1. Pedhru wakajizwa kudini Jesu paakaita mushamaiso, vobata hove jakawanda?

 PEDHRU wakapeja usiku hwese ecitanda asi aazivi kubata ciro. Iyena wakashamaisika Jesu paakamuvhunja kuti: “Vhuthai tiende pakati po gandhwa, imwimwi wisiranyi majuya, mutande.” (Ruka 5:4) Pedhru aacaitenda kuti waizobata hove, asi wakaita zvaakavhunjwari. Pavakawisira juya, irona rakada kumweka ngo ndava yo hove jainga jakawanda. Povakazwisisa kuti Jesu wainga aita mushamaiso, Pedhru no vamweni “vakathya maningi.” Pedhru wakati: “Fundurukanyi kondiri, Mambo, ngokuti ndiri mushaishi.” (Ruka 5:6-9) Zvinovoneka inga kuti Pedhru waivona inga kuti aacaifanera kugara phedo na Jesu.

2. Ngenyi zvaushoni kujija ngo muezaniso wa Pedhru?

² Pedhru wainanga zvokadi, iyena waingadi “mushaishi.” Bhaibheri rinonanga kuti Pedhru wakananga zviro no kuita, zvokuti wakagumira pa kuzvidemba. Imwimwi makambojizwa inga ndi Pedhru? Maidakarira kuitisa nane ciri cese pa undhu hwenyu kana kutoitisa nane kurembejeka kwenyu? Kana zvakadaro, kujija ngo muezaniso wa Pedhru kunozomubesera maningi kuti mutame kuruza vetero. Kuitisa kudini? Amborangariranyi izvi basi: Kudari Jehovha naaida waizoita kuti zvishaishi zvakaithwa ndi Pedhru zvitame kutahwa mu Bhaibheri. Asi izvona zvakatahwa mu Bhaibheri kuti zvitibesere. (2 Timoti 3:16, 17) Kujija muezaniso wo mwanarume uwu waingari wakarembejeka no ano mazwiro akaezana no edu, zvinotibesera kuti tizwisise kuti Jehovha aaveteri kuti tive takakwana. Jehovha anoda kuti itusu ticungirire no kwenderera mberi tecivangisira pikija no kurembejeka kwedu.

3. Ngenyi tinodikana kucungirira?

 ³ Ngenyi kucungirira kunosisira maningi? Ngokuti patinoenderera mberi teciita ciro, tinogumira pa kuitisa nane. Inga muezaniso, muimbi angatojijira ko makore akawanda kuti akwanise ushoni kurija ciri cese. Paanongaro ecijijira angatoposa ko vhaza jakawanda asi paanoenderera mberi ecijijira anogumira pa kuitisa nane. Pikija akatovona kuti wokwanisa ushoni kurija, nguva jimweni angatoposa. Asi iyena aarembi. Anoenderera mberi ecijijira mbhera woitisa nane kamare. Mu njira yakaezana, pikija patinovona kuti tapera kunyisa cineso ciri cese, tingatociitazve. Asi tinoenderera mberi teciitisa nane. Tese hedu nguva jimweni tinogumira pa kunanga kana kuita ciro cingaita kuti tigumire pa kujidemba. Cinosisira i kucungirira ngokuti tikaita kudaro Jehovha anozotibesera kuti tiitise nane. (1 Pedhru 5:10) Ngatende tivone muezaniso wa Pedhru wo kucungirira. Unyasha wakakhombijihwa Pedhru ndi Jesu pikija no kuposa kwake, ungatibesera kuti tienderere mberi tecishandira Jehovha.

4. Inga zvatinovona pana Ruka 5:5-10, Pedhru waijivona inga mundhu wakadini, asi Jesu wakamuvhunjenyi?

⁴ Bhaibheri arinangi kuti ngenyi Pedhru wakananga kuti wainga “mushaishi” nee aritonangivo cishaishi caakaitaro. (Verenganyi Ruka 5:5-10.) Zvingatoita kuti iyena wainga wakatoita zvishaishi zvikuru. Jesu wakazwisisa kuti Pedhru wainga ecithya, kangaije ngokuti iyena aacaijivona inga mundhu waushoni. Asi Jesu waizviziva kuti Pedhru waizokwanisa kwenderera mberi wakagondeka. Ngo rudo hwese, Jesu wakavhunja Pedhru kuti atame ‘kuthya.’ Magama aya aivonesa kuti Jesu wainga no ushamwari na Pedhru, zvondhozvo zvakacinja upenyu hwake. Pa kufamba ko nguva, Pedhru no hama yake Andireya vakatosiya basa ravo ro kutanda votevera Jesu, ngo kuita kwavo izvi vakawana makomborero akawanda maningi aivha kuna Jehovha.—Marko 1:16-18.

