1-2. Munjira japi tingatajwa munjira icizivi kururama?

 JESU wakabhuya ngo pamusoro po muezaniso umweni wo noni yakakumbira Mutongi kuti aitonge ngo njira yakarurama. Zvingaita kuti ciitiko ici cakapsasa maningi vajiji va Jesu ngokuti vandhu vakawanda pa mukuvo wiya vaitajwa mu njira icizivi kururama. (Ruka 18:​1-5) Muezaniso uwu ungatipsasavo nyamasi uno ngokuti mukuvo jimweni tinotajwavo ngo njira icizivi kururama.

² Mu nyika nyamasi uno makazara ngo mukheto, kubzinyirihwa, nozvimwenivo, ndiyo ndava itusu tinoziva kuti mukuvo uriwese tingashaishwa kutajwa. (Mucumaeri 5:8) Asi zviro zvaticikaveteri i kushaishwa kutajwa ngo hama no hambzaji jedu, asi izvi zvingaitika. Asi zvakajeka kuti hama jedu no hambzaji ajizivi kudari inga vandhu vamweni vanoshaishaya kutitaja. Asi ivona i vandhu vacizivi kukwanavo. Paya patinonga tiri pa mugariro jakadari inga iji tinodikana kutevejera Jesu ngo manera aakaita paya paaishaishwa kutajwa. Kudari itusu tecivangisira kuti tive vandhu vanosengerera ku vaya vacikanamati Jehovha, kana kuvaya vanotitaja ngo njira icizivi kururama izvi zvinovonesa kuti tinodikanavo kuva vandhu vanovangisira maningi pakuva tinosengerera ku hama no hambzaji jedu. Kureva kuti Jehovha anozwa kudini patinoshaishwa kutajwa ngo vandhu vo nyika kana ngo hama no hambzaji jedu? Kureva kuti Jehovha ari kuvona zvese zvatiri kuitihwari?

3. Tinozvizivisa kudini kuti Jehovha ari kuvona manera atiri kutajwa ngo vamweni?

³ Jehovha ari kuvona zvese zvatiri kuitihwa, “Jehovha anoda ururami.” (Nduyo 37:28) Jesu anotigondesa kuti Jehovha anozoviisa “ururami ngo kukasika” mukuvo wakagajwa ukazoguma. (Ruka 18:​7, 8) Sambiri pano Jehovha anozopeja zvese zvakashata  nokupeja kutama kururama kwese.—Nduyo 72:​1, 2.

4. I besero rapi ratinopuwa ndi Jehovha nyamasi uno?

⁴ Asi wari tinodikana kuvetera mukuvo wokuti Jehovha anozopeja zvineso zvese, asi pamukuvo uwu wari Jehovha anotibesera kuvona kuti ngozvapi zvatingaita vamweni pavanoshaisha kutitaja. (2 Pedhru 3:13) Iyena anotijijisa zvatinodikana kuita kuti titame kuita zviro zvimweni zvingazotiviisira zvineso. Ecishandisa Mwana wake Jesu Kristu, iyena wakatipa muezaniso wakakwana ungatibesera kuti tingaitisa kudini kuti tihwisane no kutama kururama. Ecishandisazve Bhaibheri iyena anotipekeja mbhangiro jingatibesera kuvona kuti ngozvapi zvatingaita patinotajwa ngo njira icizivi kururama.

NGOZVAPI ZVATINODIKANA KUNGWARIRA PATINOTAJWA MU NJIRA ICIZIVI KURURAMA?

5. Ngenyi tinodikana kungwarira manera atinoita paya patinoshaishwa kutajwa?

⁵ Itusu tingakhugunyika no kutama kujizwa ushoni ngo ndava yo kutama kururama. (Mucumaeri 7:7) Vashandiri vakagondeka vo mu nguva yokare vakadari inga ndi Jobe na Abhakuki vakajizwavo kudaro. (Jobe 6:​2, 3; Abhakuki 1:​1-3) Zvakareruka kujizwa kudaro, asi tinodikana kungwarira manera atinoita kuti titame kuzoita zviro zvakashata.

6. Muezaniso wa Abhisaromi unotijijisenyi? (Vonanyi foto.)

⁶ Patinoshaishwa kutajwa kana kuti mundhu watinoda akatajwa mu njira icizivi kururama kangaije tingava no cido cokuda kuhwirijira kana kutopanica mundhuwo ngo njira iriyese. Asi kuita izvi kungatoengejerazve zvineso. Vonanyi muezaniso wa Abhisaromi mwana wa mambo Dhavhidhi. Iyena wakanyangajwa maningi hambzaji yake payakajiphwa ngo munukuna wake Amoni. Mukuzwirana no mutemo wa Mosi iyena waidikana kuurawa mukuzwirana no zviro zvaakaitaro. (Varevhi 20:17) Abhisaromi wainga no mathangwe akanaka kuti ajizwe kudaro, asi iyena acainga nocitendehwa co kuhwirijira ngo nyara jake kamare.—2 Samweri 13:​20-23, 28, 29.

