1. Mundhu anozwa kudini umwe wo pa ukama hwake akajingwa?

MUNA mundhu wamunoda wakajingwa here? Izvo zvingamuhwaja maningi. Imwe hambzaji inodanwa Irdha * yakati: “Mwamunangu pavakatamika pasure po makumarongomuna na rimwe o makore no takacadha, zvakandihwaja maningi. Asi ndakahwajihwa maningi kamare mwana wangu, mukaji wake no vana vake pavakasiya kushandira Jehovha.”

2-3. Mukuzwirana na Nduyo 78:40, 41, Jehovha anozwa kudini mushandiri wake paanosiya kumushandira?

² Amborangariranyi manera Jehovha wakanyagajwa, paakavona vandhu vo mbhuri yake kamare yo kudenga, vecisiya kumushandira. (Judha 6) Vonanyizve kusuruvara kwaakava nako paakavona vandhu vake vaaida maningi Vaizraeri, vecimupandukira vhaza jakawanda. (Verenganyi Nduyo 78:40, 41.) Ivanyi no cokwadi cokuti Baba wedu vo kudenga vanohwajihwavo maningi mundhu wamunoda paanosiya kuvashandira. Ivona vanozwisisa kuhwajihwa kwamuri kusonganari nako. Ngo ndava yo unyasha hwavo, ivona vanozomuvangisa no kumubesera.

³ Pa musoro uwu, tinozovona kuti zvicinyi zvatingaita kuti tiashire besero ra Jehovha, mundhu watinoda paanosiya kumushandira. Tinozovonavo kuti tingabeseresa kudini vamweni mu ungano vari kusongana no cineso ici. Asi pakutanga, ngatende tivone murangariro waticikadikani kuva nawo.

4. Vabari vamweni vanojizwa kudini vana vavo pavanosiya cokwadi?

⁴ Mwana paanosiya kushandira Jehovha, kazinji vabari vanojivhunjisa kuti dangani zviripo zvavaidikana kuita kuti mwana uwu aenderere mberi ecishandira Jehovha. Hama imweni inodanwa  Ruka, mwana wayo paakapera kujingwa, iyona yakananga kudari: “Ndaijipa ndava, nguva jimweni andicaikwanisa kuvata ndaigara ndecirira i mwoyo wangu waihwaja maningi.” Erizabheti, hambzaji imweni yakasongana no mugariro wakafanana yakati: “Kunanga kuti ciripo candakaposa inga mai? Ndaijizwa kuti andizivi kujijisa ushoni mwanangu cokwadi.”

5. Ndiyani ano ndava mundhu paanosiya kushandira Jehovha?

⁵ Tinodikana kuceukija kuti Jehovha wakapa umwe na umwe wedu cipo co rusujunuko. Izvo zvingareva kuti itusu tingasana kuti tinoda kumuzwira kana kuti haiwa. Vana vamweni vano vabari vacikana muezaniso waushoni, vanokheta kushandira Jehovha no kuenderera mberi vakagondeka kwaari. Kuveni vana vamweni, vabari vavo vakavangisira maningi kuti vavajijise cokwadi, asi pikija zvakadaro vakasiya kushandira Jehovha. Umwe na umwe wedu anodikana kusana kushandira Jehovha. (Joxwa 24:15) Ngo kudaro, vabari vakasuruvara ngo kuti vana vavo vasiya kushandira Jehovha, avadikani kurangarira kuti ndivona vakaposa.

6. Umwe musikane wakajizwa kudini baba wake pavakasiya kushandira Jehovha?

⁶ Nguva jimweni, mubari angasiya cokwadi osiyavo mbhuri yake. (Nduyo 27:10) Izvi zvingarembesa vana avo vaivona vabari inga muezaniso wakanaka maningi. Esteri ano baba vakajingwa wakati: “Inini ndakacema maningi ngokuti ndakazwisisa kuti ivona avacaingepi vasiya cokwadi basi, asi vainga vasana kutamazve kuda kushandira Jehovha. Ndaida maningi baba wangu asi pavainga vakajingwa, ndaikayakaya maningi ngo kuda kuziva kuti ivona vainga vari ushoni kana kuti haiwa. Ndaithimwa-thimwa maningi.”