5. Pedhru wakawana makomborero api ngo kukwanisa kwake kunyisa kuthya kwake no kutendera mukoka wa Jesu?

⁵ Pedhru wakava no upenyu unodakajisa inga muteveri wa Jesu. Iyena wakavona Jesu ecirapa vaihwaja, kugogomera madhimoni no kumusa vakafa. b (Mateu 8:14-17; Marko 5:37, 41, 42) Pedhru wakakwanisavo kuvona Jesu inga mambo wo Umambo hwa Mwari, izvi zvakapsasa maningi upenyu hwake. (Marko 9:1-8; 2 Pedhru 1:16-18) Pedhru wakavona  zviro zvokuti aacaizozvivonepi kudari naacainga muteveri wa Jesu. Pacina kukana-kana, wakadakara maningi ngo kukwanisa kunyisa murangariro jicikaripi jaushoni no kuwana mukana wo kuashira makomborero akawanda.

6. Kunanga kuti Pedhru wakakwanisa kunyisa kurembejeka kwake ngo kukasika? Sananguranyi.

⁶ Pikija paakapera kuzwa no kuvona zvizinji zvakaithwa ndi Jesu, Pedhru wakaenderera mberi ecihwisana no kurembejeka kwake. Vonanyi muezaniso munganani. Jesu paakananga kuti waizotambujika no kufa kuti akwanirise zviporofita zvo Bhaibheri, Pedhru wakananga kuti izvi azvicaizoitika. (Marko 8:31-33) Ko vhaza jakawanda, Pedhru no vapostori vamweni vakavereketesana ngo kuda kuziva kuti ndiyani wainga mukuru pakati pavo. (Marko 9:33, 34) Pa usiku Jesu acito afa, Pedhru wakaita zviro mu njira icikaripi yaushoni, woceka njeve yo mwanarume umweni. (Johani 18:10) Usiku hwondhowo, Pedhru wakathya maningi wogumira pa kuramba kuti Jesu asipi shamwari yake. (Marko 14:66-72) Izvi zvakaita kuti Pedhru aceme maningi.—Mateu 26:75.

7. Jesu paakapera kumuswa, wakapa Pedhru mukana wapi?

⁷ Pedhru wakanyangajwa maningi ngo zvaakaitari. Pikija zvakadaro, Jesu aazivi kumuramba. Paakapera kumuswa, Jesu wakapa mukana Pedhru kuti akhombije rudo hwake kwaari. Iyena wakagaja Pedhru basa imbza, ro kuva muhavisi anojidodokesa no anongwarira mavhuta ake. (Johani 21:15-17) Pedhru wakaita zvaakakumbihwa ndi Jesu. Iyena waengeyovo ku Jerusarema pa njiku yo Pentekoste, wakavavo pa cikwata cokutanga co vakazojwa ngo mujimu mucena wa Mwari.

8. Ngocapi cishaishi cikuru cakaithwa ndi Pedhru paainga Antiyokiya?

⁸ Pikija pakupera kuzojwa ngo mujimu wa Mwari, Pedhru wakadikana kwenderera mberi ecihwisana no kurembejeka kwake. Mu gore ra 36 Kristu Aviya, Jesu wakatumira Pedhru ka Korneriyo uwo wainga acikaripi Mujudha, iyena wainga wakazojwa ngo mujimu mucena. Izvi zvakajekesa kamare kuti “Mwari aakheti” ngo kuvonesa kuti pikija Makristu aya aacaengaya Vajudha angavavo divi ro ungano yo Cikristu. (Mabasa o Vapostori 10:34, 44, 45) Kuvhira pondhopo Pedhru wakatanga kugara pamwepo no Makristu ainga acikaripi Vajudha, eciha navo, zviro zvaainga acikazivi kumbozviita kareko. (Vagaratiya 2:12) Pikija zvakadaro, Makristu o Cijudha airangarira kuti ivona no Makristu amweni avacaidikana kuha pamwepo. Vairangariraro zvondhozvo povakaenda antiyokiya, Pedhru wakaima kuha no Makristu acikaripi o Cijudha kuti atame kuvanyangajisa. Mupostori Pauro paakavona zvaingari zveciithwa ndi Pedhru wakamupangira pamberi po vandhu vese. (Vagaratiya 2:13, 14) Pikija no kuposa kwaakaitari, Pedhru wakaenderera mberi eciitisa nane. Zvicinyi zvakamubesera?

