Pataienderera mberi tecicumaera, taidavo mabhuku akawanda. Hama jo ku Bheteri ro Brukrini jaiimprimiri marevhista, asi kuti jiimprimiri mabhuku ano kapa jakavanga, vaienda ku ndau jimweni jaiimprimirihwi kuti vapagari. Vandhu ava povaipeja mukuvo wakareba vacikaviisi mabhuku, zvaiita kuti basa ro kucumaera ritame kufamba ushoni. Ngo iyo ndava, hama Rutherford vakavhunjisa hama Robert Martin avo vaivonerera basa ro kuimprimiri dangani zvaizokwanisika kuti ivona vaiimprimiri vega mabhuku.

Hama Martin vakati, “zano iri rinosisira.” Izvi zvaireva kuti taidikana kuva no ndau ino mucini jese jinodikana kuti tibudise mabhuku. Hama jakaarugari ndau phedo no shitaka Konkordhi numero 18 ku Brukrini, no kutenga mucini jese jaidiwa kuti vatange no basa.

Asipi vese vaizvidakarira. Muimiriri wo empreza yaiimprimiri mabhuku edu wakaviya kotivhakacira. Iyena wakananga kudari: “Imwimwi muna mucini jaushoni jokuimprimiri ndijona mabhuku, asi apana na umwe wenyu anokwanisa kujishandisa. Ajiperi mweji mutandhatu mucizivi kujigujura.”

Hama Martin vakati: “Izvi ndizvona. Asi itusu taiziva kuti tainga no besero ra Jehovha.” Ivona vainga no razau. Ngo kukasika mucini uwu wakakwanisa kuimprimiri mabhuku anokwana kuita 2.000 pa zuva.

Kusiyapo kuimprimiri amwe o mabhuku edu, vandhu va Jehovha vakatanga kushandisa radhiyo kuti vacumaere masoko akanaka. Mu Domingo jo madeko njiku 26 ya Fevereiro yo 1922, hama Rutherford vakavereketa ko vhaza yokutanga mu radhiyo. Ivona vakaita hurukuro yainga no musoro unoti: “Zviuru no Zviuru zvo Vandhu Vari Kupona Wari Avacazofi,” mu KOG ku Rozajheri, Kariforniya, Estadhus Unidhus yo Amerika.

Zvinovoneka inga kuti vandhu vanokwana kuita 25.000 vakazwa hurukuro iyi. Vamweni vavo vakatumira  karata vecibonga hama Rutherford ngo hurukuro iyi. Imwe yo karata iji yakatumihwa ndi Willard Ashford anogara ku Santa Ana, Kariforniya. Iyena wakabonga maningi hurukuro yakaitwari ndi hama Rutherford, ecinanga kuti “yainga yecidakajisa maningi.” Iyena wakaengejera eciti: “No vandhu vatatu pa muzi vecihwaja zvaizonesa maningi kuti ndizwe hurukuro iyi kudari noicizivi kuitwa mu radhiyo, pikija hayo no yakaitwa phedo no pa muzi.”

Hurukuro jakawanda jakazorijwazve pa sumana jakatevera mu radhiyo. Murindiri wakananga kuti mbhera kupera ko gore iri, “zvingaita kuti vandhu vanokwana kuita 300.000 vakaashira masoko o Umambo pecishandiswa radhiyo.”

Zvecivoneka kuti vandhu vaidakarira kuzwa hurukuro jaiitwari mu radhiyo, Vajiji vo Bhaibheri vakatema civaringo co kufunungura shitasau cavo co radhiyo ku Staten Island phedo no Bheteri ro Brukrini. Makore akazotevera, Vajiji vo Bhaibheri vakazoshandisa maningi shitasau ici co radhiyo, caizivika inga WBBR, kuti vacumaere masoko akanaka.

Murindiri wa 15 ya Junho wo 1922, wakazivisa gungano raizoitwa ku Sedhari Point, Ohiyo, mu njiku 5 mbhera 13 ya Setembro wo gore rondhoro. Vajiji vo Bhaibheri vainga vakadakara maningi povakaguma ku ndau yaidari kuitihwa gungano.

Pa hurukuro yavo yokutanga, hama Rutherford vakananga kudari kuno vese vaengepo: “Ndinokhohwa kamare kuti Mambo vanozokomborera gungano iri, nokutizve irona rinozopa ucapupu ucikazivi kumboitwazve pa nyika pano.” Vese vaiita hurukuro pa gungano iri vaivangisa hama kuti jirambe jakavanga mu basa ro kucumaera.

Ngo mucishanu njiku 8 ya Setembro, vandhu vanokwana kuita 8.000 vakazaja ndau yaiitihwari gungano vecivetera kuzwa hurukuro inodakajisa yaizoitwa ndi hama Rutherford. Ivona vaivetera kusananguhwa ko maretra okuti “ADV” aiwanika pa mukoka javo. Povainga vecienda kogara mu ndau javo, kangaije vamweni vakavona rona guru rainga rakasungwa phedo no tribhuna. Hama Arthur Claus, vakaita hwendo kuvha Tursa, Okrahoma, kuti vaende ku gungano iri. Kondhoyo  ivona vakawana ndau yaushoni yaizovabesera kuti vazwe hurukuro jainga jeciitwa, zvecivoneka kuti mu nguva iyi akucaengepi no mikrofoni.

