1. Jehovha anozwa kudini ngo vandhu vanojidodokesa?

JEHOVHA anoda vandhu vanojidodokesa. Vandhu vanojidodokesa kamare, ndivona vega basi vangava no ushamwari hwo phedo naye. Ngo divi rimweni, Jehovha ‘anoziva ngo ndhambo vanotheka.’ (Nduyo 138:6) Tese tinoda kudakajisa Jehovha. Tinodazve kuti iyena ave phedo na itusu. Ngokudaro, itusu tino mathangwe akanaka kuti tisakurire mugariro wo kujidodokesa.

2. Pajijo iyi, tinozodavira muvhunjo japi?

² Pajijo iyi itusu tinozodavira muvhunjo mutatu iji: (1) Kujidodokesa icinyi? (2) Ngenyi tinodikana kusakurira mugariro wo kujidodokesa? (3) Mugariro japi jingaeja kujidodokesa kwedu? Inga zvatinozovona, patinosakurira mugariro wo kujidodokesa, tinodakajisa mwoyo wa Jehovha, zvecibeserazve itusu kamare.—Mazwi Akangwara 27:11; Isaia 48:17.

3. Kujidodokesa icinyi?

³ Mundhu anojidodokesa aajivoni inga anosisira maningi kupinda vamweni, nee aajikuji. Bhaibheri rinokhombija kuti mundhu anojidodokesa, anoziva kuti Jehovha wakakura maningi kupinda iyena. Iyena anonasa kuziva cigaro co vandhu vamweni. Mundhu anojidodokesa, anoziva kuti mundhu wese ano paanosisira kupinda iyena.—VaFilipi 2:3, 4.

4-5. Ngenyi atidikani kuvona mundhu wakanyararisa, tomuvona inga mundhu anojidodokesa?

⁴ Vandhu vamweni vanoita inga vanojidodokesa. Kangaije vangava vandhu vakanyararisa. Vamweni vangava no nderemejo ngo ndava yo kuti ivona vakajijiswa ngo majibaba avo kuti vaite zvondhozvo. Asi ngo mukati, ivona ivandhu vanojikuja maningi. Rinomanyanga ari putihwi, inozoguma njiku yazvinozobuda pambhene.—Luka 6:45.

⁵ Ngo divi rimweni, vandhu vamweni vanovoneka kuva vanojithemba, zvokuti vanonanga mazwiro avo. Izvi azvirevi kuti vanojikuja. (Johani 1:46, 47) Pikija zvakadaro, vandhu vakanyararisa vanodikana kuva vanongwarira kuti vatame kujithemba. Azvinenyi hazvo dangani takanyararisa kana kuti haiwa, tese tinodikana kuva vandhu vanojidodokesa.

6. Inga zvinokhombijwa pana 1 VaKorinto 15:10, tinojijenyi ngo muezaniso wo mupostori Pauro?

⁶ Vonanyi zvakaitika no mupostori Pauro. Iyena wakashandiswa ndi Jehovha kuti aumbe ungano imbza mu madhorobha akasiyana-siyana. Kangaije wakatoita zvizinji pa kushandira Jehovha kupinda vapostori vamweni va Jesu Kristu. Hina, Pauro aazivi kurangarira kuti iyena anosisira maningi kupinda hama jake. Ngo kujidodokesa kwese, iyena wakati: “Inini ndiri mudoko wo vapostori. Andinakiri kudanijwa mupostori, ngokuti ndakateverera gungano ra Mwari.” (1 VaKorinto 15:9) Perapo, Pauro wakananga kuti waizokwanisa kuva no ushamwari wo phedo na Jehovha, ngo ndava yo unyasha ucikaezaniswi, haiwa ngo mugariro jaushoni jaainga najo kana zviro zvaushoni zvaakaita. (Verenganyi 1 VaKorinto 15:10.) Pa karata yake ku ungano yo Korinto, Pauro wakagaja muezaniso wakanaka wo kujidodokesa. Iyena wakajidodokesa pikija vamweni vainga vecipsaka kuva vakuru kupinda iyena!—2 VaKorinto 10:10.

