1-2. Muporofita Agayo wakananga kuti kuzungunyika kwapi kwaizoitika mu njiku jedu jino?

“PA MUSESWA mushoma, rojha no predhiyo jokare jakatanga kuphwanyika.” “Vandhu vese vakatanga kukaya-kaya . . . Vandhu vazinji vakananga kuti kuzungunyika uku kwakapeja museswa muviri. Asi kwandiri zvaiita inga ngo zvo kwenda no kwenda.” Aya i masoko manganani akanangwa ngo vandhu vakapona pa kuzungunyika kwakaitika ku nyika yo Nepari mu gore ra 2015. Kudari imwimwi no makasongana no mugariro uwu unothyisa, amucaizoukanganwa.

² Asi mu njiku jedu jino tiri kusongana no kuzungunyika kwakasiyana no uku. Ikona akuripi kuitika ku ndau imwe basi, asi kuri kuitika mu nyika yese. Ikona kwakatotanga makore mazinji aperari. Muporofita Agayo wakatonanga kuti kuzungunyika uku kwaizoitika mu njiku jedu jino kamare. Iyena wakananga kudari: “Tenji wo simba rese anoti: ‘Mukati [mo] mukuvo muxoma, ndinozozungunyisa denga no nyika, bahari no mutundhu.’”—Hagayo 2:6.

3. Ngenyi tingananga kuti kuzungunyika kwakanangwari ndi Agayo kwakasiyana no kuzungunyika kunoitari nyika?

³ Kuzungunyika kwakanangwari ndi Agayo akuzivi kuezana no kuzungunyika ko nyika kunoitikari, uko kunophwanya-phwanya zviro basi. Mukusiyana, ikona kuno muviyo jaushoni. Jehovha ambhwine anotivhunja kudari: “Ndinozozungunyisa nyika jese; upfumi hwo vandhu vese hunozoza; ndinozozaja nyumba ii ngo goja rangu.” (Hagayo 2:7) Waro ciporofita ici cairevenyi kuno vandhu vaipona mu njiku ja Agayo? Cinorevenyi kwatiri nyamasi uno? Tinozovona mupinguro wo muvhunjo iji no kuvona kuti ngorapi divi redu pa basa iri rinoitari kuti nyika izungunyike.

4. Ngenyi Jehovha wakatuma Agayo kuti aende ku vandhu vake?

⁴ Jehovha wakapa muporofita Agayo basa rinosisira maningi. Vonanyi kuti zvicinyi zvakaitika iyena acito aashira basa iri. Zvinovoneka inga kuti Agayo wainga pakati po Vajudha vainga ku ushoko ku Bhabhironi, vohwirira ku Jerusarema mu gore ro 537 Kristu Acito Aviya. No papera mukuvo mushoma no vaguma kondhoyo, vashandiri ava vakagondeka va Mwari, vakatanga kuvaka themberi kana nyumba ya Jehovha. (Esdra 3:8, 10) Asi no pacito papera mukuvo wakareba, pakaitika ciro cinosuruvarisa. Vavengi vavo vakavaita kuti varembe no kuvaita kuti vaime kuvaka themberi. (Esdra 4:4; Hagayo 1:1, 2) Ngo kudaro, mu gore ra 520 Kristu Acito Aviya, Jehovha wakatuma Agayo kuti aende kobesera vashandiri vake kuti vatangezve kuvaka themberi. *—Esdra 6:14, 15.

5. Masoko a Agayo akavangisa kudini vandhu va Mwari?

⁵ Cinangwa co masoko a Agayo cainga co kuvangisa rutendo hwo Vajudha kuna Jehovha. Ngo cicunge cese, iyena wakananga kudari kuno Vajudha vaingaya vakasuruvara: “Cunganyi mwoyo, vandhu vese vo nyika, izwi ra Tenji, batanyi basa, ngokuti ndinemwi, izwi ra Tenji wo simba rese.” (Hagayo 2:4) Magama o kuti “Tenji wo simba rese” akavangisa maningi Vajudha vaya. Jehovha ano cikwata cikuru co ngirozi jino simba jinomuzwira. Ngo kudaro, Vajudha vaidikana kuthemba Jehovha kuti vakwanise kubudirira pa basa ravo.

