1. Ngoyapi vetero yotakapuwa ndi Jehovha?

 JEHOVHA wakatipa vetero inodakajisa yo kupona kwenda no kwenda. Vamweni vano vetero yo kuzopona kwenda no kwenda kumatenga vacikafi. (1 Vakorinte 15:50, 53) Asi vandhu vazinji vano vetero yo kuzopona pasi pano vakadakara no vacikahwaji. (Apokaripsi 21:3, 4) Vetero yedu inosisira maningi kwatiri, azvinenyi dangani tinovetera kupona kudenga kana pasi pano.

2. Vetero yedu yakacijikira papi, ngenyi tingananga zvondhozvo?

² Gama rokuti “vetero” mu Bhaibheri, ringareva “kuimira zviri zvese zvinodakajisa zvinozoitika.” Vetero yedu aizivi kucijikira pa kurangarira zviro zvakanaka basi, asi yakacijikira pa zviro zvatinoziva kuti zvinoitikadi. Itusu tinokhohwa kuti zvese zvatiri kuvetera zvinozoitika kumbejiyo, ngokuti ndi Jehovha wakazvigondesa. (Varoma 15:13) Itusu tinoziva zvaakagondesa, tinozivazve kuti anokwanirisa zvaanonanga. (Bziverengo 23:19) Tinokhohwa kuti Jehovha anoda nokuti anosimba ro kukwanirisa zvese zvaakagondesa.

3. Ngozvapi zvatinozovona pa jijo iyi? (Nduyo 27:14)

³ Baba wedu vo mugore vanotida, vanoda kuti itusu tivathembe. (Verenganyi Nduyo 27:14.) Vetero yedu kuna Jehovha painova yakavanga, tinozokwanisa kucungirira zvineso zvatinosongana nazvo takacunga no takadakara. Ngatende tivone kuti vetero inotibesera kudini. Pakutanga ngativone kuti ngenyi vetero inoezaniswa no nanga pomwe no kapaseti. Perapo tinozovona kuti tingaitisa kudini kuti tivangise vetero yedu.

4. Vetero yedu yakaezana papi no nanga? (Vahebheru 6:19)

⁴ Mu karata yake ku Vahebheru, mupostori Pauro wakaezanisa vetero yedu no nanga. (Verenganyi Vahebheru 6:19.) Iyena waiita maningi hwendo no piketi. Ngo kudaro, waiziva kuti nanga jaishandiswa maningi kuti piketi jitame kutohwa ngo  mbhepo. Pa vhaza imweni, kwakaitika zibepo rakakura maningi paainga mu piketi. Pondhopo wakavona vandhu vanovhutha piketi vecikhandira nanga kuti piketi itame kwenda kojitakira pa mapuwe. (Mabasa o Vapostori 27:29, 39-41) Kudari inga nanga inobesera piketi kuti itame kutohwa ngo mbhepo, vetero yedu inotibesera kuti titame kusiya Jehovha patinosongana no zvineso mu upenyu. Vetero yedu yakavanga inotibesera kuti tikwanise kucungirira zvineso zvatinosongana nazvo, ngokuti tinokhohwa kamare kuti zvineso izvi zvinozopera kumbejiyo. Tinodikana kuceukija kuti Jesu, wakananga kuti itusu taizoteverehwa. (Johani 15:20) Kurangarijisisa ngo mupfupo watinozoashira kumbejiyo, kunozotibesera kuti tienderere mberi tecishandira Jehovha takagondeka.

5. Vetero yakabesera kudini Jesu pikija eciziva kuti waizofa?

⁵ Vetero yakabesera maningi Jesu pikija eciziva kuti waizofa mu njira inohwaja maningi. Mu njiku yo Pentekoste yo gore ra 33 Kristu Aviya, mupostori Pedhru wakananga masoko anodakajisa maningi anowanika mu bhuku ra Nduyo ngo manera waizogara Jesu pikija eciziva kuti waizofa: “Ndinorarama ndecigonda Mwari; ngokuti amuzondiregeri mu Guva, amuzosiyi mundhu wakagondeka ecivora. . . . Munozondizaja ngo mudakaro pa mberi penyu.” (Mabasa o Vapostori 2:25-28; Nduyo 16:8-11) Pikija Jesu waiziva kuti waizofa, iyena waikhohwa kamare kuti Jehovha waizomumusa. Iyena waizovazve no mudakaro wo kuva pamwepo na Baba wake kumatenga.—Vahebheru 12:2, 3.

