1-2. (a) Utongi umweni paunoteverera Zvapupu zva Jehovha, izvona zvinoitenyi? (b) Tingaitisa kudini kuti tienderere mberi takadakara patinoteverehwa? (Vonanyi foto yo pakapa.)

 WARI UNO, basa redu riri kurambijwa kana atiripi kutendehwa kuita zvimweni mu nyika jinopindirija kuita 40 kutenderera pasi pese. Mu nyika jimweni pakati po japererari kunangwa, hama no hambzaji jedu jakafungihwa mukadheya. Vakashaishenyi? Mu mavonero a Jehovha apana cavakaita. Zvavakaita basi ikuverenga no kujija Bhaibheri, kucumaera no kwenda ku musongano. Ivona vakava vacina kovakapeamira. Pikija no kuteverehwa uku vashandiri ava va Jehovha, vari kwenderera mberi vakagondeka. Vecivonesa kuti azvinenyi ngozvapi zvinoitika ivona vari kwenderera mberi vakagondeka kuna Jehovha. Ivona vanodakara maningi ngo kuita izvi.

² Kangaije makambovona foto jo hama iji wari jakacunga jeciteverehwa, pikija zvakadaro jakadakara. Ivona vakadakara ngokuti vanoziva kuti Jehovha ari kudakara ngo kugondeka kwavo. (1 Kronike 29:17a) Jesu wakati: “Vanodakara vanoteverehwa ngo ndava yo ururami . . . Dakaranyi no kudakarisisa ngokuti mupfupo wenyu, mukuru.”—Mateu 5:10-12.

3. Mukuzwirana no Mabasa o Vapostori 4:19, 20, vapostori vakaitenyi povainga veciteverehwa? Ngenyi ivona vakaita izvonazvo?

³ Zviri kuitika no hama no hambzaji jedu zvakaezana no zvakasongana no vapostori povainga vecicumaera ngo pamusoro pa Jesu. Ko vhaza jakawanda vatongi vo dare guru ro Cijudha, vakavavhunja “kuti vatame kunanga kana kujijisa ciri cese ngo zina ra Jesu.” (Mabasa o Vapostori 4:18; 5:27, 28, 40) Waro  vapostori vakaitenyi? (Verenganyi Mabasa o Vapostori 4:19, 20.) Veciimirira vapostori vese, Pedro na Johani vakananga no vakacunga kuti vaizozwira Mwari kupinda kuzwira vatongi vaya vo Cijudha, vojekesa kamare kuti ivona avacaizosiya kubhuya ngo pamusoro pa Jesu. Zvaidari inga kuti ivona vaivhunja vatongi ava kuti: ‘Muri kunanga kuti mupango jenyu jiri nane maningi kupinda ja Mwari?’ Ivona vakaita izvo ngokuti mundhu wakakhwirira maningi kupinda vatongi vaya wakavavhunja kuti vacumaere vandhu vese no kuita ucapupu hwakaperera ngo pamusoro pa Kristu.—Mabasa o Vapostori 10:42.

4. Mukuzwirana no Mabasa o Vapostori 5:27-29, muezaniso wapi wakasiiwa ngo vapostori kuitira Makristu ese, tingavatevejeresa kudini?

⁴ Vapostori vakasiya muezaniso wakanaka kuti Makristu ese atevejere. Ivona vakatema civaringo co kuda “kuzwira . . . [Mwari] kuciripi kuzwira vandhu.” (Verenganyi Mabasa o Vapostori 5:27-29.) Ngo zvokadi kuti vapostori ngo kwenderera kwavo mberi vakagondeka, vakatakwa, asi povakabuda mu dare guru ro kutongehwa ndava ro Cijudha, ivona vainga “vakadakara ngokuti vakatambujwa ngo ndava yo zina ra Jesu” voenderera mberi vecicumaera.—Mabasa o Vapostori 5:40-42.

5. Muvhunjo japi jaticada kudavira?

⁵ Zvakaitwari ngo vapostori kangaije zvingamusa muvhunjo. Inga muezaniso, vapostori vaizoitisa kudini kuti vazwire Mwari basi kusiyapo kuzwira “vatongi”? (Varoma 13:1) Tingaitisa kudini kuti ‘tireremeje utongi no vaimiriri vaho,’ inga zvakanangwa ndi Pauro, pa nguva yondhoyo toenderera mberi takagondeka kuna Jehovha Mutongi mukuru-kuru?—Tito 3:1.

