MUSORO WO KUJIJA WO 37
Ngenyi Tinodikana kuzwira Jehovha ngo Mwoyo Wese zve Tingazviitisa Kudini?
“Atidikani, here, kunyanya kuaxira mapangiro a Baba?” —VAHEBERI 12:9.
NDUMBO 9 Jehovha Ndiyena Mambo Wedu!
ZVATICAJIJA *
1. Ngenyi tinodikana kuzwira Jehovha?
JEHOVHA ndiyena Musiki wedu. Ngo kudaro, ndiyena anocitendehwa co kutivhunja kuti ngozvapi zvakashata no zvakanaka. Zvecivoneka kuti takasikwa ndi Mwari, tinodikana kumuzwira. * (Apokalipsi 4:11) Asi ciripozve cimweni cinotiitisa kuti tizwire Jehovha: Ngo cokuti matongero ake akanaka. Mukati mo zviuru no zviuru zvo makore, vatongi vazinji vakava no cigaro co kutonga vamweni. Asi tikaezanisa utongi hwo vandhu no hwa Jehovha, zvinobuda pambhene kuti Jehovha ndiyena basi mutongi ano uzivi hwakakura, ano rudo, ano unyasha zve wakanaka mwoyo kupinda vese.—Exodo 34:6; VaRoma 16:27; 1 Johani 4:8.
2. Mukuzwirana no Vaheberi 12:9-11, ngenyi tinodikana kuzwira Jehovha?
2 Jehovha aadi kuti timuzwire ngo ndava yo kumuthya. Asi, iyena anovetera kuti timuzwire ngokuti tinomuda zve tinomuvona inga baba vano rudo. Paakatara karata yake ku Vahebheru, Pauro wakasanangura kuti tinodikana “kunyanya kuaxira mapangiro a Baba” ngokuti ‘anotibesera.’—Verenganyi Vaheberi 12:9-11.
3. (a) Tingakhombijisa kudini kuti tinozwira Jehovha? (b) Tinozodavira muvhunjo japi?
3 Tinozwirana Jehovha ngo kuita zvese zvatinokwanisa kuti timupurukire pa zvese zvaanonanga. Cimwenizve, ngo kutama kugonda uzivi hwedu. (Mazwi Akangwara 3:5) Ciro cingatibesera kuzwira Jehovha, ngo co kuziva mugariro jake. Ngenyi? Ngokuti mugariro ijonajo, jinovoneka mu zvese zvaanoita. (Nduyo 145:9) Patinonasa kuziva Jehovha, tinozomuda maningi. Patinomuda, atizodikani kundandanisa zviro zvatinodikana kuita no zvaticikadini kuita. Kusiyapo zvondhozvo, tinoita zvese zvatinokwanisa kuti tirangarire inga Mwari no kuva no mazwiro akafanana no ake, kuti titame kuita zvakashata. (Nduyo 97:10) Asi, ngenyi nguva jimweni zvinganesa kuzwira Jehovha? Waro, vakuru, majibaba no majimai, vanojijenyi ngo muezaniso wa Govhernadhori Neemiya, Mambo Dhavhidhi na Mariya mai wa Jesu? Jijo iyi, inozodavira muvhunjo iji.
NGENYI ZVINGANESA KUZWIRA JEHOVHA?
4-5. Mukuzwirana no VaRoma 7:21-23, ngenyi zvinganesa kuzwira Jehovha?
4 Thangwe rinoitisa kuti zvinese kuzwira Jehovha, ngo rokuti tese takava no utaka wo ushaishi zve atizivi kukwana. Ngo iyo ndava asipi nguva jese tinoda kuzwira Jehovha. Adhamu na Evha povakapandukira Mwari, voha mucero wo muti wakarambijwa, ivona vakakhombija kuti vaida kujitemera vega civaringo co kuti ngozvapi zvakanaka no zvakashata. (Genesi 3:22) Nyamasi uno, vandhu vazinji vanodakarira maningi kuphurusa ndhungamiro ja Jehovha zve vanojitemera vega zvokuita.
