1-2. (a) Ngenyi Armagedhoni i masoko akanaka kuno vandhu? (b) Tinozopopora muvhunjo japi pa cijijo cino?

MAKAMBOZWA vandhu vecishandisa gama ro kuti “Armagedhoni” vecinangira hondo inoshandisa mabhomba makuru anouraya vandhu vakawanda (guerra nuclear), kana vecinangira ngozi here? Asi Bhaibheri, rinonanga kuti Armagedhoni i masoko akanaka anotiita kuti tidakare! (Apokalipsi 1:3) Hondo yo Armagedhoni aizoparaji vandhu asi inozovaponesa! Kuitisa kudini?

² Bhaibheri rinokhombija kuti hondo yo Armagedhoni inozoponesa vandhu ngo kuparaja utongi hwo vandhu. Hondo iyi inozoponesa vandhu ngo kuvhisa vakashata no kuponesa vakarurama. Iyona inozoponesa vandhu ngo kungwarira nyika yedu kuti itame kuparajwa. (Apokalipsi 11:18) Kuti tinase kuzwisisa mafundo aya, ngatipopore muvhunjo murongomuna iji: Armagedhoni icinyi? Zvicinyi zvinozoitika Armagedhoni icito yatanga? Tingaitisa kudini kuti tive pakati po vandhu vanozoponeswa pa Armagedhoni? Tingaitisa kudini kuti tienderere mberi takagondeka Armagedhoni painonga yecikhwedera?

3. (a) Gama ro kuti “Armagedhoni” rinoda kurevenyi? (b) Mukuzwirana na Apokalipsi 16:14, 16, ngenyi tingananga kuti Armagedhoni asipi ndau kamare inowanika pasi pano?

³ Verenganyi Apokalipsi 16:14, 16. Gama ro kuti “Armagedhoni” rinowanika kamwe basi mu Bhaibheri. Irona rinovha ku Cihebheru recinangira Dundhu ro Megidho. Megidho rainga dhorobha raiwanika mu Izriaeri yo kare. (Joxwa 17:11) Gama ro kuti Armagedhoni arinangiri ndau iri yese kamare inowanika pasi pano. Kunasa kunanga, irona rinonangira zviitiko zvinoitisa kuti “majimambo o pasi pese” abatane pamwepo kuti ahwisane na Jehovha. (Apokalipsi 16:14) Asi, pa jijo iyi, tinozoshandisa gama ro kuti “Armagedhoni” tecinangira hondo inozotevera pasure po kupera kubatana ko majimambo o pasi pano. Tinozvizivisa kudini kuti Armagedhoni inonangira ndau yo kuezanisira? Cokutanga, akuna dundhu kamare ro Megidho. Cocipiri, ndau yaitendeneja Megidho idoko maningi, kuti ikwane “majimambo o pasi pese,” masoca avo no mucini javo jo hondo. Cocitatu, inga zvatinozovona mu cijijo cino, hondo yo Armagedhoni inozotanga “majimambo” o nyika paanozohwisa vandhu va Mwari, vanonga vecirarama mu ndau jakawanda pasi pano.

4. Ngenyi Jehovha anodanija hondo huru yo kupejisira kuti i Megidho?

⁴ Ngenyi Jehovha anodanija hondo huru yo kupejisira kuti i Megidho? Munguva jo Bhaibheri, hondo zinji jaiithwa ku Megidho, phedo no Muterero wo Jezereeri. Njiku imweni, Jehovha wakabesera vandhu vake kuti vawine pa hondo iji. Inga muezaniso, phedo no “kumwa yo Megido” Mwari wakabesera Bharaki, Mambo wo Vaiziraeri, kuti anyise masoca o Kanani aitungamirihwa ndi Sizera. Bharaki no muporofita wokaji Dhebhora vakabonga Jehovha ngo kuwina kunoshamaisa kwavakava nako. Ivona vakaimba kudari: “Mugore nyereji jakaita hondo, . . . jakarhwisana na Sisara. Murambo Kixoni wakavakweva ngo kumwa yawo.”—Vatongi 5:19-21.

5. Hondo yo Armagedhoni yakasiyana papi no hondo yakaithwa ndi Bharaki?

⁵ Bharaki na Dhebhora vakapejisa ndumbo yovaiimba ngo magama aya: “Vanopera ngo kudaro vavengi venyu vese, Tenji Mwari! Avo vanomuda vaite inga zuva rinobuda ngo simba raro!” (Vatongi 5:31) Pa Armagedhoni vavengi va Mwari vanozoparajwa, asi vaya vanoda Mwari vanozoponeswa. Pano ciro cimwe cakasiyana pa zviro zviviri izvi. Pa Armagedhoni vandhu va Mwari avazohwi. Ivona avazovi no nvuti! Ngokuti simba ravo rinozovha “mu kunyarara no kugonda” Jehovha pomwe no masoca ake o kudenga.—Isaia 30:15; Apokalipsi 19:11-15.

