1. Mupostori Pauro wairangarirenyi ngo pamusoro po vabeseri vo ungano?

 VABESERI vo ungano vanovangisira maningi ngo simba kuti vabesere ungano. Mupostori Pauro waireremeja maningi vanarume ava vakagondeka. Paakavonesa izvi ndi paya paakatara karata kuitira Makristu o ku Firipo. Iyena wakatumira mucungamijo kuitira vabeseri vo ungano pamwepo no vakuru.—Vafiripi 1:1.

2. Hama Ruis vanojizwa kudini ngokushanda inga mubeseri wo ungano?

² Hama jakabhabhatijwa jo mupira wakasiyana-siyana jiri kudakara maningi ngo kuva vabeseri vo ungano. Inga muezaniso, Dhevhan wainga no makore anokwana kuita gumi na masere paakagajwa inga mubeseri wo ungano. Hama inodanijwa kuti Ruis, yakazogajwa kuti ishande inga mubeseri wo ungano po yainga no makore anopindirija 50. Iyona yakati: “Kwandiri i cidakajiso cikuru maningi kushanda inga mubeseri wo ungano, maningi-ningi pandinosotesesa rudo hwandinokhombijihwa ngo hama no hambzaji.”

3. Ngozvapi zvatinozovona mu cijijo cino?

³ Vabeseri vo ungano vazinji vanojizwavo kudaro. Kudari imwimwi makabhabhatijwa, amuto mava mubeseri wo ungano, maidakarira kuva no cido cakadaro? Zvicinyi zvingamuvangisa kuti muite zvondhozvo? Ngo zvapi zvinonangwa ngo Bhaibheri zvamunodikana kuita kuti muve mubeseri wo ungano? Mu cijijo ici tinozovona mupinguro jo muvhunjo iji. Asi wari ngatende tivone kuti i basa rapi rinoithwa ngo vabeseri vo ungano.

NGOZVAPI ZVINOITHWA NGO VABESERI VO UNGANO?

4. Mabasa api anoithwa ngo vabeseri vo ungano? (Vonanyi foto.)

⁴ Vabeseri vazinji vo ungano, vanovonerera ndima jatinoenda kocumaera, no kuvonerera mabhuku atinoshandisa mu basa  ro kucumaera. Vamweni vanobesera pa basa ro kucenesa, no kunasirira-nasirira Nyumba yo Umambo. Vabeseri vamweni vo ungano, vangagajwa kuti vashande inga maindikadhori, no kuvonerera mucini jo audhiyo vhidhiyo, musongano paunonga weciithwa. Basa rese rinoithwari ngo vabeseri vo ungano, rinosisira maningi. Kusiyapo zvese izvi, vabeseri vo ungano ava, i vanarume vakaivha ku divi ro kumujimu, vanoda Jehovha no kupona mukuzwirana no ndhungamiriro jake. Ivona vano rudo hwakakura kuno hama no hambzaji jo mu ungano. (Mateu 22:​37-39) Hama jakabhabhatijwa jinodikana kuitenyi kuti jive vabeseri vo ungano?

5. Ngozvapi zvinozomubesera kuti muve no cidakajiso cokushanda inga mubeseri wo ungano?

⁵ Bhaibheri rinokhombija kuti ngo zvapi zvinodikana kuithwa kuti hama igajwe inga mubeseri wo ungano. (1 Timoti 3:​8-10, 12, 13) Munovona kudini ngo kujija ngo pamusoro po zviro izvi no kuzvishandisa? Izvi zvinozomubesera kuti muve mundhu anokwanirisa. Cokutanga, imwimwi munodikana kurangarijisisa ushoni thangwe rinomuitaro kuti mude kushanda inga mubeseri wo ungano.

NGENYI IMWIMWI MUNODA KUVA MUBESERI WO UNGANO?