5 Kuzwira Jehovha kunganesa, pikija kuna vaya vanomuziva no kumuda. Mupostori Pauro wakazvivonavo izvi. (Verenganyi VaRoma 7:21-23.) Inga ndi Pauro, tinoda kuita zvakanaka mu mavonero a Jehovha. Asi, tinodikana kuita zvese zvatinokwanisa kuti titame kuita zvakashata.
6-7. Ngorapi thangwe rimweni rinoitiisa kuti zvinese kuzwira Jehovha? Ipanyi muezaniso.
6 Zvirovejeso zvedu no manera otakarehwa, i thangwe rimweni rinoitisa kuti zvinese kuzwira Jehovha. Mazano mazinji o vandhu, anohwisana kamare no murangariro wa Jehovha. Nguva jimweni zvingatodikana kuvangisira kuti timanyise. Vonanyi basi, muezaniso umwe.
7 Ku ndau jimweni, majaha no vasikane vanovangirijwa kuti vawane mare yakawanda. Imwe hambzaji inodanwa Mariya * yakasongana no cineso ici. Icito yajija cokwadi ngo pamusoro pa Jehovha, iyona yainga yakajija ku univhersidhadhi inosisira maningi ku nyika yake. Mbhuri yayo yaindonanga kuti hambzaji ii yaidikana kuwana basa raushoni raizomupa mare yakawanda. Iyona yaitodavo zvondhozvo. Asi, poyakatanga kujija cokwadi no kuda Jehovha hambzaji Mariya yakacinja zvido zvayo. Pikija zvakadaro, iyona yakati: “Nguva jimweni, ndinova no mukana jaushoni jo kuwana mare yakawanda. Asi jaizondiita kuti ndirembe ku divi ro umwari. Ngo ndava yo manera ondakarehwa, zvinonesa maningi kunanga kuti andidi. Ndinodikana kudeketera Jehovha kuti andibesere kuti ndinyise muejo wo kutama kutenda basa raizonditorera maningi nguva pa kushandira Jehovha.”—Mateu 6:24.
8. Wari tinoda kuvonenyi?
8 Inga zvotaperari kuvona, kuzwira Jehovha kunobeserazve itusu. Asi kuno vaya vano mutoro vakadari inga vakuru, majibaba no majimai, vano thangwe rimweni rinovaitisa kuti vazwire Jehovha. Ivona vano mukana wo kuita zvaushoni kuno vandhu vamweni. Ngatende tivone muezaniso munganani jo mu Bhaibheri jinojijisa vandhu vano mutoro manera ovanodikana kuushandisa, mu njira inodakajisa Jehovha.
VAKURU VANGAJIJENYI NGO MUEZANISO WA NEEMIYA
Vakuru vari kushanda pamwepo pakunasirira-nasirira Nyumba yo Umambo, inga zvakaithwa ndi Neemiya paakabesera kuvakiswazve ko mufimbiji jo Jerusarema (Vonanyi ndima 9-11) *
9. Zvineso zvapi zvakasongana na Neemiya?
9 Jehovha wakapa vakuru mutoro unosisira maningi, wo kukorondha vandhu vake. (1 Pedru 5:2) Vakuru vangajija zvizinji ngo matajire aiita Neemiya vandhu va Mwari. Inga Govhernadhori wo Judha, Neemiya wainga no mutoro jakawanda. (Neemia 1:11; 2:7, 8; 5:14) Vonanyi basi zvineso zvakasongana na Neemiya. Iyena wakazwisisa kuti Vajudha vainga vacikareremeji tembheri zve vainga vacikaiti muhengo inga zvainangwa ngo Mutemo kuti vaitire Varevhi. Vajudha avacaizwira mutemo wa Jehovha ngo pamusoro po Sabudu zve vanarume vaicadha no vanakaji vo majinja vacainamata Jehovha. Zvicinyi zvaizoitwa ndi Govhernadhori Neemiya pa mugariro uu unonesa?—Neemia 13:4-30.
10. Neemiya wakaitenyi kuti ahwisane no zvineso?
10 Neemiya aazivi kushandisa mutoro waainga nawo mu njira yo kuvangirirja vandhu, kuti vateveje murangariro jake. Kusiyapo izvo, wakaita mukumbiro kuna Jehovha ngo mwoyo wese zve wakakumbira kubesehwa ndi Jehovha. Iyena wakajijisa vandhu Mutemo wa Jehovha. (Neemia 1:4-10; 13:1-3) Neemiya ngo kujidodokesa kwese, wakashanda no Vajudha vamweni pa kuvakwa ko mufimbiji jo Jerusarema.—Neemia 4:15.
