1. Ngozvapi zvatinoziva, tingava no cokwadi cenyi?

 TINOZIVA kuti vandhu vamweni vangatiteverera patinonga teciita basa ro kucumaera. Kangaije kuteverehwa uku kungazoengejeka kumbejiyo. (Danieli 11:44; 2 Timoti 3:12; Apokaripsi 16:21) Tingava no cokwadi cokuti Jehovha anozotibesera pazviya zvatinoda. Ngenyi? Ngokuti mukuvo wese Jehovha wakabesera vashandiri vake kuti vakwanirise basa ravo, pikija po zvainesa. Umwe muezaniso wa izvi, ngo wo zvakaitika na muporofita Ezekieri paaicumaera Vajudha vainga kuuranda ku Bhabhironiya.

2. Jehovha wakananga kuti vandhu vainga mu ndima ya Ezekieri vainga vandhu vo mushovonyi? Ngozvapi zvatinozovona pa cijijo ici? (Ezekieli 2:3-6)

² Waro, Ezekieri waidikana kucumaera vandhu vo mushovonyi? Jehovha wakananga kuti vainga “vandhu vano musoro yakavanga,” “mwoyo yakaita inga mapuwe” no “vapanduki.” Zvaidari inga kuti Ezekieri waitendenejwa ngo muzwa no zvinyavada. Izvi ndizvona zvakaita kuti Jehovha avhunje Ezekieri ko vhaza jakawanda kuti: ‘Ucathya.’ (Verenganyi Ezekieli 2:3-6.) Ezekieri wakakwanisa basi kuita basa raakagajwa ngokuti (1) ndi Jehovha wakamutuma, (2) mujimu mucena wakamupekeja simba raaida no (3) Soko ra Jehovha rakavangisa rutendo hwake. Zviro zvitatu izvi zvakabesera kudini Ezekieri? Zvingatibeseravo kudini nyamasi uno?

3. Magama api akavangisa Ezekieri, Jehovha wakakhombijisa kudini kuti waizomubesera?

³ Jehovha wakavhunja Ezekieri kuti: “Ndinokutuma kovari.” (Ezekieli 2:3, 4) Magama aya angadari akavangisa maningi Ezekieri. Ngenyi? Ngokuti iyena wakaceukija kuti Jehovha  wakananga magama akafanana kuna Mosi na Isaya paakavagaja inga vaporofeti. (Exodo 3:10; Isaia 6:8) Ezekieri waizivazve kuti Jehovha wakabesera vaporofeti vaviri ava, kuti vanyise zvineso zvavo. Ngo kudaro, Jehovha paakavhunja Ezekieri kovhaza mbiri kuti “ndinokutuma kovari,” iyena wakava no cokwadi cokuti Jehovha waizomubesera. Kunja kwa izvi, mubhuku ra Ezekieri tinowana ko vhaza jakawanda magama okuti: “Izwi ra Tenji rakandigumira.” (Ezekieli 3:16) Kovhaza jakawanda Ezekieri wakatara kudari: “Izwi ra Tenji [rakandigumirazve].” (Ezekieli 6:1) Pacina kukana-kana, Ezekieri wainga no cokwadi cokuti wainga ecitumwa ndi Jehovha. Iyena wainga mwana wo mupiri, zvingaita kuti wakazwa ko vhaza jakawanda baba wake vecinanga kuti Jehovha wakagondesa kuti anozobesa vaporofeti vake. Izvi tinozvivona ngozvaakavhunja Isaya, Jakobe na Jeremiya paakati: “Inini ndinewe.”—Genesi 26:24; 28:15; Jeremia 1:8.

