita zviro zvizinji. Asi cimwe cakona, ngo cokuenderera mberi tecireremeja hama no hambzaji jedu kutenderera pasi pese. Tingazviitisa kudini izvi? Tingazviita ngo kusotesesa zviro zvakanaka, kuciripi zviro zvakashata zvinoitwa ngo hama no hambzaji jedu. (Johani 17:20, 21) Ngenyi izvi zvinosisira? Amborangariranyi kuezanisira uku basi. Patinoenda kovhakacira ndau yakaseja maningi, tingativetera kuwana muti no mafirori akasiyana-siyana. Mukuezanavo, nyamasi uno mu ungano tingawana  hama no hambzaji jakasiyana-siyana ijo jinoezaniswa no muti. (Isaia 44:4; 61:3) Itusu tinodikana kusotesesa kuseja kwakaita ndauyo kusiyapo kusiyana-siyana ko “muti” umwe nga umwe. Itusu atidikanai kutendera kuti kutama kukwana kwedu kana ko vamweni kuite kuti tiphingaije kubatana ko hama no hambzaji jedu kutenderera pasi pese.

17. Umwe nga umwe wedu anodikana kuitenyi kuti abesere kubatana ko ungano?

¹⁷ Ngozvapi zvinodikana kuitwa ngo umwe na umwe wedu kuti titame kuita kuti kubatana uku kupere? Tinodikana kuva vandhu vanoita runyararo. (Mateu 5:9; Varoma 12:18) Pa vhaza jese jatinovangisira kuti tiite runyararo no vamweni mu ungano, tinonga tecibesera kuti paradhiso yedu yokumujimu ienderere mberi yakaseja. Tinodikana kuceukija kuti Jehovha wakakwevera umwe nga umwe wedu ari mu paradhiso iyi, kuti amunamate ngo njira yakacena. (Johani 6:44) Amborangariranyi mudakaro unova na Jehovha paanotivona tecivangisira kuti tivangise rubatano no runyararo watinawo pakati po vandhu vake, vandhu vaanovona kuva vanosisira.—Isaia 26:3; Hagayo 2:7.

18. Tinodikana kugara tecirangarirenyi mukuvo wese, ngenyi tinodikana kugara tecidaro?

¹⁸ Ngozvapi zvatinodikana kuita kuti tikwanise kubesereka ngo zvese zvatinopuwa ndi Jehovha? Tingaita izvi ngo kushandisa zvatinojija mu Soko ra Mwari no mu mabhuku edu akacijikira mu Bhaibheri. Kuita izvi kunozotibesera kuti tive no mugariro jo Cikristu jinozotiita kuti ‘tidisane maningi ngocedu’ no kukhombijirana “rudo hwo ukama” mu ungano. (Varoma 12:10) Patinorangarijisisa ngo makomborero atinawo wari uno, tinovangisa ushamwari watinawo na Jehovha. Patinoima torangarira ngo makomborero atinozoashira kumbejiyo, vetero yokuzomushandira inozova yokadi kamare. Zvese izvi zvinozotibesera kuti tishandire Jehovha takadakara nyamasi uno.

19. (a) Mukuzwirana na Isaia 30:18, tingava no cokwadi cenyi? (b) Ngozvapi zvinozotibesera kuti ticungirire takadakara?

¹⁹ Jehovha ‘anozomuka’ kuti atibesere panozoparaja nyika ino yakashata. (Isaia 30:18) Itusu tinoziva kuti Jehovha ndi “Mwari wo ururami.” Iyena aazotenderi kuti nyika iyi ya Sathana igare njiku imwe kupindirija njiku yaagaja kuti iparajwe. (Isaia 25:9) Itusu tinovetera no kusengerera kwese njiku yokuti Jehovha anozoparaja nyika iyi. Nguva iyi icito yaguma, tatema civaringo co kwenderera mberi tecibongesera ngo cidakajiso catinaco co kuita mukumbiro, kujija Soko rake no kushandisa zvatinojijaro pomwe no kurangarijisisa makomborero atinawo. Tikaita kudaro, Jehovha anozotibesera kuti ticungirire takadakara patinonga tecimushandira.