7. Ngoapi mazwiro a Jehovha paanovona majaha ano vabari vakajingwa?

⁷ Majaha, kudari vabari venyu vakajingwa, itusu tinosuruvaravo maningi. Mungava no cokwadi cokuti Jehovha anoziva kuhwajihwa kwamuri kusongana nako. Zivanyi kuti Jehovha anomuda maningi i anodakara maningi pamunoenderera mberi mecimushandira no makagondeka. Hama no hambzaji jenyu jo mu ungano jinodakaravo maningi. Zivanyi kuti imwimwi, amubatanijwi pa zvivaringo zvinotemwa ngo vabari venyu. Inga zvatavona pakutanga, Jehovha wakatipa rusujunuko wokukheta, ngo kudaro tingakheta kuti tinoda kumushandira kana kuti haiwa. Mundhu wese wakajipira no kubhabhatijwa, anodikana ‘kuthwara mutoro wake.’—Vagaratiya 6:5.

8. Vopambhuri vangaitenyi pavanonga vecivetera kuti wakajingwaya ahwirire kuna Jehovha? (Vonanyi bhokiso rinoti: “ Hwiriranyi kuna Jehovha.”)

⁸ Mundhu wamunoda paanosiya kushandira Jehovha, imwimwi mungatova no vetero kuti njiku iri yese iyena anozohwirirazve kwaari. Waro zvicinyi zvamungaita pamunonga mecivetera? Itanyi zvese zvamunokwanisa kuti muvangise rutendo hwenyu. Mukaita kudaro, munozova muezaniso waushoni ku vandhu vamweni pa mbhuripo, kangaije kuna mundhu wiya wajingwaya. Cimwenizve munozova no simba kuti mukwanise kuhwisana no kuhwajihwa uku. Waro mungaitenyi kuti muenderere mberi makavanga?

9. Zvicinyi zvamungaita kuti muwane simba rinovha kuna Jehovha? (Vonanyi bhokiso rinoti: “ Vhesi Jinovangisa Kudari Mundhu Watinoda Wasiya Kushandira Jehovha.”)

⁹ Itanyi zvese zvamunokwanisa kuti muvangise rutendo hwenyu. Zvinosisira maningi kuenderera mberi mecivangisa rutendo hwenyu no rutendo wo vo pa mbhuri penyu. Mungazviitisa kudini? Wananyi simba rinovha kuna Jehovha ngo kuverenga Bhaibheri, kurangarijisisa no kwenda kumusongano. Joana ano baba vakasiya Jehovha wakati: “Ndinojizwa ndakagajana pandinoverenga ngo pamusoro po vandhu vanonangwa mu Bhaibheri vakadari inga Abhigairi, Esteri, Jobe, Josefa na Jesu. Muezaniso javo jinondivangisa no kundibesera kuti nditame kurangarira maningi zvakaitikaro. Ndinovonazve kuti mumbo jedu, jinondivangisa maningi.”

10. Nduyo 32:6-8, inotibeseresa kudini patinonga takasuruvara?

¹⁰ Vhunjanyi Jehovha zvese zvinomuita kuti muthimwe-thimwe. Pamunojizwa makasuruvara, mucadoremba kuita mukumbiro kuna Jehovha. Deketeranyi kuna Jehovha kuti amubesere kuvona mugarirowo inga manera aanovona. Kumbiranyizve kuti iyena ‘amujijise no kumutatija gwanja ro kutevera.’ (Verenganyi Nduyo 32:6-8.) Kunasa kunanga zvinganesa maningi kuvhunja Jehovha manera amuri kujizwa. Asi Jehovha anonasa kuzwisisa zvamuriwaro kusongana nazvo. Iyena anomuda maningi i anomukumbira kuti mumuvhunje zvese zvamuri kusonganaro nazvo.—Exodo 34:6; Nduyo 62:7, 8.

11. Mukuzwirana na Vahebheru 12:11, ngenyi tinodikana kuthemba mbhangiro yo rudo wa Jehovha? (Vonanyi bhokiso rinoti: “ Kujinga Kunovonesa Rudo hwa Jehovha.”)