6. Hama imweni yakabhuyenyi ngo pamusoro po vetero?

⁶ Vetero yedu iri kubesera hama no hambzaji jakawanda kuti jicungirire. Vonanyi muezaniso wo hama yakagondeka yaidanwa Leonard Chinn, yaigara ku Ingratera. Painga peciitika Hondo Yokutanga yo Nyika Jese, iyona yakadihwa mukadheya ngo kuramba kunghwina mu basa ro usoca. Vakapeja mweji muviri novari vega mukadheya, perapo vakavangirijwa kuti vaite basa rakavanga maningi. Ivona vakazonanga kudari: “Zvandakasongana nazvo, zvakavonesa kuti itusu tinoda vetero kuti tikwanise kucungirira. Mu Bhaibheri tino muezaniso wa Jesu, vapostori, vaporofeti pomwe no zvigondiso zvinoshamaisa. Zvese izvi zvinotipekeja vetero no simba ro kucungirira.” Vetero yaidari inga nanga kuna hama Leonard, iyona ingashandavo inga nanga kwatiri.

7. Kuitisa kudini zvineso zvingavangisa vetero yedu? (Varoma 5:3-5; Jakobo 1:12)

⁷ Patinosongana no zvineso tovona manera atiri kubesehwa ndi Jehovha, tinozwisisa kamare kuti iyena anotida. Izvo zvinovangisa maningi vetero yedu. (Verenganyi Varoma 5:3-5; Jakobo 1:12.) Izvi zvinoita kuti vetero yedu ivange maningi kupinda potakatanga kujija cokwadi. Sathana anoda kuti tigare tecithimwa-thimwa ngo zvineso zvedu, asi Jehovha angatibesera kuti tikwanise kucungirira.

8. Vetero yedu yakaezana papi no kapaseti? (1 Vatesaronika 5:8)

⁸ Bhaibheri rinoezanisazve vetero yedu no kapaseti. (Verenganyi 1 Vatesaronika 5:8.) Kapaseti inojivirira musoro wo musoca paanonga ecihwisana no vavengi vake. Itusu tinodikanavo kujivirira murangariro wedu pakuhwiswa kwatinoitwa ndi Sathana mu divi ro umwari. Iyena anoshandisa zviro zvakasiyana-siyana kuti aticengeje no kucinja murangariro wedu. Kudari inga kapaseti inojivirira musoro wo musoca, vetero yedu inotijivirira ku murangariro jakashata kuti tikwanise kuenderera mberi takagondeka kuna Jehovha.

9. Zvicinyi zvinoitika no vandhu vacikana vetero?

 ⁹ Vetero yedu yo kuva no upenyu ucikaperi, inotibesera kuti titeme zvivaringo zvaushoni. Kudari tikatama kuvangisa vetero yedu, totanga kurangarira ngo zvido zvedu basi, tinokanganwa vetero yedu yo kupona kwenda no kwenda. Vonanyi zvakaitika no Makristu amweni aigara ku dhorobha ro Korinto. Ivona vakaruza rutendo hwavo ku cigondiso cinosisira cakaitwa ndi Mwari, co vetero yo rumuko. (1 Vakorinte 15:12) Pauro wakatara kuti vaya vacikatendi vetero yo rumuko, vainga vacipona kuti vagutise zvido zvavo basi. (1 Vakorinte 15:32) Nyamasi uno, vazinji vacikatendi zvigondiso zva Mwari, vanopona kuti vagutise zvido zvavo. Asi itusu takasiyana na ivona. Tinothemba zvigondiso zvese zvakaita Mwari kuitira kumbeji. Vetero yedu yakadari inga kapaseti, inotijivirira kuti titame kurangarira zvakashata no zviro zvatinoda basi. Ngokuti zvondhozvo zvaizopeja ushamwari hwedu na Jehovha.—1 Vakorinte 15:33, 34.