11. Mukuzwirana no 1 VaTesalònika 2:7, 8, vakuru vanodikana kutaja kudini vandhu vo mu ungano?
11 Vakuru avangasongani no zvineso zvakasonganari na Neemiya. Asi vangatevejera muezaniso wake ngo njira jakasiyana-siyana. Inga muezaniso, ivona vanoshanda ngo simba kuti vabesere hama no hambzaji javo. Cimwenizve, avajivoni inga vakakwirira kupinda vamweni ngokuti ivona vano mutoro. Kusiyapo izvi, ivona vanotaja hama no hambzaji mu ungano ngo rudo. (Verenganyi 1 VaTesalònika 2:7, 8.) Rudo hwavo no kujidodokesa zvinovaita kuti vabhuye no vamweni ngo nderemejo. Hama Andre, avo vari mukuru ko makore akawanda, vakati: “Ndakazwisisa kuti, kudari mukuru akava no unyasha no ushamwari, zvinobaya mwoyo yo hama no hambzaji. Mugariro iji, jinondundira ungano kuti ishande pamwepo no vakuru.” Hama Toni, avo vaano makore akawanda vecishanda inga mukuru, vakati: “Ndinoeja kushandisa mbhangiro inowanika pana VaFilipi 2:3 zve nguva jese ndinoeja kuita zvandinokwanisa kuti ndivone vamweni inga vakuru. Izvi zvinondibesera kuti nditame kuvangirija vamweni kuti vazwire inini.”
12. Ngenyi vakuru vanodikana kujidodokesa?
12 Vakuru vanodikana kujidodokesa inga ndi Jehovha. Pikija hake i mukuru-kuru wo mudenga no pasi, iyena “anoderuka” kuti amuse “murembi mu bukuta.” (Nduyo 18:36; 113:6, 7) Bhaibheri rinotivhunja kuti Jehovha anonyenya vese vanojikuja.—Mazwi Akangwara 16:5.
13. Ngenyi mukuru anodikana ‘kubata rurimi hwake’?
13 Mukuru anozwira Jehovha anodikana ‘kubata rurimi hwake.’ Mukusiyana, mundhu akatama kumureremeja, kangaije angatodavira mu njira yakashata. (Jakobo 1:26; VaGalàsia 5:14, 15) Hama Andre, vanangwaya pakutanga, vakati: “Nguva jimweni pandinozwisisa kuti hama kana hambzaji janditaja mu njira yo kutama nderemejo ndinova no cidaka-daka co kutama kuvapingura ushoni. Asi, ndakarangarijisisa muezaniso jo vandhu vanonangwa mu Bhaibheri. Izvi zvakandibesera kuvona dikano yo kuva mundhu anojidodokesa no wakapfava.” Vakuru vanokhombija kuzwira Jehovha ngo kubhuya mu njira yo rudo no yakanaka ku hama no hambzaji, kubatanijavo vakuru vamweni.—VaKolosi 4:6.
MAJIBABA ANGAJIJENYI NGO MUEZANISO WA MAMBO DHAVHIDHI
14. Jehovha wakapa basa rapi ku majibaba zve Jehovha anovetera kuti vaitenyi?
14 Jehovha wakapa majibaba mutoro wo kuva mosoro wo mbhuri. Iyena anovetera kuti ivona vajijise no kupangira vana vavo. (1 VaKorinto 11:3; VaEfeso 6:4) Asi, mutoro uno majibaba uno paunogumira, ivona vanozodavira pamberi pa Jehovha, muumbi wo mbhuri. (VaEfeso 3:14, 15) Kuitira kukhombija kuti ivona vanozwira Jehovha, majibaba vanodikana kushandisa simba ravo mu njira inodakajisa Mwari. Majibaba vangajija zvizinji ngo kujija ngo pamusoro po upenyu hwa Mambo Dhavhidhi.
