1. Mundhu anothembeka anoitenyi?

 MUNDHU anothembeka anovangisira kuti akwanirise zvaanonanga no kubhuya cokwadi. (Nduyo 15:4) Vandhu vanozviziva kuti vangamuthemba. Itusu tinoda kuti hama no hambzaji jedu jitithembe. Zvicinyi zvingatibesera kuti ivona vatithembe?

2. Tingakhombijisa kudini kuti tiri vandhu vanothembeka?

² Atidikani kuvangirija vamweni kuti vatithembe. Tingakhombija kuti tiri vandhu vanothembeka ngo zviro zvatinoita. Vandhu vamweni vanonanga kuti kuthembeka kwakadari inga mare. Inonesa maningi kuiwana asi zvakareruka kuiruza. Jehovha wakaita kuti itusu timuthembe. Iyena narini aazotipi mathangwe kuti tiruze kuthemba kwatinomuita. Ngokuti “basa rake rese ndha kadi.” (Nduyo 33:4) Iyena anovetera kuti itusu titevejere muezaniso wake. (Vaefeso 5:1) Wari ngatende tivone muezaniso munganani jo vashandiri va Jehovha vakatevejera muezaniso wa Baba wavo vo kudenga, vokhombija pacavo kuti ivona ndi vandhu vanothembeka. Tinozovonazve mugariro mushanu jinozotibesera kuti tive vandhu vanothembeka.

3-4. Muporofeti Dhanyeri wakakhombijisa kudini kuti wainga mundhu anothembeka? Tinodikana kujiita muvhunjo japi?

³ Muporofeti Dhanyeri wakagaja muezaniso waushoni wo kuva mundhu anothembeka. Pikija wainga wakatohwa kuti aende kuuranda ngo Vabhabhironi, ngo kukasika mugariro jake jakaita kuti vandhu vamuthembe. Vandhu vakanyaya kumuthemba maningi, paakabesehwa ndi Jehovha kuti adurujire hope ja Mambo wo Bhabhironi, Nabhukodhonozori. Pa vhaza  imweni, Dhanyeri wakavhunja mambo kuti Jehovha wainga acizivi kudakara ndiyena pikija hazvo kuti mambo uwu aacaidepi kuzwa masoko akadari. Dhanyeri waida cicunge kuti abhuye masoko aya, ngokuti Nabhukodhonozori wainga no hasha maningi. (Danieli 2:12; 4:20-22, 25) Makore mazinji akazotevera, Dhanyeri wakakhombijazve kuva mundhu anothembeka paakasanangura revo yo magama ainga akatahwa pa biravira ro nyumba ya mambo wo Bhabhironi. (Danieli 5:5, 25-29) Pa kufamba ko nguva, Dhariyo wo ku Medho Persiya no nduna jake, vakavonavo kuti Dhanyeri wainga “no mwiha wakanakisisa.” Ivona vakazwisisa kuti Dhanyeri “wainga mugondeki, akucaivonekepi ndava nokuti bzakaxata kwaari.” (Danieli 6:4, 5) Pikija majimambo ainga acikanamati Jehovha, akatotendavo kuti munamati uwu wa Jehovha waithembeka.

⁴ Tecirangarira ngo muezaniso wa Dhanyeri, tingajivhunjisa kudari: ‘Ngowapi mugariro wangu pakati po vandhu vacikaripi Zvapupu zva Jehovha? Kureva kuti ndiri mundhu anozivika kuti anokwanirisa mabasa ake no mundhu anothembeka?’ Zvinosisira maningi kuwana mupinguro wo muvhunjo iji. Ngokuti patinova vandhu vanothembeka, tinokuja Jehovha.

5. Zvicinyi zvakabesera Hananiya kuti ave mundhu anothembeka?

⁵ Mu gore ra 455 Kristu Acito Aviya, Govhernadhori Neemiya paakapera kuvakisa mupfimbiji jo Jerusarema, wakapsaka mundhu kuti angwarire dhorobha. Neemiya wakasana  Hananiya kuti ave mutungamiriri. Bhaibheri rinonanga kuti Hananiya wainga “mugondeki no [mundhu] waithya Mwari, kupinda vazinji vamweni.” (Neemia 7:2) Zvecivoneka kuti Hananiya waida Jehovha no kuthya kumunyangajisa, waishanda ngo simba kuti akwanirise basa rese raaigajwa. Mugariro iji jinozotibeseravo kuti tive vandhu vanothembeka mu basa ratinoitira Jehovha.