¹¹ Beseranyi zvasungwaro ngo vakuru. Kujinga kunoita divi ro nasiriro ya Jehovha. Nasiriro  iyi inobesera vese, kubatanijavo mundhu wiya wajingwaya. (Verenganyi Vahebheru 12:11.) Vandhu vamweni mu ungano, vangashora civaringo catemwa ngo vakuru, co kujinga ariwese, asi ceujanyi kuti vandhu vondhovo vanoda kuvoniwa ushoni ngo mundhu wajingwaya. Kazinji izvi zvinoitika ngo ndava yo kuti atizivi zvese zvinobatanijwepo. Zvaizova zvo ungwaru kuthemba vakuru vabatanijwaro pa kutonga shwiro iya, ngokuti vaita zvese zvavanokwanisa kuti vateveje zvinonanga Bhaibheri no kutonga zvinozwirana no zina “ra Tenji Mwari.”—2 Kronike 19:6.

12. Vamweni vakabesereka kudini ngo kuzwira nasiriro ya Jehovha yo kujinga?

¹² Ngo kubesera cisungo co vakuru co kujinga mundhu watinoda, tinonga tecibesera kuti mundhu wajingwaro ahwirire kuna Jehovha. Erizabheti wanangwaya pakutanga wakati: “Cakava cineso cikuru maningi kutamazve kubhuya no mwana wangu wo dangwe.” Iyena wakati: “Paakahwirira kuna Jehovha iyena wakananga kuti waifanera kujingwa kamare. Pakufamba ko nguva, wakavona kuti wakakwanisa kujijira zviro zvizinji zvaushoni, wovona kuti mbhangiro ya Jehovha nguva jese yakanaka.” Mwamuna wa Erizabheti anodanwa Marko, wakaengejera eciti: “Mukuvo wakazotevera, mwana wedu wakativhunja kuti waidazve kuhwirira kuna Jehovha ngokuti aticaibhuyazve na iyena. Ndinobonga maningi Jehovha ngokuti wakatibesera kuti tive vandhu vanozwira.”

13. Zvicinyi zvingamubesera kuti mukwanise kuhwisana no mazwiro acikabesi?

¹³ Bhuyanyi no shamwari inomuzwisisa. Shamwarijanani no Makristu akaivha ku divi ro kumujimu kuti muve no mavonero aushoni. (Mazwi Akangwara 12:25; 17:17) Joana wanangwaya pakutanga wakati: “Ndaijizwa ndiri ndoga. Asi kubhuya no shamwari jinothembeka kwakandibesera kuti ndihwisane no mugariro uwu.” Zvicinyi zvamungaita kudari mukavona kuti mu ungano muno vandhu vanobhuya zviro zvinomuita kuti muhwajihwe maningi?

14. Ngenyi tinodikana ‘kuenderera mberi tecicungirirana ngocedu no kuregererana’?

¹⁴ Ivanyi anosengerera no hama no hambzaji jenyu. Kunasa kunanga, asipi vese vangananga zviro zvaushoni mukuvo wese. (Jakobo 3:2) Tese atizivi kukwana, ngokudaro mucakahamara kudari ariwese akananga kana kuita ciri cese cingamuita kuti mukhuvazike. Ceujanyi kuti mupostori Pauro wakananga kudari: “Endereranyi mberi mecicungirirana ngocenyu no kuregererana ngo mwoyo wese pikija aripo wamukhugunya ngo ciro ciri cese.” (Vakorose 3:13) Imwe hambzaji ino ukama wakajingwa yakananga kudari: “Jehovha wakandibesera kuti ndiregerere hama jaieja kundibesera ngo njira acikaripi iyona.” Waro ungano ingabesera kudini mbhuri ino mundhu ari wese wakajingwa?

15. Zvicinyi zvatingaita kuti tibesere mbhuri ino mundhu wavha kujingwa?

¹⁵ Ivanyi wakanaka mwoyo no kuva no ushamwari ku mbhuri ino mundhu wajingwaro. Hambzaji imweni inodanwa Miriamu yakananga kuti yainga icithya kwenda ku musongano,  hama yayo payakajingwa. Iyona yakati: “Ndaithya zvaizonanga vandhu. Asi kondhono, kwaingavo no hama no hambzaji jaingavo jakasuruvara ngo zviro zvaingaya zvaitika. Asi ijona ajicaizonanga zviro zvakashata ngo pamusoro po hama yangu yaingaya yajingwa. Ngo besero ro hama andizivi kuhwisana ndega no mugariro uwu.” Hambzaji imweni yakati: “Mwana wedu paakajingwa hama jakaviya kotivangisa. Vamweni vakananga kuti avacaiziva zvokunanga pikija zvakadaro, vamweni vakacema na inini kuveni vamweni vakanditumira karata jinovangisa. Zvavakaitaro zvakandibesera maningi kamare.”