Mukumbiro wa baba vo Cikristu, unodikana kukhombija kujidodokesa kwavo (Vonanyi ndima 15-16) *
15. Ngenyi tingananga kuti Mambo Dhavhidhi muezaniso wakanaka kuno majibaba?
15 Kusiyapo kuva musoro wo mbhuri basi, Jehovha wakagaja Dhavhidhi inga musoro wo jinja rese ro Iziraeri. Inga Mambo, Dhavhidhi wainga no mutoro jakawanda. Nguva jimweni, iyena aacainasa kushandisa ushoni simba rake inga mambo. (2 Samueli 11:14, 15) Asi, Dhavhidhi wakakhombija kuzwira Jehovha ngo kutendera kuashira mbhangiro. Iyena wakadurura mwoyo wake kuna Jehovha, ngo kumubvunja mazwiro ake. Cimwenizve, waiita zvese zvaaikwanisa kuti azwire mbhangiro ya Jehovha. (Nduyo 51:1-4) Mukuengejera, Dhavhidhi waijidodokesa maningi, zvokuti waitendera kuashira mbhangiro jo vanarume pomwe no jo vanakaji. (1 Samueli 19:11, 12; 25:32, 33) Dhavhidhi wakajijira ngo zvishaishi zvake, tevere wakaita kuti kunamata kwake Jehovha kuve pakutanga.
16. Majibaba angajijenyi ngo muezaniso wa Dhavhidhi?
16 Kudari muri baba, mungajija zvizinji ngo muezaniso wa Dhavhidhi. Inga muezaniso, mucashaisha kushandisa mutoro wo makapuwa ndi Jehovha. Tenderanyi zvamunoposa. Vamweni pavanomupa mbhangiro jakacijikira mu Bhaibheri, jiashirenyi. Mukaita kudaro, mbhuri yenyu inozomureremeja ngo kujidodokesa kwenyu. Pamunonga meciita mukumbiro kuna Jehovha, nanganyi zvese zvamunazvo. Cimwenizve, itanyi kuti mbhuri yenyu izive kuti munoda besero ra Jehovha. Panyezuru po zvese, vonanyi kunamata kwenyu Jehovha inga divi rinosisira maningi mu upenyu hwenyu. (Deuteronòmio 6:6-9) Muezaniso wenyu unosisira maningi kuno mbhuri yenyu.
MAJIMAI ANGAJIJENYI NGO MUEZANISO WA MARIYA
17. Jehovha wakapa basa rapi kuno majimai?
17 Jehovha wakapa basa guru maningi kuno majimai, ro kukorondha vana. (Mazwi Akangwara 6:20) Zvese zvinonanga mai no kuita zvinopsasa vana vavo mu upenyu hwavo hwese. (Mazwi Akangwara 22:6) Vonanyi kuti majimai angajijenyi ngo muezaniso wa Mariya mai wa Jesu.
18-19. Majimai angajijenyi ngo muezaniso wa Mariya?
18 Mariya wainasa kuziva Matahwa. Iyena waireremeja maningi Jehovha zve wainga no ushamwari wo phedo naye. Cimwenizve, iyena wainga no cido co kuda kuita zvese zvaida Jehovha, pikija zvondhozvo zvaireva kucinja upenyu hwake hwese.—Luka 1:35-38, 46-55.
Mai pavanonga vakaremba kana kunyangajwa, vangatodikana kuvangisira kuti vakhombije rudo kuno mbhuri (Vonanyi ndima 19) *
19 Kudari muri mai, mungajija zvizinji ngo muezaniso wa Mariya. Kuitisa kudini? Cokutanga, ngo kuva no ushamwari wo phedo na Jehovha, ngo kuita jijo yo mundhu ega no kuita mukumbiro. Cocipiri, ivanyi no cido co kuda kuita cinjo kuti mudakajise Jehovha. Inga muezaniso, kangaije makarehwa ngo vabari vacainesa kunyangajwa zve vaibhuya ngo hasha nemwi. Zvingatoitazve kuti makakura mecirangarira kuti awo ndiwona maitiro aushoni o kurera vana. Pikija mapera kujija ngo manera anoda Jehovha kuti vana varehwe, mungatozvivona inga kuti zvinonesa maningi kuti mutame kukharira vana venyu. (VaEfeso 4:31) Pa nguva jakadari, munodikana kuita mukumbiro kuna Jehovha. Mai vamweni vanondanwa Lidhiya, vakati: “Nguva jimweni, mwana wangu paacaindipurukira, ndaiita mukumbiro wakavanga kuna Jehovha, kuti nditame kumukharamusa. Zvinoitika pandinonga ndecivereketa, ndoima, ndoita mukumbiro mucinyararire kuti Jehovha andibesere. Mukumbiro waiindiita kuti ndithive.”—Nduyo 37:5.
