1. Ngozvapi zvatingavhunjiswa ku cikora kana kubasa?

 MUNOZWA kudini kudari mudoni wenyu wokubasa kana wo kushikora akamuita muvhunjo ngo pamusoro po zviro zvamunotenda? Imwimwi munothimwa-thimwa? Vazinji vanozwa kudaro. Asi muvhunjo jakadari, jinotiita kuti tizwisise zviri kurangarihwa ngo mundhuwo no kutipa mukana wo kumuvhunja masoko akanaka. Nguva jimweni, vandhu vanoita muvhunjo kuti vavereketesane. Izvi azvitishamaisi. Vamweni vanozwa masoko okunyepa ngo pamusoro po zviro zvatinotenda. (Mabasa o Vapostori 28:22) Kunasa kunanga, tiri kupona “mu njiku jo kupejisira,” mukuvo wokuti vandhu vazinji avadi ‘kuzwirana no vamweni’ no “vanothyisa.”—2 Timoti 3:1, 3.

2. Ngenyi tinodikana kuva vandhu vakapfava?

² Kangaije mungajivhunjisa kudari: ‘Ndingaitisa kudini kuti ndirambe ndakathiva vamweni pavanoda kuvereketesana ngo zvinonangwa mu Bhaibheri?’ Ngozvapi zvingamubesera? Ikuva mundhu wakapfava. Mundhu wakapfava aakasiki kunyangajwa, mukusiyana anojibata paanonga ecishohwa no paanongaya acina cokudavira. (Mazwi Akangwara 16:32) Zvakajeka kuti izvi zvakareruka kuvereketa kusiyapo kuzviita. Mungaitisa kudini kuti muve mundhu wakapfava vandhu pavanomuvhunjisa ngo pamusoro po zviro zvamunotenda? Kudari muri mubari, mungabesera kudini vana venyu kuti vajivirire rutendo hwavo ngo njira yakapfava? Ngatende tivone.

3. Ngenyi tingananga kuti mundhu wakapfava wakavanga kusiyapo kuva mundhu wakarembejeka? (2 Timoti 2:24, 25)

³ Kuva mundhu wakapfava azvirevi kuti makaremba. Mugariro  uwu kazinji unowanika no vandhu vakavanga. Munodikana kuva mundhu wakapfava kuti mukwanise kuva makagajana pamunonga mecisongana no mugariro unonesa. Kupfava i “mucero yo mujimu.” (Vagaratiya 5:22, 23) Gama ro kuti “kupfava” ku Cigiriki rainangira zvaiithwa ngo haci yo musora yainga yakasungwa ngo monga. Payaipera kusungwa ngo monga yaigara yakapfava. Asi yaienderera mberi yakavanga. Waro tingaitisa kudini kuti tive takapfava pa mukuvo umwewo tova takavanga? Atingakwanisi kuita izvi tega. Tinodikana kuita mukumbiro kuna Jehovha tecikumbira mujimu wake kuti utibesere kusakurira mugariro uwu unosisira. Kuno muezaniso jakawanda jinovonesa kuti zvinokwanisika kuva mundhu wakapfava. Hama no hambzaji jakawanda jakakwanisa kwenderera mberi jakapfava pajaishohwa. (Verenganyi 2 Timoti 2:24, 25.) Mungaitisa kudini kuti mugariro wo kupfava uve unosisira maningi kwamuri?

