1. Zvineso zvapi zvakasongana na Jehoashi, Uziya na Josiya?

 AMBORANGARIRANYI kuva mambo nomuri mwana kana cimujaha. Maizoshandisa kudini simba renyu? Bhaibheri rinobhuya ngo pamusoro po majaha akawanda akava majimambo o ku Judha. Inga muezaniso, Jehoashi wakava mambo paainga no makore anokwana kuita 7, Uziya wakava mambo paainga no makore anokwana kuita 16 kuveni Josiya wainga no makore anokwana kuita 8. Zvingaita kuti izvi zvainga zviro zvinonesa. Asi azvinenyi no mugariro wavainga nawo, ivona vainga no besero kuti vakwanise kunyisa zvineso no kuva no upenyu unodakajisa.

2. Ngenyi zvinosisira maningi kujija ngo muezaniso ja Jehoashi Uziya na Josiya?

² Itusu atiripi majimambo kana majimambokaji. Asi tingajija zviro zvinosisira kuvha ku majaha matatu aya anonangwari mu Bhaibheri. Ivona vakatema zvivaringo zvaushoni no kutemavo zvivaringo zvimweni zvokuti azvicaingepi zvaushoni. Tecishandisa muezaniso javo, tinozovona kuti ngenyi itusu tinodikana kukheta shamwari jaushoni, kwenderera mberi tecijidodokesa no kuramba tecipsaka Jehovha.

3. Mupiri Mukuru Jehoyadha wakabesera kudini Mambo Jehoashi kuti ateme zvivaringo zvaushoni?

³ Tevejeranyi zvivaringo zvaushoni zvakatemwa ndi Jehoashi. Paainga mujaha, Mambo Jehoashi wakatema civaringo caushoni. Zvecivoneka kuti iyena aacaingepi na baba, wakanasa kuteverera ndhungamiriro jo Mupiri Mukuru Jehoyadha. Mupiri Mukuru uwu wakajijisa Jehoashi inga ari kujijisa mwana wake kamare. Ngo ndava yo muezaniso wa Jehoyadha, Jehoashi wakatema civaringo co kushandira Jehovha no kubeseravo kuti vamweni vazviitevo. Jehoashi wakaita nasiriro kuti themberi ya Jehovha inasirihwe.—2 Kronike 24:1, 2, 4, 13, 14.

4. Tinobesereka kudini ngo kuda Jehovha no kuda mupango jake? (Mazwi Akangwara 2:1, 10-12)

 ⁴ Kudari muri kujijiswa kuda Jehovha no kupona mukuzwirana no ndhungamiriro jake, muri kujijiswa zviro zvinosisira maningi. (Verenganyi Mazwi Akangwara 2:1, 10-12.) Vabari vangajijisa vana vavo ngo njira jakasiyana-siyana. Vonanyi muezaniso wa baba wa hambzaji imweni inodanijwa Katiya kuti vakavabesera kudini kuti vateme zvivaringo zvaushoni. Njiku jese baba wavo pavaivatora kuenda navo kucikora, vaibhuya navo ngo pamusoro po vhesi yo njiku. Hambzaji Katiya vakati: “Kubhuisana uku kwaindibesera kuti ndikwanise kuhwisana no mugariro jandaisongana najo.” Ngozvapi zvamaizoita kudari mukavona kuti zviri kumujijisa vabari venyu ngo pamusoro po Bhaibheri zviri kumuvhisira rusujunuko hwenyu? Zvicinyi zvingamubesera kuti mutendere zvavari kunangaro? Hambzaji imweni inodanijwa Anastansiya inoceukija kuti vabari vayo vakapsaka nguva kuti vasanangure kuti ngenyi ivona vakadira mutemo jakatikuti. Ivona vakati: “Izvo zvakandibesera kuti nditendere zvavaindivhunjaro kusiyapo kuvona inga kuti ndiri kubzinyirihwa asi ndizvivone inga jiviriro inovonesa rudo hwavo kwandiri.”

