1. Kuitisa kudini kuda kwedu ‘kuziva’ Jehovha kunotibesera kuti tidakare?

 MUDAKARO wokadi-kadi asipi mazwiro atingava nawo o kudakara ko mukuvo mushoma. Ngo pamusoro po kudakara, Jesu wakananga kudari pa Hurukuro yake yo pa Dundhu: “Vanodakara vaya vanoziva kuti vanodikana kutungamirihwa ndi Mwari.” (Mateu 5:3) Izvi zvinovonesa kuti itusu tingakwanisa kuva no mudakaro mu upenyu hwedu hwese. Tingazviitisa kudini? Jesu waizviziva kuti vandhu vakasikwa no cido cokuda kunamata Musiki wavo, Jehovha Mwari. Zvecivoneka kuti Jehovha ndi “Mwari wakadakara,” vandhu vanomunamata, vangakwanisavo kuva vakadakara.—1 Timoti 1:11.

2-3. (a) Mukuzwirana no masoko a Jesu, mbhaani vangadakara? (b) Zvicinyi zvatinozovona mu jijo iyi, ngenyi zvinosisira?

² Kureva kuti tingadakara basi kudari tikatama kuwanana no zvineso here? Haiwa. Pa hurukuro yake yo pa dundhu, Jesu wakananga masoko anoshamaisa. Iyena wakananga kuti vaya “vanocema” dangani ngo zvishaishi zvavo kana ngo zvineso zvavo, vangadakara. Jesu wakanangazve zvakafanana ngo vaya “vanoteverehwa ngo ndava yo ururami” no ‘vanotukwa’ ngo kuva vateveri va Kristu. (Mateu 5:4, 10, 11) Tingaitisa kudini kuti tive takadakara pa mugariro iji wari?

³ Jesu wainga ecijijisa kuti mudakaro wedu auvhi pa mugariro watinao mu upenyu. Asi unofira pa kuziva kwedu Mwari no kwenderera mberi tina ushamwari hwo phedo naye. (Jakobo 4:8) Tingazviitisa kudini izvi? Mu jijo iyi, tinozovona zviro zvitatu zvingatibesera kuti tiwane mudakaro wokadi-kadi.

4. Ngocapi ciro cokutanga cingatibesera kuti tiwane mudakaro wokadi-kadi? (Nduyo 1:1-3)

⁴ CIRO 1: Kuti tive vandhu vano mudakaro wokadi-kadi, tinodikana kuverenga no kujija Bhaibheri. Jesu wakaezanisa  Soko ra Mwari no zvokuha. Vandhu pamwepo no zvinyama vanoda zvokuha kuti vakwanise kupona. Asi ndi vandhu basi vangakwanisa kuverenga Soko ra Mwari. Itusu tinotodikana kamare kuita zvondhozvo. Izvo ndizvona zvakaita kuti Jesu anange kudari: “Mundhu aadikani kupona ngo pau basi, asi anodikana kupona ngo masoko ese anovha pa muromo wa Jehovha.” (Mateu 4:4) Ngo kudaro, atidikani kupeja njiku yese ticizivi kuverenga Soko ra Mwari, Bhaibheri. Mutari wo nduyo wakananga kudari: “Anomucena mundhu . . . anodakara ngo mupango wa Mwari worangarira matongero ake usiku no masikati.”—Verenganyi Nduyo 1:1-3.

5-6. (a) Zvicinyi zvatingajija mu Bhaibheri? (b) Kuverenga Bhaibheri kungatibeseresa kudini?

⁵ Jehovha ngo rudo hwese wakadira mu Bhaibheri masoko anotibesera kuti tive no upenyu unodakajisa. Inga muezaniso, tinojija kuti ngenyi iyena wakarura vandhu. Tingaitisa kudini kuti tive no ushamwari hwo phedo naye no kuregerehwa zvishaishi zvedu. Tinojijazve ngo vetero inoshamaisa yatinozova nayo kumbejiyo. (Jeremia 29:11) Patinojija Bhaibheri toziva zvokadi izvi, tinodakara maningi.

⁶ Bhaibheri rino mazano akawanda maningi angatibesera mu upenyu hwedu hwo njiku no njiku. Patinoshandisa mazano aya, tingawana mudakaro wokadi-kadi. Pamunosuruvara ngo zvineso zvenyu, pejanyi nguva meciverenga Bhaibheri no kurangarijisisa zvamaverengaro. Jesu wakati: “Vanodakara nga vaya vanozwa soko ra Mwari no kuita zvarinonanga!”—Ruka 11:28.