6. Jehovha angashandisa njira japi kuti anyise vavengi vake pa Armagedhoni?

⁶ Mwari anozoitisa kudini kuti anyise vavengi vake pa Armagedhoni? Iyena angashandisa njira jakasiyana-siyana. Inga muezaniso, iyena angashandisa citeke-teke, nvura yo mapuwe no murazvu. (Jobe 38:22, 23; Ezekieli 38:19-22) Iyena angaita kuti vavengi vake vahwisane ngocavo. (2 Kronike 20:17, 22, 23) Angashandisazve ngirozi jake kuti jiuraye vakashata. (Isaia 37:36) Ngo njira iri yese hayo, Jehovha anozowina kamare. Vavengi vake vese vanozoparajwa. Vese vakarurama vanozoponeswa.—Mazwi Akangwara 3:25, 26.

7-8. (a) Mukuzwirana no 1 VaTesalònika 5:1-6, masoko api acizivi kumboziviswazve anozoziviswa ngo vatungamiriri vo nyika? (b) Ngenyi masoko aya anozova manyepo akashata?

⁷ Kuziviswa ko ‘runyararo no rugarisiko’ kunozoitika ‘njiku ya Jehovha’ icito yaguma. (Verenganyi 1 VaTesalònika 5:1-6.) Pana 1 VaTesalònika 5:2, ‘njiku ya Jehovha,’ iri kunangira “dambujiko guru.” (Apokalipsi 7:14) Tinozozvizivisa kudini kuti dambujiko guru roda kutanga? Bhaibheri rinonanga kuti kunozoziviswa masoko amweni acizivi kumboziviswazve. Kuziviswa uku, kunozotatija kuti dambujiko guru roda kutanga.

⁸ Kuziviswa uku ndikona kwakanangwaya kuti kwaizodanijihwa ‘runyararo no rugarisiko.’ Ngenyi vatungamiriri vo nyika vanozonanga izvi? Kureva kuti, vatungamiriri vo zviara vanozoitavo ciziviso ici here? Kangaije. Asi ciziviso ici ngo co kunyepa, zve cinovha ku madhimoni. Manyepo aya akashata maningi. Ngokuti anozoitisa kuti vandhu vajivone inga vano rugarisiko kasike dambujiko guru roda kutanga. Hina, Bhaibheri rinonanga kudari: “Cipondhopondho, vanozopejwa, inga kuhwajihwa kwaanoita mwanakaji ano mimba.” Zvicinyi zvinozoitika no vashandiri vakagondeka va Jehovha? Kangaije vangakahamara ngo matangiro o civhumbu o njiku ya Jehovha, asi ivona vanonga vakanasirira kuitira njikuyo.

9. Jehovha anozoshandisa mativi api kuti aparaje nyika ya Sathana?

⁹ Mu njiku ja Nowa, Jehovha wakaparaja nyika yakashata kamwe basi. Asi kuti aparaje nyika ya Sathana, Jehovha anozoshandisa mativi maviri akasiyana. Rokutanga, iyena anozoparaja Bhabhironi Guru, rinoimirira zviara zvese zvo manyepo. Tevere, pa Armagedhoni iyena anozoparaja nyika yese ya Sathana, pomwe no zvomatongehwe o nyika, zvohondo no zvokutengeserana. Ngatinase kupopora mativi maviri aya.

10. Mukuzwirana na Apokalipsi 17:1, 6, no 18:24 ngenyi Jehovha anozoparaja Bhaibhironi Guru?

¹⁰ “Kutongwa ko hure huru.” (Verenganyi Apokalipsi 17:1, 6; 18:24.) Ngo ndava yo Bhabhironi Guru vandhu vazinji avacareremeji zina ra Mwari. Irona riri kujijisa manyepo ngo pamusoro pa Mwari. Inga hure, irona ariripi kugondeka kuna Mwari ngo kubatana no utongi hwo nyika ino. Irona riri kushandisa simba no mazano aro o kucengeja kuti ritorere mare vandhu. Riri kuuraya vandhu vakawanda kubatanijavo vashandiri va Mwari. (Apokalipsi 19:2) Jehovha anozoparajisa kudini Bhabhironi Guru?

