MUSORO WO KUJIJA WO 40
‘Kuita Kuti Vazinji Vave Vakarurama’
‘Vaya vari kuita kuti vazinji vave vakarurama, vanozomunikira inga ndhondo mbhera narini.’—DANIELI 12:3, Sandujo yo Nyika Imbza.
NDUMBO 151 Anozodanija
ZVATICAJIJA *
1. Ngozvapi zviitiko zvinodakajisa zvinozoitika pa Kutonga ko Ciuru co Makore kwa Kristu?
NJIKU inotanga rumuko pa Kutonga ko Ciuru co Makore kwa Kristu, inozova njiku inodakajisa maningi. Vese vaya vakafihwa ngo vadiwa vavo, vanozovavonazve. Izvi ndizvona zvinodavo Jehovha. (Jobe 14:15) Tinozodakara maningi patinozovona vaya vatinoda pavanonga vapera kumuswa. Inga zvotakajija pa musoro wakapera, “vakarurama” avo vano mazina avo akatahwa mu bhuku ro upenyu, “vanozomuswa kuti vaende ku upenyu.” (Mabasa o Vapostori 24:15; Johani 5:29) Kangaije vazinji vatinoda vakafaya vanozomuswa pakupera mukuvo mushomani Armagedhoni noyapera. * Kusiyapo zvondhozvo, cikwata cimweni co vanozomuswa, ndi vaya “vacizivi kururama.” Ivona vakafa vacikazivi kuwana mukana wo kuziva Jehovha kana kumushandira novakagondeka. Vandhu ava “vanozomuswa kuti vaende kootongwa.”
2-3. (a) Inga zvinokhombijwa pana Isaia 11:9, 10, ngorapi basa guru ro kujijisa rinozoitwa pasi pano? (b) Ngozvapi zvatinozovona pa musoro uwu?
2 Vandhu vese ava vanomuswari, vanozoda kujijiswa. (Isaia 26:9; 61:11) Ngo kudaro, basa guru ro kujijisa ricikazivi kumboitwazve pasi pano, rinozodikana kuitwa. (Verenganyi Isaia 11:9, 10.) Ngenyi? Ngokuti vacikazivi kururama vanozomuswari vanozodikana kujija ngo pamusoro pa Jesu Kristu, Umambo hwa Mwari, muripo wo kujipira wa Jesu, kusisira ko zina ra Jehovha pomwe no ukuru-kuru hwake. Vaya vakarurama vanozodikanavo kuvhunjwa zvakajijisa Jehovha vandhu vake padoko ngo padoko ngo pamusoro po cidisiso cake no nyika ino. Vamwe vo vashandiri ava vakagondeka va Jehovha vakafa, Bhaibheri ricito rapera kutahwa. Ngo kudaro, vese vacizivi kururama no vakarurama vanozova no zviro zvakawanda kamare kuti vajije.
3 Pa musoro uwu tinozodavira muvhunjo iji: Basa iri ro kujijisa vandhu rinozoitiswa kudini? Basa iri rinozwirana papi no kutahwa ko mazina o vandhu mu bhuku ro upenyu? Mupinguro wo muvhunjo iji unosisira maningi kwatiri nyamasi uno. Inga zvaticazovona, zviporofita zvinganani zvinowanika mu bhuku ra Dhanyeri na Apokaripsi, zvinozotibesera kuti tinase kuzwisisa zvinozoitika vakafa pavanopera kumuswa. Pakutanga, ngatende tivone zviitiko zvinodakajisa zvakanangwa mu ciporofita ca Danieli 12:1, 2.
“VAYA VANOVATA MUBUKUTA . . . VANOZOMUKA”
4-5. Bhuku ra Danieli 12:1 rinonangenyi ngo pamusoro po mukuvo wokupejisira?
4 Verenganyi Danieli 12:1. Bhuku ra Dhanyeri rinovonesa kuti zviro izvi zvinozoitikisa kudini mu mukuvo wo kupejisira. Inga muezaniso, Danieli 12:1 inonanga kuti Mikaeri, uwo ari Jesu Kristu, “anorinda panyezuru po vandhu” va Mwari. Divi iri ro ciporofita rakatanga kukwanirisika mu gore ro 1914 Jesu paakagajwa inga Mambo wo Umambo hwa Mwari.
5 Asi Dhanyeri wakavhunjwazve kuti Jesu ‘waizomuka’ pa “mukuvo wo bonezi guru, ricizivi kumbovoneka kubvira kuamba ko majinja mbhera mukuvowo.” “Mukuvo [uwu] wo bonezi” ndi “dambujiko guru” rinonangwa pana Mateu 24:21. Jesu anozomuka kana kuti anozoita ciri cese kuti ajivirire vandhu va Mwari pakupera ko mukuvo uwu wo bonezi kana kuti pa Armagedhoni. Bhuku ra Apokaripsi rinonangira vandhu ava inga “vandhu vakawanda maningi vanovha pa dambujiko guru.”—Apokaripsi 7:9, 14.