6. Ngozvapi zvingamuvangisa kuti muite zviri zvese kuitira kubesera vamweni? (Mateu 20:28) (Vonanyi foto yo pakapa.)

⁶ Jesu Kristu ndi muezaniso waushoni kwatiri. Zvese zvaaita waitungamirihwa ngo rudo waainga nawo na Baba wake pomwe no vandhu. Rudo wakandundira Jesu kuti ade kubesera vamweni no kuita mabasa okujidodokesa. (Verenganyi Mateu 20:28; Johani 13:​5, 14, 15) Kudari zvese zvamuri kuita muri kuzviita ngo rudo, Jehovha anozomukomborera no kumubesera kuti mukwanirise cido cokuva mubeseri wo ungano.—1 Vakorinte 16:14; 1 Pedhru 5:5.

7. Ngenyi atidikani kujikuja kana kujivona inga tinosisira maningi?

⁷ Vandhu vazinji mu nyika muno, vanoshamaisika maningi pavanovona vandhu vanojiita inga vanosisira maningi. Asi vandhu va Jehovha avazivi kudaro. Hama inoda vamweni inga ndi Jesu, aigari yecitonga vamweni kana kuita kuti ivoneke kuti inosisira maningi. Kudari mundhu anojikuja akagajwa kuti ashande inga mubeseri wo ungano, kangaije iyena angaramba kuita mabasa amweni anovoneka inga acikasisiri,  asi anodikana pakutaja zvimavhuta zvinosisira zva Mwari. Iyena anojivona inga anosisira maningi zvokuti aangatoiti mabasa akadaro. (Johani 10:12) Jehovha aazokomboreri mundhu anoita mabasa ngokujikuja kana anojivona inga anosisira maningi.—1 Vakorinte 10:​24, 33; 13:​4, 5.

8. Jesu wakapa mbhangiro yapi ku vapostori gumi na vaviri?

⁸ Pa vhaza jimweni, shamwari jo phedo ja Jesu jakada kuwana cigaro ngo cido cakashata. Vonanyi zvakaitika no vapostori va Jesu vaviri, Jakobo na Johani. Ivona vakakumbira Jesu kuti vave no cigaro cinosisira maningi mu Umambo. Jesu aazivi kuvavangisa ngo cido cavo ici cokuda kuva vandhu vanosisira maningi kupinda vamweni. Kusiyapo izvo, iyena wakavhunja gumi na vaviri vo vapostori kudari: “Wiya anoda kuita mukuru pakati penyu, anodikana kuva mushandiri wenyu. Wiya anoda kuva wokutanga pakati penyu, ngaave muranda wo vese.” (Marko 10:​35-37, 43, 44) Hama painoeja kuva mubeseri wo ungano no cido caushoni cokushandira vamweni, iyona inozobesera ungano ngo njira jakawanda.—1 Vatesaronika 2:8.

MUNGAENGEJERESA KUDINI CIDO CENYU COKUVA MUBESERI WO UNGANO?

9. Mungaengejeresa kudini cido cenyu cokuda kushandira vamweni?

⁹ Pa cina kukana-kana imwimwi munoda Jehovha no kuda kushandira vamweni. Pikija zvakadaro, zvingaita kuti imwimwi amuna cido cokuva mubeseri wo ungano ngokuti munozviziva kuti basa iri rinobatanija kuita zvakawanda. Mungaengejeresa kudini cido cenyu cokushandira vamweni? Njira imwe yokuita ndiyona izvi ngo yokurangarira ngo pamusoro po mudakaro watinova nawo ngokushandira hama no hambzaji jedu. Jesu wakati: “Kupekeja kunoviisa mudakaro mukuru kupinda kuashira.” (Mabasa o Vapostori 20:35) Jesu aazivi kuzvinanga basi asi wakazviitavo. Jesu wainga no mudakaro wokadi ngokuti waishandira vamweni. Zvokadi, izvi zvingaitikavo na imwimwi.