16. Ungano ingaendereresa kudini mberi yecibesera mbhuri ino mundhu wakajingwa?

¹⁶ Endereranyi mberi mecipa besero mbhuri ino mundhu wajingwaro. Ivona vanoda kutatijihwa rudo no kuvangiswa pa mugariro uwu kupinda kare. (Vahebheru 10:24, 25) Nguva jimweni hama jimweni jinoima kubhuya no mbhuri jino mundhu wakajingwa, zviro izvi zvinoita kuti mbhuri iji jijizwe kuti ijona jatojingwavo. Macasiya kuti zviro izvi zviitike. Maningi-ningi majaha ano mubari umwe wakajingwa, anoda maningi kusimbwa no kuvangiswa. Hambzaji Maria avo vakavona mwamunavo vecijingwa vosiya mbhuri, vakati: “Shamwari jangu jimweni jakaviya ku muzi kwangu jotibikira no kutibesera kuita jijo yo mbhuri. Ivona vakazwa kuhwajihwa kwangu vocema na inini. Ngari yo pakatanga kuzika marehwa-rehwa akashata ngo pamusoro pangu, ivona vakandijivirira. Ivona vakandivangisa kamare.”—Varoma 12:13, 15.

17. Vakuru vangaitenyi kuti vavangise mbhuri ino mundhu wakajingwa?

¹⁷ Vakuru, shandisanyi mukana wese wamunawo kuti muvangise rutendo wo mbhuri ino mundhu wakajingwa. Imwimwi muno basa rinosisira maningi ro kuvangisa hama jino ukama wakasiya kushandira Jehovha. (1 Vatesaronika 5:14) Ivanyi no cirovejeso co kuvangisa hama no hambzaji musongano jicito jatanga no pajinopera. Vavhakacirenyi no kuita mukumbiro navo. Shandanyi navo mu basa ro kucumaera no kuvakoka pakunamata kwenyu ko mbhuri. Vahavisi vo kumujimu, vanodikana kukhombija rudo no mudakaro pavanotaja mavhuta a Jehovha ari kutambujika.—1 Vatesaronika 2:7, 8.

18. Mukuzwirana na 2 Pedhru 3:9, Mwari anodenyi kuno vaya vaima kumushandira?

¹⁸ Jehovha, “aadi kuti mundhu afe, asi anoda kuti vese vakhauye.” (Verenganyi 2 Pedhru 3:9.) Pikija mundhu paanoita cishaishi cakakura maningi, iyena anondosisira kuna Jehovha. Ndizvona zvakaita kuti Jehovha apagari mutengo wakakura maningi kuno vashaishi vese ngo kupira upenyu wo Mwana wake waanoda. Ngo rudo hwese, Jehovha anoeja kubesera vandhu vakamusiya kuti vahwirire kwaari. Iyena anovetera kuti ivona vatendere besero iri inga zvinokhombijwa pa muezaniso wa Jesu wo mwana mupanduki. (Ruka 15:11-32) Vazinji vakasiya cokwadi vakahwirirazve mu sangano rake. Ungano yakanasa kuvaashira. Hambzaji Erizabheti vanangwaya pakutanga, vakava no mudakaro wo kuvona mwana wavo ecihwirijwa mu ungano. Veciceukija zvokare ivona vakati: “Ndinobonga maningi ngo vese vakandivangisa kuti nditame kuruza vetero yangu.”

19. Ngenyi tinodikana kuthemba Jehovha nguva jese?

¹⁹ Itusu nguva jese tingathemba Jehovha. Ngwajo jese jaanotipa ikuitira kugara ushoni kwedu. Iyena ndi Baba vano rudo no vanokova. Cimwenizve vanoda maningi vese vanomunamata. Ivanyi no cokwadi cokuti pamunonga mucisongana no cineso cakakura maningi, Jehovha narini aazomusiyi. (Vahebheru 13:5, 6) Hama Marko vanangwaya pakutanga vakati: “Jehovha na kamwe aazivi kumbotisiya. Nguva yese yatinosongana no zvineso iyena ari ku divi redu.” Jehovha anozoenderera mberi ecimupa “simba rinopindirija ro vandhu.” (2 VaKorinte 4:7) Ngo kudaro, pikija mundhu wamunoda akasiya kushandira Jehovha ivanyi no cokwadi cokuti imwimwi mungaenderera mberi makagondeka, motama kuruza vetero.