7. Mungabesereka kudini pamunopeja nguva meciverenga Bhaibheri?

⁷ Pamunonga meciverenga Soko ra Mwari,  psakanyi nguva yokuravira zvamunongaro meciverenga. Rangariranyi ngo muezaniso uwu basi. Amborangariranyi kuti mundhu wamubikira zvokuha zvamunodakarira maningi. Zvingaita kuti imwimwi muri kukasika maningi kana muri kuneseka ngo zviro zvimweni, zvoita kuti mutame kudakajihwa ngo zvamuri kuharo. Pamunopera kuha munozwisisa kuti maha ngo kukasikira maningi, zvokuti amuzivi kuzwa kunaka ko zviro zvamaharo. Ndizvona zvondhozvo zvinotika patinoverenga Bhaibheri. Nguva jimweni tinoverenga Bhaibheri ngo kukasika, zvoita kuti titame kuzwisisa zvotaperaro kuverenga. Ivanyi no nguva kuti mubesereke ngo zvamunoverengaro. Vonanyi zviri kuitikepo, manera avari kubhuya no kurangarijisisa ngo zvamuri kuverengaro. Mukaita izvi munozodakara maningi.

8. “Muranda wakagondeka no wakangwara,” uri kukwanirisa kudini basa rowakapuwa ndi Jesu Kristu? (Vonanyivo masoko o pasi.)

⁸ Jesu wakagaja “muranda wakagondeka no wakangwara,” kuti utipe zvokuha pa nguva kwayo. Itusu tiri kupuwa kamare zvokuha zvaushoni ku divi ro umwari. * (Mateu 24:45) Zvokuha zvese zvatinopuwari ngo muranda wakagondeka zvakacijikira mu Bhaibheri. (1 Vatesaronika 2:13) Cimwenizve, zvokuha izvi zvinotibesera kuzwisisa manera Jehovha anorangarira. Izvi ndizvona zvinotiitisa kuti tiverenge marevhista Murindiri no Mukai! pamwepo no musoro jimweni jinowanika mu saite jw.org. Tinonasirira kuitira musongano jo pakati po sumana no kumbhiri ko sumana, no kuvona urongwa wo mweji ngo mweji wo JW Broadcasting^®. Kudari tikaenderera mberi teciverenga no kujija Bhaibheri, tinozokwanisa kuita ciro cocipiri cinotibesera kuti tive no mudakaro woka-kadi.

9. Ngocapi ciro cocipiri cingatibesera kuti tive no mudakaro wokadi-kadi?

⁹ CIRO 2: Kuti tive no mudakaro wokadi-kadi, tinodikana kuzwira ndhungamiriro ja Jehovha. Mutari wo nduyo wakatara kudari: “Vanodakara vese vanothya Tenji Mwari, vanofamba mu makwanja ake!” (Nduyo 128:1) Kuthya Jehovha kunorevenyi? Kunoreva kumureremeja no kutama kuita zviro zvinomunyangajisa. (Mazwi Akangwara 16:6) Izvo ndizvona zvinotiitisa kuti tizwire ndhungamiriro jese ja Jehovha jatinowana mu Bhaibheri ngo pamusoro po zvakanaka no zvakashata. (2 Vakorinte 7:1) Tinozokwanisa kudakara, kudari tikaita zviro zvinoda Jehovha, toramba kuita zviro zvaanonyenya.—Nduyo 37:27; 97:10; Varoma 12:9.

10. Mukuzwirana no Varoma 12:2, ngozvapi zvatinodikana kuita?

¹⁰ Verenganyi Varoma 12:2. Mundhu angaziva hake kuti Jehovha ano citendehwa co kunanga kuti ngozvapi zvakanaka no zvakashata. Asi iyena anodikana kutendera kuzwira ndhungamiriro jakadihwari ndi Mwari. Inga muezaniso, mundhu angaziva kuti utongi uno citendehwa co kudira mugano wo vherosidhadhi yaanodikana kufamba mu shitaka. Asi zvingaita kuti iyena aatenderi kuzwira mugano jakadihwari ngo utongi. Inga muviyo, iyena anofamba ngo vherosidhadhi yaanoda, kusiyapo kuzwira mutemo wakadihwaya ngo utongi. Itusu tingakhombijavo ngo manera atinopona kuti kuzwira ndhungamiriro ja Jehovha, kunobesera upenyu hwedu. (Mazwi Akangwara 12:28) Mambo Dhavhidhi wairangariravo kudaro. Iyena wakananga kudari ngo pamusoro pa Jehovha: “Munozondijijisa gwanja ro kurarama, pa meso penyu ndinozara ngo kudakara, ndikagara nemwi ndinozobusa mbhera narini.”—Nduyo 16:11.