9. Johani 6:68, 69 inovonesa kudini kuti Pedhru wainga akagondeka?

⁹ Pedhru wainga wakagondeka, aazivi kutendera kuti ciri cese kana ari wese amurembese pa kutevera Jesu. Inga muezaniso, pa vhaza imweni iyena wakakhombija kugondeka kwake vajiji vamweni povakatama kuzwisisa zvakanangwa ndi Jesu. (Verenganyi Johani 6:68, 69.) Vajiji vamweni va Jesu vakaima kumutevera, nee avacaida kuzwa kuti zvaakanangaro zvaida kurevenyi. Asi Pedhru wainga wakagondeka. Wotonanga kuti Jesu wainga no “masoko o upenyu hucikaperi.”

10. Jesu wakakhombijisa kudini kuti waithemba Pedhru? (Vonanyi foto.)

 ¹⁰ Jesu aazivi kuramba Pedhru. Pa usiku hwo kupejisira wo upenyu hwake pasi pano, Jesu waizviziva kuti Pedhru no vapostori vamweni vaizomuramba. Pikija zvakadaro, Jesu waithemba kuti Pedhru waizoenderera mberi wakagondeka. (Ruka 22:31, 32) Jesu waizviziva kuti “mujimu unoda, asi nyama yakaremba.” (Marko 14:38) Ngo kudaro, Jesu aazivi kuramba mujiji wake Pedhru pikija paakamurambaya katatu kuti aamuzivi. Pakupera kumuswa kwake, zvinovoneka inga kuti Jesu wakabudira Pedhru naari ega. (Marko 16:7; Ruka 24:34; 1 Vakorinte 15:5) Zvingaita kuti izvi zvakavangisa maningi Pedhru, uwo wainga wakasuruvara ngo zvaainga akaita.

11. Jesu wakanangenyi kuna Pedhru zvaivonesa kuti Jehovha waizomukorondha?

¹¹ Jesu wakagondesa Pedhru kuti Jehovha waizomubesera. Pakupera kumuswa kwake, Jesu wakaita kuti Pedhru no vapostori vamweni vabate hove ngo mushamaiso. (Johani 21:4-6) Mushamaiso uwu wakavonesa kuna Pedhru kuti Jehovha waizomupa zvese zvaaida ku divi ro kunyama. Kangaije Pedhru wakatoceukija magama a Jesu okuzobesera vaya ‘vanotanga kupsaka Umambo.’ (Mateu 6:33) Izvi zvakaita kuti Pedhru adire Umambo hwa Mwari pakutanga kusiyapo basa rake ro kutanda. Iyena wakava no cicunge co kucumaera pa njiku yo Pentekoste yo gore ra 33 Kristu Aviya, wobesera zviuru zvo vandhu kuti vatendere masoko akanaka. (Mabasa o Vapostori 2:14, 37-41) Pa kufamba ko nguva, wakabesera vagari vo Samariya no Makristu amweni ainga acikaripi o Cijudha kuti vave vateveri va Kristu. (Mabasa o Vapostori 8:14-17; 10:44-48) Pacina kukana-kana, Jehovha wakashandisa Pedhru mu njira inoshamaisa kuti aviise vandhu vo mushovo jakasiyana-siyana mu ungano.

12. Muezaniso wa Pedhru ungatibesera kudini patinonga tecihwisana no cineso ciri cese ko mukuvo wakati kuti?

¹² Jehovha angatibesera kuti ticungirire. Zvinganesa kuti tienderere mberi patinonga tecihwisana no muejo ko mukuvo wakati kuti. Nguva jimweni zvineso zvedu zvingaengejeka maningi kupinda zvakasongana na Pedhru. Asi Jehovha anotipekeja simba ratinoda kuti ticungirire. (Nduyo 94:17-19) Vonanyi muezaniso wo hama imweni yokuti icito yajija cokwadi yaivatana no mwanarume doni. Iyona yakacinja kamare manera oyaipona, yopona mukuzwirana no zvinojijiswa ngo Bhaibheri.  Pikija zvakadaro, yakadikana kwenderera mberi yecihwisana no zvido zvicikaripi zvaushoni. Zvicinyi zvakaibesera kuti icungirire? Iyona yakananga kudari: “Jehovha anondivangisa.” Yakaengejera yeciti: “Ngo besero ro mujimu mucena . . . , ndinokwanisa kwenderera mberi ndiri mu cokwadi . . . pikija no kutama kukwana kwangu Jehovha ari kwenderera mberi ecindishandisa no kundivangisa.”

13. Inga zvatiri kuvona pana Mabasa o Vapostori 4:13, 29, 31, tingatevejeresa kudini muezaniso wa Pedhru? (Vonanyi foto.)