7. Hama yaizivika maningi yaizwi Klein, yakakhombijisa kudini kuva inojidodokesa?

⁷ Zvapupu zva Jehovha zvizinji zvinovangiswa maningi ngo zvakaitika na hama Karl Klein, avo vakashanda inga umwe wo vandhu vanoumba Mukhumbi Unotonga. Mu zviitiko zvavo zvo upenyu, Hama Klein no kujidodokesa kwese vakatendera kuhwisana no zvineso mu upenyu hwavo. Inga muezaniso, ivona vakananga kuti mu gore ro 1920, vakaenda koocumaera muzi ngo muzi. Asi zvakavanesera zvokuti vakagara makore maviri vacikaendi koocumaera. Asi pakufamba ko nguva, povainga vecishandira ku Bheteri, hama Klein vakanyangajwa pavakapera kupuwa mbhangiro yakavha ku hama imweni. Cimwenizve, ivona vakambova no ndhendha yo mumusoro, asi yakazoita nane. Pikija no zvese izvi, hama Klein vakaashira mutoro jakawanda maningi zve jinosisira. Amborangariranyi basi: Pikija vainga hama yaizivika maningi, ivona vakajidodokesa, avazivi kupseruka ngo kutendera zviro zvavacaikwanisepi ku vandhu vese! Ndizvona zvinoitisa kuti hama no hambzaji, ngo cido cese, jirangarire hama Klein pajinoverenga zviitiko zvo upenyu * hwavo zvinodakajisa.

8. Kuitisa kudini 1 Pedru 5:6, inotibesera kuvona kuti kujidodokesa kunodakajisa Jehovha?

⁸ Thangwe guru rinotiitisa kuti tisakurire mugariro wo kujidodokesa, ngo rokuti zvinodakajisa Jehovha. Mupostori Pedhru wakanasa kuzvijekesa. (Verenganyi 1 Pedru 5:6.) Recibhuya ngo magama a Pedhru, bhuku rinozwi “Uya Uve Muteveri Wangu,” rakati: “Kujikuja kwakadari inga nvhenene. Ikona kungatouraya kamare. Cimwenizve, kujikuja kunoitisa kuti mundhu anokwanisa kuita zvizinji, ave acikasisiri pamberi pa Mwari. Ngo divi rimweni, kujidodokesa, kungaita kuti mundhu anovoneka inga acikasisiri, ave anosisira maningi kuna Jehovha. Ngokudaro, Mwari anozodakara ngo kuzopfupa kujidodokesa Kwenyu.” * Munorangarira kuti, kuno zviro zvimweni zvakanaka kusiyapo kudakajisa mwoyo wa Jehovha here?—Mazwi Akangwara 23:15.

9. Kuitisa kudini kujidodokesa kunoita kuti vandhu vade kuita ushamwari na itusu?

⁹ Kusiyapo kudakajisa Jehovha, tikajidodokesa tinozoashira makomborero akawanda. Kujidodokesa kunozoita kuti vandhu vade kuita ushamwari na itusu. Kuti munase kuzwisisa, ejanyi kurangarira mushovo wo vandhu vamunoda kushamwarijana navo. (Mateu 7:12) Itusu atidakariri kushamwarijana no vandhu vanoda kuti vamweni vaite basi zviro zvavanoda zve vacikadakariri kupurukiravo mazwiro o vamweni. Mukusiyana, zvinodakijisa maningi kuva pondhopo no hama no hambzaji jinokhombija kuva no ‘mwoyo wo kudisana inga hama, kuthiva mwoyo no kujidodokesa.’ (1 Pedru 3:8) Kudari tecidakarira kuva no vandhu vakadaro, tinodikana kujidodokesa kuti ivona vazodakarevo kuva phedo nesu.