4. Ngozvapi zvakabesera Izaki kuti ave mundhu wakapfava?

⁴ Bhaibheri rino muezaniso jakawanda jinovonesa kuti kupfava i mugariro unosisira maningi. Vonanyi muezaniso wa Izaki. Paakaenda kogara ku ndharaundha yo Jherari phedo no Vafiristi, ivona vakagara no thima naye voenda kofucira mwimbo jese jakaciwa ngo varanda va babake. Kusiyapo kuhwisana kuti mwimbo iji jitame kufucihwa, iyena no mbhuri yake vakathutha voenda kogara kumweni, voguma konayo vocazve mwimbo jimweni. (Genesi 26:12-18) Asi Vafiristi vakananga kuti kumwa yainga mu mwimbo jaingari jaciwa yainga yavo. Pikija zvakadaro, Izaki wakaenderera mberi wakapfava. (Genesi 26:19-25) Zvicinyi zvakamubesera kuti aenderere mberi wakapfava vamweni pavaimunesa? Pacina kukana-kana, wakatevejera muezaniso wo vabari vake. Baba wake vaida maningi kuita runyararo, mai wake Sara vainga no “mujimu wakathiva no kunyarara.”—1 Pedhru 3:4-6; Genesi 21:22-34.

5. Ngowapi muezaniso unovonesa kuti vabari vo Cikristu vanodikana kujijisa vana vavo kuti vave vakapfava?

⁵ Vabari vo Cikristu, beseranyi vana venyu kuti vave vandhu vakapfava. Vonanyi muezaniso wa Makisesi, ano makore anokwana kuita 17. Paainga kucikora no mu basa ro kucumaera, waidikana kuhwisana no vandhu vacikanesi kunyangajwa. Vabari vake vainga vandhu vanosengerera, ngo kudaro, vakamujijisa kuti ave mundhu wakapfava. Vabari va Makisesi vakati: “Iyena wakazwisisa kuti zvakareruka maningi kuhwirijira vandhu pavanokushora, asi mundhu wakavanga anokwanisa kujibata.” Zvinodakajisa ngo zvokuti, Makisesi wakakwanisa kuva mundhu wakapfava.

6. Mukumbiro ungatibesera kudini kuti tive vandhu vakapfava?

⁶ Ngozvapi zvatinodikana kuita kudari mundhu akatanga kubhuya zvakashata ngo pamusoro pa Jehovha no Bhaibheri? Tinodikana kuita mukumbiro kuna Jehovha tecikumbira mujimu wake no uzivi kuti tikwanise kuva vandhu vakapfava. Waro tingaitenyi kudari tikazwisisa kuti taita zviro mu njira yoticaidikanepi? Tinodikanazve kuita mukumbiro no kurangarira zvatinozoita patinozosonganazve no mugariro wakaezana. Tikaita zvondhozvo, Jehovha anozotibesera ngo kutipa mujimu wake mucena kuti tive vandhu vakathiva no vakapfava.

7. Zvicinyi zvinozotibesera kuti tikwanise kungwarira zvatinovereketa ngo pamusoro po vandhu vanotishora? (Mazwi Akangwara 15:1, 18)

⁷ Mavhesi amweni o mu Bhaibheri angatibesera kuti tive vandhu vanojibata patinosongana no mugariro unonesa. Mujimu wa Mwari ungatibesera kuti ticeukije mavhesi aya. (Johani 14:26) Inga muezaniso, ndhungamiriro jatinowana mu bhuku ra Mazwi Akangwara, jingatibesera kuti tive vandhu vakapfava. (Verenganyi Mazwi Akangwara 15:1, 18.) Bhuku iri rinovonesa kuti ngenyi zvinosisira kuva mundhu  wakapfava pa mugariro unonesa.—Mazwi Akangwara 10:19; 17:27; 21:23; 25:15.

8. Ngenyi tinodikana kuamba tarangarira ticito tadavira muvhunjo watinonga taithwa ngo pamusoro po zvatinotenda?

⁸ Ungwaru ungatibeseravo. (Mazwi Akangwara 19:11) Mundhu wakangwara anokwanisa kudavira ushoni vandhu pavanomuita muvhunjo ngo pamusoro po zviro zvaanotenda. Kazinji vandhu pavanotiita muvhunjo avativhunji thangwe ravaitisaro kuti vatiite muvhunjo wondhowo. Ngo kudaro, zvaushoni maningi kumborangarira ticito tadavira.—Mazwi Akangwara 16:23.