11-12. (a) Patinosongana no zvineso kana patinonga takacamwa, zvicinyi zvatinodikana kungwarira? (b) Mugariro jiri pana Vafiripi 4:8, jinotibesera kudini patinonga tecisana mabungaijo?

 ¹¹ Tese tinosongana no zvineso kana tingatocamwa. Pazvinoitika izvi kangaije tingatoita ciri cese kuti tikanganwe zvinesozvo. Izvi azvizivi kushata, asi tinodikana kungwarira kuti titame kuita zviro zvicikadakajisi Jehovha.—Vaefeso 5:10-12, 15-17.

¹² Pa karata yake ku Vafiripi, mupostori Pauro wakabesera hama kuti jirambe jecirangarira ngo pamusoro po zviro “zvakarurama, . . . zvakacena, . . . zvinodiwa [no] zvinokujwa.” (Verenganyi Vafiripi 4:8.) Pauro paakananga mugariro iji, aacainangirepi ngo pamusoro po mabungaijo. Asi zvaakatarari zvinodikana kutibesera pa kusana mabungaijo. Amboejanyi kuita izvi basi: Mucito makheta “mumbo,” “firmi,” “vhidhiyo gemi” kana “bhuku” riri rese, vonanyi dangani zvinozwirana no mugariro jatinowana pa vhesi iyi. Kuita izvo kunozomubesera kuti muzive dangani mabungaijo omakheta, anodakajisa Jehovha kana kuti haiwa. Tinoda kupona mukuzwirana no ndhungamiriro jakakhwirira ja Jehovha. (Nduyo 119:1-3) Izvi zvinozotibesera kuti tive no hana yakacena pakuita ciro cocitatu cinotibesera kuti tive no mudakaro wokadi-kadi.—Mabasa o Vapostori 23:1.

13. Ngocapi ciro cocitatu cingatibesera kuti tive no mudakaro wokadi-kadi? (Johani 4:23, 24)

¹³ CIRO 3: Ivanyi no cokwadi co kuti muri kudira kunamata Jehovha pa ndau yokutanga mu upenyu hwenyu. Jehovha ndiyena wakatisika. Cimwenizve, ndiyena basi anofanera kunamatwa. (Apokaripsi 4:11; 14:6, 7) Ngo iyo ndava, cinosisira maningi mu upenyu hwedu ndi kunamata Jehovha ngo njira yaanotendera, “ngo mujimu mucena no cokwadi.” (Verenganyi Johani 4:23, 24.) Izvi zvinoreva kuti kunamata kwedu kunodikana kutungamirihwa ngo mujimu mucena no kuzwirana no zvokadi zvinowanika mu Bhaibheri. Kunamata kwedu Jehovha kunodikana kuva pa ndau yokutanga mu upenyu hwedu pikija basa redu riri kurambijwa mu nyikemo. Hama no hambzaji jinopindirija kuita 100, jakafungihwa mukadheya wari uno basi ngo kuva Zvapupu zva Jehovha. * Pikija zvakadaro, ivona vari kuramba vakadakara veciita mukumbiro, vecijija no kuvhunja vamweni ngo pamusoro pa Mwari no Umambo hwake. Patinoshohwa kana kutukwa, tinodakara ngo kuziva kuti Jehovha ari ku divi redu nokutizve anozotipfupa.—Jakobo 1:12; 1 Pedhru 4:14.

14. Zvicinyi zvakaitika no hama imweni iri mujaha yo ku Tajikistau? Ngenyi zvondhozvo zvakaiitikira?

¹⁴ Zvakaitika mu upenyu hwo vandhu vamweni zvinovonesa kuti zviro zvitatu zvotaperari kujija zvinotibesera kamare kuti tiwane mudakaro wokadi, azvinenyi no zvineso zvatinosongana nazvo. Vonanyi zvakaitika no hama imweni iri mujaha ino gumi no mapfumbhamwe o makore, inodanwa Jovidon Bobojonov, inogara ku Tajikistau. Iyona yakaramba kunghwina mu basa ro usoca. Ngo kudaro, mu njiku 4 ya Outubro yo 2019, yakafungihwa mu kadheya ko mweji munganani, yovoniwa inga yaita zvakashata. Zvakaitikari zvakabudiswa mu notisiya mu nyika jakasiyana-siyana. Iyona yakatakwa, yovangirijwa kuti isimire nguvo jo masoca no kuita mbhiko. Perapo yakavhunjwa kuti ino ndava, yotumihwa ku ndau yaivangirijwa vandhu kuti vaite basa, mbhera mukuvo wokuti prezidhenti wo nyika iyi  wakairegerera woibudisa mukadheya. Pikija no zvese zvakaiitikirari, iyona yakaenderera mberi yakagondeka kuna Jehovha. Cimwenizve, aizivi kuruza mudakaro wayo. Yakazviitisa kudini? Nguva jese iyona aizivi kukanganwa kuti yaidikana kutungamirihwa ndi Mwari.

