1. Tinozvizivisa kudini kuti Jehovha anoda kuti tikhwedere phedo naye?

 JEHOVHA anotikoka kuti tikhwedere phedo naye. (Jakobo 4:8) Iyena anoda kuva Baba wedu, Mwari wedu, Shamwari yedu. Jehovha anodavira mukumbiro jedu no kutibesera pa mukuvo wo kunesa. Iyena anoshandisa sangano rake kuitira kutibesera no kutijivirira. Asi itusuvo ngo zvapi zvatingaita kuti tikwanise kukhwedera phedo na Jehovha?

2. Tingakhwederesa kudini phedo na Jehovha?

² Itusu tingakwanisa kukhwedera phedo na Jehovha ngokuita mukumbiro, kuverenga Bhaibheri no kunasa kurangarijisisa. Izvi zvinoengejera rudo hwedu no kumudakajisa. Perapo tinojizwa tecivangiswa kuti timupekeje zvaanoda, kumuzwira kwedu no kumunamata. (Apokaripsi 4:11) Patinonasa kumuziva kamare zvinotiita kuti timuthembe no kuthemba sangano rake raanoshandisa kuti ritibesere.

3. Zvicinyi zviri kuizwa ndi Sathana kuti aeje kutiparajanisa na Jehovha, ngozvapi zvingatibesera kuti tirambe tiri mu sangano rake? (Nduyo 31:13, 14)

³ Sathana anoeja kuti titame kuthemba Jehovha paya patinosongana no zvineso. Anozviitisa kudini? Iyena anoeja padoko ngo padoko kurembesa kuthemba kwedu Jehovha pomwe no sangano rake. Asi itusu ativhiri kuremba. Rutendo hwedu nokuthemba kwedu Jehovha pakunonga kwakavanga, apana cingakwanisa kutiparajanisa naye pomwe no sangano rake.—Verenganyi Nduyo 31:13, 14.

4. Ngozvapi zvatiri kuda kuvona mu cijijo ici?

⁴ Mu cijijo ici, tiri kuda kuvona zviro zvitatu zvingarembesa kuthemba kwedu Jehovha no sangano rake. Kuitisa kudini zvineso izvi zvingaguma pa kutiparajanisa na Jehovha? Ngo zvapi zvatingaita kuti tijijivirire ku muejo iji ja Sathana?

5. Kuitisa kudini zvineso zvatinosongana nazvo zvingaguma pakupsasa kuthemba kwedu Jehovha no sangano rake?

⁵ Pa mukuvo umweni itusu tinosongana no zvineso, zvakadari inga kuteverehwa pa mbhuri no kutama basa. Zvineso izvi zvingaguma pa kurembesa kuthemba kwedu Jehovha no sangano rake. Zvingaitikisa kudini? Pamunova no zvineso ko mukuvo wakareba, mungaguma pa kucamwa no kujizwa muri mega. Sathana anoshandisa mukuvo uwu kuti tivone inga kuti Jehovha aacatidi. Zvokuti tingatoguma pa kujivhunjisa kuti Jehovha aciri kutidadi kamare? Kunanga kuti Jehovha no sangano rake ndivona vari kutiviisira matambujiko? Zviro zvakadari inga izvi, zvakamboitikavo no Vaiziraeri ku Ejipita. Pakutanga ivona vainga vakazwisisa kuti Jehovha wainga akashandisa Aroni na Mosi kuti vavasujunure kuvha kuuranda. (Exodo 4:29-31) Perapo Faro pakaenderera mberi ecivatambuja, ivona vakatanga kupekeja ndava Aroni na Mosi, Veciti: “Tenji Mwari ngaamuvone, amutonge, matiitisa vanyenywi panyasi pa Faro no po varanda vake, makavapa cipanga mu nyara mavo kuti vatiuraye.” (Exodo 5:19-21) Ivona vakapa ndava vashandiri vakagondeka va Jehovha. Izvi zvainga zvakashata! Kudari paanomukuvo wakareba mecihwisana no zvineso, mungaitisa kudini kuti murambe mecithemba Jehovha no sangano rake?

