MUSORO WO KUJIJA WO 39
Zina Renyu Ririmovo “mu Bhuku ro Upenyu” Here?
“Rakatahwa pambeji pake buku ro bzicerecejo, ngo ndava ya vaya vanothya Tenji.”—MALAKIA 3:16.
NDUMBO 61 Vanganyi Imwimwi Zvapupu!
ZVATICAJIJA *
Kuvhira mu njiku ja Abheri mbhera nyamasi, Jehovha aciri kutara mazina amweni “mu bhuku ro upenyu” (Vonanyi ndima 1-2)
1. Mukuzwirana na Malakia 3:16, ngorapi bhuku riri kutahwa ndi Jehovha, bhuku iri rinenyi?
KO MAKORE akawanda, Jehovha ari kutara bhuku rinosisira maningi. Bhuku iri rino mazina akawanda o vashandiri va Jehovha vakagondeka, kutangira na Abheri. * (Ruka 11:50, 51) Kuvhira pondhopo, Jehovha ari kuengejera mazina amweni mu bhuku iri. Nyamasi uno, mondhomo muno zviuru no zviuru zvo mazina. Mu Bhaibheri bhuku iri wari rinodanijwa “buku ro bzicerecejo” no “bhuku ro upenyu.” Pa musoro uwu, bhuku iri wari tinozoridanija kuti “bhuku ro upenyu.”—Verenganyi Malakia 3:16; Apokaripsi 3:5; 17:8.
2. Mazina ani anozotahwa mu bhuku ro upenyu, tingaitisa kudini kuti mazina edu atahwevo mu bhuku iri?
2 Mu bhuku iri wari rinosisira, muno mazina o vese vaya vanonamata Jehovha ngo nderemejo yese no kuthya zina rake. Ivona vanozova no mukana wokuashira upenyu ucingaperi. Itusu tingakwanisa kuva no zina redu rakatahwa mu bhuku ro upenyu, kudari tikava no ushamwari wo phedo na Jehovha, wakacijikira pa muripo wo Mwana wake Jesu Kristu. (Johani 3:16, 36) Tese hedu tinoda kuti mazina edu atahwe mu bhuku iri, azvinenyi dangani tino vetero yo kupona kudenga kana pasi pano.
3-4. (a) Kureva kuti tinozorarama no kucingaperi ngokuti mazina edu akatahwa mu bhuku ro upenyu? Sananguranyi. (b) Ngozvapi zvatinozojija pa jijo ino no inotevera?
3 Izvi zvinoreva kuti vese vano mazina akatahwa mu bhuku ro upenyu vanozova no upenyu ucingaperi? Tinowana mupinguro wo muvhunjo uwu pa magama a Jehovha aakavhunja Mosi, anowanika pana Exodo 32:33. Jehovha wakati: “Ndinozofujura mu buku rangu vese vaya vakandixaixira.” Ngo kudaro, mazina anowanika mu bhuku iri angafujuhwa. Zvakadari inga kuti Jehovha wakatara mazina aya ngo rapishi. (Apokaripsi 3:5) Tinodikana kuva no cokwadi cokuti zina redu ririmovo mu bhuku iri mbhera irona ritahwe ngo kaneta.
4 Izvi zvingaita kuti tive no muvhunjo munganani. Inga muezaniso, Bhaibheri rinotivhunjenyi ngo pamusoro po vaya vano mazina avo akatahwa mu bhuku ro upenyu no vaya vacikazivi kutahwa mu bhuku iri? Vaya vano mazina akatahwa mu bhuku iri vanozoashira rini upenyu ucingaperi? Tingati kudini kuno vaya vakafa vazicivi kumbojija ngo pamusoro pa Jehovha? Kureva kuti zvingakwanisika kuti mazina avo atahwe mu bhuku iri? Muvhunjo iji jinozodavihwa mu cijijo cino no cinotevera.
MAZINA ANI ARI MU BHUKU IRI?
5-6. (a) Mukuzwirana no Vafiripi 4:3, mazina ani anonga akatahwa mu bhuku ro upenyu? (b) Ndirini ivona vanozova no mazina avo akatahwa mu bhuku ro upenyu kwenda no kwenda?