11. “Cikara cakapsuka” cinoimirirenyi? Kuitisa kudini “gumi ro munyanga” rinozomukira Bhabhironi Guru?

¹¹ Jehovha anozoparaja “hure huru” escishandisa “gumi ro munyanga” ro “cikara cakapsuka.” Cikara ici, cinoimirira Nações Unidas. Gumi ro munyanga rinoimirira utongi unobesera Nações Unidas. Pa nguva yakagajwa ndi Mwari, utongi uwu unozomukira Bhabhironi Guru. Iwona ‘unozomupfenyurira no kumusiya ari mitu’ ngo kumutorera zvese zvaanazvo no kumovonesa kuti iyena, mushati. (Apokalipsi 17:3, 16) Kuparajwa kwaro kunozova ko kukasika, zvovoneka inga kuti zvaitika ngo njiku imwe basi. Vese vairibesera, vanobatwa ngo kuthya. Ngokuti irona raiyanja kunanga kudari: “Ndakagara pasi inga mbahosi, andiripi noni, andicazosimiri mariji.”—Apokalipsi 18:7, 8.

12. Jehovha aazotenderi kuti vandhu vo majinja vaitenyi zve ngenyi?

¹² Jehovha aazotenderi kuti vandhu vo majinja vaparaje vandhu vake. Ngokuti ivona vanoreremeja zina rake zve vakazwira ngwajo yo kubuda mu Bhabhironi Guru. (Maitiro o Vapostori 15:16, 17; Apokalipsi 18:4) Ivona vakashanda ngo simba kuti vavhunje vamweni kuti vabudemo. Ngokudaro, vashandiri va Jehovha ‘avazotori [divi] ro matambujiko aro.’ Pikija zvakadaro, ivona vanodikana kuva no rutendo hwakavanga kuti vacungirire muejo jo kumbeji.

13. (a) Gogi ndiani? (b) Mukuzwirana na Ezekieli 38:2, 8, 9, zvicinyi zvinozoita kuti Gogi agume pa ndau yo kuezanisira inodanwa Armagedhoni?

¹³ Kuhwisa kwa Gogi. (Verenganyi Ezekieli 38:2, 8, 9.) Pakupera kuparajwa ko zviyara zvese zvo manyepo, vandhu va Mwari vanozonasa kuvoneka kamare, inga muti unonga wasara pasure po dutu guruwane. Zvokadi kamare, Sathana anozonyangajwa maningi. Iyena anozotatija ushungu hwake ngo kushandisa kutokoteswa kunoithwa ngo madhimoni, anonangwaya pana Apokalipsi inga magama o “mujimu . . . Yakashata.” Ngo ndava yo kutokoteswa uku, kubatana ko majinja, kana cikwata co majinja akasiyana-siyana cinozohwisa vashandiri va Jehovha. (Apokalipsi 16:13, 14) Kubatana kondhoko, kunodanijwa ‘Gogi, wo nyika ya Magogi.’ Majinja paanohwisa vandhu va Mwari, iwona anonga aguma pa ndau yo kuezanisira inodanwa Armagedhoni.—Apokalipsi 16:16.

14. Gogi anozovonenyi?

¹⁴ Gogi anozothemba “[mukono] wo nyama” no masoca ake ano simba. (2 Kronike 32:8) Itusu tinozothemba Jehovha Mwari wedu. Izvi zvinozovoneka inga upenji ngo vandhu vo majinja. Zvokadi kamare, zvimwari zvo Bhabhironi Guru zvaingaya no simba, azvizivi kukwanisa kuponesa Bhabhironi Guru kuvha ku “cikara” pomwe no “gumi ro munyanga”! (Apokalipsi 17:16) Ngokudaro, Gogi anozorangarira kuti azvinesi kuparaja vandhu va Mwari. “Inga gwiti rinofukija nyika,” iyena anozohwisa vandhu va Jehovha. (Ezekieli 38:16) Asi ngo kukasika, Gogi anozovona kuti wawira mu murawu. Inga ndi Faro pa Jombe ro Kupsuka, Gogi anozozwisisa kuti ari kuhwisana na Jehovha.—Exodo 14:1-4; Ezekieli 38:3, 4, 18, 21-23.