Kuti patame kuva no mundhu waizophingaija vamweni hurukuro painonga yeciitwa, hama yaitungamirira yakazivisa kuti apana waidikana kunghwina mu ndau yaiitihwaro gungano hama Rutherford pavanonga veciita hurukuro yavo. Pa nguva jinokwana kuita 9:30, hama Rutherford vakatanga hurukuro yavo ngo kunanga magama a Jesu anowanika pana Mateu 4:17, okuti: “Umambo wo kudenga waaphedo.” (Versão Rei Jaime) Vecibhuya ngo manera vandhu vaizoziva Umambo uhu, ivona vakati: “Jesu wakananga kuti pa mukuvo wokuviya kwake, waizounganija vandhu vake, woita kuti vashandiri vake vokadi no vakagondeka vave vakabatana.”

Hama Claus, avo vainga vakagara phedo no tribhuna, vakati: “Itusu taizwa kamare zvese zvainangwa.” Asi zvinosuruvarisa ngo zvokuti ivona vakadikana kubuda povaigara, ngokuti avacaengepi vecijizwa ushoni. Pikija vecizviziva kuti avacaidikana kunghwinazve.

No papera museswa munganani, ivona vakatangazve kujizwa ushoni. Povainga vecihwirira vakazwa vandhu vecitaka nyara. Izvo zvakavadakajisa maningi. Ivona vakarangarira kukhwira pa denga kudari zvecikwanisika kuti vanase kuzwa hurukuro iyi. Pa mukuvo uwu, hama Claus vainga no 23 o makore. Zvecivoneka kuti majhanera ainga akafununguka, vakazwisisa kuti “vaizobesereka ushoni kamare.”

Asi hama Claus avacaengepi voga. Shamwari javo jimweni jaingavo panyezurupo. Umwe wavo waidanwa Frank Johnson, wakavakhwederera ovavhunjisa kudari: “Munavo shipanga cakarojwa?”

Hama Claus vakati: “Hina ndinaco.”

Hama Franki vakati: “Imwimwi muri mupinguro jo mukumbiro jedu. Muri kuvona rona guru rakapombehwaro  apo? Irona rakasungihwa pa perego, nasanyi kupurukira hama painonga yeciita hurukuro yayo. Ikandombhera ngo kunanga magama okuti: ‘Zivisanyi, zivisanyi,’ cekanyi uruji wakasungaro rona.”

Ngo kudaro, hama Claus vakagara vakangwarira no cipanga mu nyara. Ngo kukasika, hama Rutherford vakaguma pa fundo guru ro hurukuro yavo. No vakadakara, kangaije no izwi guru hama Rutherford vakananga kudari: “Ivanyi Zvapupu zvokadi no zvakagondeka zva mambo. Ivanyi vandhu vanovangisira mbhera zviyara zvese zvokunyepa zvipere kuparajwa. Zivizisanyi masoko ku nyika jese. Nyika inodikana kuziva kuti Jehovha ndi Mwari nokuti Jesu Kristu ndi Mambo wo majimambo. Nyamasi ndi njiku inosisira maningi. Vonanyi, mambo ari kutonga! Imwimwi muno basa ro kuzivisa vandhu izvi. Ngo kudaro, zivisanyi, zivisanyi, zivisanyi Mambo no Umambo hwake!”

Hama Claus no hama jimweni vakaceka uruji waisunga rona riya, irona rakapombonoka. Mukuzwirana no maretra okuti “ADV” mu cingezi, rona riya rainga rakatahwa kudari: “Zivisanyi Mambo no Umambo.”

Gungano rakaitwari ku Sedhari Point rakabesera hama kuti jibatikane maningi pa basa rinosisira rokucumaera ngo pamusoro po Umambo. Vaya vainga no cido cakakura co kuita basa iri vakadakara maningi. Hama imweni inogara ku Okrahoma, Estadhus Unidhus yo Amerika yaishanda inga Koportori (anozivika wari inga piyona), yakananga kudari: “Zona rotaicumaera raizara ngo mugodhi jo marasha. Vandhu vazinji vainga varombo maningi.” Iyona yakananga kuti vandhu povaipurukira masoko ainangwa mu revhista A Idade de Ouro, “vaitanga kucema.” Ivona vakaengejera veciti: “I makomborero makuru kubesera vandhu ava.”

Vajiji ava vo Bhaibheri vakavona kusisira ko magama a Jesu, anowanika pana Ruka 10:2, okuti: “Munda unoda kukotohwa, wakakura. Asi vashandi vashoma.” Mukupera ko gore ro 1922, hama jainga japera kunasirira kuti jizivise masoko o Umambo pa nyika yese.