5 Mazina ani ari mu bhuku iri ro kuezanisira? Kuti tikwanise kudavira muvhunjo uwu, tinozovona zvikwata zvishanu zvo vandhu. Pazvikwata izvi zvo vandhu, pano vamweni vano mazina avo akatatahwa mu bhuku iri ro upenyu, vamweni avato.
6 Cikwata cokutanga cinoumbwa ngo vaya vakasanwa kuti vatonge na Jesu kumatenga. Kureva kuti mazina avo atahwa mubhuku ro upenyu wari? Hina. Mukuzwirana no zvakananga mupostori Pauro ku “vashandi doni” vake ku Firipi, mazina o vokuzojwa, avo vakasanwa kuti vaende kotonga na Jesu kumatenga, apera kutahwa mubhuku ro upenyu. (Verenganyi Vafiripi 4:3.) Kuti mazina avo aenderere mberi naari mubhuku iri rokufananijira, vanodikana kuramba vakagondeka. Pasure pokuashira mupfupo wavo wo kudenga, mazina avo anozoenderera mberi akatahwa mu bhuku iri. Izvi zvicazoitika ivona vacito vafa, dambujiko guru ricito ratanga.—Apokaripsi 7:3.
7. Mukuzwirana na Apokaripsi 7:16, 17, ndirini kuti vandhu vakawanda vo mavhuta amweni vanozova no mazina avo akatahwa kwenda no kwenda mu bhuku ro upenyu?
7 Cikwata cocipiri cinoumbwa ngo vandhu vakawanda vo mavhuta amweni. Kureva kuti mazina avo apera kutahwa wari mu bhuku ro upenyu? Hina. Waro, kureva kuti mazina avo anozoenderera mberi ari mu bhuku iri pakupera kupokonyoka pa hondo yo Armagedhoni? Hina. (Apokaripsi 7:14) Jesu wakananga kuti vandhu ava vakadari wari inga mavhuta, vanozoenda “ku upenyu hucikaperi.” (Mateu 25:46) Asi vaya vanozopokonyoka pa hondo yo Armagedhoni avazoashire ngo kukasika upenyu ucikaperi. Mazina avo anozoenderera mberi akatahwa ngo rapishi inga zvaari wari. Pa Kutonga ko Ciuru co Makore, Jesu ‘anozovahavisa no kuvatungamirira kuenda ku kumwa yo upenyu.’ Vaya vanozozwira ndhungamiriro ja Jesu, vovoniwa ndi Jehovha kuva vakagondeka, mazina avo anozotahwa kwenda no kwenda mu bhuku ro upenyu.—Verenganyi Apokaripsi 7:16, 17.
8. Ngovapi vacikazovi no mazina avo akatahwa mu bhuku ro upenyu, zvicinyi zvinozovaitikira?
8 Cikwata cocitatu cinoumbwa ngo mbuji, avo vanozoparajwa pa hondo yo Armagedhoni. Mazina avo aamo mu bhuku ro upenyu. Jesu wakananga kuti ivona “vanozoenda koparajwa kucikaperi.” (Mateu 25:46) Pauro wakafemehwa kuti ativhunje kudari: “Ivona vanozopejwa mbhera narini.” (2 Vatesaronika 1:9; 2 Pedhru 2:9) Vaya vakashaishira mujimu mucena, avazoashiri upenyu ucingaperi asi vanozoparajwa nokucingaperi. Zvakajeka kamare kuti ivona avazomuswi. (Mateu 12:32; Marko 3:28, 29; Vahebheru 6:4-6) Wari ngatende tivone zvikwata zviviri zvo vandhu vanozomuswa kuti vapone pasi pano.
VAYA VANOZOMUSWA
9. Inga zvatinovona pana Mabasa o Vapostori 24:15, ngozvapi zvikwata zviviri zvo vandhu zvinozomuswa kuti zvipone pasi pano, ngowapi musiyano pa zvikwata zviviri izvi?