6. Kuzungunyika kwakanangwari ndi Agayo kwaizova no muviyo wapi?

⁶ Jehovha wakafemera Agayo kuti aende kovhunja Vajudha kuti iyena waizozungunyisa majinja ese. Masoko aya akavangisa Vajudha vaingaya vaima kuvaka themberi. Iwona aivonesa kuti Jehovha waizozungunyisa nyika yese yo Persiya. Zvinovoneka inga kuti Umambo uwu wo Persiya wainga wakavanga maningi pa mukuvo wondhowo i waiumbwa ngo nyika jakasiyana-siyana. Ngowapi waizova muviyo wo kuzungunyika uku? Wokutanga, vashandiri va Mwari vaizokwanisa kupejisa kuvaka themberi. Tevere, vandhu avacaengepi Vajudha vaizobatanavo no Vajudha pa kunamata Jehovha mu themberi yaingaya yavakiswazve. Hina masoko a Agayo akavangisa maningi vashandiri va Mwari.—Zakaria 8:9.

7. Nyamasi uno, i basa rapi riri kuita kuti nyika izungunyike? Durujiranyi.

⁷ Waro ciporofita ca Agayo cinorevenyi kwatiri nyamasi uno? Nyamasi uno Jehovha ari kuitazve kuti majinja ese azungunyike. Asi pa vhaza ino itusu tinobatanijwavo. Vonanyi basi: Mu gore ro 1914, Jehovha wakaita kuti Jesu ave Mambo wo Umambo hwake. (Nduyo 2:6) Aya akava masoko akashata kuno vatungamiriri vo nyika. “Mukuvo wakagajwa wo majinja” wainga wakwana. Ngo magama amweni mukuvo wo kuti Jehovha wainga acina muimiriri wainga ecitonga, wainga wapera. (Ruka 21:24) Ngo kudaro, kutangira mu gore ro 1919, vashandiri va Jehovha vakatanga kuzivisa kuti Umambo hwa Mwari ndiwona wega basi ungapa vetero ku vandhu vese. Kucumaehwa ko “masoko akanaka o Umambo” kuri kuzungunyisa nyika, kuvhira pa mukuvo wondhowo.—Mateu 24:14.

8. Mukuzwirana na Nduyo 2:1-3, vandhu vazinji vanovona kudini masoko akanaka?

⁸ Vandhu vanomavona kudini masoko aya? Vazinji avamadakariri. (Verenganyi Nduyo 2:1-3.) Nyika aizivi kugajana. Ivona  vanoramba kutongwa ndi Mambo wakagajwa ndi Jehovha. Kwavari masoko o Umambo atinocumaera asipi “masoko akanaka.” Atee vatongi vamweni vari kurambisa basa iri ro kucumaera! Pikija vamwe vo vatongi ava vanonanga kuti vanoshandira Mwari, ivona avadi kusiya cigaro covanaco. Ngo kudaro, inga vatongi vo mu njiku ja Jesu, ivona vanokhombija kuti avadi kubesera utongi hwa Jesu ngo kuhwisa vateveri vake vakagondeka.—Mabasa o Vapostori 4:25-28.

9. Zvicinyi zvaari kuita Jehovha pikija vandhu vano mavonero akashata ngo pamusoro po masoko akanaka?

⁹ Ngowapi mupinguro wa Jehovha kuno vaya vano mavonero akashata ku masoko aya? Nduyo 2:10-12, inonanga kudari: “Bzino, majimambo, basopanyi; tenderanyi kupangihwa, vatongi vo nyika. Xandiranyi Tenji Mwari ngo kuthya, psompsanyi soka jake mecitetemera, kuti atame kunyangajwa, mufire mu gwanja ngokuti uxungu hwake hunokasika kubwaka. Vanomucena vanotizira kwaari!” Ngo kuva kwake no rudo Jehovha aciri kupa mukana vavengi ava kuti vacinje murangariro wavo, vatendere Umambo hwa Mwari. Asi nguva iyi iri kupera. Nyamasi uno, itusu tiri kupona “mu njiku jo kupejisira.” (2 Timoti 3:1; Isaia 61:2) Ngo zvokukasika kamare kuti vandhu vazive cokwadi no kutema civaringo caushoni.