6. Ngozvapi zvatajija kuvha ku muporofita Abhakuki? (Habakuki 3:17-19)

⁶ Itanyi mukumbiro kuna Jehovha ngo mwoyo wese mecikumbira besero rake. Muporofita Abhakuki wakasongana no zvineso zvakawanda maningi, zvakamuita kuti agare no muvhunjo mu upenyu hwake kuti Jehovha waimudadi kamare. Iyena wakafunungura mwoyo wake kuna Jehovha onanga zvese zvaaizwa. Abhakuki wakananga kudari: “Tenji, mbhera rini ndinozokumbira kubeswa, imwimwi mucikazwi; ndinozomukhuwira: “Ugevenga!” imwimwi mucikaponesi? . . . Ngenyi munondivonesa zvakashata?” (Habakuki 1:2, 3) Abhakakuki wakatanga kurangarira ngo pamusoro po zviro zveese zvainga zvakaitwa ndi Jehovha kuitira vandhu vake. (Habakuki 2:2, 3) Izvi zvakamubesera kuti awanezve mudakaro, nokuzwisisa kuti Jehovha waimuda. Cimwenizve, waithemba kuti Jehovha waimubesera kuhwisana no zvineso zvaaisongana nazvo. (Verenganyi Habakuki 3:17-19.) Ngozvapi zvatinojija? Paya pamunosongana no zvineso, itanyi mukumbiro kuna Jehovha mecimuvhunja zvese zviri mu mwoyo menyu, mecikumbira besero rake. Munozova no cokwadi cokuti Jehovha anozomubesera kuhwisana no zvineso zvese zvamunosongana nazvo. Pamunozwa Jehovha ari ku divi renyu, rutendo hwenyu unozovanga maningi.

7. Umwe wo pa ukama wa hambzaji Shirirei wakaeja kuitenyi, asi ivona vakaitenyi?

⁷ Endereranyi mberi makavanga ku divi ro umwari. Hambzaji Shirirei vo ku Papuwa Novha Ginee, vakasonganavo no zvineso zvakawanda maningi. b Mbhuri yavo yainga varombo, zvokuti cainga cineso kuti vawane zviro zvishomani pa njiku imwe basi. Umwe wo paukama hwavo wakavaeja kuti varuze ushamwari hwavo na Jehovha. Iyena wakati: “Iwewe unonanga kuti uri kubesehwa ngo mujimu mucena wa Mwari, riri kwapi besero rakona? Mbhuri yako ivarombo. Iwewe uri kupeja nguva yako wecicumaera.” Hambzaji Shirirei vanonanga kuti vakaguma pakujivhunjisa kuti: “Kunanga kuti Jehovha anotajadi inini pamwepo no mbhuri yangu? Inini ndakaita mukumbiro kuna Jehovha ndecimuvhunja zvese zvandairangarira. Ndakaenderera mberi ndeciverenga  Bhaibheri no kuverenga mabhuku akacijikira mu Bhaibheri kuciripi basi kucumaera no kupinda musongano.” Hambzaji Shirirei vakatanga kuzwisisa kuti Jehovha waivataja pamwepo no mbhuri yavo. Vainga vacizivi kumbovata no njara. Cimwenizve, mukuvo wese vainga vakadakara. Ivona vakati: “Ndakatanga kuzwisisa kuti Jehovha wainga ecidavira mukumbiro jangu.” (1 Timoti 6:6-8) Kudari tikaenderera mberi takavanga kudivi rokumujimu, zvineso zvatinozosongana nazvo azvizokwanisi kutiparajanisa na Jehovha.

8. Ngozvapi zvingaitika no hama jinotungamirira mu sangano ra Jehovha?

⁸ Mumaterevhizau no mu interneti, vavengi vedu vanondhandhanisa masoko okunyepa ngo pamusoro po hama jinotungamirira sangano ra Jehovha. (Nduyo 31:13) Hama jedu jimweni jakasungwa no kunyepehwa kuti jakaita zviro zvakashata maningi. Izvi azvitishamaisi, Makristu o mu nguva jokare akasonganavo no zvineso zvakadaro mupostori Pauro paakasungwa. Ngozvapi zvavakaita?