4. Ngoapi magama akavangisa Ezekieri?

⁴ Vaiziraeri vakaitenyi pavakazwa masoko aicumaehwa ndi Ezekieri? Jehovha wakati: “Vonyumba yo vaIsraeli avadi kukuzwa, ngokuti avadi kundizwa inini.” (Ezekieli 3:7) Povairamba kuzwa masoko a Ezekieri vainga veciramba kuzwa masoko a Jehovha. Magama a Jehovha kuna Ezekieri aivonesa kuti zvaiitwa ngo vandhu, azvicaivonesepi kuti iyena wainga washaisha inga muporofita. Jehovha wakagondesa Ezekieri kuti rutongeso hwaakananga ukazotanga kuziviswa, vandhu vaizoziva kuti “pano muporofita pakati pavo.” (Ezekieli 2:5; 33:33) Pacina kunaka-kana, magama aya a Jehovha akapekeja simba Ezekieri kuti akwanirise basa rake.

5. Mukuzwirana na Isaia 44:8, ngozvapi zvinotipekeja cicunge?

⁵ Inga ndi Ezekieri itusu tinavo cicunge co kucumaera masoko akanaka ngokuti tinoziva kuti ndi Jehovha wakatituma. Jehovha wakatigaja inga “fakazi” jake. (Isaia 43:10) Izvi zvinotidakajisa maningi. Kudari inga Jehovha wakavhunja Ezekieri kuti: ‘Ucathya,’ ari kutivhunjavo kuti: “Mucathimwa-thimwa.” Ngenyi atidikani kuthya vavengi vedu? Ngokuti kudari inga ndi Ezekieri itusu tiri kutumwavo ndi Jehovha, iyena anotibesera.—Verenganyi Isaia 44:8.

6. (a) Magama api a Jehovha anovonesa kuti iyena anoda kutibesera? (b) Ngozvapi zvinotitondhoja no kutipekeja simba?

⁶ Jehovha anogondesa kuti anozotibesera. Inga muezaniso, iyena acito ativhunja kuti “ndimwi fakazi jangu,” wakati: “Ukakhirira pakati po kumwa, ndinozova newe, ukaambuka murambo, aizokuboboji. Ukakhirira pa muriro, auzokupisi, no murabzu aizokugumiri.” (Isaia 43:2) Kazinji patinonga tecicumaera tinosongana no zvineso zvakadari inga kumwa no muriro. Pikija zvakadaro, ngo besero ra Jehovha tingakwanisa kuenderera mberi tecicumaera. (Isaia 41:13) Kudari inga mu njiku ja Ezekieri, vandhu vazinji nyamasi uno vanoramba kutipurukira. Zvavanoitaro azvirevi kuti zviripo zvatiri kuposa inga Zvapupu zva Jehovha. Tinotondhojwa no kuvangiswa ngo kuziva kuti Jehovha anodakara kudari tikaenderera mberi tecicumaera takagondeka. Mupostori Pauro wakananga kuti: “Mundhu umwe na umwe anozoashira mupfupo wake mukuzwirana no basa rake.” (1 Vakorinte 3:8; 4:1, 2) Hambzaji imweni yaanomakore akawanda yecishanda inga piyona, yakananga kudari: “Zvinodakajisa maningi kuziva kuti Jehovha anokomborera kuvangisira kwedu.”

7. Ezekieri waijizwa kudini paiima worangarira ngo civoniso caakava naco? (Vonanyi foto yo pakapa.)

⁷ Ezekieri wakazwisisa kuti mujimu mucena isimba rakakura. Iyena wakava no civoniso wovona kuti mujimu mucena waipekeja simba ngirozi. Iwona waipazve simba marodha makuru o karu ya Jehovha yo kudenga kuti ifambe. (Ezekieli 1:20, 21) Ezekieri wakaitenyi paakavona izvi? Iyena wakatara zvaakaita. “Nondacivona, ndakawa ngo hope pasi.” Ezekieri wakashamaisika maningi ngo zvaakavonari wowa pasi. (Ezekieli 1:28) Perapo, pese paairangarira ngo civoniso ici, kangaije Ezekieri wakavangiswa maningi ngo kuziva kuti ngo besero ro mujimu mucena wa Jehovha, waizokwanirisa basa raakagajwa.