7. Mutari wo nduyo wakaitenyi paaivona kutama kururama?

⁷ Mukuvo umweni vandhu vanoita zviro zvicikazivi kururama vanovoneka inga kuti avazopanichwi. Ngo ndava yazvo tingatanga kurangarira kuti kuita zviro zvakanaka akuna zvakunobesera. Vonanyi zvakaitika no mutari wo nduyo, uwo waisotesesa vandhu vaiita zviro zvakashata vecibudirira kuveni vandhu vaiita zvakanaka vaivoneka inga varombo mukuvo wese. Iyena wakati: “Ava ndi vandhu vakashata vacikaneseki ngo zviri zvese mukuvo wese.” (Nduyo 73:12) Iyena  wakaguma pa kutoneseka maningi ngo ndava yo kutama kururama uku, zvokuti wakatoguma pa kukana-kana kuti kushandira Jehovha kwaibesera kana kuti haiwa. Iyena wakati: “Pandakaeja kuzwisisa zviro izvi, ndakabararika hwiru.” (Nduyo 73:​14, 16) Iyena wakatoguma pakunanga kudari: “Inini ndainga ndaaphedo kuti ndisvejeke; inini ndainga ndaaphedo kuti ndiwe.” (Nduyo 73:2) Zviro zvakadari inga izvi, zvakaitikira hama imweni inodanijwa kuti Arbhertu.

8. Kutama kururama kwakapsasa kudini hama Arbhertu?

⁸ Hama Arbhertu vakapumbhwa kuti vakaba mare yo ungano. Inga muviyo, hama Arbhertu vakaruza mutoro javainga najo mu ungano no kutoruza nderemejo ku hama jese jainga jeciziva ngo pamusoro po shwiroyo. Ivona vanoti: “Ndakanyangajwa no kuthimwa-thimwa.” Ivona vakarembejeka maningi kudivi ro kumujimu, avacaiienda kumusongano ko makore mashanu. Zvakaitikari na hama Arbhertu, zvingaitikavo na itusu kudari tikatendera kuti kunyangajwa kutitungamirire paya patinotajwa ngo njira icizivi kururama.

TEVEJERANYI JESU PAYA PAMUNOTAJWA NGO NJIRA ICIZIVI KURURAMA

9. Kutama kururama kwapi kwakasongana na Jesu? (Vonanyi foto.)

⁹ Jesu wakagaja muezaniso wakakwana ungatibesera kuti tingaitisa kudini kuti tihwisane no kutama kururama. Iyena wakatajwa ngo njira  icizivi kururama ngo vandhu vakawanda kubatanijavo no vo pambhuri pake. Vamweni vo pa mbhuri pake vaitorangarira kuti iyena anopenga, vatungamiriri vo zviara vakananga kuti iyena ano dhimoni, cimwenizve masoca o Ciroma akamushora, kumutaja ngo njira icizivi kururama, pejisire vomuuraya. (Marko 3:​21, 22; 14:55; 15:​16-20, 35-37) Pikija zvakadaro Jesu wakakwanisa kuhwisana no kutama kururama uku acikahwirijiri. Ngozvapi zvatingajija kuvha ku muezaniso wake?

10. Jesu wakahwisana kudini no kutama kururama? (1 Pedhru 2:​21-23)

¹⁰ Verenganyi 1 Pedhru 2:​21-23. a Jesu wakasiya muezaniso wakakwana kuitira kuti ngozvapi zvatingazoita paya patinoshaishwa kutajwa ngo vamweni kana ngo njira icizivi kururama. Iyena waiziva mukuvo waushoni wo kuvereketa no mukuvo wo kunyarara. (Mateu 26:​62-64) Iyena acaigarepi ecijiinikira paciro cimwe nga cimwe caainyepehwa ngo vandhu. (Mateu 11:19) Paaibhuya iyena aacaitukepi vamweni nee aacaivathyisijirepi. Jesu mukuvo wese waiita zviro “ecithemba wiya waitonga ngo ururami.” Jesu waizviziva kuti mavonero a Jehovha pa shwiro iriyese ndiona aisisira maningi. Iyena waithemba kuti Jehovha waizopeja kutama kururama kwese pa mukuvo kwavo.

