1-2. “Basa rakanaka” rinoithwa ngo vakuru rinobatanijenyi?

 KUDARI imwimwi maano mukuvo wakatikuti mecishanda inga mubeseri wo ungano, kangaije muri mugwanja kwaro kuti muzoshanda inga mukuru wo ungano. Imwimwi maidakariravo kuita “basa rakanaka” riri kuithwa ngo vakuru?—1 Timoti 3:1.

² Ngozvapi zvinobatanijwa pa basa ro vakuru? Ivona vanotungamirira mu basa ro kucumaera, vanoshanda ngo simba kuti vavhakacire hama no kujijisa, cimwenizve, vanoshanda ngo simba pakubesera ungano ngo zvavanonanga no kuita. Ndiyo ndava, Bhaibheri rinodaninja vakuru vanoshanda ngo simba inga “zvipo zvo vanarume.”—Vaefeso 4:8.

3. Ngozvapi zvinodikana kuithwa ngo hama kuti ive mukuru? (1 Timoti 3:​1-7; Tito 1:​5-9)

³ Ngozvapi zvamunodikana kuita kuti mushande inga mukuru? Kuva no zvikwaniriso kuti mushande inga mukuru, azvizivi kuezana no kuva no zvikwaniriso kuti mushande basa ro nyika. Kazinji kuti muwane basa munodikana kuva mundhu anokwanisa kushanda ngo simba inga zvinodiwa ndi patarau. Ngo divi rimweni, kudari imwimwi mecida kugajwa inga mukuru, imwimwi munodikana kuita zvizinji kusiyapo basi kucumaera no kujijisa. Kudari imwimwi mecida kuva mukuru munodikana kuva no zvikwaniriso zvinonangwa ngo Bhaibheri. 1 Timoti 3:​1-7 na Tito 1:​5-9. (Verenganyi.) Cijijo cino cinozobhuya ngo zviro zvinovetehwa ku vakuru pa zviro zvitatu zvinosisira: Cokutanga, kuva no mufambiro waushoni mu ungano no kunja. Cocipiri, kugaja muezaniso waushoni inga musoro wo mbhuri. Cocitatu, kuva makanasiririka kuti mushandire ungano.

 KUVA NO MUFAMBIRO WAUSHONI

4. Magama okuti “mucina camunopumbhwa,” anoda kurevenyi?

⁴ Kuti muve mukuru, munodikana kuva ‘mucina camunopumbhwa,’ izvi zvinoda kureva kuti imwimwi muno mufambiro waushoni mu ungano zvokuti apana ari wese angamupumbha ciro cakashata. Kunja kwa izvi, mundhu anoda kuva mukuru “anodikanavo kunangihwa zvakanaka ngo vokunja.” Zvakajeka kuti vandhu vamweni vacikashandiri Jehovha, vangabhuya zvakashata ngo pamusoro po zvamunotenda, asi ivona narini avadikani kuwana thangwe ro kukana-kana kuti imwimwi muri mundhu wakagondeka no waushoni. (Dhanyeri 6:​4, 5) Jivhunjisenyi kudari: ‘Kureva kuti inini ndinomufambiro waushoni mu ungano no kunja?’

5. Munodikana kuitenyi kuti ‘mude zvakanaka’?

⁵ Imwimwi munodikanavo ‘kuda zvakanaka’ kana kuvona zvaushoni zvinoithwa ngo vandhu vamweni no kuvangisa hama ngo mugariro jaushoni javanajo. Imwimwi munodikana kudakara ngokuita zvakanaka ku vamweni no kuita zvakawanda kupinda zviya zvaivetehwa kwamuri. (1 Vatesaronika 2:8; Tito 1:8) Ngenyi mugariro uwu unosisira maningi ku vakuru? Ngokuti ivona vanoshandisa maningi nguva yavo inosisira kuti vabesere ungano no kuita mabasa avo avakagajwa. (1 Pedhru 5:​1-3) Pikija zvakadaro, mudakaro wavanova nawo ngokushandira vamweni wakakura maningi kupinda kuvangisira kwese kwavanoita.—Mabasa o Vapostori 20:35.