10. Mavonero api akanaka anonangwa pana Hagayo 2:7-9, aizova no vandhu?

¹⁰ Vandhu vamweni vano mavonero akanaka ngo pamusoro po kuzungunyika kwakanangwari ndi Agayo. Iyena wakananga muviyo waizovepo ngo ndava yo kuzungunyika uku, paakati: ‘Upfumi . . . [kana vandhu vano mwoyo wakanaka] vanozoza’ kuti vanamate Jehovha. * (Verenganyi Hagayo 2:7-9.) Vaporofita vamweni vakadari inga ndi Isaya na Mika, vakanangavo ngo pamusoro po zviitiko zvakaezana na ici, kuti zvaizoitika “mu njiku jokupejisira.”—Isaia 2:2-4; MIKEYA 4:1, 2.

11. Hama imweni yakaitenyi payakazwa masoko akanaka pa vhaza yokutanga?

 ¹¹ Inga muezaniso, vonanyi basi zvakaitika na hama Keni vanoshanda ku cine ro pasi pese. Pakhirira makore anokwana kuita makumarongomuna kuvha pavakatanga kuzwa masoko akanaka. Asi ivona vari kuzviceukija inga zvaitika nyamasi. Ivona vakati: “Pandakazwa cokwadi co Bhaibheri pa vhaza yokutanga, ndakadakara maningi ngo kuziva kuti tiri kupona mu njiku jo kupejisira. Ndakazwisisa kudari, kuti ndive mundhu anotendehwa ndi Jehovha no kuwana upenyu ucikaperi, ndaidikana kusiya kubatana no nyika ino ndova ndakavanga ku divi ra Jehovha. Ngo kudaro, ndakaita mukumbiro ndeckumbira besero no kuita cinjo ngo kukasika. Ndakasiya kubesera nyika ino, ndopsaka kujivirihwa ngo Umambo hwa Mwari, Umambo wokuti narini auzozungunyiswi.”

12. Mu mazuva ano okupejisira themberi yo kumujimu ya Jehovha iri kuzarisa kudini no goja?

¹² Atikani-kani kuti Jehovha ari kukomborera vandhu vake. Mu njiku jedu jino, tiri kuvona vandhu vakawanda maningi vacinamata Jehovha. Mu gore ro 1914 tainga zviuru zvinganani basi. Asi wari itusu taazviuru zvisere zvinovangisira pa kunamata Mwari. Zviuru zvimweni zvakawanda zvinobatana na itusu makore ese kuti ticeukije kufa ka Kristu. Ngo kudaro, themberi yo kumujimu ya Jehovha kana kuti ndau yaakasana kuti timunamatire yakazara ngo “vandhu” vanosisira. Pacina kukana-kana izvi zvinokuja Jehovha. Asi ciro cimweni cinokuja zina ra Jehovha i cinjo jiri kuitwa ngo zviuru zvo vandhu kuti vave no undhu upsa.—Vaefeso 4:22-24.