10. Vetero ingatibesera kudini kuti titame kuva no murangariro jakashata?

¹⁰ Vetero yedu inobeserazve paya patinova no murangariro wokuti kuda kwedu kudakajisa Jehovha akushandi ciro. Inga muezaniso, vamweni vangarangarira kudari: ‘Inini andiripi mundhu kwaye, narini andizovi pakati po vaya vanozopona kwenda no kwenda. Narini andizokwanisi kupona mukuzwirana no ndhungamiriro ja Jehovha.’ Mucaceukija ari wese wakananga masoko akafanana kuna Jobe? Yakava shamwari yokunyepa ya Jobe, yaidanwa Erifazi. Iyena wakati: “Mundhu anokwanisa kudini kuita wakacena?” Tevere, iyena wakananga kudari ngo pamusoro pa Mwari: “Mwari aagondi varanda vake vo mugore; ngirozi jake ajicenivo pambeji pake.” (Jobe 15:14, 15) Manyepo akashata akadini! Murangariro wakadari unovha ka Sathana. Iyena anoziva kuti kudari mukaenderera mberi mecirangarira ngo njira iyi, amuzovi no vetero yakavanga. Ngo kudaro, rambanyi manyepo akadaro, batikananyi pa zvigondiso zva Jehovha. Mucadokanganwa kuti iyena anoda kuti imwimwi mupone nokucikaperi. Ngo iyo ndava, anozomubesera kuti mukwanirise izvi.—1 Timoti 2:3, 4.

11. Ngenyi tinodikana kuva vandhu vanosengerera patinonga tecivetera kuti Jehovha akwanirise zvigondiso zvake?

¹¹ Azvizivi kureruka kuvangisa vetero yedu mukuvo wese. Ngo kuti tingatoguma pa kuremba patinonga tecivetera kuti Mwari akwanirise zvaakagondesa. Asi tinodikana kuceukija kuti Jehovha anogara no kucikaperi, manera aanovona kufamba kunoita nguva kunosiyana no manera atinovona itusu. (2 Pedhru 3:8, 9) Iyena anozokwanirisa zvaakagondesa mu njira yakanakisisa kamare asi mu njira yotainga ticikaveteri. Waro, zvicinyi zvingatibesera kuti tivangise vetero yedu patinonga tecivetera ngo kusengerera kwese mukuvo wokuti Jehovha akwanirise zvigondiso zvake?—Jakobo 5:7, 8.

12. Mukuzwirana no Vahebheru 11:1, 6, vetero yakabatana papi no rutendo?

¹² Bhaibheri rinonanga kuti kudari tikada kuva no vetero, tinodikana kutenda kuti Jehovha ariyo, nokuti ndiyena “anopfupa vanomupsaka ngo mwoyo wese.” (Verenganyi Vahebheru 11:1, 6.) Kudari tikathemba kuti Jehovha ariyodi kamare, tinothembavo kuti iyena anozokwanirisa zvese zvaakagondesa. Tinozovangisa vetero yedu kudari tikaenderera mberi tino ushamwari wakavanga na Jehovha, uwo wakagondesa kukwanirisa zvese zvatiri kuvetera. Ngatende tivone zviro zvinganani zvatingaita kuti tivangise ushamwari hwedu na Jehovha no kutibesera kuti tienderere mberi tino vetero yakavanga.

13. Tingaitisa kudini kuti tive no ushamwari wo phedo na Mwari?

 ¹³ Itanyi mukumbiro kuna Jehovha no kuverenga Bhaibheri. Pikija atikwanisi kuvona Jehovha, tingava no ushamwari wo phedo naye. Tingakwanisa kubhuya naye ngo kuita mukumbiro teciziva kuti ari kutizwa. (Jeremia 29:11, 12) Itusu tingakwanisa kuzwa Mwari ecivereketa ngo kuverenga Bhaibheri no kurangarijisisa zvotaverengaro. Patinovona manera Jehovha wakavangisa vashandiri vake vo mu nguva jo kare, vetero yedu inovanga maningi. Zvese zviri mu Bhaibheri “zvakatahwa kuti zvitijijise, tova no vetero inovha pa kucungirira kwedu no kunyarajwa ngo Matahwa.”—Varoma 15:4.

