Pana 1 Vakorinte 15:8, Pauro wakati: “Pakupejisira, wakabudira inini, mundhu wakabahwa nguva icito yakwana.” Kare, taisanangura kuti Pauro kangaije wainga ecinangira civoniso caakava naco paakavona Jesu kumatenga. Zvaidari inga kuti iyena wakava no rukujo wokubahwa, kana kumuswa, kuti ave no upenyu wo kumujimu, nguva icito yaguma, kana mazana o makore rumuko wakadari ucito waitika. Asi pasure po kujija maningi vhesi iyi, tavona kuti zvinodikana kucinja zwisiso yotainga nayo.

Icokwadi kuti Pauro apa wainga ecinanga zvakaitika pa kutendeuka kwake. Asi waida kunangenyi paakananga kuti wainga “wakabahwa nguva icito yakwana”? Ngatende tivone mathangwe manganani, okuti kangaije akaita kuti Pauro anange magama aya.

Kutendeuka kwake kwakava kucikavetehwi no kunohwaja. Kubara nguva icito yakwana, kazinji akuvetehwi. Sauro (uwo wakazozivika inga Pauro pa kufamba ko nguva) wainga ecienda Dhamashiko kuti ateverere Makristu kondhoyo. Iyena aacaivetera kuti waizovona Jesu uwo wainga wapera kumuswa. Kutendeuka ka Pauro, akuzivi kushamaisa iyena basi, asi kwakashamaisavo Makristu aaiendaya koteverera. Mukuengejera, civoniso ici wari cakamuhwaja maningi, zvokuti wakagumira pakutama kuvona ko mukuvo wakati kuti.—Mabasa o Vapostori 9:1-9, 17-19.

Iyena wakatendeuka pa “mukuvo wakashata.” Gama ro Cigiriki rakasandujwa kuti “wakabahwa nguva icito yakwana,” ringasandujwazve kuti “wakabahwa mukuvo wakashata.” A Bíblia de Jerusalém rakasanduja izvi ngo njira iyi: “Zvakaita inga kuti ndakabahwa pa mukuvo wokuti apana mundhu waivetera.” Pa mukuvo wakatendeuka Pauro, Jesu wainga wahwirira kumatenga. Mukusiyana no vaakanangari pa mavhesi o nyezuru, iyena aazivi kuvona Jesu paakamuswa acito ahwirira kudenga. (1 Vakorinte 15:4-8) Civoniso caakavari naco, cakamupa mukana wo kuvona Jesu pasure po kumuswa kwake, pikija wainga ecirangarira kuti wainga “mukuvo wakashata.”

Iyena waibhuya ngo pamusoro pake mu njira yo kujidodokesa. Mukuzwirana no vajiji vamweni gama rakashandisa Pauro apa ringazika mu njira yokujirerusa. Kudari iyena wainga ecirangarira izvi, zvinoreva kuti iyena waiziva kuti aacaifanera kuva no basa iri. Iyena wakatoguma pa kunanga kudari: “Inini ndiri mudoko ku vapostori. Cimwenizve, andifaniri kudanijwa mupostori ngokuti ndakateverera ungano ya Mwari. Ndiri zvandiri wari ngo pamusoro po unyasha hucikaezaniswi hwa Mwari.”—1 Vakorinte 15:9, 10.

Ngo kudaro, zvinovoneka inga kuti Pauro wainga ecinangira manera aakavona Jesu ngo njira yaainga acikaveteri no inohwaja no kutendeuka kwaakaita pa mukuvo wainga ucikavetehwi kana kuti iyena aacaifanera kuva no civoniso ici. Azvinenyi kuti ngozvapi zvaainangira, zvakaitikari zvaisisira maningi kuna Pauro. Izvi zvakamukhohwesa kuti Jesu wainga wamuswa ko vakafa. Pacina kukana-kana, iyena waivhunja vamweni zvakaitikari paainga ecicumaera ngo pamusoro po kumuswa ka Jesu.—Mabasa o Vapostori 22:6-11; 26:13-18.