5. Zvivaringo zvamunotema zvinopsasa kudini vabari venyu na Jehovha? (Mazwi Akangwara 22:6; 23:15, 24, 25)

⁵ Pamunoshandisa mbhangiro jo Bhaibheri jamunopuwa, munozoita kuti vabari venyu vadakare. Cinosisira maningi ngo cokuti munozoita kuti Jehovha adakare no kuita kuti muve no ushamwari wo kwenda no kwenda naye. (Verenganyi Mazwi Akangwara 22:6; 23:15, 24, 25.) Izvi azvimuiti kuti mude kutevejera muezaniso wa Jehoashi paainga ari mujaha?

6. Mupiri Mukuru Jehoyadha paakafa, Jehoashi wakatanga kupurukira mazano aivha kwaani, ngowapi wakava muviyo wakona? (2 Kronike 24:17, 18)

⁶ Jijanyi ngo zvivaringo zvakashata zvakatemwa ndi Jehoashi. Pakupera kufa ka Jehoyadha, Jehoashi wakasana shamwari jakashata. (Verenganyi 2 Kronike 24:17, 18.) Iyena wakakheta kuzwa ndhungamiriro jo vatungamiriri vo Vajudha avo vainga vacikadi Jehovha. Ndizvona kuti Jehoashi waidikana kugara ndhambo no vandhu ava vakashata. (Mazwi Akangwara 1:10) Kusiyapo zvondhozvo, iyena wakasana kupurukira zvakanangwari ngo shamwari jake iji. Perapo hama yake Zakariya payakamuvhunja kuti wainga ecishaisha, wakatumira vandhu kuti vaende komuuraya. (2 Kronike 24:20, 21; Mateu 23:35) Izvi zvainga zvakashata maningi. Jehoashi wakatanga upenyu hwake mu njira yaushoni, asi zvinosuruvarisa ngo zvokuti iyena wakagumira pa kuva mupanduki no muurayi. Pejisire iyena wakazouraiwa ngo varanda vake. (2 Kronike 24:22-25) Izvi azvicaizoitika kudari iyena naakaenderera mberi ecipurukira zvainangwa ndi Jehovha no vandhu vaya vaimuda. Ngozvapi zvamungajija ngo muezaniso wa Jehoashi?

7. Mbhaani vatinodikana kusana kuti vave shamwari jedu? (Vonanyi foto.)

 ⁷ Ciro cimwe catingajija ngo civaringo cakatemwa ndi Jehoashi ngo cokuti tinodikana kusana shamwari jaushoni, jinoda Jehovha no kuda kumudakajisa. Atidikani kusana basi shamwari jo mupira wedu. Ceukijanyi kuti Jehoashi wainga mujaha maningi kupinda shamwari yake Jehoyadha. Ngo kudaro, sotanyi shamwari jamunajo perapo mojivhunjisa kudari: ‘Ijona jinondibesera kuti ndivangise rutendo hwangu kuna Jehovha? Ijona jiri kundivangisa kuti ndipone mukuzwirana no ndhungamiriro ja Jehovha? Ijona jinobhuya ngo pamusoro pa Jehovha no zvokadi zvinosisira zvaanotijijisa? Ijona jinoreremeja ndhungamiriro ja Jehovha? Ijona jino cicunge cokundipangira pazvinodikana weya?’ (Mazwi Akangwara 27:5, 6, 17) Kunasa kunanga, kudari shamwari jenyu ajidi Jehovha imwimwi amudikani kushamwarijana najo. Asi kudari imwimwi muno shamwari jinoda Jehovha, endereranyi mberi mecishamwarijana najo, ijona jinozomubesera maningi.—Mazwi Akangwara 13:20.

8. Kudari imwimwi munoshandisa interneti kuti mubhuye no vamweni, ngozvapi zvamunodikana kurangarira?

⁸ Nyamasi uno, tino manera aushoni okubhuya no ukama no shamwari tecishandisa interneti. Asi vazinji vari kushandisa njira iyi yokubhuisana kuti vashamaise vamweni ngo kudira mafoto, mavhidhiyo, zviro zvavakatenga kana zvavari kuita. Kudari imwimwi munoshandisa interneti, jivhunjisenyi kudari: ‘Cinangwa cangu ngo cokuda kushamaisa vamweni? Cinangwa cangu ngo cokuda kuvhunja vamweni zviro zvaushoni kana vagare vacindisimba? Ndiri kutendera kuti vandhu vari kushandisari interneti vacinje manera angu okurangarira, okuita zviro no okuvereketa?’ Hama Nathan Knorr vakashanda inga umwe wo Mukhumbi Unotonga vakapa zano iri: “Mucaeja kudakajisa vandhu. Ngokuti zvinozoita kuti imwimwi mukonehwe kudakajisa ari wese. Dakajisanyi Jehovha, munozokwanisa kudakajisavo vaya vanoda Jehovha.”