6. Tikiko wakakhombijisa kudini kuti wainga shamwari inothembeka yo mupostori Pauro?

⁶ Vonanyi muezaniso wa Tikiko, shamwari yaithembeka yo mupostori Pauro. Pauro paainga akafungihwa pa muzi pake, iyena waithemba Tikiko, wonanga kuti iyena wainga “mushandiri wakagondeka.” (Vaefeso 6:21, 22) Pauro aazivi kumuthemba basi ngokuti waienda kosiya karata kuna Vaefeso no ku Vakorose. Asi ngokuti iyena waizovavangisa no kuvatondhoja. Muezaniso wa Tikiko unoticeukija basa rinoitwa ngo hama jinotungamirira nyamasi uno.—Vakorose 4:7-9.

7. Mungajijenyi ngo pamusoro po kuva mundhu anothembeka kuvhira ku vakuru no vabeseri vo ungano yenyu?

⁷ Nyamasi uno, tinobesereka maningi ngo kuthembeka ko vakuru no vabeseri vo ungano. Kudari inga ndi Dhanyeri, Hananiya na Tikiko, ivona vanobata ngo nyara mbiri mabasa avo. Inga muezaniso, patinoenda ku musongano wo pakati po sumana, tinoziva kuti mativi ese apera kugajwa vandhu kuti vamaite. Vakuru vanodakara maningi pavanovona vaya vakagajwa mativi vakanasa kunasirira no kumaita ushoni. Inga muezaniso, itusu atithyi kukoka vajiji vedu kuti vaviye pa musongano wo kumbhiri ko sumana, tecirangarira kuti hama yagajwaro kuti iite hurukuro yakanganwa. Cimwenizve, itusu tinothemba kuti mabhuku atinoda kuti tiende kocumaera nawo anowanika. Hama iji jakagondeka jinotitaja ushoni. Ngo iyo ndava tinobonga maningi Jehovha ngo kuva no hama iji. Tingatatijisa kudini kuti tiri vandhu vanothembeka?

8. Tingava kudini vandhu vakaezanana patinokhombija kuda kwatinoita vamweni? (Mazwi Akangwara 11:13)

⁸ Itusu tinoda hama no hambzaji jedu, tinoda kugara ushoni kwavo. Asi atidikani kunghwinira mu shwiro javo. Makristu amweni o muzana rokutanga ro makore, vainga no “magumbu no kunghwinira mu shwiro jo vamweni, vecibhuya zviro zvovacaidikana kubhuya.” (1 Timoti 5:13) Kunasa kunanga, itusu atidi kuita inga ndivona. Ngatiti mundhu ari wese wativhunja masoko ngo pamusoro po upenyu hwake, wotikumbira kuti titame kumavhunja vamweni. Inga muezaniso, hambzaji ingativhunja ngo pamusoro po zvineso zvayo zvo uhomi kana zvineso zvimweni zvairi kusonganan nayo. Perapo yotikumbira kuti ativhiri kuzvivhunja vamweni. Itusu tinodikana kuita zvoyatikumbiraro. * (Verenganyi Mazwi Akangwara 11:13.) Wari ngatende tivone mugariro jimweni jinosisira maningi jingatibesera kuti titame kunanga masoko akafishika.

9. Vandhu pa mbhuri vangakhombijisa kudini kuti ndi vandhu vanothembeka?

⁹ Pa mbhuri. Umwe nga umwe anodikana kuita zvese zvaanokwanisa kuti shwiro jo pa mbhuri jitame kuzivika ngo vamweni. Inga muezaniso, mukaji wo Cikristu angava no cirovejeso cokuti mwamuna wake anocivona kuti cinosekesa. Kureva kuti waizovhunjavo vamweni, kuveni iyena anozviziva kuti mukaji  wake waizopseruka? Kunasa kunanga haiwa. Iyena anomuda, ngo kudaro, aacaizoita ciri cese kuti anyangajise mukaji wake. (Vaefeso 5:33) Majaha no vasikane vanodavo kureremejwa padoko. Zvinosisira kuti vabari vaceukije izvi. Ivona avacaizopseruja vana vavo ngo kuvhunja vamweni zvavanoposa. (Vakorose 3:21) Vana vanodikana kujijira kuviga masoko, kuti vatame kuvhunja vamweni zviro zvaizoita kuti ari wese pa mbhuri pavo, apseruke. (Deuteronòmio 5:16) Umwe na umwe akaita divi rake wotama kuvhisa masoko acikadikani kuzivika ngo vamweni, zvinozoita kuti mbhuri ive yakabatana kamare.