15. Kristu anozoitenyi kuti awine pa hondo yo Armagedhoni?

¹⁵ Kristu no masoca ake o kudenga, anozojivirira vandhu va Mwari no kukwiya-kwiya simba rese ra Gogi. (Apokalipsi 19:11, 14, 15) Waro zvicinyi zvinozoitika na Sathana, muvengi mukuru wa Jehovha, uwo wakandhandhanisaya manyepo akacengeja majinja kuti agume ku Armagedhoni? Jesu anozomukhandira murindi pamwepo no madhimoni ake, vanozofungihwa mukati mo ciuru co makore.—Apokalipsi 20:1-3.

16. (a) Tingakhombijisa kudini kuti ‘tinoziva Mwari’? (b) Zvicinyi zvinozoitika no vandhu vanoziva Mwari pa hondo yo Armagedhoni?

¹⁶ Azvinenyi dengani taano makore akawanda mu cokwadi kana haiwa, tese tinozoponeswa pa Armagedhoni. Asi kuti izvo zvikwanisike, tinodikana ‘kuziva Mwari’ no “kupurukira vangeri ra Tenji wedu Jesu.” (2 VaTesalònika 1:7-9) ‘Tinoziva Mwari,’ patinokwanisa kuziva zvaanodakarira, zvaacikadakariri no ndhungamiro jake. (1 Johani 2:3-5; 5:3) Tinokhombija kuti tinoziva Mwari patinomuda, kumuzwira no kunamata iyena basi. Patinokhombija kuti tinomuziva, tinova no rukujo wo ‘kuzivika [ndiyena],’ ngokudaro tinozoponeswa pa Armagedhoni. (1 VaKorinto 8:3) Kuitisa kudini? Patinozivika ndi Mwari, tingatendehwa ndiyena.

17. Zviri kuda kunangenyi “kupurukira vangeri ra Tenji wedu Jesu”?

¹⁷ “Vangeri ra Tenji wedu Jesu” rinobatanija zvokadi zvese zvakajijiswa ndi Jesu zvinowanika mu Soko ra Mwari. Tinozwira vhangeri patinorishandisa mu upenyu hwedu. Kuzwira, kunobatanija kudira Umambo hwa Mwari pakutanga, kupona mukuzwirana no ndhungamiro jakarurama ja Mwari no kucumaera. (Mateu 6:33; 24:14) Zvinobatanijazve kubesera Makristu okuzojwa, avo vano mutoro jakawanda.—Mateu 25:31-40.

18. Makristu o kuzojwa anozoitisa kudini kuti ahwirijire unyasha hwavakatatijihwa ngo mavhuta amweni?

¹⁸ Sambiri pano vashandiri va Mwari vo kuzojwa, vanozohwirijira unyasha hwavakatatijihwa ngo ‘mabvuta amweni.’ (Johani 10:16) Kuitisa kudini? Hondo yo Armagedhoni icito yatanga, vese vo 144.000, vanonga vamuswa. Ivona vanonga vaakudenga inga mujimu icikafi. Vanozova divi ro masoca o kudenga, vozokwiya-kwiya Gogi vecijivirira “uzinji hukuru” hwo vandhu vanoshandira Jehovha. (Apokalipsi 2:26, 27; 7:9, 10) Pacina kukana-kana, uzinji hukuru hunozodakara maningi ngo kuva no mukana wo kubesera vashandiri vo kuzojwa va Mwari pavainga pasi pano!

19-20. Pikija no zvineso zvatinazvo, zvicinyi zvingatibesera kuti tienderere mberi takagondeka, Armagedhoni painonga yecikhwedera?

¹⁹ Mu njiku jo kupejisira jino, vazinji vedu vari kusongana no zvineso. Pikija zvakadaro, itusu tingacungirira tino mudakaro. (Jakobo 1:2-4) Ciro cingatibesera kuti ticungirire, ngo co kuenderera mberi teciita mukumbiro. (Luka 21:36) Atidikani kuita mukumbiro basi, asi tinodikana kujija Bhaibheri njiku jese pomwe no kurangarijisisa zvatinojija. (Nduyo 77:13) Kudari tikaita zviro izvi, no kuita zvese zvatinokwanisa mubasa ro kucumaera, rutendo hwedu pomwe no vetero zvinozova zvakavanga!

²⁰ Rangariranyi madakajire azvinozoita patinozovona kuti Bhabhironi Guru raparajwa no Armagedhoni yapera! Amborangariranyizve madakajire azvinozoita vandhu vese pavanozoreremeja zina ra Mwari no matongero ake! (Ezekieli 38:23) Hina, Armagedhoni, masoko akanaka kuna vaya vanoziva Mwari, vanozwira Mwana wake no vanocungirira mbhera kumagumo.—Mateu 24:13.