20. Majimai amweni anosongana no zvineso zvapi zve angazvinyisisa kudini?
20 Majimai amweni anosongana no zvineso zvakafanana. Ivona vanonesehwa kukhombija rudo kuno vana vavo. (Tito 2:3, 4) Vazinji vo majimai aya akarehwa ngo vabari vainga vacikataji ushoni vana vavo. Kudari makarehwa mu njira iyi, mucatevejera kuposa ko vabari venyu. Kuti mukwanise kuita zvondhozvo, munodikana kuzwira Jehovha no kujijira kukhombija Rudo kuno vana venyu. Zvingatomunesera kucinja manera enyu okurangarira, kuzwa no kuita zviro. Asi mungazviikwanisa. Cimwenizve, cinjo jondhojo jinozobesera imwimwi no mbhuri yenyu.
ENDERERANYI MBERI MECIZWIRA JEHOVHA
21-22. Mukuzwirana na Isaia 65:13, 14, tinoashira makomborero api ngo kuzwira Jehovha?
21 Mambo Dhavhidhi waiziva makomborero anovepo ngo kuzwira Jehovha. Iyena wakatara kudari: “Mutheto ya Tenji Mwari yakarurama, inodakajisa mwoyo; mutemo ya Tenji Mwari inojeka, inoveneka mumeso. Anovenekeravo muranda wenyu; kumateveja kunobesa kukuru.” (Nduyo 19:9, 12) Nyamasi uno, tinokwanisa kuvona musiyano o vandhu vanozwira Jehovha na vaya vanoramba mbhangiro jake. Vanosana kuzwira Jehovha “vanozotamba vecidakara mu mwoyo mavo.”—Verenganyi Isaia 65:13, 14.
22 Vakuru, majibaba pomwe no majimai pavanozwira Jehovha ngo mwoyo wese, vanowana upenyu uri nane, mbhuri javo jinova no mudakaro zve ungano inoenderera mberi yakabatana. Kusiyapo zvese izvi, vanodakajisa mwoyo wa Jehovha. (Mazwi Akangwara 27:11) Uwu mudakaro mukuru wotaizowana.
NDUMBO 123 Kubesera Urongwa hwo Umwari Takagondeka
^ ndim. 5 Jijo iyi, inozobhuya kuti ngenyi tinodikana kuzwira Jehovha. Inozobhuyazve kuti vakuru, majibaba no majimai, vanozojijenyi ngo muezaniso wa Govhernadhori Neemiya, mambo Dhavhidhi na Mariya mai wa Jesu.
^ ndim. 1 MAGAMA AKASANANGUHWA: Magama o kuti kuzwira no kujidira pasi anozika mu njira yakashata ngo vaya vanojizwa kuvangirijwa kuzwira vamweni. Asi, vashandiri va Mwari vanosana kumuzwira. Ngokudaro, avavoni kuzwira Mwari inga ciro cakashata.
^ ndim. 7 Pa jijo iyi, mazina amweni akacinjwa.
^ ndim. 62 KUDURIJIHWA KO PIKICA: Mukuru arikushanda pamwepo no mwana wake pakunasirira-nasirira Nyumba yo Umambo, inga zvakaithwa ndi Neemiya paakabesera kuvakiswazve ko mufimbiji jo Jerusarema.
^ ndim. 64 KUDURIJIHWA KO PIKICA: Baba vari kuita mukumbiro kuna Jehovha pamwepo no mbhuri yavo.
^ ndim. 66 KUDURIJIHWA KO PIKICA: Mwana mudoko wapeja nguva yakawanda ecitamba vhidhiyo gemi wotama kuita basa raakapuwa ndi make kana basa ro kucikora. Make vakaguma kuvha kubasa vakaremba, vanopangira mwana vacikamukhariri.