9. Gidhiyoni wakakhombijisa kudini ungwaru no kupfava paaibhuya no vanarume vo Efraimi?

⁹ Vonanyi kuti Gidhiyoni wakadavirisa kudini vanarume vo Efraimi povakamuita muvhunjo novakanyangajwa. Ivona vaida kuziva kuti ngenyi Gidhiyoni aazivi kuvadanija kuti vaende vese kohwisana no vavengi vo Vaiziraeri. Ngorapi thangwe rakaita kuti ivona vabhuye novakanyangajwa? Kunanga kuti i kujikuja? Azvinenyi kuti ngorapi rainga thangwe rakona, Gidhiyoni wakakhombija kuti wainga mundhu wakangwara. Wakaeja kuzwisisa kuti ngenyi ivona vainga vakanyangajwa wovadavira ngo njira yakapfava. Ngowapi wakava muviyo wakona? Bhaibheri rinonanga kuti povakazwa zvakanangwa  ndi Gidhiyoni “kupopera kwavo kwakanyarara.”—Vatongi 8:1-3.

10. Zvicinyi zvinozotibesera kudavira ushoni vandhu vanoita muvhunjo ngo pamusoro po zviro zvatinotenda? (1 Pedhru 3:15)

¹⁰ Kangaije mudoni wo kubasa kana wo kucikora angatotivhunjisa kuti ngenyi itusu tinopona mukuzwirana no ndhungamiriro jo Bhaibheri. Patinonga tecimudavira tinoita zvese zvatinokwanisa kuti tijivirire zvatinotenda no kukhombija nderemejo pa mavonero o mundhuwo. (Verenganyi 1 Pedhru 3:15.) Kusiyapo kuvona kuti mundhu waitaro muvhunjowo anoda kuhwisana na itusu, zvaizova zvaushoni kuvona muvhunjowo inga mukana wo kuziva zvaari kurangarira. Azvinenyi kuti ngozvapi zvamuitisaro kuti aite muvhunjowo, tinodikana kumudavira ngo njira yakapfava no yakanaka. Mupinguro wedu kangaije ungabesera mundhuwo kuti acinje manera ake okurangarira. Pikija mundhuwo akava acikanesi kunyangajwa, tinodikana kumudavira ngo njira yakanaka.—Varoma 12:17.

11-12. (a) Ngozvapi zvatinodikana kurangarira ticito tadavira muvhunjo jinonesa? (Vonanyi foto.) (b) Ipanyi muezaniso unovonesa kuti kuita muvhunjo kungabesera kuti muenderere mberi no mabhuyo.

¹¹ Kudari mudoni wenyu wo kubasa anoda kuziva kuti ngenyi amuceukiji njiku yo kubahwa, amboimanyi morangarira kudari: Kunanga kuti iyena waita muvhunjo uwu ngo kurangarira kuti itusu atidakariri kubungaija? Kana ari kurangarira kuti ngo kutama kwedu kuceukija njikuyo tinozophingaija rubatano uno vandhu pa basepo? Tinodikana kusimba mudoni wedu ngo kuneseka kwaari kuita ngo pamusoro po vamweni no rubatano wo vandhu vese pa basepo no kutomuvhunja kuti tinodakarira maningi kushanda no vese inga shamwari. Kuita izvi, zvinozoita kuti mudoni wedu atame kugara ecineseka maningi. Kangaije tingatowana mukana wo kumuvhunja kuti Bhaibheri rinonangenyi ngo kuceukija njiku yo kubahwa.