9. Jehovha wakabesera Uziya kuti aitenyi? (2 Kronike 26:1-5)

⁹ Tevejeranyi zvivaringo zvaushoni zvakatemwa ndi Uziya. Mambo Uziya paainga mujaha, wainga mundhu anojidodokesa maningi. Iyena wakajijira ‘kuthya Mwari wokadikadi.’ Uziya wakapona mbhera 68 o makore. Cimwenizve, Jehovha wakamukomborera maningi mu upenyu hwake hwese. (Verenganyi 2 Kronike 26:1-5.) Uziya wakanyisa majinja akawanda aihwisa vandhu va Mwari no kuita kuti dhorobha ro Jerusarema rive rakajiviririka. (2 Kronike 26:6-15) Pacina kukana-kana, Uziya wakadakara maningi pa zvese zvaakakwanisa kuita ngo besero ra Jehovha.—Mucumaeri 3:12, 13.

10. Ngozvapi zvakaitika na Uziya?

¹⁰ Jijanyi ngo zvivaringo zvakashata zvakatemwa ndi Uziya. Mambo Uziya wainga aroveja kupa ndhungamiriro vamweni pa zviro zvavaidikana kuita. Kunanga kuti izvo zvaireva kuti iyena waidikana kuita zviri zvese zvaaida basi? Njiku imweni Uziya wakanghwina mu themberi ya Jehovha woda kupisa rubani, zviro zvokuti majimambo acaitendehwepi kuzviita. (2 Kronike 26:16-18) Mupiri Mukuru Azariya wakaeja kumubesera asi iyena wakanyangajwa maningi. Zvinosuruvarisa ngo zvokuti Uziya aazivi kwenderera mberi akagondeka kuna Jehovha. Ngo kudaro, Jehovha wakamupanica ngo kuva no mapere. (2 Kronike 26:19-21) Izvi azvicaizoitikepi kudari iyena naakaenderera mberi ecizvidodokesa.

11. Ngozvapi zvinozotibesera kuti tienderere mberi tecijidodokesa? (Vonanyi foto.)

¹¹ Uziya paakava mundhu ano simba rakakura maningi, wakamuka kukanganwa manera Jehovha wakamubesera kuti abudirire. Tinojijenyi? Mukuvo wese tinodikana kuceukija kuti makomborero ese atinawo no mabasa atiri kuita anovha kuna Jehovha. Kusiyapo kugara tecijikuja pa zvese zvatinokwanisa kuita, tinodikana kupa rukujo  hwese kuna Jehovha. b (1 Vakorinte 4:7) Kusiyapo zvondhozvo, tinodikana kuzvidodokesa tozwisisa kuti atizivi kukwana. Ngo iyo ndava, tinodikana kutendera kupangihwa. Hama imweni ino makore anokwana kuita 60, yakatara kudari: “Ndakajijira kuva mundhu acikakasiki kunyangajwa vamweni pavanoziva zvandaposa. Nguva jimweni ndinotoita zviro zvicikaripi zvaushoni ndogumira pakupangihwa. Asi ndinoenderera mberi ndecisota kumbeji ndecishandira Jehovha.” Patinozwira Jehovha toramba tecijidodokesa tinova no mudakaro wokadi.—Mazwi Akangwara 22:4.