10. Kuitisa kudini kujidodokesa kunoita kuti tipungure zvatinazvo mu upenyu?

¹⁰ Cimwenizve, kujidodokesa kunoita kuti tipungure zvatinazvo mu upenyu. Zvokadi kamare, nguva jimweni tingatovona zviro, zvokuti mu mavonero edu, azvizivi kunaka nee azvizivi kurungama. Mambo wainga no uzivi Soromona, wakati: “Ndinovona xoko jinopakira haci, no nduna jinofamba ngopasi.” (Mucumaeri 10:7) Nguva jimweni vandhu vanokwanisa kuita zvizinji, avawani rukujo hwovanoda. Asi, vaya vacikakwanisi, vanoashira rukujo. Pikija zvakadaro, Soromona wakazwisisa kuti ciro cikuru catinodikana kuita ngo co kuzwisisa zviri kuitikari zve totama kupsakisisa zviro zvicikabeseri. (Mucumaeri 6:9) Kudari tikajidodokesa, zvinozoreruka maningi kwatiri kutendera zviro munjira yazviri waro, haiwa kuda kucinja.

11. Tinodikana kuitenyi patinoashira mbhangiro?

¹¹ Njiku jese, tino mukana jakawanda maningi jo kukhombija kuti tinojidodokesa.Vonanyi mugariro munganani. Patinoashira mbhangiro. Pa mugariro wakadari, tinodikana kuceukija izvi, kuti mundhu atipe mbhangiro indava yo kuti tashaisha kamare. Kangaije zviro zvokutanga zvatingaita i kuramba mbhangiro yondhoyo. Zvingatoitazve kuti tingatoshora mundhu watiparo mbhangiroyo kana manera aakaparo. Asi, kudari tikajidodokesa, zvinozotibesera kuti tiashire mbhangiro ngo njira yaushoni.

12. Mukuzwirana na Mazwi Akangwara 27:5, 6, ngenyi tinodikana kubongesera mundhu paanotipa mbhangiro? Ipanyi muezaniso.

¹² Mundhu anojidodokesa anobongesera paanoashira mbhangiro. Inga muezaniso, rangariranyi kuti muri pa musongano jo Cikristu. Pakupera kubhuya no hama jakati kuti, umwe wavo womutora woenda nemwi pa mutivi, womuvhunja kudari: Hama muno ciri cese cakaphakhira pa meno enyu. Pacina kukana-kana, munopseruka padoko. Asi, amucaizomubonga ngo kumuvhunja kudaro here? Zvokadi kamare, maitodakarira kuti ari wese akasike kumuvhunja. Mu njira yakafanana, tinodikana kujidodokesa zve tobongesera patinovona hama yava no cicunge co kutipa mbhangiro yotaida. Tinodikana kuvona mundhu wondhowo inga shamwari haiwa inga muvengi wedu.—Verenganyi Mazwi Akangwara 27:5, 6; VaGalàsia 4:16.

13. Tingakhombijisa kudini kujidodokesa, vamweni pavanoashira mabasa akasiyana-siyana pa kushandira Jehvoha?

¹³ Vamweni pavanoashira mabasa akasiyana-siyana pa kushandira Jehovha. Umwe mukuru anodanwa Jasoni, wakati: “Nguva jimweni, pandinovona vamweni veciashira mabasa akasiyana-siyana, ndinojivhunjisa kuti ngenyi andimapuwivo.” Makambojizwavo mu njira iyi here? Azvizivi kushata kuva no cido co kuda kuita zvizinji mu basa ra Jehovha. (1 Timoti 3:1) Asi, tinodikana kungwarira maningi zvatinorangarira. Kudari tikatama kungwarira, tinozosiya kuti kujikuja kukure mu mwoyo mwedu. Inga muezaniso, hama iri yese ingatorangarira kuti ndiyona inokwanisa ushoni kuita basa rakati kuti. Kana kuti, mukaji wo imwe hama kangaije angatorangarira kudari: ‘Mwamunangu vaizoita ushoni basa iri kupinda hama iyoo!’ Tikajidodokesa kamare, atizovi no mujimu uu wo kujikuja.