6. (a) “Vatongi” vanonangwari pana Varoma 13:1 mbhaani? Ngozvapi zvatinodikana kuvaitira? (b) Vatongi ava vanokwanisa kuitenyi?

⁶ Verenganyi Varoma 13:1. Pa vhesi iyi gama rokuti “vatongi” riri kunangira vandhu vanotungamirira vamweni. Ngo iyo ndava, tinodikana kuvapa zviro zvavanokumbira zvakadari inga kushaba, kuvareremeja no  kuvakuja. (Varoma 13:7) Makristu ese anodikana kuzwira utongi uhu. Ivona vanobesera kuti vandhu vave no runyararo, vazwire mutemo. Nguva jimweni vanotojivirira vandhu va Jehovha. (Apokaripsi 12:16) Pikija zvakadaro, utongi uhu hwo vandhu unokwanisa kuita izvi ngokuti Jehovha anovatendera kuti ivona vazviite. Jesu wakanasa kujekesa izvi paainga ecivhunjiswa ngo govherinadhori wo Ciroma Ponsiyo Pirato. Pirato paakananga kuti iyena wainga no simba no kusujunura no kuuraya Jesu, Jesu wakamuvhunja kudari: “Iwewe aucaizova no simba ririrese kwandiri kudari no wainga ucizivi kuripuwa recivha ngo kudenga.” (Johani 19:11) Inga ndi Pirato utongi hwese nyamasi uno no vaya vanotungamirira zvo poritika, uno paunogumira.

7. Ngopapi paticikadikani kuzwira vatongi, ivona vanodikana kuceukijenyi?

⁷ Makristu anodikana kuzwira utongi hwo vandhu kudari mutemo javo ajihwisani no mutemo ja Jehovha. Asi itusu atidikani kuzwira utongi kudari iwona uri kutikumbira kuti tiite zviro zvinorambijwa ndi Mwari kana uri kutikumbira kuti titame kuita zviro zvinodiwa ndi Mwari. Inga muezaniso, ivona vangatotikumbira kuti tinghwine mu basa ro usoca. * Vangatotikamisa kuti tiverenge Bhaibheri, mabhuku akacijikira mu Bhaibheri, kucumaera no kwenda kumusongano. Vatongi pavanoshaisha kushandisa cigaro cavo, voteverera Makristu, vanozozvidavira pamberi pa Mwari. Jehovha ari kuvona zvese.—Mucumaeri 5:7.

8. Ngowapi musiyano wo zvinokwanisa kuitwa ngo utongi no zvinokwanisa kuitwa ndi Jehovha?

⁸ “Vatongi” vanocitendehwa co kuita zviro zvizinji asi avana citendehwa co kuita zviro zvese. Ndi Jehovha basi anocitendehwa co kuita zviro zvese. Bhaibheri rinomudanija ko vhaza jakawanda kuti “mukuru-kuru.”—Danieli 7:18, 22, 25, 27.

9. Ngozvapi zvivoniso zvakavoniwa ndi Dhanyeri?

⁹ Muporofita Dhanyeri wakava no zvivoniso zvakawanda zvaivonesa kamare kuti Jehovha ndiyena mukuru-kuru kupinda mundhu ari wese hake. Pakutanga Dhanyeri wakavona zvinyama zvirongomuna zvaiimirira utongi hwo pasi pese hwokare, Bhabhironi, Medho-Persiya, Gresiya no Roma, kubatanijavo no umweni wo njiku jedu jino Agro-Amerikana. (Danieli 7:1-3, 17) Tevere iyena wakavona Jehovha Mwari pa cigaro cake co Umambo ecitonga. (Danieli 7:9, 10) Zvakazovoniwa ngo muporofita uwu wakagondeka zvinoshanda inga ngwajo nyamasi uno.

10. Mukuzwirana na Danieli 7:13, 14, 27, Jehovha anozotora utongi hwo pasi pano wozopejeka ani? Izvi zvinozovonesenyi ngo pamusoro pake?

¹⁰ Verenganyi Danieli 7:13, 14, 27. Jehovha anozovhisa vatongi vese vari kutongari nyamasi uno, woupekeja vamweni vanofanera kutonga no vano simba rakakura maningi kupinda ravo. Unozopuwa ani? Unozopuwa “mundhu umwe wakaita inga Mwana wo Mundhu” Jesu Kristu pamwepo no “vacena va Mwari Mukurukuru” vo 144.000 avo vanozotonga “mbhera narini, makore acikaperi.” (Danieli 7:18) Zvakajeka kamare kuti Jehovha ndiyena “Mukurukuru,” ngokuti ndiyena basi ano simba rokuita izvi.