12. Josiya paainga mujaha wakaitisa kudini kuti ave no ushamwari hwo phedo na Jehovha? (2 Kronike 34:1-3)

¹² Tevejeranyi zvivaringo zvaushoni zvakatemwa ndi Josiya. Josiya wainga no makore anokwana kuita 16 paakatanga kuva no usamwari wo phedo na Jehovha. Iyena waida kujija zvakawanda ngo pamusoro pa Jehovha no kuda kwake. Asi asipi nguva jese zviro zvaireruka kuno mujaha uwu waingari mambo. Pamukuvo uwu vandhu vainamata zvimwari zvokunyepa. Josiya wakadikana kuva no cicunge kuti akwanise kujivirira kunamata kwakacena. Izvi ndizvona kamare zvaakaita. Iyena aacainga nee no makore anokwana kuita 20 paakapeja kunamata kokunyepa munyikemo.—Verenganyi 2 Kronike 34:1-3.

13. Kujipira kwamakaita kuna Jehovha kunorevenyi kwamuri?

¹³ Pikija imwimwi muri mujaha mungakwanisa kutevejera Josiya ngo kupsaka Jehovha no ndhungamiriro jake. Izvi ndizvona zvinozoita kuti imwimwi mude kupira upenyu hwenyu kuna Jehovha. Waro, civaringo ici cinozopsasa kudini upenyu hwenyu? Hama Ruka vakabhabhatijwa vano makore anokwana kuita 14, vakati: “Kutangira wari kuenda mberi ndinodira kushandira kwangu Jehovha pakutanga mu upenyu hwangu no kuita kuti iyena adakare.” (Marko 12:30) Ivanyi no cokwadi cokuti imwimwi munozokomborehwa maningi kudari mukaita zvakafanana.

14. Ipanyi muezaniso munganani jo majaha ari kutevejera muezaniso wa Mambo Josiya.

¹⁴ Inga mushandiri wa Jehovha ari mujaha, ngozvapi zvineso zvamungasongana nazvo? Hama Jona vakabhabhatijwa no makore anokwana kuita  12, vanonanga kuti vakavangirijwa maningi ngo vadoni vavo vo kucikora kuti vabheme. Kuti vakwanise kucungirira kuvangirijwa kwavaithwari, ivona vakaceukija kuti kubhema kwaizokhuvaza uhomi hwavo no kukhuvaza ushamwari hwavo na Jehovha. Hambzaji Rakeri vakabhabhatijwa no makore anokwana kuita 14, vanosanangura zvinovabesera kuti vakwanise kuhwisana no muejo kucikora. Ivona vakati: “Ndinoeja kuzwiranisa zvese zvandinovona no zvandinojija mu Bhaibheri. Inga muezaniso, pandinojija dhisipirina yo shitoriya kangaije ndingatorangarira ciporofita ciri cese co mu Bhaibheri. Nguva jimweni pandinobhuya no ari wese kucikora ndingatoceukija vhesi iri yese, ndotomuvhunja mundhuwo.” Zvineso zvamungasongana nazvo zvingatosiyana no zvakasongana na Josiya. Pikija zvakadaro, imwimwi mungakwanisa kukhombija uzivi no kuva makagondeka inga manera iyena wakaita. Kuhwisana no muejo pamunonga muri mujaha zvinozomubesera kuti mukwanise kuhwisana no zvineso zvamunozosongana nazvo kumbejiyo.

15. Zvicinyi zvakabesera Josiya kuti ashandire Jehovha naakagondeka? (2 Kronike 34:14, 18-21)

¹⁵ Mambo Josiya paainga no makore anokwana kuita 26, wakatanga kunajirira themberi. Ndipona pakawanika “bhuku ro Mupango wa Tenji Mwari, wakapuwa ndi Mosi.” Mambo paakazwa zvainga zvakatahwa mu bhuku iri ngo kukasika wakaita cinjo kuti aite zvaingaro zvakatahwa mondhomo. (Verenganyi 2 Kronike 34:14, 18-21.) Imwimwi makamboverenga Bhaibheri njiku jese? Kudari makamboverenga, kureva kuti zviri kubudirira? Munoanja kutarira vhesi nganani jingazomubesera? Hama Ruka vambonangwaya, vanotarira pa kadherno zviro zvavadakarira zvavawana pavainga veciverenga. Kuita zvakafanana kungamubeseravo kuti mukwanise kuceukija zviro zvinosisira zvamawana pamainga meciverenga. Kudari mukaverenga maningi Bhaibheri munoguma pakuda kushandira maningi Jehovha. Kudari inga ndi Josiya wakakwanisa kubesehwa ngo Soko ra Mwari irona rinozokwanisavo kumubesera.