6. Mungaitisa kudini kuti muve mundhu ‘anoashira varendo’? (Vahebheru 13:​2, 16, vonanyi foto.)

⁶ Imwimwi munovonesa kuti muri mundhu “anoashira varendo” pamunoita zvakanaka ku vamweni kubatanijavo na vaya vacikaripi shamwari jenyu jo phedo. (1 Pedhru 4:9) Bhuku rimweni rakananga kuti: “Mundhu anoashira ushoni varendo, anoashira no vandhu vaacikanasi kuziva ushoni, cimwenizve, anodakara maningi ngokuvakoka kuti vaviye kumuzi kwake.” Jivhunjisenyi kudari: Kureva kuti inini ndinozivikanwa inga mundhu anokhombija kunaka mwoyo ku vandhu vapsa vanoviya mu ungano mangu? (Verenganyi Vahebheru 13:​2, 16.) Mundhu anoashira ushoni varendo anokhombija kunaka mwoyo no kubhuya zviya zvaanazvo ku vandhu vapsa vanoviya ku ungano kwake. Izvi zvinobatanijavo kuitira zvaushoni ku vandhu vaya vari varombo maningi vokuti avazokwanisi kumuhwirijira ciri cese. Cimwenizve, munodikana kukhombija kunaka mwoyo ku hama jinoviya koita hurukuro ku ungano kwenyu na vaya vanoshanda ngo simba kuti vadakajise hama.—Genesisi 18:​2-8; Mazwi Akangwara 3:27; Ruka 14:​13, 14; Mabasa o Vapostori 16:15; Varoma 12:13.

7. Mukuru angakhombijisa kudini kuti iyena ‘aadi maningi mare’?

 ⁷ “Acikadi maningi mare.” Izvi zvinoreva kuti imwimwi amubatikani pa zviro zvokunyama. Azvinenyi kuti muri murombo kana kuti mukhupuki, imwimwi munodira Umambo hwa Mwari pakutanga pa mugariro uri wese mu upenyu hwenyu. (Mateu 6:33) Imwimwi munoshandisa nguva yenyu, simba no zvese zvamunazvo kuti munamate Jehovha, mutaje mbhuri yenyu no kushandira ungano. (Mateu 6:24; 1 Johani 2:​15-17) Jivhunjisenyi kudari: ‘Ngoapi mavonero angu ngo pamusoro po mare? Kureva kuti ndiri kuva mundhu anokwana ngo kuva no zviro zvinodikana basi? Kana kuti ndiri kubatikana pa kuda kuwana zviro zvakawanda no zviro zvokunyama?’—1 Timoti 6:​6, 17-19.

8. I njira japi jamungakhombija ndijona kuti “munojibata”?

⁸ Kudari imwimwi muri mundhu “anojibata,” izvi zvinoreva kuti muri mundhu wakaezanana mu mativi ese o upenyu hwenyu. Kana kuti munoziva pamunogumira. Izvi zvinobatanija pamunoha, kumwa, manera o kusimira no kujironga no mu mabungaijo. Imwimwi amutevejeri mugariro jo vandhu vacikashandiri Jehovha. (Ruka 21:34; Jakobo 4:4) Imwimwi munoenderera mberi makagajana vandhu pavanomuambira kana kumutaja ngo njira iciripi yaushoni. Imwimwi amudikani “kumwisa maningi doro” kana kuzivika inga cidhakwa. Jivhunjisenyi kudari: ‘Kureva kuti manera andinopona anovonesa kuti inini ndiri mundhu anojibata?’

9. Magama okuti “ano murangariro wakanaka” no “wakarongeka,” anobatanijenyi?

⁹ Kuva no “murangariro wakanaka” zvinoreva kuti munodikana kushandisa ndhungamiriro jo Bhaibheri pa shwiro imwe nga imwe. Imwimwi munorangarira no kungwarira kwese kuti ndhungamiriro jo mu Bhaibheri jinoshandisiswa kudini pa shwiro imwe nga imwe. Ngokuita kudaro munozonasa kuzwisisa ushoni no kutema zvivaringo zvaushoni. Imwimwi amuzodaviri ciri cese mucikazivi zvese zvinobatanijwepo. (Mazwi Akangwara 18:13) Mukaita kudaro, munozova mundhu wakaezanana no anotema zvivaringo akacijikira pa ndhungamiriro ja Jehovha. Kuti muve mundhu “wakarongeka,” munodikana kuva makanasiririka no kuva mundhu wokutanga. Imwimwi munodikana kuzivika inga mundhu anothembeka no anozwira ndhungamiriro. Mugariro iji jinozomubesera kuti muve no mufambiro waushoni. Ngatende tivone kuti tingakwanisa kudini kuita zvinonangwa ngo Bhaibheri no kuva musoro wo mbhuri waushoni.