8-9. (a) Jehovha wakavhunja Ezekieri kuti aitenyi? (b) Ngorapi besero rimweni Jehovha raakapa Ezekieri kuti akwanise kuhwisana no zvineso zvaaisongana nazvo mu ndima yake?

⁸ Jehovha wakati kuna Ezekieri: “Mwana wo mundhu, imai, ngokuti ndinoda kuvereketa newe.” Zvakabhuyari Jehovha zvakapekeja Ezekieri simba raaida kuti ‘amuke aime.’ Ezekieri wakatara kudari: “Mwiha wakanghwina mukati mangu, wondiimisa.” (Ezekieli 2:1, 2) Kuvhira pondhopo kwenda mberi, Ezekieri wakatungamirihwa ngo “nyara” ya Mwari kana kuti ngo mujimu mucena. (Ezekieli 3:22; 8:1; 33:22; 37:1; 40:1) Mujimu wa Mwari wakamubesera kuti aite basa raainga akagajwa, ro kucumaera ‘vomusakazwa no vo mwoyo yakatindivara.” (Ezekieli 3:7) Jehovha wakananga kudari kuna Ezekieri: “Inini ndinozoita hope yako icikapeteki inga hope javo, no huma yako icikakotamiki inga javo. Ndinozoita huma yako inga simbi, yakavanga kupinda buwe. Ucavathya, nokuti kutetemera pambeji pavo.” (Ezekieli 3:8, 9) Zvaidari inga kuti Jehovha waivhunja Ezekieri kudari: ‘Ucatendera  kuti kutama kuzwa ko vandhu ava kukurembese. Inini ndinozokuvangisa.’

⁹ Kuvhira pondhopo, mujimu wa Mwari wakabesera Ezekieri ku ndau yese yaaicumaera. Ezekieri wakatara kudari: “Nyara ya Tenji yairema panyezuru pangu.” Kuti Ezekieri akwanise kuita basa ro kucumaera zvakatora sumana kuti iyena anase kuzwisisa. (Ezekieli 3:14, 15) Pondhopo, Jehovha wakamuvhunja kuti aende kubani, kondhoyo ‘mwiha wakamunghwina.’ (Ezekieli 3:23, 24) Wari Ezekieri wainga wakanasiririka kuti atange basa rake.

10. Ngorapi besero ratinoda kuti tikwanise kucumaera, ngenyi?

¹⁰ Ngorapi besero ratinoda kuti tikwanise kuita basa redu rokucumaera? Kuti tidavire ngatimboceukije zvakaitika na Ezekieri. Acito atanga basa rake rokucumaera mujimu mucena wakamupa simba raaida. Nyamasi unovo tinokwanisa kucumaera ngo besero ro mujimu mucena. Ngenyi? Ngokuti Sathana ari kutihwisa ecida kuti tisiye basa redu rokucumaera. (Apokaripsi 12:17) Vandhu vazinji vanorangarira kuti Sathana ano simba rakakura maningi zvokuti atikwanisi kuwhisana naye. Asi ngo kuenderera kwedu mberi tecicumaera tiri kunyisa Sathana! (Apokaripsi 12:9-11) Tiri kumunyisisa kudini? Patinoita basa ro kucumaera tinonga tecikhombija kuti atiripi kuthya kuthyisijiwha ndi Sathana. Pavhaza imwe nga imwe yatinonga tecicumaera tinonga tecimunyisa. Waro tingaguma pa mbhejiso yapi, teciziva kuti tingakwanisa kuenderera mberi tecicumaera pikija teciteverehwa? Tinoguma pa mbhejiso yokuti Jehovha anodakara ngozvatinoita, nokutizve unotipa mujimu wake kuti utibesere.—Mateu 5:10-12; 1 Pedhru 4:14.