16. Ngenyi Josiya wakaguma pakuita cishaishi cikuru, tinojijenyi ngo zvaakaitikaro?

¹⁶ Jijanyi ngo zvivaringo zvakashata zvakatemwa ndi Josiya. Josiya paainga no makore  anokwana kuita 39, iyena wakatema civaringo cakadira upenyu hwake pa ngozi. Kusiyapo kuthemba ndhungamiriro ja Jehovha, iyena wakajithemba pacake. (2 Kronike 35:20-25) Tinojija zviri zvese ngo zvaakaitari. Azvinenyi dangani taavasharuka kana taano makore akawanda tecishandira Jehovha, nguva jese tinodikana kwenderera mberi tecipsaka ndhungamiriro ja Jehovha. Kuti tikwanise kuita izvi tinodikana kuita mukumbiro nguva jese, tecipsaka ndhungamiriro no kupsaka besero ku hama jakaivha kudivi ro umwari. Tikaita izvi atizogumiri pa kuita cishaishi cikuru. Cimwenizve, tinozova no mudakaro.—Jakobo 1:25.

17. Zviro zvapi zvinosisira zvatajija ngo majimambo matatu aya o Judha?

¹⁷ Kuno zviro zvakawanda maningi zvinodakajisa zvamungaita pamunonga muri mujaha. Muezaniso ja Jehoashi, Uziya na Josiya jinovonesa kuti imwimwi mungakwanisa kutema zvivaringo zvaushoni zvinodakajisa Jehovha pikija pamunonga muri mujaha. Ngo zvokadi kuti ivona vakagumira pa kuita zvishaishi zvakava no muviyo jakashata maningi. Asi kudari imwimwi mukatevejera muezaniso javo jaushoni motama kuita zviro zvakashata zvavaiitaro, upenyu hwenyu hunozova unodakajisa.

18. Muezaniso japi jinonangwa mu Bhaibheri jinovonesa kuti mungakwanisa kuva no upenyu unodakajisa? (Vonanyi foto.)

¹⁸ Bhaibheri rinonangazve ngo muezaniso jo majaha amweni akava no ushamwari wo phedo na Jehovha vogumira pa kuva no makomborero anovha kwaari no kuvazve no mudakaro. Dhavhidhi ndi umwe wavo. Paainga ari mujaha, Dhavhidhi wakazwira Jehovha, pakufamba ko nguva iyena wakazova mambo. Ndizvona kuti Dhavhidhi wakaita zvishaishi zvinganani. Asi Jehovha wakamuvona inga mundhu wakagondeka kwaari. (1 Majimambo 3:6; 9:4, 5; 14:8) Madini kupsaka nguva kuti mujije ngo pamusoro pa Dhavhidhi. Zvokadi kamare, munozobesereka maningi ngo muezaniso wake moenderera mberi mecishandira Jehovha makagondeka. Mungatosanavo kujija ngo muezaniso wa Marko na Timoti, ivona vakatanga kushandira Jehovha pavainga vari majaha kamare. Vakaita izvi mu upenyu hwavo hwese. Vakawana unyasha hwa Jehovha vova no mudakaro mu upenyu hwavo.

19. Munoda kuti upenyu hwenyu huve hwakadini?

¹⁹ Manera amunoshandisa upenyu hwenyu wari, anozovonesavo manera unozova upenyu hwenyu kumbejiyo. Kudari mukathemba Jehovha kusiyapo kujithemba pacenyu, nguva jese anozomubesera kuti muteme zvivaringo zvaushoni. (Mazwi Akangwara 20:24) Imwimwi mungava no zviro zvakawanda no mudakaro mu upenyu asi ceukijanyi kuti Jehovha anoreremeja maningi zvamunomuitira. Kuita zvese zvamunokwanisa kuti mushandire Baba wedu vano rudo i ciro caushoni maningi camungaita mu upenyu hwenyu.