10. Ngozvapi zvinovonesa kuti Jesu waidakara ngokushandira vamweni? (Marko 6:​31-34)

¹⁰ Vonanyi muezaniso unovonesa kuti Jesu waidakara maningi ngo kushandira vamweni. (Verenganyi Marko 6:​31-34.) Pa vhaza imweni, Jesu no vajiji vake vainga vakaremba. Ivona vainga vecienda ku ndau yakanyararisa no cinangwa cokwenda kozorora. Asi mbhungano huru yakatanga kuguma ivona vacito vaguma, vogara vecivetera Jesu. Ivona vaida kuzwa jijiso ja Jesu, Jesu waizoramba. Kunasa kunanga, iyena no vapostori “avacaiwanepi no mukuvo wokuha.” Kana kuti Jesu waizovajijisa zvokadi zvinganani perapo ovavhunja kuti vapinde. Asi Jesu waida vandhu. Ngo kudaro, “wakavajijisa zviro zvizinji.” Iyena wakavajijisa mbhera ‘nguva yopera.’ (Marko 6:35) Jesu wakaita izvi haiwa ngo kuvangirijwa asi ‘ngo pena yaainga nayo.’ Iyena wakavajijisa kuti ngenyi waivada, kuita izvi kwaimusiya akadakara.

11. Jesu wakaitenyizve kuti abesere mbhungano iya? (Vonanyi foto.)

¹¹ Kusiyapo kuvajijisa basi, Jesu wakashandiravo mbhungano iya ngo njira imweni. Iyena wakataja zvinodiwa zvokunyama zvo mbhungano iya. Iyena wakavabesera ngo kuvapa zvokuha perapo wakakumbira vajiji vake kuti vaperekere zvokuha izvi ku mbhungano iya. (Marko 6:41) Ngo njira iyi, Jesu wakajijisa vajiji vake kuti vashandire vamweni. Iyena wakakhombijazve kuti zvinosisira maningi kubesera vamweni ngo kuvapa zviri zvese. Izvi ndizvona zvinodikana kuithwa ngo vabeseri vo ungano. Rangariranyi mudakaro wakava no vajiji ava pavakabesera Jesu ngo kukovanisa zvokuha zvoita kuti ‘vese vahe voguta.’ (Marko 6:42)  Asipi vhaza iyi basi yokuti Jesu wakadira pakutanga zvinodiwa zvo vamweni, iyena wakaita izvi mu upenyu hwake hwese naari pasi pano. (Mateu 4:23; 8:16) Kuvajijisa no kuita zviro ngo kujidodokesa kuitira kuvabesera, zvakadakajisa maningi Jesu. Pacina kukana-kana, munozodakara maningi kudari mukadira pakutanga zvinodiwa zvo vamweni no kuvangisira kuti mushande inga mubeseri wo ungano.

12. Ngenyi apana na umwe wedu anojizwa inga ano zviro zvishoma kuti ape ungano?

¹² Vandhu vamweni vanorangarira kuti avana zvikwaniriso zvaushoni zvingatoitavo kuti vagume pakushandiswa mu ungano. Kudari muri kujizwa kudaro, mucadosuruvara. Zvokadi imwimwi muno mugariro jaushoni jokuti mungatokwanisavo kubesera hama no hambzaji jo mu ungano. Madini kuverenga magama o mupostori Pauro anowanika pa 1 Vakorinte 12:​12-30, no kuita mukumbiro ngo pamusoro pazvo. Pakarata iyi mupostori Pauro anonasa kujekesa kuti mushandiri umwe nga umwe wa Jehovha kubatanijavo na imwimwi, vanosisira maningi. Cimwenizve, vanodikana mu ungano. Ngo kudaro, kudari wari amuripi kukwanirisa kuti mushande inga mubeseri wo ungano, mucadoramwa. Kusiyapo zvondhozvo, itanyi zvese zvamunokwanisa kuti mushandire Jehovha pomwe no hama no hambzaji. Ivanyi no cokwadi cokuti vakuru vanorangariravo ngo pamusoro penyu, cimwenizve vanozomugaja mabasa amunokwanisa kuita.—Varoma 12:​4-8.