11. Mujimu mucena ungakwanisa kutiitirenyi, tingaitisa kudini kuti tirambe teciuashira?

¹¹ Jehovha wakaita kuti hope no huma ya Ezekieri ivange kupinda buwe, izvi zvinoita  kuti tithembenyi? Izvi zvinotiita kuti tithembe kuti mujimu mucena unozotibesera kuti tinyise zvineso zvese zvatinosongana nazvo mu basa rokucumaera. ( 2 Vakorinte 4:7-9) Ngozvapi zvatingaita kuti tirambe teciashira mujimu mucena wa Jehovha? Tinodikana kuita mukumbiro nguva jese, tova no cokwadi cokuti Jehovha anotizwa no kutipekeja mujimu mucena. Jesu wakajijisa vajiji vake kuti: “Endereranyi mberi mecikumbira, . . . endereranyi mberi mecipsaka, . . . endereranyi mberi mecigogoja.” Inga muviyo, Jehovha anozopekeja “mujimu mucena kuna vaya vanovakumbira.”—Ruka 11:9, 13; Mabasa o Vapostori 1:14; 2:4.

12. Mukuzwirana na Ezekieli 2:9–3:3, muphukutu waivhepi? Wainga wakatahwenyi?

¹² Mujimu wa Mwari wakapa simba no cicunge Ezekieri kuti akwanise kwenderera mberi ecicumaera. Asi izvi azvicaikwana, Soko ra Mwari rakavangisavo rutendo hwake. Mu civoniso cimweni Ezekieri wakavona nyara yakabata muphukutu. (Verenganyi Ezekieli 2:9–3:3.) Muphukutu waivhepi? Wainga wakatahwenyi? Wakavangisa kudini rutendo wa Ezekieri? Muphukutu uwu wakavha kuna Jehovha. Zvinovoneka inga kuti Jehovha wakashandisa ngirozi imwe pa ngirozi murongomuna jakavoniwaya ndi Ezekieri kuti imupe muphukutu uwu. (Ezekieli 1:8; 10:7, 20) Pa muphukutu uwu painga pakatahwa masoko a Mwari, ainga masoko akawanda kamare o rutongeso aidikana kuziviswa ndi Ezekieri, kuvapanduki vaingaya kuuranda. (Ezekieli 2:7) Muphukutu uwu wainga wakatahwa masoko ngo kumbeji no sure kwawo.

13. Jehovha wakananga kuti Ezekieri aitenyi no muphukutu waakapuwaya, ngenyi iwona waitapira?

¹³ Jehovha wakavhunja muporofita wake kuti ahe muphukutu agute ndiwona. Ezekieri wakazwira, woha muphukutu wese. Divi iri ro civoniso rinorevenyi? Ezekieri waidikana kunasa kuzwisisa kamare, masoko aaidikana kuenda kozivisa. Waidikana kunasa kumatenda kamare, kuti masoko aya anase kumabhuya munjira inokhohwesa. Ngo kudaro, zvakaitika zviro zvakashamaisa maningi. Ezekieri wakazwisisa kuti muphukutu uwu “waitapira inga uci.” (Ezekieli 3:3) Ngenyi? Ngokuti kuna Ezekieri kubhuya ngo pamusoro pa Jehovha, kwaitapira kana kuti kwaimudakajisa. (Nduyo 19:8-11) Iyena waidakara maningi ngo kusaniwa ndi Jehovha kuti ave muporofita wake.

14. Zvicinyi zvakabesera Ezekieri kuti atendere basa raakagajwa?

¹⁴ Perapo, Jehovha wakananga kudari kuna Ezekieri: “Bzese bzo ndinozokubvunja, bziaxirei mu mwoyo wako no kubzizwisisa.” (Ezekieli 3:10) Ngo kunanga kwake izvi Jehovha waida kuti Ezekieri aceukije zvakatahwa pa muphukutu wiya no kuzvirangarijisisa. Izvi zvaizovangisa rutendo wa Ezekieri. Cimwenizve, aya ainga masoko aaidikana kuzivisa kuno vandhu. (Ezekieli 3:11) Zvecivoneka kuti masoko aya ainga mu mwoyo make no pamuromo pake, iyena wainga akanasiririka kuti atende basa iri no kuriita.—Ezanisanyi na Nduyo 19:14.