¹² Tingatoita zvakafanana pakambhera ngo kubuda shwiro jimweni jinonesa. Kangaije mudoni wo kucikora angatonanga kuti Zvapupu zva Jehovha zvinodikana kuitisa nane mavonero avo ngo pamusoro po kuvatana ko mwanarume no mwanarume pomwe no mwanakaji no mwanakaji. Kureva kuti iyena anonga ecinanga zvondhozvo ngokuti aazivi zvinotendhwa ngo Zvapupu zva Jehovha? Kana ano shamwari kana ukama uno maponero aya? Kureva kuti iyena anorangarira kuti atidakariri vandhu vanoita izvi? Kangaije zvaizova zvaushoni kumuvhunja kuti itusu tinoneseka no kureremeja vandhu vese ngokuti tinoziva kuti mundhu umwe nga umwe anocitendehwa co kusana zvaanoda. b (1 Pedhru 2:17) Ngo kuita izvi taizova no mukana wo kumuvhunja manera atinobesereka ngo ndhungamiriro jo Bhaibheri.

13. Mungabesera kudini mundhu acikatendi kuti Mwari ariyo?

¹³ Patinobhuya no mundhu anondovangirira pa zviro zvaanotenda, ativhiri kukasika kunanga kuti tinoziva kuti ngenyi ari kuita zvondhozvo. (Tito 3:2) Inga muezaniso, ngozvapi zvamaizoita kudari mudoni wenyu wo kucikora akananga kuti azvina musoro kutenda kuti Mwari ariyo? Munodikana kukasika kunanga kuti iyena anotenda kuti zviro zvakaita ngo kuphinduka-phinduka kana anoziva maningi ngo pamusoro po shwiroyo? Zvingaita kuti ari kunanga zvondhozvo ngokuti ndizvona zvaanondozwa basi, aazivi kumbogara worangarira ngo shwiroyo. Kusiyapo kubhuya ngo pamusoro po kuphinduka-phinduka, zvaizova zvaushoni kumusiira shwiro imweni kuti aende korangarijisisa. Kangaije mungamukhombija masoko ari ese anowanika mu saiti yedu jw.org anovonesa kuti zviro zvakasikwa. Mungazobhuisana naye ngo musoro kana vhidhiyo iri yese yaawana mu saiti.  Ndizvona kuti patinodavira ngo njira yo kureremeja, vandhu vanozoda kujija Bhaibheri.

14. Niri wakashandisa kudini saiti yedu kuti abesere mudoni wo ku cikora kuti atame kubatisisa zviro zvokunyepa zvaibhuiwa ngo pamusoro po Zvapupu zva Jehovha?

¹⁴ Mujaha umweni anodanwa kuti Niri wakashandisa saiti yedu kuti avonese vandhu kuti zvavanonanga ngo pamusoro po Zvapupu zva Jehovha zvakaposeka. Iyena wakati: “Mudoni umweni wandaijija naye, wainanga kuti andicaithemba zvo siensiya ngokuti ndaithemba bhuku rimweni rainga rakazara ngo shitoriya.” Zvecivoneka kuti wainga acikadi kuzwa zvainangwa ndi Niri, wakamuvhunja kuti anghwine mu saiti jw.org woenda pa divi rinoti, “Siensiya no Bhaibheri.” Pakufamba ko nguva Niri wakaziva kuti mudoni wake wainga wakanghwina mu saiti. Wari wainga woda kubhuya ngo kusikwa kwakaitwa zviro. Izvi zvingatoitikavo na imwimwi.

15. Majibaba angabesera kudini vana vavo kuti vadavire ngo njira yakapfava vadoni vavo pavanovaita muvhunjo ngo pamusoro po zviro zvavanotenda?

¹⁵ Majibaba angajijisa vana vavo kuti vadavire mu njira yakapfava pavanovhunjiswa zviro zvavanotenda. (Jakobo 3:13) Vabari vamweni vanoita izvi pa kunamata kwavo ko mbhuri. Ivona vanojija shwiro nganani jinoitika ku cikora no manera avangadavira. Vanojijisa vana vavo kuti vadavire ngo njira yakapfava no inodakarihwa ngo vamweni.—Vonanyi bhokiso rinoti: “ Jijiranyi Zvokuita no Mbhuri Yenyu.”