9 Bhaibheri rinobhuya ngo zvikwata zviviri zvo vandhu vanozomuswa kuti vapone pasi pano, “vakarurama” no “vacizivi kururama.” (Verenganyi Mabasa o Vapostori 24:15.) “Vakarurama” ndi vaya vakashandira Jehovha vakagondeka povainga vacipona. Ngo divi rimweni, “vacizivi kururama” ndi vaya vakafa vacikazivi kushandira Jehovha vakagondeka. Izvi zvinovonesa kuti mufambiro wavo aucaengepi wakarurama. Zvecivoneka kuti zvikwata zvese zvo zviviri zvinomuswa, kureva kuti mazina avo akatahwa mu bhuku ro upenyu? Kuti tidavire muvhunjo uwu, ngatibhuye ngo pamusoro po cikwata cimwe nga cimwe.
10. Ngenyi “vakarurama” vanozomuswa? Vamweni vavo vanozoita basa rapi? (Vonanyi mu Murindiri uwu “Muvhunjo Jo Vaverengi” unobhuya ngo vaya vanozomuswa kuti vapone pasi pano.)
10 Cikwata cocirongomuna cinoumbwa ngo “vakarurama.” Vacito vafa, mazina avo ainga apera kutahwa mu bhuku ro upenyu. Kureva kuti mazina avo akavhiswa mu bhuku iri povakafa? Haiwa, ngokuti ivona vaciri “kurarama” mu murangariro wa Jehovha. Jehovha “asipi Mwari wo vakafa, asi ndi Mwari wo vanopona, ngokuti kwaari, vese vanorarama.” (Ruka 20:38) Izvi zvinoreva kuti vakarurama pavanozomuswa kuti vapone pasi pano, mazina avo anonga acirimo mu bhuku ro upenyu, asi anonga acakandotahwa ngo rapishi. (Ruka 14:14) Pacina kukana-kana, vamweni vo vaya vanozomuswa vanozova no basa ro kushanda inga “nduna jo nyika yese.”—Nduyo 45:17.
11. Zvicinyi zvinodikana kuzojijwa ngo “vacizivi kururama,” kuti mazina avo atahwe mu bhuku ro upenyu?
11 Pakupejisira, ngativone cikwata cocishanu cinoumbwa ngo “vacizivi kururama.” Zvecivoneka kuti ivona avacaizwira mutemo ja Jehovha, avacaipona mu njira yakarurama vacito vafa. Ngo iyo ndava mazina avo aazivi kutahwa mu bhuku ro upenyu. Asi Jehovha anozovamusa kuti vavevo no mukana wo kuva no mazina avo akatahwa mu bhuku iri. Vandhu ava “vacizivi kururama” vanozoda maningi kubesehwa. Vacito vafa vamweni vavo vaiita zviro zvakashatisisa kamare. Ivona vanodikana kujijira kupona mukuzwirana no ndhungamiriro jakarurama ja Jehovha. Kuti izvi zvikwanisike, Umambo hwa Mwari unozotungamirira basa guru ro kujijisa ricikazivi kumboitwazve pasi pano.
12. (a) Ndiyani anozojijisa vacizivi kururama? (b) Ngozvapi zvinozoitika kuno vaya vanoramba kushandisa zvovari kujijiswa?
12 Ndiyani anozojijisa vacizivi kururama? Ndi vaya vanoita divi ro vandhu vakawanda maningi pomwe no vakarurama vanozomuswari. Kuti vacizi kururama vave no mazina avo akatahwa mu bhuku ro upenyu, vanozodikana kuva no ushamwari wo phedo na Jehovha no kujipira kwaari. Jesu pamwepo no vokuzojwa vanozonasa kusotesesa no vari kudenga kuti vavone dangani vacizivi kururama ava vari kudakarira zvavari kujijiswari kana kuti haiwa. (Apokaripsi 20:4) Vaya vanozoramba kuushandisa zvavari kujijiswari vanozouraiwa, pikija havo vano zana ro makore. (Isaia 65:20) Zvecivoneka kuti Jehovha na Jesu vanokwanisa kuvona zviri mu mwoyo, avazotenderi kuti ari wese aite zvakashata mu nyika imbza.—Isaia 11:9; 60:18; 65:25; Johani 2:25.
KUMUSWA KUITIRA UPENYU NO KUMUSWA KUITIRA KUTONGWA
13-14. (a) Kare taizwisisa kudini magama a Jesu anowanika pana Johani 5:29? (b) Ngowapi muvhunjo watinoda kudavira?