15. Kuti tibudirire mu basa ro kucumaera zvicinyi zvatinodikana kudira ‘mu mwoyo medu’?

¹⁵ Kuti tibudirire mu basa ro kucumaera, tinodikanavo kuvangisa rutendo hwedu ngo kushandisa Soko ra Mwari Bhaibheri. Tinodikana  kudira ‘mu mwoyo meduʼ zvese zvatinovhunjwa ndi Jehovha. Nyamasi uno, Jehovha anobhuya na itusu ecishandisa Bhaibheri. Tingaitisa kudini kuti Soko ra Mwari ritungamirire zvese zvatinoita?

16. Ngozvapi zvatinodikana kuita kuti tizwisise Soko ra Mwari?

¹⁶ Kuti tive no uhomi hwaushoni tinodikana kuha, perapo tozorora padoko. Ndizvonavo zvondhozvo, patinojija Soko ra Mwari no kurangarijisisa, rutendo hwedu unovanga maningi. Tinodikana kugara tecirangarira zvatinojija ngo civoniso co muphukutu. Tingatonanga kuti Jehovha anoda kuti tigute ngo Soko rake. Izvi zvinoreva kuti tinodikana kunasa kuzwisisa Bhaibheri. Tingakwanisa kuita izvi ngo kuita mukumbiro, kuverenga Bhaibheri no kurangarijisisa. Pakutanga, itusu tinoita mukumbiro kuti tinasirire mwoyo wedu kuti tizwisise Soko ra Mwari no kutanga kuverenga zvatinodaro. Patinopeja kuverenga tinoima torangarijisisa zvotaverengaro. Ngowapi unozova muviyo? Patinorangarijisisa tinonasa kuzwisisa Soko ra Mwari. Izvi zvinovangisa rutendo hwedu.

17. Ngenyi zvinosisira maningi kurangarijisisa zvatinoverenga mu Bhaibheri?

¹⁷ Ngenyi zvinosisira kuverenga Bhaibheri no kurangarijisisa zvataverengaro? Ngokuti zvondhozvo, zvinozotibesera kuti ticumaere masoko o umambo wari no kumbejiyo tizivise masoko o rutongeso anozodikana kuziviswa. Patinorangarijisisa ngo mugariro ja Mwari, ushamwari hwedu naye unovanga maningi. Izvi zvinozotiita kuti tidakare no kuva no runyararo.—Nduyo 119:103.

18. Vandhu vo mu ndima yedu vanozozivenyi, ngenyi?

¹⁸ Ezekieri wainga muporofita, asi itusu atiripi vaporofeti. Pikija zvakadaro, itusu tinoenderera mberi tecicumaera masoko anowanika mu Bhaibheri mbhera kuti Jehovha anange kuti zvakwana. Nguva yo rutongeso ikakwana, vandhu vomundima yedu avazonangi kuti avazivi kupuwa ngwajo kana kuti Mwari wakavakanganwa. (Ezekieli 3:19; 18:23) Kusiyapo zvondhozvo, ivona vanozoziva kuti masoko atakacumaera, aivha kuna Mwari.

19. Ngozvapi zvinozotipa simba kuti ticumaere?

¹⁹ Ngozvapi zvinozotipa simba kuti ticumaere? Izviro zvitatu zvakabeseraya Ezekieri. Itusu tinocumaera ngokuti takatumwa ndi Jehovha, tinobesehwa ngo mujimu mucena wake, no kuvangiswa ngo Soko ra Mwari. Ngo besero ra Jehovha, tinowana simba ro kuenderera mberi tecicumaera no kucungirira “mbhera kumagumo.”—Mateu 24:13.