¹³ Inga zvatavona, Pedhru wakathya ko vhaza jakawanda ngo ndava yo kuthya vandhu. Asi Pedhru wakaita mukumbiro ecikumbira simba, wokwanisa kuita zviro ngo cicunge. (Verenganyi Mabasa o Vapostori 4:13, 29, 31.) Na itusuvo tingakwanisa kunyisa kuthya kwatinako. Vonanyi zvakaitika na hama Horst, hama yo mujaha yaigara ku Aremanya Nazista pa Hondo Yocipiri yo Nyika Yese. Ko vhaza inodakarika imwe ivona vakagumira pa kuvangirijwa ku Cikora kuti vanange kuti: “Hai Hiteri!” Ivona vakaverengera vabari vavo. Kusiyapo kuvavereketera, vabarivo vakaita navo mukumbiro vecikumbira kuti Jehovha avapekeje cicunge. Ngo besero ra Jehovha no ro vabari vavo, hama Horst vakakwanisa kuwana simba ro kwenderera mberi vakavanga. Pasure po kukhirira makore akati kuti, ivona vakananga kudari: “Jehovha aazivi kundisiya.” c

14. Vahavisi vano rudo vangahavisa kudini vaya vakasuruvara?

¹⁴ Jehovha na Jesu narini avazotisii. Pedhru paakapera kuramba Jesu wakadikana kutema civaringo cinosisira maningi. Kunanga kuti waizosiya kuva muteveri wa Jesu kana waizoenderera mberi ecicungirira? Jesu wakadeketerera  Jehovha kuti rutendo hwa Pedhru utame kurembejeka. Perapo Jesu wakaverengera Pedhru kuti wainga aita mukumbiro wondhowo no kuvonesa kuti iyena waizokwanisavo kuvangisa hama jake. (Ruka 22:31, 32) Zvingaita kuti Pedhru waivangiswa maningi paairangarira zvakanangwari ndi Jesu. Mukufananavo, patinoda kutema civaringo cinosisira mu upenyu hwedu, Jehovha angatibesera kuti tirambe takagondeka. Iyena angaita zvondhozvo ngo kushandisa vahavisi vano rudo. (Vaefeso 4:8, 11) Hama imweni inodanwa kuti Pauro, iri kushanda inga mukuru ko mukuvo wakareba inoeja kuita izvi. Painovona hama iri kutanga kuremba, inoceukija manera Jehovha wakaikwevera kuti iviye mu cokwadi. Yoceukija kuti rudo ucikacinji wa Jehovha, auzoiti kuti amusiye. Hama Pauro vakapejisa ngo magama aya: “Ndakavona hama jakawanda jecikwanisa kucungirira ngo besero ra Jehovha.”

15. Muezaniso wa Pedhru no wa hama Horst unovonesa kudini kuti zvinonangwa pana Mateu 6:33 ngo zvokadi?

¹⁵ Inga manera Jehovha wakabesera Pedhru no vapostori vamweni pa zviro zvovaida ku divi ro kunyama, iyena anozotibeseravo tikadira Umambo hwake pa kutanga. (Mateu 6:33) Pakupera ko Hondo Yocipiri yo Nyika Yese, hama Horst vanangwaya, vakarangarira kuva piyona. Ivona vainga murombo maningi, zvokuti vairangarira kuti avacaizokwanisa kushanda inga piyona wo nguva jese. Ivona vakaitenyi? Vakatema civaringo co kueja kuti vavone dangani Jehovha waizovakorondha. Pa sumana yovainga vecifambihwa ngo muvonereri wavo wo ndharaundha, vakashanda sumana yese mu basa ro kucumaera. Pakupera ko sumana iyi, vakashamaisika maningi muvonereri wo ndharaundha paakavapa envheropi yainga icikazivi kutahwa zina, yakazara ngo mare. Iyona yainga no mare inokwana kuti vashandise ko mweji jakawanda mu basa ravo inga piyona. Hama Horst vakavona izvi inga citatijo co kuti Jehovha waizovakorondha. Vakazopeja upenyu hwavo hwese vecidira Umambo pakutanga.—Marakiya 3:10.

16. Ngenyi zvinosisira maningi kujija ngo muezaniso wa Pedhru no zvaakatara mu karata jake?

¹⁶ Pedhru wakadakara maningi Jesu paakatama kumusiya, pikija Pedhru wakambozviita pa vhaza imweni. Jesu wakaenderera mberi ecijijisa Pedhru kuti ave mupostori wakagondeka no kuva muezaniso wakanaka kuno Makristu. Tingatowana zviro zvinosisira kuvha ku zvakajijari Pedhru. Iyena wakatotara zvimweni zvakona pa karata mbiri jaakatarira ungano jo muzana ro kutanga. Mu cijijo cinotevera, tinozovona zviro zvinganani zvatingajija mu karata iji no manera atingazvishandisa nyamasi uno.