11. Mu njira yapi yatingangwarira zvatinovereketa? (Vonanyi foto.)

¹¹ Tingatevejera Jesu ngo kungwarira magama edu paya patinotajwa ngo njira icizivi kururama. Mukuvo umweni kushaishwa kutajwa kwatinoithwa akuzivi kukura maningi, ngo kudaro, tingatama kutokuteverera kana kutama kubhuya ciricese ngo pamusoro pazvo, ngokuti patinozvibhuya tingatobara zvineso zvimweni.  (Mucumaeri 3:7; Jakobo 1:​19, 20) Zvingaitazve kuti pamugariro jimweni tingatodikana kujivirira ari wese ari kutajwa munjira icikazivi kururama kana kuti tingatodikana kubhuya cokwadi kuti tijivirire zvatinotenda. (Mabasa o Vapostori 6:​1, 2) Asi patinoita zvondhozvo tinodikana kuita zvese zvatinokwanisa kuti tibhuye ngo njira yakagajana no nderemejo.—1 Pedhru 3:15. b

12. Ngozvapi zvatinodikana kuita kuti tithembhe Jehovha wiya anotonga no ururami?

¹² Tingatevejeravo Jesu ngo kuthemba Jehovha “wiya anotonga ngo ururami.” Vamweni pavanotitonga kana kushaisha kutitaja, itusu tinothemba kuti Jehovha anoziva zvokadi. Kuthemba uku kunotiita kuti ticungirire kushaishwa kutajwa kwatinonga teciithwa ngokuti tinozviziva kuti kumbejiyo Jehovha anozotonga zvineso zvese. Kudari tikathemba Jehovha kuti kumbejiyo anozopeja zvineso zvese, atizogari takanyangajwa kana kuzonda vamweni. Kudari tikasiya mazwire akashata mu mwoyo mwedu anozotiita kuti tiite zviro zvakashata, kuruza mudakaro no kukhuvaza ushamwari hwedu na Jehovha.—Nduyo 37:8.

13. Zvicinyi zvinozotibesera kucungirira no kusengerera paya patinohwisana no kutama kururama?

¹³ Ngo zvokadi kuti atizokwanisi kutevejera muezaniso wa Jesu ngo njira yakakwana. Mukuvo umweni tingazonanga zviro kana kuita zviro zvinozotiita kuti tigumire pa kujidemba. (Jakobo 3:2) Mukuvo umweni manera atinoshaishwa kutajwa ngo vamweni angaita kuti itusu tihwajihwe no kusuruvara ko upenyu hwedu hwese mu mugariro uno wo zviro. Kudari imwimwi makambotajwa ngo njira icizivi kururama ivanyi no cokwadi cokuti Jehovha ari kuvona zvamuri kuitihwaro. Cimwenizve, mungavavo no cokwadi cokuti Jesu uwo wakashaishwavo kutajwa ari kuzwisisa mazwire enyu. (Vahebheru 4:​15, 16) Kusiyapo kutipekeja basi muezaniso wa Jesu kuti titevejere, Jehovha anotipekejavo mbhangiro ijo jinoshanda no kutibesera kuti tihwisane no kutama kururama. Ngatende tivone vhesi mbiri jo bhuku ra Varoma jingatibesera kuita izvi.

“REGERANYI KUTI MWARI AVONESE USHUNGU HWAKE”

14. Magama okuti ‘regeranyi Jehovha avonese ushungu hwake’ anorevenyi? (Varoma 12:19)

¹⁴ Verenganyi Varoma 12:1. Mupostori Pauro paakapa mbhangiro ku Makristu ngo pamusoro pokuti “regeranyi kuti Mwari avonese ushungu hwake,” iyena waida kunangenyi? Mukuzwirana no zviri kunangwa ndi mupostori Pauro kuti regeranyi kuti Mwari avonese ushungu hwake, itusu tinosiya kuti Jehovha avonese ushungu hwake paya patinosiya kuti iyena aviise ururami pamukuvo kwawo. Hama imweni inozwi Joni yakashaishwa kutajwa yakati: “Ndakadikana kungwarira ushungu hwangu kuti nditame kuita zviro ndakacijikira pa mavonero angu. Asi izvi azvizivi kuva zvakareruka. Varoma 12:19 yakandibesera kuti ndienderere mberi ndakavetera Jehovha.”