13. Ngozvapi zvinosisira pa zviro zvizinji zvinodikana kuna wiya anoda kuva mubeseri wo ungano?

¹³ Ngatende tivone mathangwe amweni angamubesera kuti muvangisire kuti muzove mubeseri wo ungano. Zviro zvamunodikanaro kuita i zviro zvokuti Makristu ese ndizvona zvaanodikanavo kuita. Inga muezaniso, Mukristu wese anodikana kuvangisa ushamwari hwake na Jehovha, kuva akanasiririka kuti ashandire vamweni no mudakaro no kugaja muezaniso waushoni mu mufambiro wake. Ngo kudaro, kangaije mapera kusakurira mugariro jese jinodikana kuti muve mubeseri wo ungano. Asi ngozvapi zvinodikana kuti hama inoda kuva mubeseri wo ungano ive inokwanirisa?

NGOZVAPI ZVAMUNODIKANA KUITA KUTI MUVE MUBESERI WO UNGANO?

14. Zvinorevenyi kuva “vakareremera”? (1 Timoti 3:​8-10, 12)

¹⁴ Ngatende tijije zviro zvimweni zvinonangwa mu bhuku ro 1 Timoti 3:​8-10, 12. (Verenganyi.) Vabeseri vo ungano vanodikana  “kuva vakareremera.” Gama iri ringasandujwazve ngo njira iyi, “kureremejwa ngo vamweni,” “anofanera” no “anokujwa.” Izvi azvirevi kuti imwimwi amungatoitivo zviro zvinosekesa kana kutotamba. (Mucumaeri 3:​1, 4) Fundo ngorokuti munodikana kunasa kureremeja ushoni basa renyu. Kudari imwimwi mukava mundhu anovangisira no anothembeka, zvinozoita kuti muve munoreremejwa ngo vese mu ungano.

15. Zvinoda kurevenyi kuva ‘anovereketa ciro cimwe’ no ‘kutama kuda kuwana ciro ngo njira yakashata’?

¹⁵ ‘Kuva mundhu anovereketa ciro cimwe’ zvinoda kureva kuti munodikana kuva mundhu wokadi, wakagondeka, cimwenizve, anovereketa cokwadi mukuvo wese. Imwimwi munodikana kuva mundhu anokwanirisa zvaanonanga kana kutama kucengeja vamweni. (Mazwi Akangwara 3:32) ‘Kutama kuda kuwana ciro ngo njira yakashata’ zvinoreva kuti imwimwi makagondeka pa basa renyu no manera amunoshandisa mare. Imwimwi amucaizoshandisepi shamwari jenyu jo mu ungano ngo njira yo kujikuja kuti muwane mare ngo pamusoro pavo.

16. (a) Zvinorevenyi ‘kutama kumwisa maningi doro’? (b) Zvinorevenyi kuva no “hana yakacena”?

¹⁶ ‘Kutama kumwisa maningi doro’ zvinoreva kuti pamunomwa doro amupindiriji mudida, cimwenizve, imwimwi amuzivikanwi inga cidhakwa. Kuva no “hana yakacena” zvinoreva kuti imwimwi munoreremeja zvinonangwa ndi Jehovha ngo pamusoro po zvakanaka no zvakashata. Ngozvokadi kuti imwimwi amuzivi kukwana asi muno ushamwari wokadi na Jehovha, ngo kudaro, munojizwa muno runyararo.