KUGAJA MUEZANISO WAKANAKA INGA MUSORO WO MBHURI

10. Mwanarume ‘angatungamiririsa kudini mbhuri yake’?

¹⁰ Kudari imwimwi makacadha, cimwenizve, muri kuda kuva mukuru wo ungano, mufambiro waushoni wo mbhuri yenyu i ciro cinodikana. Ngo kudaro, munodikana ‘kutungamirira ushoni mbhuri yenyu.’ Munodikana kuva musoro wo mbhuri ano rudo no anofanera. Munodikana kutungamirira mbhuri yenyu pa kunamata ko mbhuri, kusotesesa dangani vari kupinda kumusongano jese no kuvona dangani vanodikana kuitisa nane mu basa ro kucumaera. Ngenyi izvi zvinosisira? Mupostori Pauro wakati: “Kudari mwanarume acikakwanisi kutungamirira mbhuri yake, angazongwaririsa kudini ungano ya Mwari?”—1 Timoti 3:5.

11-12. Ngenyi mufambiro wo vana unosisira maningi ku hama inoda kuva mukuru wo ungano? (Vonanyi foto.)

¹¹ Kudari imwimwi muri baba, munodikana kuva “no vana vanozwira no nderemejo yese.” Munodikana kuvajijisa no kuvaroveja ngo rudo. Zvakajeka kuti imwimwi munoda kuti vana venyu vadakare no kubungaija inga zvinoithwa ngo vana vese. Asi kuvajijisa komunoita kunozovabesera kuti vave vana vanozwira no vakareremera. Kunja kwa izvi, munodikana kuita zvese zvamunokwanisa kuti mubesere vana venyu kuti vave no ushamwari hwaushoni na Jehovha, kuzwira  ndhungamiro jake no kuvangisira mbhera pakubhabhatijwa.

¹² “Ano vana vanotenda, vacina mufambiro wakashata no vacikapandukiri.” Kudari mwana wo capupu akaita cishaishi cikuru, izvi zvingapsasisa kudini baba wakona? Kudari baba wakona avazivi kumuroveja no kumupangira inga zvinodikana kuithwa, ivona avazofaneri kuti vashande inga mukuru.—Vonanyi Murindiri wo kujija wo 15 wa Outubro wo 1996 pheji 21 ndima 6-7.

KUSHANDIRA UNGANO

13. Mungakhombijisa kudini kuti muri mundhu “anozwisisa” no “acina hasha”?

¹³ Hama jino mugariro ja ushoni jo Cikristu, jinosisira maningi ku ungano. Mwanarume “anozwisisa” anovangisira kuti pave no runyararo. Kudari mecida kuzivika inga mundhu anozwisisa munodikana kupurukira zvinonangwa ngo vamweni no kuva makanasiririka kuti mutendere mavonero o vamweni. Pa musongano wo vakuru, imwimwi maizova makanasiririka kuti muzwire mazano o vamweni kudari ecizwirana no ndhungamiriro jo Bhaibheri? Imwimwi ‘amudikani kuva no hasha’ kana kuti kuita kuti zviro zviithwe ngo manera enyu. Imwimwi munodikana kureremeja mazano o vamweni no mavonero avo. (Genesisi 13:​8, 9; Mazwi Akangwara 15:22) Munodikana kuva mundhu “acikaiti mapope” no ‘acikakasiki kunyangajwa.’ Kusiyapo kuva mundhu wakavanga no acikatenderi mavonero o vamweni, munodikana kuva mundhu wakanaka no anobhuya ngo njira yaushoni. Kudari imwimwi muri mundhu ano runyararo munozoshanda ngo simba kuti muite runyararo no vamweni pikija pa mugariro jinonesa. (Jakobo 3:​17, 18) Kudari mukava mundhu wakanaka mwoyo pamunobhuya no vandhu vese kubatanijavo na vaya vacikaripi hama jedu, munozovabesera kuti vaenderere mberi vakagajana no kuita kuti vatame kugara vakanyangajwa maningi.—Vatongi 8:​1-3; Mazwi Akangwara 20:3; 25:15; Mateu 5:​23, 24.

14. Magama o kuti “aadikani kuva mundhu wavha kutendeuka wari” no kuva mundhu “wakagondeka,” anoda kurevenyi?

¹⁴ Kuti mukwanirise kushanda inga mukuru, ‘amudikani kuva mundhu wavha kutendeuka wari.’ Izvi azvirevi kuti anodikana kuva mundhu waano makore akawanda naabhabhatijwa, asi anodikana kuva no nguva inodikana kuti  ave Mukristu wakaivha. Mucito magajwa inga mukuru munodikana kuvonesa inga ndi Jesu kuti munojidodokesa no kusengerera mecivetera mukuvo kwawo wokuti Jehovha azomupekeja mabasa mazinji mu ungano. (Mateu 20:23; Vafiripi 2:​5-8) Imwimwi mungakhombija kuti muri mundhu “wakagondeka” ngo kuzwira ndhungamiriro no mutemo ja Jehovha pomwe no kuzwira ndhungamiriro jamunopuwa ngo sangano rake.—1 Timoti 4:15.