15. Ngenyi ngozvaushoni kuvetera kuti Jehovha atonge zvineso?

¹⁵ Tinobesereka maningi kudari tikavetera Jehovha kuti azopeja kutama kururama. Patinoita izvi tinongwarira kuti titame kugara tecineseka mu murangariro no kugara takasuruvara awo ari mazwiro atinova nawo paya patinoeja kutonga zvineso tiri tega. Jehovha anojipira kuti atibesere. Patinohwisana no kutama kururama zvinoita inga kuti iyena ari kunanga kudari: ‘Zvisiyei munyara jangu inini ndinozvitonga.’ Kudari tikatendera cigondiso ca Jehovha cokuti “ndinozohwirijira” tinozosiya shwirojo munyara jake tothembha kuti Jehovha anoziva zvaanozoita pa mukuvo kwawo. Izvi ndizvona zvakabesera hama Joni, ivona vakananga kuti: “Kudari ndikasiya kuti Jehovha atonge swiro yangu muviyo  wakona unozova wakanaka maningi kupinda manera andaizotonga cinesoco ndiri ndega.”

“NYISAI USHAISHI NGO ZVAKANAKA”

16-17. Mukumbiro unotibeseresa kudini kuti ‘tinyise zvakashata ngo zvanaka’? (Varoma 12:21)

¹⁶ Verenganyi Varoma 12:21. Mupostori Pauro wakangwaja Makristu kuti ‘nyisanyi ushaishi ngo kuita zvakanaka.’ Pa Hurukuro yake yo pa Dundhu Jesu wakati: “Rambanyi mecida vavengi venyu no kuitira mukumbiro vaya vanomuteverera.” (Mateu 5:44) Izvi ndizvona kamare zvakaita Jesu. Imwimwi makamboima morangarira mazwire akava na Jesu paakakohomehwa pamutanda ngo masoca o Ciroma? Jesu wakatajwa ngo njira yakashata maningi cimwenizve, wakacungirira kuhwajihwa kwakakura maningi. Itusu atingakwanisi kuzwisisa mukuperera manera aakatambujika.

¹⁷ Jesu wakaramba ano rudo kuna Jehovha no kwenderera mberi akagondeka kwaari. Pikija nomatambujikire aakaita, kusiyapo kukumbira kuti Jehovha apanice masoca aya iyena wakaita mukumbiro eciti: “Baba, varegererenyi, ngokuti avazvizivi zvavari kuita.” (Ruka 23:34) Patinoita mukumbiro kuna Jehovha tecikumbira kuti iyena abesere vaya vanoshaisha kutitaja zvinozotibesera kuti tigare tagakajana no kupungura kusuruvara kwedu. Cimwenizve, zvinotibesera kuti itusu ticinje manera atinojizwa patinosota vandhu vondhovo.

18. Mukumbiro wakabeseresa kudini hama Arbhertu na hama Joni kuti vahwisane no kutama kururama?

¹⁸ Mukumbiro jakabesera hama mbiri janangwa mu cijijo cino kuti jihwisane no kutama kururama. Hama Arbhertu vanoti: “Inini ndaaitira mukumbiro hama jaishaishaya kunditaja. Inini ndaaita mukumbiro kuna Jehovha kakawanda ndecimukumbira kuti iyena andibesere kuti ndisiye sure zvaiitikari.” Ngo kudaro, hama Arbhertu vakatangazve kushandira Jehovha novakagondeka. Hama Joni vanoti: “Kovhaza jakawanda inini ndaiitira mukumbiro hama yaingaya yakandikhugunya. Ngo ndava yo mukumbiro iji, Jehovha wakandibesera kuti inini ndiiregerere no kutama kugara ndakasuruvara ngo pamusoro payo nee kuitonga. Mukumbiro iji jakandiita kuti ndijizwe ndino runyararo.”

19. Ngozvapi zvatinodikana kuita mbhera kumbhiri ko mugariro uno wo zviro? (1 Pedhru 3:​8, 9)

¹⁹ Mbhera kumbhiri ko mugariro uno wo zviro, itusu atizvizivi kuti i kushaishwa kutajwa kwapi kwatinozohwisana nako. Azvinenyi kuti ngozvapi zvinozoitika kumbejiyo, itusu atizoregeri kuita mukumbiro kuna Jehovha tecikumbira besero. Kusiyapo zvondhozvo, endereranyi mberi mecishandisa ndhungaririro jo mu Bhaibheri no kutevejera Jesu Kristu paya pamunoshaishwa kutajwa. Kudari imwimwi mukaita izvi mungava no cokwadi cokuti Jehovha anozomukomborera kwenda no kwenda.—Verenganyi 1 Pedhru 3:​8, 9.