9. Ngozvapi zvakaizwa ngo Makristu o mu nguva jokare, mupostori Pauro paainga akasungwa?

⁹ Mupostori Pauro paakasungwa ku Roma, Makristu amweni akaramba kumubesera. (2 Timoti 1:8, 15) Ngenyi? Kunanga kuti ivona vakava no nyowa no mupostori Pauro, ngokuti vandhu vaimuvona inga mundhu wakashata? (2 Timoti 2:8, 9) Kangaije ivona vaithya kuti vaizoteverehwavo. Azvinenyi ngozvapi zviri kuitika, asi amborangariranyi kuti Pauro wakazwa kudini. Iyena wainga akatosongana no zvineso zvakawanda maningi pamweni zvokuti wakatoguma pakutendera kutotambujwa ngokuti waida kubesera hama jake. (Mabasa o Vapostori 20:18-21; 2 Vakorinte 1:8) Itusu atidi kuva inga Makristu o mu nguva iyi akarambari kubesera mupostori Pauro. Ngozvapi zvatinodikana kuceukija, hama jinotungamirira pajinonga jeciteverehwa?

10. Ngozvapi zvatinodikana kuita hama jinotungamirira pajinonga jeciteverehwa?

¹⁰ Tinodikana kuceukija kuti ngenyi tinoteverehwa no kuziva kuti ndiyani ari kuzviitisa. Karata yo 2 Timoti 3:12 inoti: “Zvokadi,  vese vaya vanoda kurarama mu kujipira kuna Mwari, mukubatana na Kristu Jesu, vanozoteverehwa.” Asi izvi azvitishamaisi patinovona hama jinotungamirira mu sangano ra Jehovha jeciteverehwa ndi Sathana. Caanoda ngocokuti hama iji jitamezve kuva jakagondeka kuna Jehovha. Kusiyapo zvondhozvo, iyena anoda kuti tijizwe takasuruvara no tiri tega.—1 Pedhru 5:8.

11. Ngozvapi zvatajija ngo muezaniso wa Oneziforo? (2 Timoti 1:16-18)

¹¹ Tinodikana kuenderera mberi takagondeka tecibesera hama jedu. (Verenganyi 2 Timoti 1:16-18.) Mu nguva jokare Mukristu umweni waidainjwa kuti Oneziforo acaiitepi zvaiizwa ngo Makristu amweni akarambaya kubesera Pauro. Iyena “aacaipserukepi ngo njinga [ja Pauro].” Oneziforo wakapsaka mupostori Pauro, paakamuwana wakamubesera ngozvaaida pamukuvo wondhowo. Kuti aaite izvi, Oneziforo wakatodira pa ngozi upenyu hwake. Ngozvapi zvatinojija? Ativhiri kusiya kuti kuthya kutiite kuti tisiye kubesera hama jedu jiri kuteverehwa. Kusiyapo izvo tinodikana kuima kudivi ravo kuti tivabesere pa zvavanoda. (Mazwi Akangwara 17:17) Ivona vanotodavo maningi rudo hwedu no besero redu.

12. Ngozvapi zvatajija kuvha ku hama no hambzaji jedu jo ku Rusiya?

¹² Vonanyi muezaniso wo hama jedu jinogara ku Rusiya, ivona ne avasiyi kubesera hama jedu no hambzaji jakasungwa. Hama no hambzaji jedu pajinotohwa kuenda ku tiribhunari kuenda kotongwa hama jimweni jinozvipira kuti jiende kobesera. Ngozvapi zvatinojija? Hama jedu jinotungamirira sangano pajinosungwa, kana kuti pajinonyepehwa zviri zvese, ticathya, ngatiite mukumbiro ngo pamusoro pavo no kubeseravo mbhuri javo. Torangarirazve njira jimweni jatingavabesera ndijona.—Mabasa o Vapostori 12:5; 2 Vakorinte 1:10, 11.