15. Kureva kuti mukuru anodikana kuva mundhu anonasa kuita hurukuro, sananguranyi?

¹⁵ Bhaibheri rinonasa kujekesa kuti vakuru vanodikanavo ‘kukwanisavo kujijisa vamweni.’ Izvi zvinoreva kuti vakuru vese vanodikana kuva vecinasa kuita hurukuru? Haiwa. Vakuru vazinji pikija vacikakwanisi kuita ushoni hurukuro, vanokwanisa kujijisa ushoni mu basa ro kucumaera no paya pavanovhakacira hama no hambzaji kuti vajivangise. (1 Timoti 3:2; ezanisiranyi na 1 Vakorinte 12:28 na Vaefeso 4:11) Pikija mucikakwanisi kunasa kuita ushoni hurukuru, munodikana kushanda ngo simba kuti muve mujijisi waushoni. Mungazviitisa kudini izvi?

16. Mungaitisa kudini kuti muve mujijisi waushoni? (Vonanyi foto.)

¹⁶ “Majijisire ake anodikana kubatisisa soko rinogondeka.” Kuti muve mujijisi waushoni munodikana kushandisa Bhaibheri mukuvo wese wamunonga mecijijisa no kupa mazano. Verenganyi Bhaibheri mukuvo wese no kujija mabhuku akacijikira mu Bhaibheri. (Mazwi Akangwara 15:28; 16:23; Tito 1:9) Pamunonga mecijijisa nasanyi kusotesesa kuti mabhuku edu ari kunasa kusanangura mavhesi o mu Bhaibheri kana kuti haiwa, kuitira kuti mukwanise kumashandisa ngo njira kwayo. Pamunonga mecijijisa, itanyi zvese zvamunokwanisa kuti mukwanise kupsasa mwoyo ja vaya vari kumupurutana. Mungaitisazve nane manera enyu o kujijisa kudari mukakumbira no kushandisa mazano amunopuwa ngo vakuru vano ruzivo. (1 Timoti 5:17) Vakuru vanodikana ‘kukwanisa kuvangisa’ hama no hambzaji, asi mukuvo umweni vanotodikana kupekeja mbhangiro kana “kupangira.” Pa mugariro jiri jese ivona vanodikana kuva vakanaka mwoyo. Kudari imwimwi mukuvo wese mukava mundhu wakanaka no ano rudo pamunonga mecijijisa Soko ra Mwari, munozova mujijisi  waushoni ngokuti munonga meciteveja Mujijisi Mukuru Jesu Kristu.—Mateu 11:​28-30; 2 Timoti 2:24.

ENDERERANYI MBERI MECIITA ZVESE ZVAMUNOKWANISA

17. (a) Ngozvapi zvingabesera mubeseri wo ungano kuti aenderere mberi ecivangisira? (b) Vakuru vanodikana kurangarirenyi pavanosotesesa hama kuti vaigaje basa riri rese? (Vonanyi bhokiso rinoti: “ Mucasotesesa Kutama Kukwana ko Vamweni.”)

¹⁷ Pasure pokuvona zvinodikana kuti mushande inga mukuru wo ungano, vabeseri vazinji vo ungano vangarangarira kuti narini avazokwanisi kuzviita. Asi ceukijanyi kuti Jehovha no sangano rake avaveteri kuti imwimwi muve makakwana pakukhombija mugariro iji. (1 Pedhru 2:21) Cimwenizve, mujimu mucena ndiwona unozomubesera kuti muve no mugariro iji. (Vafiripi 2:13) Imwimwi munovona kuti munodikana kuitisa nane mugariro uri wese? Itanyi mukumbiro kuna Jehovha ngo pamusoro pazvo. Psakisisanyi ngo pamusoro po shwiroyo no kukumbira mazano ku mukuru ari wese kuti mungaitenyi kuti mukwanise kuitisa nane.

18. Vabeseri vese vo ungano vanodikana kuitenyi?

¹⁸ Itusu tese kubatanijavo no vakuru, tinodikana kwenderera mberi tecisakurira mugariro janangwari mu cijijo cino. (Vafiripi 3:16) Imwimwi muri mubeseri wo ungano? Mucaimira ponapo. Kumbiranyi Jehovha kuti amuroveje no kumubesera kuti muenderere mberi muri mundhu waushoni mu ungano. (Isaya 64:8) Jehovha anozokomborera kuvangisira kwenyu kuti muzokwanisa kushanda inga mukuru.