13 Jesu wakabhuyazve ngo vaya vanozomuswa kuti vapone pasi pano. Inga muezaniso, iyena wakati: “Inozoguma nguva yokuti vese vari mu makuva anoceukijwa, vanozozwa izwi rake, vobuda. Vese vakaita zviro zvakanaka vanozomuswa kuti vaende ku upenyu, asi vaya vakaita zviro zvakashata vanozomuswa kuti vaende kootongwa.” (Johani 5:28, 29) Jesu waida kunangenyi ngo magama aya?
14 Kare taizwisisa kuti magama aya a Jesu, ainangira zviro zvaizoitwa ngo vandhu vakafa pavanopera kumuswa kana kuti taizwisisa kuti vamweni vaizomuswa voita zviro zvakanaka kuveni vamweni vaizoita zviro zvakashata. Asi, vonanyi kuti Jesu aazivi kunanga kuti vaya vanovha mumakuva anoceukijwa vanozoita zviro zvakanaka kana vanozoita zviro zvakashata. Iyena wakananga kuti vakaita. Jesu wakabhuya ngo pamusoro po vaya “vakaita zviro zvakanaka” no vaya “vakaita zviro zvakashata.” Izvi zvinovonesa kuti zviro izvi vakazviita vacito vafa. Izvi zvinozika, andizvopi? Mu nyika imbza apana anozotendehwa kuita zviro zvakashata. Vacikazivi kururama vakaita zviro izvi vacito vafa. Waro magama a Jesu okuti “vanozomuswa kuti vaende ku upenyu” no “vanozomuswa kuti vaende kootongwa” anorevenyi?
15. Ndiyani ‘anozomuswa kuti aende ku upenyu,’ ngenyi?
15 Varurami, vakaita zviro zvakanaka vacito vafa, “vanozomuswa kuti vaende ku upenyu” ngokuti mazina avo anonga akatahwa mu bhuku ro upenyu. Izvi zvinoda kureva kuti kumuswa ko vandhu “vakaita zviro zvakanaka” kunonangwa pana Johani 5:29, ndikona kondhoko no kumuswa ko “vakarurama” kunonangwa pa Mabasa o Vapostori 24:15. Izvi zvinozwirana kamare no masoko atinowana pana Varoma 6:7, okuti: “Ngokuti mundhu wese anonga afa wapera kusujunuhwa mu cishaishi cake.” Varurami ava povakafa Jehovha wakavaregerera zvishaishi zvavo, asi aciri kuceukija zviro zvakanaka zvovakaita. (Vahebheru 6:10) Ngo kudaro, varurami vanozomuswari vanozodikana kwenderera mberi vakagondeka kuti mazina avo aendererevo mberi ari mu bhuku ro upenyu.
16. Magama okuti “vanozomuswa kuti vaende kootongwa” anoda kurevenyi?
16 Tingativo kudini ngo vaya vakaita zviro zvakashata vacito vafa? Pikija zvishaishi zvavo zvakaregerehwa povakafa, ivona avazivi kushandira Jehovha novakagondeka. Mazina avo aazivi kutahwa mu bhuku ro upenyu. Ngo kudaro, kumuswa ko vandhu “vakaita zviro zvakashata” kwakaezana no kumuswa ko “vacizivi kururama” kwatinowana pana Mabasa o Vapostori 24:15. Ivona “vanozomuswa kuti vaende kootongwa.” * Izvi zvinoreva kuti Jesu anozovasotesesa no kuvona dangani vacinja. (Ruka 22:30) Pakupera mukuvo wakati kuti, Jesu anozoziva kuti ivona vanofanera kuti mazina avo atahwe mu bhuku ro upenyu kana kuti haiwa. Kuti izvi zviitike, ivona vanodikana kusiya maponero avo okare akashata, vopira upenyu hwavo kuna Jehovha.
17-18. Vese vanozomuswari kuti vapone pasi pano vanodikana kuitenyi? Mukuzwirana na Apokaripsi 20:12, 13, vanomuswari vanozotongwa vakacijikira mu “zviito” zvapi?