6. Tinozvizivisa kudini kuti rumuko unonangwa pana Daniel 12:2 unozoitikadi kamare? (Vonanyi mu Murindiri uwu “Muvhunjo Jo Vaverengi” unobhuya ngo vaya vanozomuswa kuti vapone pasi pano.)
6 Verenganyi Danieli 12:2. Zvicinyi zvinozoitika vandhu vakawanda maningi vacikaverengeki pavanopera kupokonyoka pa mukuvo uwu wo bonezi? Ciporofita ici aciripi kunangira rumuko wo kuezanisira zvakadari inga kubahwazve ngapapsa ko vashandiri va Mwari waizoitika mu njiku jino jokupejisira inga zvataizwisisa kare. * Kunasa kunanga, icona ciri kunanga ngo pamusoro po rumuko unozoitika mu nyika imbza. Ngenyi taguma pambhejiso iyi? Gama rokuti “bukuta” rakashandiswavo pana Jobe 17:16, recinangira ciro cimweco “iba.” Izvi zvinovonesa kuti Danieli 12:2, iri kunangira rumuko unozoitika pakupera mukuvo mushomani Armagedhoni noyapera kuitika.
7. (a) Ngo njira yapi vamweni vanozomuswa kuti “vararame [no] kucikaperi”? (b) Kuitisa kudini “rumuko [uwu] hwakanaka”?
7 Danieli 12:2 inoda kunangenyi painonanga kuti vamweni vanozomuswa kuti “vararame [no] kucikaperi”? Izvi zvinoreva kuti, vaya vanozomuswa voguma pa kuziva kana voenderera mberi veciziva no kuzwira Jehovha na Jesu pa ciuru co makore vanozoashira upenyu ucikaperi. (Johani 17:3) Uwu unozova “rumuko hwakanaka” kupinda wo vaya vakamuswaya mu nguva jokare. (Vahebheru 11:35) Ngenyi? Ngokuti vandhu vakamuswari, vakafazve pa kufamba ko nguva.
8. Kuitisa kudini vamweni vanozomuswa “kuti vapseruke no kutetemera kucikaperi”?
8 Asi asipi vese vanozomuswa vanozotendera kujijiswa ndi Jehovha. Ciporofita ca Dhanyeri cinonanga kuti vamweni vanozomuswa “kuti vapseruke no kutetemera kucikaperi.” Zvecivoneka kuti ivona vanonga vecikhombija murangariro wo kupandukira, mazina avo aazotahwi mu bhuku ro upenyu nee avazoashiri upenyu ucikaperi. Kusiyapo zvondhozvo, ivona ‘vanozotetemera kucikaperi’ kana kuparajwa. Ngo kudaro, vhesi ya Danieli 12:2 iri kubhuya ngo zvinozoitika pakupejisira kuno vese vaya vanonga vapera kumuswa, vakacijikira pazvavanozoita pasure po kumuswa kwavo. * (Apokaripsi 20:12) Vamweni vanozoashira upenyu ucikaperi, kuveni vamweni haiwa.
‘KUITA KUTI VAZINJI VAVE VAKARURAMA’
9-10. Ngocapi cimweni cinozoitikazve pakupera ko dambujiko guru? Mbhaani ‘vanozomunikira inga kumunikira ko denga’?
9 Verenganyi Danieli 12:3, Sandujo yo Nyika Imbza. Ngozvapi zvimweni zvinozoitika pasure po “mukuvo [uwu] wo bonezi”? Kusiyapo zvotaperari kuvona pana Danieli 12:2, vhesi yo 3 iri kunangira zviro zvinozoitika pakupera ko dambujiko guru.
10 Mbhaani ‘vanozomunikira inga kumunikira ko denga’? Tinowana mupinguro pa magama a Jesu anowanika pana Mateu 13:43, paakati: “Pa mukuvo wondhowo, varurami vanozomonikira inga zuva mu Umambo hwa Baba wavo.” Ngo magama aya, tinovona kuti Jesu wainga ecibhuya ngo pamusoro po “vana vo Umambo,” kana kuti Makristu okuzojwa, aanozoshanda naye mu Umambo hwo kudenga. (Mateu 13:38) Ngo kudaro, Danieli 12:3 kangaije iri kunangira vokuzojwa no basa ravanozoita pa Kutonga ko Ciuru co Makore.
Vo 144.000 vacazobatana na Jesu Kristu kuti vatungamirire basa gururo kujijisa rinozoitwa pasi pano mukati mo ciuru co makore (Vonanyi ndima 11)
11-12. Ngorapi basa rinozoitwa ngo vo 144.000 mukati mo ciuru co makore?