14. Tinojijenyi ngo zvakaita Mosi vamweni povakaashira mabasa akasiyana-siyana?

¹⁴ Tingatojijira zvakawanda maningi kuvhira ku zvakaitika na Mosi vamweni povakaashira mabasa akasiyana-siyana. Mosi waibongesera maningi ngo basa raakagajwa ro kutungamirira jinja ro Iziraeri. Waro Jehovha paakasana vandhu vamweni kuti vashande na Mosi, Mosi wakaitenyi? Iyena aazivi kuva no usanje. (Bziverengo 11:24-29) Wakava anojidodokesa zve wakatendera kuti vamweni vamubesere pa basa ro kutonga. (Exodo 18:13-24) Iyena aazivi kuita kuti basa rake ribzinyirire vandhu vaaitonga. Iyena waizviziva kuti kuva no vandhu vakawanda kuti vatonge jinja ro Vaiziraeri, zvaizova zvaushoni maningi. Uwu muezaniso waushoni maningi! Atidikani kukanganwa kuti, kudari tecida kuva vandhu vanosisira kuna Jehovha, kujidodokesa kwedu kunodikana kukura kupinda kukwanisa kwedu kuita zviro. Pikija ‘Tenji Mwari mukuru-kuru! Yena anovonavo mundhu wakapfava.’—Nduyo 138:6.

15. Hama zinji jakasongana no cinjo japi?

¹⁵ Patinosongana no cinjo. Mu makore ano, hama zinji jakacinja basa rojaiita. Inga muezaniso, mu gore ro 2014, vavonereri vo dhistrito vakakumbihwa kuti vaite mabasa akasiyana-siyana mu nguva yakazara. Cimwenizve, Mukhumbi Unotonga wakananga kuti kuvhira mu gore rondhoro, hama jino makore anokwana kuita makumanomwe, avacaidikanazve kushanda inga vavonereri vo ndharaundha zve vakuru vano makumasere o makore avacadikanazve kushanda inga murongi wo dare ro vakuru. Kusiyapo zvondhozvo, mabheterita mazinji akagajwa kuti ashande inga mapiyona. Kuveni vamweni vaishanda mu nguva yakazara vakadikana kusiya basa ravo ngo ndava yo zvineso zvo uhomi, kuda kubesera ukama no zvimwenivo hazvo.

16. Hama no hambzaji jedu jakakhombijisa kudini kujidodokesa pojakasongana no cinjo?

¹⁶ Azvicaireruka ku hama no hambzaji iji kuti jiite cinjo iji. Zvokadi kamare, ivona vaidisisa maningi basa ravaiita kare. Kazinji ainga mabasa avaipsaka kuvhira kare. Vamweni povakaashira basa rimweni vakava pa mukuvo umweni unonesa maningi. Asi pa kufamba ko nguva, vakakwanisa kurovejana no cinjojo. Ngenyi? Ngokuti hama iji, jinoda maningi Jehovha. Ivona vanozviziva kuti vakajipira kuna Jehovha, haiwa ku basa ravo, kana kuti vave no nduma. (VaKolosi 3:23) Ivona vanodakara maningi ngo kwenderera mberi vecishandira Jehovha ngo kujidodokesa kwese azvinenyi ngo rapi basa ravo. Ivona “vanotura muthwaro” wavo kwaari, ngokuti ivona vanozviziva kuti anovakorondha.—1 Pedru 5:6, 7.

17. Ngenyi zvaushoni kutevejera zvinonangwa mu Soko ra Mwari ngo pamusoro po kujidodokesa?

¹⁷ Tinobonga maningi ngokuti Soko ra Mwari rinotivangisa kuti tisakurire kujidodokesa. Patinojidodokesa, vandhu vanozodakara kuva nesu zve itusu navo. Tinozonasa kuhwisana no zvineso zvo uhomi. Kusiyapo zvese izvi, tinozokwedera phedo na Baba wedu vo mugore. Zvinodakajisa kuziva kuti, pikija Jehovha anogara ku ndau “yakakhwira, nyezuru,” anoda maningi vandhu vanojidodokesa zve anovareremeja.—Isaia 57:15.