10. Zvicinyi zvinobatanijwa pa kuva shamwari yokadi? (Mazwi Akangwara 17:17)

¹⁰ No shamwari jedu. Mu upenyu hwedu pano nguva yokuti tinoda kuvhunja shamwari yedu manera atiri kujizwa. Asi kuita izvi nguva jimweni zvinganesa. Azvizivi kureruka kuvhunja vamweni manera atiri kujizwa. Cimwenizve, tinozosuruvara maningi patinozoziva kuti shamwari yedu iya yavhunja vamweni zvotakaivhunjaya. Ngo divi rimweni, tinodakara maningi ngo kuvhunja shamwari mazwiro edu no kuzivazve kuti ijona ajizovhunji vamweni. Shamwari yakadari ndi “xamwari” yokadi.—Verenganyi Mazwi Akangwara 17:17.

11. (a) Vakuru no vakaji vavo vanokhombijisa kudini kuti ndi vandhu vanothembeka? (b) Ngozvapi zvatinojija ngo mukuru watiri kuvonari pa foto? (Vonanyi foto.)

¹¹ Mu ungano. Vakuru vacikavhunji vamweni shwiro jakafishika, vakadari inga “citiziro co njiku yo mbhepo, no muthaviro wo dutu” ku hama javo. (Isaia 32:2) Itusu tinoziva kuti tingabhuya no vakuru ngo pamusoro po ciri cese haco, tecithemba kuti ivona avazovhunji ari wese zvotavavhunjaro. Atidikanivo kuvavangirija kuti vanange zviro zvakafishika. Mukuengejera, tinoreremejavo vakaji vo vakuru ngokuti ivona avaeji kuvangirija majimwamuna avo kuti vavavhunje masoko akafishika. Zvokadi kamare, imakomborero ku mukaji wo mukuru kutama kuvhunjwa masoko akafishika ngo pamusoro po hama no  hambzaji javo. Mukaji umweni wo mukuru, wakananga kudari: “Ndinobonga maningi ngokuti mwamunangu avandivhunji masoko akafishika ngo pamusoro po vaya vavanoenda kohavisa kana vaya vanoda kubesehwa ku divi ro umwari, nee avatondivhunji mazina avo. Ndinobongazve ngokuti mwamunangu vanoviga shwiro jakafishika. Ngo kudaro, andigari ndecineseka ngo zviro zvokuti apana candingaita kuti ndizvicinje. Ngo iyo ndava, ndinokwanisa kubhuya no hama jese nondakasujunuka. Cimwenizve, ndingathembavo kuti kudari ndikavhunja mwamunangu cineso ciri cese candiri kusongana naco, ivona avazovhunji ari wese.” Zvokadi kamare, tese tinoda kuzivika inga vandhu vanothembeka. Mugariro japi jinozotibesera kuti tikwanirise izvi? Ngatende tivone mugariro mushanu.

12. Ngenyi tingananga kuti rudo unobesera kuti vandhu vave vanothembeka? Ipanyi muezaniso.

¹² Rudo unotibesera kuti tive vandhu vanothembeka. Jesu wakananga kuti mupango muviri mukuru i kuda Jehovha no kuda mudoni wedu. (Mateu 22:37-39) Rudo hwedu kuna Jehovha unotiita kuti titevejere muezaniso wake wakaperera wo kuva mundhu anothembeka. Inga muezaniso, rudo hwedu kuno hama no hambzaji unobesera kuti titame kundhandhanisa masoko avanotivhunja kuti titame kuvhunja vamweni. Narini atidikani kunanga ciri cese cinovaita kuti vasuruvare no kupseruka.—Johani 15:12.

13. Mu njira yapi kujidodokesa kunotibesera kuti tive vandhu vanothembeka?

¹³ Kujidodokesa kunozotibesera kuti tive vandhu vanothembeka. Mukristu anozvidodokesa aaeji kuva wokutanga kuvhunja vamweni ngo pamusoro po zviri zvese zvinonga zvaitika. (Vafiripi 2:3) Iyena aaeji kuvonesa vamweni kuti ano masoko akafishika aacikadikani kunanga. Kujidodokesa kunozotibesera kuti titame kunanga mavonero edu pa shwiro icikanasi kujekeswa ngo Bhaibheri kana ngo mabhuku akacijikira mu Bhaibheri.