13. Kucumaehwa ko masoko akanaka kunokwanirisa zviporofita zvapi? (Vonanyi foto yo pa kapa.)

¹³ Zvese izvi zviri kuitikari zviri kukwanirisa zviporofita zvimweni, cakadari inga cinowanika pa Isaia cipauko 60. Vhesi ya 22 yo cipauko ici inonanga kudari: “Mudoko wavo unozova ciuru; wokurembejeka wavo unozova jinja rakavanga. Inini, Tenji, mu mukuvo wabzo, ndinozoita ibzi ngo kukasika.” Ngo ndava yo kuengejeka ko vandhu vanonamata Mwari, kuri kuitika zviro zvinoshamaisa. “Vandhu” ava pavanoviya mu sangano ra Jehovha ivona vanoviya no uzivi, ticikanangi ngo pamusoro po kuda kucumaera “masoko  akanaka o Umambo.” Isaya wakadanija izvi zviri kushandiswari ngo vandhu va Jehovha inga “bzokuha” zvo majinja. (Isaia 60:5, 16) Ngo besero ro vanarume no vanakaji ava vanosisira, basa ro kucumaira riri kuitwa mu nyika jinokwana kuita 240 i kuri kubudiswazve mabhuku mu ndumi jinodarika 1000.

14. Vandhu vanodikana kutema civaringo capi wari uno?

¹⁴ Jehovha ngo kuita kuti nyika izungunyike mu njiku jino jo kupejisira, vandhu vanodikana kukheta zvavanodikana kuita. Kunanga kuti ivona vanozobesera Umambo hwa Mwari kana vanozobesera utongi hwo nyika ino? Ici icisungo cinosisira maningi cinodikana kuitwa ngo mundhu ari wese ngo kukasika. Izvokadi kuti itusu atiripi vapanduki. Inga vashandiri va Jehovha tinozwira utongi, asi atibeseri shwiro jo poritika jo nyika ino. (Varoma 13:1-7) Tinozviziva kuti Umambo hwa Mwari ndiwona wega basi unozopeja zvineso zvo vandhu. Umambo uhu auiti divi ro nyika ino.—Johani 18:36, 37.

15. Bhuku ra Apokaripsi rinobhuya ngo pamusoro po kuejwa kwapi kukuru?

¹⁵ Bhuku ra Apokaripsi, rinonanga kuti kugondeka ko vandhu va Jehovha kwaizova pa muejo mu njiku jo kupejisira. Kuejwa uku kunozova kwakavanga maningi. Utongi unozotivhunja kuti itusu tiunamate no kuubesera, wozoteverera vaya vanoramba kuita izvi. (Apokaripsi 13:12, 15) Ivona vanozovangirija “vandhu vese; vadoko no vakuru, vakapfuma no varombo, varanda no vaciripi varanda kuti vadihwe cidhindho pa mukono muho kana pa huma.” (Apokaripsi 13:16) Mu nguva jo kare varanda vaidihwa cidhindho co kwenda no kwenda caivonesa kuti ivona vari kushandira ani. Mukufananavo, mu njiku jedu jino utongi unozovetera kuti vese vave no cidhindho kana kuti ciro cinotatija kuti ivona vari kubesera ani. Murangariro no zviito zvo vandhu ndizvona zvinozovonesa kuti ivona vari kubesera utongi hwo nyika.

16. Ngenyi ngo zvo kukasika kuvangisa kugondeka kwedu kuna Jehovha wari uno?

¹⁶ Waro itusu keni? Tinozotendera kuashira cidhindho ici? Tinozobesera utongi hwo nyika? Wiya anoramba kuita izvi anozosongana no zvineso zvizinji. Bhuku ra Apokaripsi rinonanga kuti: Apana “mundhu anotenga no kutengesa, kuciripi wiya ano cidhindho.” (Apokaripsi 13:17) Asi vashandiri va Jehovha vanozviziva kuti zvicinyi zvinozoita Jehovha kuno vaya vano cidhindho cakatahwa pana Apokaripsi 14:9, 10. Kusiyapo kuva no cidhindho ici ivona vanozotara mu nyara mwavo kuti “ndiri wa Tenji.” (Isaia 44:5) Wari inguva yo kujipopora pacedu kuti tivone dangani takagondeka kuna Jehovha kana kuti haiwa. Kudari takagondeka, Jehovha anozodakara ngo kunanga kuti itusu tiri ku divi rake.

