Maidakarira kujija zvizinji pa jijo yenyu yo mundhu ega? Imwimwi mungaeja kuita mazano anoteverari kuti muve no cirovejeso cokujija:

• Psakanyi ndau yakamunakira. Kudari zvecikwanisika psakanyi ndau yakarongeka no yakaeja. Imwimwi mungagara pa meza kana kupsaka ndau imweni yakangwaririka kunja.

• Psakanyi ndau yamungagara mega. Jesu wakaita mukumbiro “comangwanani, kucakasvipa” pa “ndau icina vandhu.” (Marko 1:35) Kudari mukatama kuwana ndau yamungagara mega, mungavhunja mbhuri yenyu kana vamunogara navo nguva yenyu yo jijo nokuvakumbira kuti vatame kuita musindo.

• Batikananyi pa zvamuri kujija. Ngwariranyi kuti mutame kuphingaijika. Kudeya mecishandisa foni kana thabhureti pamunonga mecijija, idirenyi mu mugariro wokuti aizomuphingaiji. Pamunonga mecijija mukaceukija kuti pano ciro camunodikana kuita citarirenyi kuti muzociita pamukuvo umweni. Kudari zviri kumunesera kubatikana pa zvamuri kujija mungaima kana kusiya.