14. Kuzwisisa kunotibesera kudini kuti tive vandhu vanothembeka?

¹⁴ Kuzwisisa kunozobesera Mukristu kuti azive “mukuvo wo kunyarara, no mukuvo wo kuvereketa.” (Mucumaeri 3:7) Vandhu vamweni vanonanga kuti “magama akadari inga sirivha, asi kunyarara kwakadari inga goridhe.” Ngo magama amweni tingananga kuti pano mukuvo wo kuti zviri nane kunyarara kusiyapo kuvereketa. Izvo ndizvona zvinoita kuti Mazwi Akangwara 11:12 inange kudari: “Mundhu ano uzivi [kana kuzwisisa] anonyarara.” Vonanyi muezaniso uwu basi. Hama imweni ino makore akawanda yecishanda inga mukuru, yakakumbihwa kuti iende kobesera ungano jimweni jiri kusongana no zvineso. Vonanyi basi zvakananga mukuru umweni ngo pamusoro po hama iyi, “ivona vanongwarira maningi kuti vatame kunanga masoko akafishika o ungano jimweni.” Kuzwisisa kunoita hama iyi, kwakaita kuti iyona ireremejwe ngo vakuru vamweni vo mu ungano yavo. Ivona vanoziva kuti hameyo aizonangi masoko akafishika o ungano yavo.

15. Ipanyi muezaniso unovonesa kuti kuva takagondeka kunoita kuti vamweni vatithembe.

¹⁵ Kugondeka ndi mugariro umweni unosisira kudari tecida kuva vandhu vanothembeka. Itusu tinothemba mundhu wakagondeka ngokuti tinoziva kuti mukuvo wese anozobhuya cokwadi. (Vaefeso 4:25; Vahebheru 13:18) Inga muezaniso, ngatiti imwimwi munoda kuitisa nane manera enyu okujijisa. Zvaizova zvaushoni kukumbira ari wese kuti apurukire divi renyu, kuti azomupe mazano anomubesera  kuti muitise nane. Ndiyani wamaizothemba kuti waizomupa mazano kuti amubesere? Maizopsaka mundhu anomuvhunjanyi zvakanaka basi kana maizopsaka mundhu anobhuya cokwadi ngo njira yo rudo? Mupinguro wakajeka. Bhaibheri rinoti: “Kuvereketehwa pambhene kuri nane kupinda kudiwa ngo cifise. Kutakwa ngo xamwari akunyepi.” (Mazwi Akangwara 27:5, 6) Pikija zvinganesa kuzwisisa pakutanga, asi mazano atinopuwa ngo shamwari yakagondeka anozotibesera mu upenyu hwedu hwese.

16. Mukuzwirana na Mazwi Akangwara 10:19, ngenyi tinodikana kuva vandhu vanojibata?

¹⁶ Zvinosisira maningi kuva vandhu vanojibata kudari tecida kuti vamweni vatithembe. Mugariro uwu unotibesera kuti titame kubhuya masoko akafishika, patinonga teciejwa kuti tiite zvondhozvo. (Verenganyi Mazwi Akangwara 10:19.) Patinonga tecishandisa interneti zvinganesa maningi kuva vandhu vanojibata. Kudari tikatama kungwarira tingaguma pa kunanga masoko akafishika, ticikatodi kuita zvakadaro. Patinopera kudira masoko mu interneti, atizozivi manera aanoshandiswa no ngozi jaanozoviisa. Kujibata kunozotibeseravo kuti titame kunanga ciri cese vavengi vedu pavanotikumbira kuti tinange zviri zvese zvaizodira hama no hambzaji jedu pa ngozi. Izvi zvingaitika mu nyika jo kuti basa redu riri kurambijwa no paya pokuti hama jedu jinonga jeciitwa muvhunjo ngo vatongi. Pa mugariro wakadari, tingashandisa ndhungamiriro inowanika pana Nduyo 39:2, inoti: ‘Ndinozofunga muromo wangu ngo monga.’ Itusu nguva jese tinodikana kuva vandhu vanothembeka, azvinenyi dangani ndi pa mbhuri, no shamwari jedu, no hama no hambzaji jedu kana no vamweni. Kuti tive vandhu vanothembeka tinodikana kujibata.

17. Tingaitisa kudini kuti tive vandhu vanothemba hama no hambzaji jedu?

¹⁷ Tinobonga maningi Jehovha ngokuti tinoita divi ro mbhuri yake yakazara ngo vandhu vano rudo no vanothembeka. Tese hedu tinodikana kukhombija kuti tiri vandhu vanothembeka. Kudari tese tikashanda ngo simba kuti tisakurire mugariro jakadari inga rudo, kujidodokesa, kuzwisisa, kugondeka no kujibata, tinozokwanisa kuthemba hama no hambzaji jedu. Kudari tinoda kuzivika inga vandhu vanothembeka, tinodikana kuvangisira kuti tienderere mberi tecikhombija mugariro uwu. Tikadaro, tinozotevejera Jehovha Mwari no kukhombija mukuvo wese kuti tiri mundhu anothembeka.