17. Zvicinyi zvatinodikana kuceukija ngo pamusoro po kunsegerera ka Jehovha?

¹⁷ Jehovha ari kusengerera maningi mu njiku jedu jino jo kupejisira. Iyena aadi kuti mundhu ari wese afe. (2 Pedhru 3:9) Iyena aciri kupa vandhu vese nguva kuti vakhauye no kutema civaringo caushoni. Asi kusengerera uku ka Jehovha asipi ko kwenda no kwenda. Wiya ari kuramba mukana uwu uri kupari Jehovha, anozova no muviyo jakashata inga jakava na Faro mu njiku ja Mosi. Jehovha wakati kuna Faro: “Bzakadi inini nondainga ndakatambaraja nyara yangu kuti ndikurove, iwewe no vandhu vako, ngo ndhenda, maizodeno makangarangara mu nyika. Ndibzo ndakakungwarira: kuti zina rangu ritokoteswe mu  nyika yese.” (Exodo 9:15, 16) Vandhu vese vanozoziva kuti Jehovha ndiyena ega basi Mwari wo cokwadi. (Ezekieli 38:23) Zvinozoitikisa kudini izvi?

18. (a) Hagayo 2:6, 20-22, inonanga ngo kuzunginyika kwapi kumweni? (b) Tinozvizivisa kudini kuti magama a Agayo anozokwanirisika kumbejiyo?

¹⁸ No papera mazana o makore Agayo naafa, mupostori Pauro wakafemehwa kuti anange magama anowanika pana Hagayo 2:6, 20-22, aizokwanirisika kumbejiyo. (Verenganyi.) Pauro wakati: “Asi wari iyena wakagondesa kuti: ‘Ndinozozungunyisazve nyika no kudenga.’ Gama ro kuti ‘ndinozozungunyisazve’ rinokhombija kuvhisa zviro zvinozozungunyiswa, zviro zvakaithwa ngo mundhu, kuti zviro zvicizivi kuzungunyiswa zvigare zviripo.” (Vahebheru 12:26, 27) Asi kuzungunyika uku kwakasiyana no kunonangwa pana Hagayo 2:7, kuzungunyika uku kunoreva kuparajwa ko kwenda no kwenda kuno vaya vakadari inga ndi Faro, vanoramba kutendera kuti Jehovha ndiyena ano citendehwa co kutonga.

19. Icinyi cicikazozungunyiswi, tinozvizivisa kudini?

¹⁹ Icinyi cicikazozungunyiswi no kuparajwa? Pauro wakaenderera mberi eciti: “Zvecivoneka kuti tinozoashira umambo ucikazozungunyiswi, ngatienderere mberi teciashira unyasha hucikaezaniswi, kuti ngo unyasha hwondhohwo tiitire Mwari basa rakacena munjira inofanera, ngo kuthya no kumureremeja.” (Vahebheru 12:28) Hina, pasure po kuzungunyiswa uku ko kupejisira, Umambo hwa Mwari ndihwona hwega basi ucikazoparajwi. Iwona unozoenderera mberi wakavanga mbhera narini.—Nduyo 110:5, 6; Danieli 2:44.

20. Vandhu vanodikana kutema civaringo capi, tingavabeseresa kudini?

²⁰ Nguva yasara doko maningi! Vandhu vanodikana kusana zvavanodikana kuita, dangani kwenderera mberi vecibesera mufambiro wakashata unoitwa ngo nyika ino kana kupona mukuzwirana no kuda ka Jehovha. Ciro cokutanga canangwari cinoendesa ku rufu. Cocipiri cinoendesa ku upenyu ucikaperi. (Vahebheru 12:25) Ngo kuita basa ro kucumaera itusu tingakwanisa kubesera vandhu kuti vateme civaringo ici cinosisira. Ngatiite zvese zvatinokwanisa kuti tibesere vandhu ava kuti vabesere Umambo hwa Mwari. Patinonga teciita izvi ngatirangarire magama akananga Mambo wedu Jesu, paakati: “Masoko akanaka o Umambo aya, anozocumaehwa pasi pese, kuti vandhu vese vamazwe, perepo kunozoviya kupejwa ko zvese.”—Mateu 24:14.