11. Zvicinyi zvakatara Dhanyeri zvakavonesa kuti Jehovha ndi mukuru-kuru?

¹¹ Civoniso cakava na Dhanyeri cinozwirana no zvaakananga pokutanga. Iyena wakati: “Mwari wo mugore anowisa majimambo, womadirabze pa dendemaro.” Iyena wakaengejera  eciti: “Mwari Mukuru-kuru, ndiyena anotonga panyezuru po umambo hwo vandhu; ndiyena anopa umambo waanoda.” (Danieli 2:19-21; 4:14) Asi zvakamboitika Jehovha wovhisa majimambo wogaja vamweni? Hina.

12. Ipanyi muezaniso unovonesa kuti Jehovha wakavhisa majimambo mu nguva yokare. (Vonanyi foto.)

¹² Jehovha wakavonesa kare kuti iyena ndi mukuru-kuru kupinda “vatongi” vese. Ngativone muezaniso mutatu basi. Faro wakatambuja vandhu va Jehovha ku Ejipita. Ko vhaza jakawanda iyena wakaramba kuvasujunura. Asi Jehovha wakasujunura vandhu vake, woita kuti Faro afe mu Jombe ro Kupsuka. (Exodo 14:26-28; Nduyo 136:15) Mambo Bhetishazari wo Bhabhironiya wakaita mabuso wojikuja iyena pacake ‘womukira Tenji wo mugore.’ Cimwenizve, ‘wakaimbira bzimwari bzo ndarama no siriva’ kusiyapo Jehovha. (Danieli 5:22, 23) Asi Mwari wakapseruja mwanarume uwu waijikujari. “Mu usiku humwehwo” mambo Bhetishazari wakauraiwa, umambo hwake wopuwa Vamedho no Persiya. (Danieli 5:28, 30, 31) Mambo Herodhi wokutanga wo ku Parestina wakauraya mupostori Jakobo no kudira mukadheya mupostori Pedhru no cinangwa co kuda kumuurayavo. Asi Jehovha aazivi kutendera kuti iyena aite zvondhozvo. “Ngirozi ya Jehovha yakamutaka” wofa.—Mabasa o Vapostori 12:1-5, 21-23.

13. Ipanyi muezaniso unovonesa kuti Jehovha wakanyisa majimambo akawanda.

¹³ Jehovha wakavonesazve ukuru-kuru hwake paakaparaja majimambo akawanda. Iyena wakahwa pa ndau yo vaiziraeri no kuvabesera kuti vanyise majimambo anokwana kuita 31 o Vakanani kuti vatore ndau huru yo Nyika Yakagondeswa. (Joxwa 11:4-6, 20; 12:1, 7, 24) Jehovha wakabeserazve Vaiziraeri kuti vanyise mambo Beni-hadhadhe no majimambo amweni anokwana kuita 32 o Vasiriya, vaihwisana no Vaiziraeri.—1 Majimambo 20:1, 26-29.

14-15. (a) Mambo Nabhukodhonozori na Dhariyo vakanangenyi ngo pamusoro po ukuru-kuru hwa Jehovha? (b) Mutari wo nduyo wakanangenyi ngo pamusoro pa Jehovha no vandhu vake?

¹⁴ Jehovha wakavonesa ko vhaza jakawanda kuti iyena ndi Mambo Mukuru-kuru. Mambo Nabhukodhonozori wo Bhabhironiya paakajikuja wobhuya ngo pamusoro po simba rake no zviro zvese zvaainga nazvo, kusiyapo kuzwisisa kuti Jehovha ndiyena basi anofanera  kunamatwa, Jehovha wakaita kuti iyena apenge. Nabhukodhonozori paakaita nane, “wakakomborera Mwari Mukuru-kuru” no kuvonesa kuti utongi hwa Jehovha “utongi hucikaperi.” Iyena wakaengejera eciti: “Apana anokwanisa kuimisa nyara yake.” (Danieli 4:27, 30-32) Jehovha paakaponesa Dhanyeri paakakhandihwa mu rindi ro mbhondoro, Mambo Dhariyo wakadira mutemo wokuti: “Vese vanodikana kutetemera no kuthya pambeji pa Mwari wa Danieli. Ndiyena Mwari anopona, anogara mbhera narini umambo hwake ahuzopejwi, utongi hwake ahuzoperi.”—Danieli 6:7-10, 19-22, 26, 27.