15. Hama Jovidon vakaitisa kudini kuti vaenderere mberi vacijija ngo pamusoro pa Jehovha povainga mukadheya?

¹⁵ Pavainga mukadheya, hama Jovidon vakaenderera mberi vecijija ngo pamusoro pa Jehovha, kunyazi vainga vacina Bhaibheri no mabhuku amweni akacijikira mu Bhaibheri. Vakazviitisa kudini? Hama no hambzaji jo mu ndharaundhemo pajaivaendesera zvokuha, jaidiremo vhesi yo njiku. Ngo kudaro, vaikwanisa kuverenga Bhaibheri no kurangarijisisa njiku jese. Pavakabuda mukadheya, ivona vakananga kudari kuna vaya vacito vasongana no muejo jakadari: “Wari inguva yokushandisa rusujunuko hwenyu kuti muengejere uzivi hwenyu ngo pamusoro pa Jehovha ngo kuverenga Bhaibheri no mabhuku edu.”

16. Hama jovidon vakatema civaringo co kubatikana pa zviro zvapi?

¹⁶ Hama Jovidon vakavangisira maningi kuti vapone mukuzwirana no ndhungamiriro ja Jehovha. Ivona avazivi kugara vecirangarira no kuita zviro zvakashata. Kusiyapo zvondhozvo, vakabatikana pa zviya zvinoda Jehovha.  Hama Jovidon vaishamaisika maningi ngo kuvona zvisikwa zva Jehovha. Comangwanani ivona vaimuka vozwa shiri jeciimba. Comadeko vaivona nyereji no mweji zvakabhwaka. Ivona vakati: “Ndaidakara no kuvangiswa pondaivona zvipo izvi zva Jehovha.” Kudari tikava vandhu vanobongesera ngo zviro zvatinopuwa ndi Jehovha ku divi ro umwari no kunyama tinozova no mudakaro wokadi-kadi. Mudakaro uwu unozotipekeja simba kuti ticungirire.

17. Kuitisa kudini 1 Pedhru 1:6, 7, ingabesera mundhu anonga ari pa mugariro wakaezana no wa hama Jovidon?

¹⁷ Hama Jovidon vakadiravo kunamata Jehovha pa ndau yokutanga mu upenyu hwavo. Ivona vaizviziva kuti zvaisisira maningi kuramba vakagondeka kuna Jehovha, Mwari wokadi-kadi. Jesu wakati: “Ndi Jehovha Mwari wako waunodikana kunamata, ndiyena basi waunodikana kuitira basa rakacena.” (Ruka 4:8) Vatungamiriri vo masoca vaida kuti hama Jovidon vasiye kuva Capupu ca Jehovha. Kusiyapo kuita zvondhozvo, ivona vakaenderera mberi veciita mukumbiro ngo mwoyo wese usiku no masikati, kuti Jehovha arambe ecivabesera kuti vatame kuremba. Pikija vecishaisha kutajwa hama Jovidon vakaenderera mberi vakagondeka. Ngo zvokadi kuti ivona vakavhiswa pa muzi pavo, votakwa no kudihwa mukadheya, asi wari ivona vano ciro cinosisira maningi, rutendo hwakavanga.—Verenganyi 1 Pedhru 1:6, 7.

18. Ngozvapi zvatinodikana kuita kuti tive no mudakaro wokadi-kadi?

¹⁸ Jehovha anoziva zvatinoda kuti tive no mudakaro wokadi-kadi. Kudari mukatevera zviro zvitatu zvinotipa mudakaro wokadi-kadi zvotaperaya kuvona, munozokwanisa kwenderera mberi makadakara pikija no zvineso zvamuri kusongana nazvo. Kuvhira pondhopo munozokwanisa kunanga kudari: “Vanomucena vandhu Mwari wavo ndi [Jehovha]!”—Nduyo 144:15.