13. Kushohwa kwatinoitwa ngo vamweni kungaejesa kudini kuthemba kwatinoita Jehovha no sangano rake?

¹³ Vandhu vamweni vo paukama, vadoni vo kushikora no vadoni vo kubasa vangatieja kuti tisiye kucumaera no kupona mukuzwirana no ndhungamiriro ja Jehovha. (1 Pedhru 4:4) Ivona kangaije vangananga kudari: “Inini ndinodakara maningi ndiwe, asi shwiro imwe ngoyociara cako icona acimbokusii kuti uitevo zviri zvese.” Vandhu vakadari vanodakarira maningi kubhuya ngo pamusoro po kujingwa, ivona vanonanga kuti: “Imwimwi munocumaera mecinanga kuti muri vandhu vanokhombija rudo asi ambovonanyi manera amunotaja vandhu vakajingwa.” Zviro zvavanobhuyari zvingatisiya no muvhunjo mu murangariro mwedu. Tingarangarira kudari: ‘Kureva kuti Jehovha ari kukumbira kuti ndiite zvandicikakwanisi? Azvicaizova zvaushoni kudari sangano rake rikatitendera kuita zvese zvatinoda?’ Kudari makambosongana no zvineso zvakadari inga izvi mungaitisa kudini kuti muenderere mberi makagondeka kuna Jehovha?

14. Ngozvapi zvatinodikana kuita vandhu pavanotishora ngo kupona kwedu mukuzwirana no ndhungamiriro ja Jehovha? (Nduyo 119:50-52)

¹⁴ Temanyi civaringo cokuita zviya zvinonanga Jehovha kuti zvakanaka. Jobe waizwira ndhungamiriro ja Jehovha pikija waishohwa ngokuita kwake zvaushoni. Imwe shamwari yokucengejera ya Jobe, yakaeja kumukhohwesa pa zviro zvimweni zvainga zvakashata, yecinanga kuti Mwari aacaineseka kuti dangani Jobe waiita zviro zvakanaka kana zvakashata. (Jobe 4:17, 18; 22:3) Jobe aazivi kutenda manyepo aya. Iyena waiziva kuti ndhungamiriro ja Jehovha ngo pamusoro po zviro zvakanaka no zvakashata, nguva jese jaushoni. Iyena wainga atema civaringo co kupona mukuzwirana no ndhungamiriro iji. Aazivi kutendera kuti vamweni  vamuite kuti asiye ushamwari hwake na Jehovha. (Jobe 27:5, 6) Waro ngozvapi zvatinojija? Mucadotendera kuti kushohwa kwamunoitwa ngo vamweni kumuite kuti mutame kuthemba ndhungamiriro ja Jehovha. Amborangariranyi zviro zvakamuitikira mu upenyu, zvingaita kuti imwimwi munase kuzwisisa kamare kuti ndhungamiriro ja Jehovha jiripo ngokuti jinoda kutibesera. Ngo kudaro, temanyi civaringo cokubesera sangano iri rinozwira ndhungamiriro jese ja Jehovha. Ngo kudaro, azvinenyi dangani vandhu vanotishora zvakadini ngo kuzwira kwedu ndhungamiriro ja Jehovha, atidikani kutendera kuti ivona vatiparajanise naye.—Verenganyi Nduyo 119:50-52.