16-17. Kujijira inga mbhuri kungabesera kudini majaha?

¹⁶ Kujijira nguva iciripo kunobesera kuti vana vazokwanise kudurujira zvavanotenda no kujikhohwesa kuti vano mathangwe akanaka okutenda zvinojijiswa ngo Bhaibheri. Divi rinoti “Mubvunjo Jinoitwa ngo Vocidoko” rinowanika mu saiti jw.org rino mabhokiso angabesera majaha. Irona rakaitihwa majaha kuti vakwanise kuvangisa rutendo hwavo no kukwanisa kudavira ngo magama avo kamare, vandhu pavanozovavhunjisa ngo pamusoro po zviro zvavanotenda. Kudari  mbhuri ikajija iri pamwepo divi iri, zvinozobesera kuti vana vakwanise kujivirira rutendo hwavo ngo njira yakapfava no inodakajisa vamweni.

¹⁷ Mujaha umweni anodanijwa kuti Mateu wakananga kuti kujijira kovakaita kwakamubesera maningi. Pakunamata kwavo ko mbhuri, Mateu no vabari vake vaijijira shwiro jaizomuka kucikora. Iyena wakati: “Tairangarijisisa ngo muvhunjo jaizoithwa ngo vadoni vangu vo kucikora perapo taipsakisisa manera andaizodavira. Pandainasa kuziva kuti ngenyi ndinotenda zvinonangwa ngo Bhaibheri, zvaindirerukira kudavira ngo njira yakapfava vamweni pavaindivhunjisa ngo zviro zvandinotenda.”

18. Vakorose 4:6 inobhuya ngo pamusoro penyi?

¹⁸ Pikija tikanasa kusanangura ngo njira yakajeka, asipi vese vanozoda kupurukira zvatinongaro tecinanga. Asi kubhuya ngo njira yaushoni no yakapfava kungabesera. (Verenganyi Vakorose 4:6.) Kusanangura zvatinotenda zvakafanana no kukhandirira bhora umweni. Tingakwanisa kukhandira bhora ngo njira yakapfava kana yakavanga. Kudari tikatama kukhandira bhora ngo simba zvinoita kuti umweni akwanise kuribata no kwenderera mberi ecitamba. Mukufananavo, kudari tikabhuya ngo njira yaushoni no yakapfava, zvinoita kuti vandhu vapurukire zvatiri kubhuyaro no kwenderera mberi no mabhuyo. Zvakajeka kuti kudari mundhu aadi kupurukira zvatiri kubhuyaro kana akada kuvereketesana na itusu, ativangirijwi kuti tienderere mberi no mabhuyo kana kudavira muvhunjowo. (Mazwi Akangwara 26:4) Vandhu vazinji avaiti kudaro, vamweni vanozoda kutipurukira.

19. Ngozvapi zvinodikana kutibesera kuti tive vandhu vakapfava patinonga tecijivirira zvatinotenda?

¹⁹ Zvakajeka kuti kuva mundhu wakapfava zvinosisira maningi. Kumbiranyi Jehovha kuti amubesere kuti muve mundhu wakapfava vamweni pavanomushora ngo ndava yo zviro zvamunotenda. Ceukijanyi kuti kubhuya kwamunoita ngo njira yakapfava kunoita kuti mutame kuvereketesana. Mupinguro wakapfava no unoithwa ngo nderemejo, ungabesera vandhu kuti vacinje mavonero avo ngo pamusoro pedu no Bhaibheri. ‘Garanyi makanasirira kuti’ mujivirire zvamunotenda “mecizviita ngo kupfava kwese no nderemejo huru.” (1 Pedhru 3:15) Temanyi civaringo co kukhombija kuti muri mundhu wakapfava no wakavanga!