17 Azvinenyi dangani vainga varurami kana vacikazivi kururama, vese vanozomuswa vanozodikana kuzwira mutemo jinonga jakatahwa mu muphukutu jinozofununguhwa mukati mo ciuru co makore. Mupostori Johani wakasanangura zvaakavona paakati: “Ndakavona vakafa, vakuru no vadoko, vakaima pamberi po cigaro co umambo. Muphukutu jakafununguhwa. Muphukutu umweni wakafununguhwa, wainga muphukutu wo upenyu. Vakafa vakatongwa pecishandiswa zvainga zvakatahwa mu muphukutumo, mu kuzwirana no zviito zvavo.”—Apokaripsi 20:12, 13.
18 Vaya vanozomuswa, vanozotongwa mukuzwirana no “zviito” zvapi? Kureva kuti vanozotongwa mukuzwirana no zviro zvovakaita vacito vafa? Haiwa! Ceukijanyi kuti mundhu paanofa, zvishaishi zvake zvinonga zvapera kuregerehwa. Apa “zviito zvavo” azviripi kunangira zvovakaita kare. Pari kunangira zviro zvavanozoita mu nyika imbza pavanopera kujijiswa. Pikija vanarume vakagondeka vakadari inga Nowa, Samuweri, Dhavhidhi na Dhanyeri vanozodikana kujija ngo pamusoro pa Jesu no kuva no rutendo ku muripo wake. Kudari vagondeki ava vanozova no zviro zvizinji zvokujijira, vaya vacikazivi kururama vanozodikana kujijira zviro zvakawandisisa kamare.
19. Ngozvapi zvinozoitika kuno vaya vanoramba mukana uwu unodakajisa?
19 Ngozvapi zvinozoitika kuno vaya vanoramba mukana uwu unodakajisa? Apokaripsi 20:15 inonanga kudari: “Mundhu wese wainga acizivi kutahwa zina rake mu bhuku ro upenyu wakakhandihwa mu gandhwa ro muriro.” Hina, ivona vanozoparajwa kwenda no kwenda. Ngo kudaro, zvinosisira maningi kuva no cokwadi co kuti zina redu rakatahwavo mu bhuku ro upenyu no kwenderera mberi ririmo.
Hama iri kubatikana pa basa guru ro kujijisa rinozoitwa pasi pano, pa kutonga ko ciuru co makore (Vonanyi ndima 20)
20. Basa rapi rinozoitwa pa Kutonga ko Ciuru co Makore? (Vonanyi foto yo pakapa.)
20 Kutonga ko Ciuru co Makore unozova mukuvo unodakajisa maningi. Unozova mukuvo wo kuita basa ro kujijisa ricikazivi kumboitwazve ngo vandhu va Mwari. Cimwenizve, pa mukuvo uwu mufambiro wo vakarurama no vacizivi kururama unozoejwa. (Isaia 26:9; Mabasa o Vapostori 17:31) Basa iri rokujijisa rinozoitiswa kudini? Musoro unotevera unozotibesera kuti tizwisise izvi no kubongesera ngo nasiriro iyi inoshamaisa.
NDUMBO 147 Upenyu Hucikaperi Hwakagondeswa
^ Musoro uwu uri kuda kuvonesa kucinja ko zwisiso yotainga nayo ngo pamusoro po magama a Jesu anowanika pana Johani 5:28, 29, okuti vandhu “vanozomuswa kuti vaende ku upenyu” no “vanozomuswa kuti vaende kootongwa.” Tinozovona kuti rumuko ruviri uwu uri kunangira ani no kuvonazve kuti mbhaani vanobatanijwa pa rumuko uwu.
^ Bhuku iri rakatanga kutahwa “kuvhira pa kutanga ko nyika” kana kuti, kuvhira pa mukuvo wokuti vandhu vakatanga kubesereka ngo muripo. (Mateu 25:34; Apokaripsi 17:8) Zvinovoneka kuti zina ra Abheri ndirona rakatanga kutahwa mu bhuku iri, ngokuti iyena waingavo mururami.
^ Gama rokuti “kootongwa,” kare tairisanangura tecida kunangira kupanicwa. Irona ringatorevadi zvondhozvo kamare. Asi Jesu paakashandisa gama rokuti “kootongwa,” zvinovoneka inga kuti wainga ecibatanija zviro zvakawanda, ecida kunangira basa ro kunasa kusotesesa dangani mundhu wacinja mufambiro wake kana kuti haiwa.