11 Vokuzojwa vanozoitisa kudini kuti ‘vazinji vave vakarurama’? Vokuzojwa vanozobesana na Jesu Kristu kuti vatungamirire basa guru ro kujijisa rinozoitwa pasi pano mukati mo ciuru co makore. Vo 144.000 avazoshandi basi inga majimambo, asi vanozoshandazve inga vapiri. (Apokaripsi 1:6; 5:10; 20:6) Ngo kudaro, vanozobesera pa ‘kurapa majinja’ no kuita kuti vandhu vavezve vakakwana. (Apokaripsi 22:1, 2; Ezekieli 47:12) Vokuzojwa vanozodakara maningi pa kuita basa iri.
12 Ndiyani anoita divi ro ‘vazinji’ vanozobesehwari kuti vave vakarurama? Ndi vandhu vanozomuswa, vaya vanozopona pa Armagedhoni pamwepo no vana vanozobahwa mu nyika imbza. Pakupera ko ciuru co makore, vese vanonga vari pasi pano vanozova vakakwana. Waro mazina o vandhu ava anozotahwavo rini ngo kaneta mu bhuku ro upenyu?
MUEJO WOKUPEJISIRA
13-14. Vandhu vese vakakwana vanonga vari pasi pano, vanodikana kuvonesenyi vacito vaashira upenyu ucikaperi?
13 Tinodikana kuceukija kuti kuva takakwana azvirevi kuti tatowana upenyu ucikaperi. Amborangariranyi basi ndi Adhamu na Evha. Ivona vainga vakakwana, asi vaidikana kukhombija kuti vaizwira Jehovha Mwari vacito vaashira upenyu ucikaperi. Zvinosuruvarisa ngo zvokuti, ivona avazivi kumuzwira.—Varoma 5:12.
14 Ngowapi unozova mugariro wo vandhu pavanonga vecipona pasi pano pakupera ko ciuru co makore? Vese vanonga vakakwana. Kureva kuti vese vanongaro vakakwana vanozobesera utongi hwa Jehovha kwenda no kwenda? Kureva kuti ivona vanozoita inga ndi Adhamu na Evha, pikija vainga vakakwana vakashaisha? Muvhunjo iji jinodikana kudavihwa, asi jingadavihwiswa kudini?
15-16. (a) Vandhu vese vanozova rini no mukana wo kukhombija kugondeka kwavo kuna Jehvoha? (b) Ngowapi unozova muviyo wo muejo uwu wokupejisira?
15 Sathana anozofungihwa ko ciuru co makore. Pa mukuvo uwu, iyena aazokwanisi kucengeja ari wese. Asi pakupera ko ciuru co makore, Sathana anozosujunuhwa. Iyena anozoeja kucengeja vandhu vakakwana. Pa mukuvo uwu wo muejo, vandhu vese vakakwana vanonga vecipona pasi pano, vanozova no mukana wo kuvonesa kuti vanoreremeja zina ra Jehovha kana kuti haiwa no kuvonesazve dangani vanobesera ukuru-kuru hwake. (Apokaripsi 20:7-10) Zvinozoitwa ngo umwe na umwe pa mukuvo uwu wari, zvinozovonesa dangani zina rake rinodikana kutahwa kwenda no kwenda mu bhuku ro upenyu kana kuti haiwa.
16 Bhaibheri rinonanga kuti vamweni vanozoshaisha inga ndi Adhamu na Evha, voramba kutongwa ndi Jehovha. Vanozova vangana? Atinasi kuzviziva. Zvicinyi zvinozovaitikira? Apokaripsi 20:15 inonanga kudari: “Mundhu wese wainga acizivi kutahwa zina rake mu bhuku ro upenyu wakakhandihwa mu gandhwa ro muriro.” Hina, vandhu ava vacikazivi wari kuzwira vanozoparajwa kwenda no kwenda. Asi vandhu vazinji vakakwana vanozokwanisa kucijikira pa muejo uwu wo kupejisira. Kuvhira pondhopo, mazina avo anozotahwa kwenda no kwenda mu bhuku ro upenyu.
ZVINOZOITIKA PA “MUKUVO WOKUPEJISIRA”
17. Ngozvapi zvakavhunjwa Dhanyeri ngo ngirozi kuti zvaizoitika mu mukuvo uno? (Danieli 12:4, 8-10)
17 Zvinodakajisa maningi kurangarira zviro zvinozoitika kumbejiyo. Asi Dhanyeri wakavhunjwazve ngo ngirozi masoko anosisira maningi ngo pamusoro po “mukuvo [uwu] wokupejisira.” (Verenganyi Danieli 12:4, 8-10; 2 Timoti 3:1-5) Ngirozi yakavhunja Dhanyeri kudari: “Uzivi hwavo hunozoengejeka.” Vandhu va Mwari vaizonasa kuzwisisa masoko o uporofita anowanika mu bhuku rake. Ngirozi yakaengejera yecinanga kuti pa mukuvo uwu, ‘vakaxata vanozoita bzakaxata: apana mundhu wakaxata anozozwisa bziro ibzi.’