14. Ngenyi zvinosisira kurangarira ngo zvigondiso zvakapera kukwaniriswa ndi Jehovha?

¹⁴ Rangariranyi manera Jehovha wakakwanirisa zvigondiso zvake. Rangariranyi zvakaita Jehovha kuna Abhirahama na Sara. Ivona vainga vaavasharuka kuti vabare. Pikija zvakadaro, ivona vakava no mwana inga zvaainga akagondesa Jehovha. (Genesi 18:10) Jehovha wainga akavagondesazve zvimweni. Bhaibheri rinoti: “Iyena wainga ano rutendo hwo vetero hwokuti njiku imweni anozova baba wo majinja mazinji.” (Varoma 4:18) Pikija zvaivoneka inga kuti azvicaizokwanisika mu mavonero o vandhu, Abhirahama waithemba kuti Jehovha waizozvikwanirisa. Rutendo hwake hwakamubesera maningi. (Varoma 4:19-21) Ciitiko cakadari inga ici, cinovonesa kuti Jehovha mukuvo wese anokwanirisa zvigondiso zvake, pikija tecizvivona inga azvikwanisiki.

15. Ngenyi tinodikana kurangarira ngo zviro zvatakaitihwa ndi Jehovha?

¹⁵ Rangariranyi zvamakamboitihwa ndi Jehovha. Vonanyi kuti ngozvapi zvigondiso zvo mu Bhaibheri zvakakwanirisika mu  upenyu hwenyu. Inga muezaniso, Jesu wakananga kuti Baba wake vaizomupa zvamunoda kuti mukwanise kupona. (Mateu 6:32, 33) Jesu wakanangazve kuti Jehovha waizomupa mujimu mucena kudari mukamukumbira. (Ruka 11:13) Jehovha ari kukwanirisa zvigondiso izvi. Kangaije, matorangariravo ngo zvigondiso zvimweni zviri kukwanirisika mu upenyu hwenyu. Inga muezaniso, iyena anogondesa kumuregerera, kumupa zvokuha zvo umwari no kumutondhoja. (Mateu 6:14; 24:45; 2 Vakorinte 1:3) Kurangarira ngo zvese zvamakaitihwa ndi Jehovha, kunovangisa vetero yenyu pa zviya zvaanozomuitira kumbejiyo.

16. Ngenyi vetero yedu ndi cipo cinosisira?

¹⁶ Vetero yedu yo kuva no upenyu ucikaperi ndi cipo cinoshamaisa cinovha kuna Mwari. Tiri kuvetera no cidaka-daka cese kuva no kumbeji kunodakajisa. Izvi zvinozoitikadi kamare. Vetero yedu inoshanda inga nanga yecitibesera kuti tikwanise kucungira zvineso zvatinosongana nazvo, kuteverehwa no rufu. Inoshandazve inga kapaseti ngo kutijivirira ku murangariro jakashata kuti tikwanise kuramba kuita zvakashata asi toda kuita zvakanaka. Vetero yedu yakacijikira mu Bhaibheri inotiita kuti tive no ushamwari wo phedo na Jehovha, yokhombija kuti iyena anotida maningi. Kudari vetero yedu ikaenderera mberi yakavanga, tinozova no makomborero mazinji.

17. Ngenyi tingadakara ngo vetero yedu?

¹⁷ Mupostori Pauro wakananga kudari pa karata yake ku Varoma: “Dakaranyi ngo vetero yenyu.” (Varoma 12:12) Pauro waidakara ngokuti iyena waiziva kuti kudari akaenderera mberi akagondeka, waizova no upenyu wo kwenda no kwenda kumatenga. Itusu tingadakaravo ngo vetero yedu ngokuti tinoziva kuti Jehovha anozokwanirisa zvigondiso zvake. Mutari wo nduyo wakatara kudari: “Anomucena . . . anovetera Tenji Mwari wake, . . . anogondeka mbhera narini.”—Nduyo 146:5, 6.