¹⁵ Mutari wo nduyo wakananga kudari: “Tenji Mwari anoita kuti matandiro o majinja aite acina hwiru, no murangariro yo vandhu idunye.” Iyena wakaengejera eciti: “Rinodakara jinja rinoromberera Tenji Mwari, vandhu vakasanwa ndiyena kuti vaite ndhaka yake.” (Nduyo 33:10, 12) Iri ithangwe rakanaka kamare rinotiita kuti tirambe takagondeka kuna Jehovha.

16. Tingathemba kuti Jehovha anozoitenyi pa “dambujiko guru” ngenyi tingava no kuthemba kondhoko? (Vonanyi foto.)

¹⁶ Takwanisa kuvona zvakaita Jehovha mu nguva jokare. Waro, zvicinyi zvaanozoita kumbejiyo? Tingava no cokwadi co kuti Jehovha anozoponesa vashandiri vake vakagondeka pa “dambujiko guru.” (Mateu 24:21; Danieli 12:1) Iyena anozoita zvondhozvo, apo kubatana ko majinja kunodanijwa mu Bhaibheri kuti Gogi wo Magogi, pavanozohwisa mu njira yakashata vashandiri vese vakagondeka va Jehovha pa nyika. Pikija kubatana uku ko majinja kunobatanija nyika jinokwana kuita 193 jinoita divi ro Nações Unidas, ijona asipi ciro tikajiezanisira no Mukuru-kuru Jehovha pamwepo no masoca ake okudenga. Jehovha wakagondesa kudari: “Ndinozovonesa simba rangu no uceni hwangu, ndinozojivonesa pambeji po vandhu vakawanda, vozoziva kuti ndini Tenji.”—Ezekieli 38:14-16, 23; Nduyo 46:10.

17. Bhaibheri rinonanga kuti zvicinyi zvinozoitika no majimambo o nyika pamwepo no vaya vanoenderera mberi vakagondeka kuna Jehovha?

 ¹⁷ Kuhwisa kunozoita Gogi wa Magogi kunozoita kuti tiende pa hondo yokupejisira, hondo yo Armagedhoni, Jehovha paanozoparaja “majimambo o pasi pese.” (Apokaripsi 16:14, 16; 19:19-21) Asi “varurami vanozogara mu nyika, vakanaka mwoyo vanozoita veno vayo.”—Mazwi Akangwara 2:21.

18. Makristu mazinji ocokwadi akatema civaringo cokuitenyi, ngenyi? (Danieli 3:28)

¹⁸ Kuvhira kare, Makristu akawanda ari kudira rusujunuko hwavo no upenyu hwavo pa ngozi, ngokuti vanoda Jehovha uwo ari Mutongi wavo Mukuru-kuru. Makristu aya akasunga kwenderera mberi akagondeka kuna Jehovha. Ivona vakadari inga majaha matatu o Cihebheru akaenderera mberi akagondeka kuna Jehovha, uwo wakazovaponesa mu rindi rino muriro.—Verenganyi Danieli 3:28.

19. Jehovha anozotonga vandhu vake wakacijikira papi? Ngozvapi zvatinodikana kuita wari?

¹⁹ Dhavhidhi wakananga kuti kwenderera mberi takagondeka kuna Jehovha kunosisira maningi, paakati: “Tenji Mwari ndiyena mutongi wo vandhu, nditongenyi Tenji Mwari ngo kuteveja kururama kwangu, no ngokuteveja uceni hwangu.” (Nduyo 7:9) Iyena wakatarazve kudari: “Unaki no ururami ngabzindingwarire.” (Nduyo 25:21) Ciro cakanaka maningi catingaita mu upenyu, ndi kwenderera mberi takagondeka kuna Jehovha, azvinenyi kuti ngozvapi zvingaitika. Kudari tikaita izvi, tinozokwanisavo kunanga zvakafanana no zvakanangwa ngo mutari wo nduyo paakati: “Vanodakara vaya vakagondeka . . . vanofamba mu mutemo wa Jehovha.”—Nduyo 119:1, Sandujo yo Nyika Imbza.