15. Ngenyi hambzaji Briziti vakashohwa ngo ukama wo mwamunavo?

¹⁵ Vonanyi muezaniso wa hambzaji Briziti, vanogara ku nyika yo Indiya, avo vaishohwa ngo mbhuri yavo, ngo ndava yo zviro zvavaitenda. Nopapera mukuvo mushomani no vabhabhatijwa mu gore ra 1997, mwamuna wavo wainga aciripi Capupu ca Jehovha, wakaruza basa. Ngo ndava yazvo ivona vakadikana kuthutha kwavainga, kuti vaende kogara no vabari vavo kudhorobha rimweni. Kondhoyo hambzaji Briziti vakasongana no zvineso zvakashatisisa kamare. Inga muezaniso, zvecivoneka kuti mwamuna wavo wainga aruza basa, ivona vakadikana kushanda njiku jese kuti vasapote mbhuri yavo. Kusiyapo zvondhozvo, kuti vagume ku Nyumba yo Umambo vaidikana kufamba makiromita anokwana kuita 350. Ukama wo mwamunavo wakavashora maningi ngo ndava yo zviro zvavaitenda. Izvi zvakaguma pakushatisisa zvoita kuti mbhuri ya hambzaji Briziti, igume pakuthuthazve. Asi ngo civhumbu mwamuna wavo vakatamika. Tevere mwana wavo wainga no makore anokwana kuita gumi na maviri, wakatamikavo ngo ndhendha inozwi kanseri. Kusiyapo zvese izvi, ukama hwa hambzaji Briziti wakananga kuti zvese zvainga zveciitika ngokuti ivona vainga Capupu ca Jehovha. Ngo magama amweni ivona vainga vecinanga kuti hambzaji Briziti ndivona vainga veciitisa zvese izvi. Pikija zvakadaro,  vakaenderera mberi vecithemba Jehovha no kuthemba sangano rake.

16. Ngoapi makomborero akawana hambzaji Briziti ngo kugara kwavo phedo na Jehovha pomwe no sangano rake?

¹⁶ Zvecivoneka kuti hambzaji Briziti vaigara ndhambo no ungano yavo, muvonereri wo ndharaundha wakavavangisa kuti vacumaere ku ndau yo vaigararo no kuita musongano pamuzi pavo. Pakutanga ivona vaivona inga kuti zvaivanesa maningi, asi vakazwira zvavakavhunjwaro. Ivona vaicumaera mukuvo wese, vaiita musongano pamuzi pavo no kupsaka nguva yo kuita kunamata ko mbhuri no vana vavo vokaji. Ngowapi wakava muviyo wokuita izvi? Ivona vakakwanisa kutangisa jijo jo Bhaibheri jakawanda maningi, vazinji vovajiji vavo vakaguma pakubhabhatijwa. Gore ra 2005 ivona vakatanga kushanda inga piyona wo nguva jese. Zvecivoneka kuti hambzaji Briziti vaithemba Jehovha no sangano rake, vakawana makomborero akawanda. Vana vavo vari kushandira Jehovha vakagondeka. Cimwenizve ku ndau yavaicumaerari, nyamasi uno kuno ungano mbiri! Hambzaji Briziti vanokhohwa kuti Jehovha wakavapa simba ravaida kuti vakwanise kucungirira zvineso zvavaisongana nazvo no kushohwa kwavaiitwa ngo ukama hwavo.

17. Tinodikana kutema civaringo co kuitenyi?

¹⁷ Sathana anoda kuti titende kuti Jehovha anotisiya patinosongana no zvineso mu upenyu hwedu no kutizve kuva takagondeka kuno sangano ra Jehovha kunoita kuti upenyu hwedu hunese maningi. Iyena anoeja kutiita kuti tithye patinovona hama jinotungamirira jecitukwa, kuteverehwa, kana kutodihwa mukadheya. Iyena anoshandisa kushora kuti titame kuthemba ndhungamiriro ja Jehovha no sangano rake. Asi itusu tinonasa kuziva murau jinoshandiswa ndi Sathana, ngo iyo ndava aticengejwi ndiyena. ( 2 Vakorinte 2:11) Temanyi civaringo cokuramba manyepo ese a Sathana no kuenderera mberi takagondeka kuna Jehovha no sangano rake. Ceukijanyi kuti narini Jehovha aazomusii. (Nduyo 28:7) Ngo kudaro, mucatendera kuti ciri cese haco cimuparajanise na Jehovha!—Varoma 8:35-39.

18. Ngozvapi zvatinozovona pa jijo inotevera?

¹⁸ Pa jijo iyi tavona zvineso zvatingasongana nazvo, zvinovha kuno vandhu vacikaripi hama jedu mu ungano. Asi kuthemba kwatinoita Jehovha no sangano rake, kungatoejwa ngo vandhu vanonga vari muungano. Ngozvapi zvatingaita kuti tikwanise kunyisa zvineso zvakadari? Tinozovona izvi pa jijo inotevera.