18. Zvicinyi zvinozoitika sambiri pano no vandhu vakashata?
18 Nyamasi uno, zviri kuvoneka inga kuti vandhu vakashata avaripi kupanicwa ngo zviito zvavo zvakashata. (Malakia 3:14, 15) Sambiri pano, Jesu anozotonga vaya vakadari inga mbuji no kudira ku divi rimweni vaya vakadari inga mavhuta. (Mateu 25:31-33) Vandhu ava vakashata, avazoponi pa dambujiko guru nee avazomuswi kuti vapone mu nyika imbza. Mazina avo aazowaniki mu “buku ro bzicerecejo” rinonangwa pana Malakia 3:16.
19. Wari i mukuvo kuti itusu tiitenyi, ngenyi? (Malakia 3:16-18)
19 Wari, i mukuvo wokutatija kuti itusu atiripi pakati po vaya vari kuita zvakashata. (Verenganyi Malakia 3:16-18.) Jehovha ari kuunganija vaya vaari kuvona inga ‘vandhu vake’ kana upfumi hwake. Pacina kukana-kana tinoda kuita divi ro vandhu ava.
Zvinozodakajisa maningi kuvona Dhanyeri, vaya vatinoda no vazinji vamweni ‘vacimuswa’ kuti vapone mu nyika imbza. (Vonanyi ndima 20)
20. Ngocapi cigondiso cokupejisira cakaita Jehovha kuna Dhanyeri? Ngenyi muno cidaka-daka co kuvona kukwanirisika ko cigondiso ici?
20 Zvokadi kamare, itusu tiri kupona mu mukuvo unodakajisa maningi. Sambiri pano kunozoitika zviro zvinoshamaisa maningi. Tinozovona kuparajwa ko vandhu vese vanoita zvakashata. Izvi pazvinopera kuitika, tinozovona kukwanirisika ko cigondiso cakaita Jehovha kuna Dhanyeri, cokuti: ‘Unozomuka kuti uaxire divi rako mu njiku yokupejisira.’ (Danieli 12:13) Munokwanisa kurangarira mudakaro wamunozova nawo, pamunovona Dhanyeri no vaya vatinoda ‘vacimuswa’ kuti vaponezve? Ngo kudaro, vangisiranyi kuti muenderere mberi makagondeka. Mukadaro, munozova no cokwadi co kuti zina renyu rinozoenderera mberi rakatahwa mu bhuku ro upenyu.
NDUMBO 80 “Ejanyi, Munozovona Unaki hwa Tenji Mwari”
^ Musoro uwu uri kuviisa zwisiso imbza ngo pamusoro po basa guru ro kujijisa rinonangwa pana Danieli 12:2, 3. Tinozovona kuti izvi zvinozoitika rini no kuvonazve kuti ndiyani anoita basa iri. Tinozovonazve kuti basa iri ro kujijisa rinozonasirira kudini vanonga vari pasi pano kuitira muejo wokupejisira pa kupera ko Kutonga ko Ciuru co Makore kwa Kristu.
^ Kangaije rumuko unozotanga ngo vaya vakafa vakagondeka mu njiku jo kupejisira, perapo vanozomuswavo vaya vakafa kare, mubarihwana ngo mubarihwana. Kudari izvi zvikaitika ngo njira iyi, zvinovonesa kamare kuti mubarihwana umwe nga umwe unozodakajihwa ngo kuashira vandhu vaya vavanoziva. Azvinenyi kuti izvi zvinozoitika kudini, Bhaibheri parinosanangura ngo vaya vanozomuswa kuti vapone kudenga, rinonanga kuti mundhu umwe nga umwe anozomuswa “pa nguva yake.” Ngo kudaro, tingagumavo pa mbhejiso yokuti rumuko unozoitika pasi pano unozoitwavo ngo njira yakarongeka.—1 Vakorinte 14:33; 15:23.
^ Kusananguhwa uku kuri kucinja zwisiso yotainga nayo inowanika mu bhuku Fungisisa Uprofita hwaDhanieri!, cipauko 17 no mu Murindiri wo 1 wa Julho wo 1987, mapheji 21-25, mu Ciputukezi.
^ Mukusiyana, magama okuti “vakarurama” no “vacizivi kururama” anowanika pana Mabasa o Vapostori 24:15 pamwepo no magama okuti “vese vakaita zviro zvakanaka” no “vaya vakaita zviro zvakashata” anowanika pana Johani 5:29 ari kunangira zviro zvakaitwa ngo vakamuswaya vacito vafa.