17. Magama o kuti “kuvoniwa kukwanisa kwavo,” anoda kurevenyi? (1 Timoti 3:10; vonanyi foto.)

¹⁷ “Kuvoniwa kukwanisa kwavo” zvinoreva kuti vakuru vakavona kuti imwimwi munokwanirisa mabasa enyu nokutizve vangamuthemba. Vakuru pavanomupa basa riri rese kuti imwimwi muite, nasanyi kutevejera ndhungamiriro javanomupekeja no ndhungamiriro jatinopekejwa ngo sangano. Psakanyi kuziva zvese zvinobatanijwa pa basa renyu no kuziva kuti ndirini parinodikana kupera. Kudari mukanasa kukwanirisa mabasa ese amakapuwa, vese mu ungano vanozozwisisa kuti imwimwi munofanera no kuvona kufambira mberi kwenyu. Vakuru amudikani kusiya kuroveja hama japera kubhabhatijwa. (Verenganyi 1 Timoti 3:10.) Kureva kuti mu ungano menyu muno majaha avha kubhabhatijwa wari ano makore anopindirija 13, vanoita jijo yavo yo mundhu ega no kunasirira musongano? Ivona vanopa mupinguro pamusongano no kwenda mu basa ro kucumaera? Kudari mupinguro wo muvhunjo iji  ukava hina, vapekejenyi mabasa avanokwanisa kuita. Ngo kudaro, majaha aya ‘anozovoniwa kukwanisa kwavo.’ Ngo kudaro, pavanozova no makore anopindirija 17, kangaije vanozogajwa kuti vazoshanda inga vabeseri vo ungano.

18. Magama o kuti “apana cavanopomehwa” anoda kurevenyi?

¹⁸ Magama okuti “apana cavanopomehwa” anoreva kuti apana mundhu anozowana thangwe raushoni kuti amuvhunje kuti makaita zviro zvakashata. Kangaije vandhu vangamupunbha zviro zvokunyepa. Izvi zvakaitikavo na Jesu, iyena wakatonanga kuti vateveri vake vaizosonganavo nazvo. (Johani 15:20) Asi kudari imwimwi mukava no mufambiro wakacena, inga ndi Jesu, imwimwi munozoreremejwa ngo hama no hambzaji.—Mateu 11:19.

19. Magama okuti “majimwamuna ano mukaji umwe basi” anoda kurevenyi?

¹⁹ “Majimwamuna ano mukaji umwe basi.” Jehovha paakaita mucadho wokutanga iyena wakananga kuti mucadho unoumbhwa ngo mwanarume umwe no mwanakaji umwe. (Mateu 19:​3-9) Zvondhozvo ndizvona zvinodikana kuti zvitevehwe ngo Makristu ese. Mukristu aadikani kuita zvo uhure. (Vahebheru 13:4) Kunja kwa izvi imwimwi munodikana kuva makagondeka ku mukaji wenyu. Narini amudikani kukhombija zviito zvinovonesa kuti muri kuda mwanakaji umweni.—Jobe 31:1.

20. Mwanarume ‘angatungamiririsa kudini ushoni vana vake no mbhuri yake’?

²⁰ ‘Vanotungamirira ushoni mbhuri yavo no vana vavo.’ Kudari imwimwi muri musoro wo mbhuri munodikana kukwanirisa mutoro jenyu. Itanyi kunamata ko mbhuri mukuvo wese. Endanyi mu basa ro kucumaera no mukaji wenyu no vana venyu pese pamunokwanisa. Beseranyi vana venyu kuti vasakurire ushamwari wakavanga na Jehovha. (Vaefeso 6:4) Mwanarume anotaja ushoni mbhuri yake anovonesa kuti iyena anokwanirisa kutaja ungano.—Ezanisanyi na 1 Timoti 3:5.

21. Kudari amuto maamubeseri wo ungano, ngozvapi zvamunodikana kuita?

²¹ Hama, kudari imwimwi amuto maamubeseri wo ungano, nasanyi kujija ushoni cijijo cino no kuita mukumbiro. Jijanyivo ngo zviro zvinonangwa mu Bhaibheri zvinodikana kuithwa kuti mundhu ave mubeseri wo ungano. Vangisiranyi kuti muzvikwanirise, rangarijisisanyi ngo manera amunoda Jehovha no hama no hambzaji. Izvi zvinozoengejera cido cenyu cokuda kuvashandira. (1 Pedhru 4:​8, 10) Pamunozoshanda inga mubeseri wo ungano munozodakara maningi ngo kushandira hama no hambzaji jo mu ungano. Munozova no cokwadi cokuti Jehovha anozokomborera kuvangisira kwenyu kuti mushande inga mubeseri wo ungano.—Vafiripi 2:13.