1. Mukuvo mushomani Pedhru acito afa, Jehovha wakamushandisa kuti aitenyi?

 MUPOSTORI Pedhru waizviziva kuti waizofa pa mukuvo mushomani. Pa mukuvo wese wo basa rake naakagondeka iyena waifamba na Jesu Kristu, iyena wakacumaera masoko akanaka no kushanda inga umwe wo mukhumbi unotonga. Asi basa ra Pedhru rainga ricito rapera. Mu makore o 62-64 Kristu Aviya, iyena wakafemehwa kuti atare mabhuku maviri o mu Bhaibheri, Pedhru wokutanga no wo cipiri. Pedhru waivetera kuti karata iji jibesere Makristu pikija paaizofa.—2 Pedhru 1:12-15.

2. Ngenyi karata mbiri ja Pedhru jakatahwa pamukuvo kwawo?

² Pedhru wakatara karata jake pamukuvo wo kuti hama no hambzaji jaisongana no “muejo jakasiyana-siyana.” (1 Pedhru 1:6) Vanarume vakashata vakaeja kusvipisa ungano ngo jijiso jokunyepa no mufambiro jicizivi kucena. (2 Pedhru 2:1, 2, 14) Pamukuvo mushomani Makristu o ku Jerusarema aizohwisana no “kupera ko zvese.” Masoca o Ciroma aizoparaja dhorobha ro Jerusarema no utongi wo Cijudha. (1 Pedhru 4:7) Pacina kukana-kana, karata ja Pedhru jakabesera Makristu kuti azive zvokuita pakuhwisana no matambujiko aya no amweni aizoviya kumbejiyo. b

3. Ngenyi tinodikana kubatisisa maningi zvakatahwa mu karata iji ja Pedhru?

³ Ndizvona kuti Pedhru wakatara karata iji kuitira Makristu aipona mukuvo wondhowo, asi Jehovha waida kuti karata iji jiwanike mu Soko rake. Ngo kudaro, itusu tingabeserekavo  ngo karata iji. (Varoma 15:4) Itusu tiri kupona mu nyika yakashatisisa maningi yo kuti vandhu vazinji avashandiri Jehovha, ndiyo ndava, tinosongana no zvineso zvakasiyana-siyana zvinoita kuti tinesehwe kumushandira. Kusiyapo zvondhozvo, tinozosongana no dambujiko guru kupinda rakasongana no Vajudha. Ngo iyo ndava, zviceukijo zvatinowana mukarata mbiri iji jakatahwari ndi Pedhru zvinosisira maningi. Izvona zvinozotibesera kuti tigare takangwarira kuviya ko njiku ya Jehovha, kuti tinyise kuthya kwedu vandhu no kukhombijirana rudo umwe kuno umweni. Zviceukijo zvakadari zvingabeseravo vakuru kuti vakwanise kuvona manera avangabesera mavhuta.

4. Mukuzwirana na 2 Pedhru 3:3, 4, ngozvapi zvaizorembesa rutendo hwedu?

⁴ Itusu takatendenejwa ngo vandhu vacikatendi zviporofita zvo Bhaibheri. Vandhu vanotiteverera vangatishora ngokuti tiri kubhuya ngo pamusoro po kuparajwa ko nyika ino ko mukuvo wakareba. Vamweni vanonanga kuti mugumo auzoviyi narini. (Verenganyi 2 Pedhru 3:3, 4.) Patinozwa zviro zvakadari zvecinangwa ngo vandhu vatinocumaera, vadoni vo kubasa kana vo pa mbhuri, rutendo hwedu ungaguma pakurembejeka. Pedhru anosanangura zviro zvingatibesera.

5. Ngozvapi zvinozotibesera kuti tivetere no kusengerera mugumo wo nyika ino? (2 Pedhru 3:8, 9)

⁵ Vamweni vangatovona kuti Jehovha ari kunonoka kupeja zviro zvakashata zviri kuithwa mu nyika ino. Asi masoko a Pedhru angatibesera kuti tive no mavonero akanaka, eciticeukija kuti manera Jehovha anovona nguva akasiyana no manera anovona vandhu. (Verenganyi 2 Pedhru 3:8, 9.) Kuna Jehovha ciuru co makore cakadari inga njiku imwe. Jehovha anosengerera, aadi kuti mundhu ari wese aparajwe. Asi nguva yaakasana ikambhera ngo kuguma, anozopeja ushati hwese. Itusu tino cidakajiso co kushandira Jehovha pa nguva yasarari kuti ticumaere masoko akanaka kuno vandhu mu nyika yese.

6. Ngozvapi zvatinodikana kuita kuti “tinase kuziva kuguma ko njiku ya Jehovha?” (2 Pedhru 3:11, 12)

⁶ Pedhru anotivangisa kuti tinase kuziva “kuguma ko njiku ya Jehovha.” (Verenganyi 2 Pedhru 3:11, 12.) Tingazviitisa kudini? Kudari zvecikwanisika, ngatirangarijisise ngo makomborero atinozowana mu nyika mukuvo wese. Amborangariranyi mecigara mu ndau yaushoni, meciha zvokuha zvinodakajisa, meciashira ukama no shamwari wapera kumuswa kuvha ko vakafa no kujijisa vandhu vakapona kare kukwanirisika ko zviporofita zvo Bhaibheri. Kurangarijisisa zviro izvi, kunomubesera kuti muenderere mberi mecivetera no kuthemba kuti mugumo waaphedo. Ngo kuziva zvinozoitika kumbeji kwedu ‘nguva iciripo . . . atizopauswi’ ngo vajijisi vo kunyepa.—2 Pedhru 3:17.

7. Kuthya mundhu kungatipsasisa kudini?

⁷ Tinonasa kuziva kuti njiku ya Jehovha yaaphedo, ndiyo ndava tinoita zvese zvatinokwanisa kuti tivhunje vamweni masoko akanaka. Asi nguva jimweni, ngo ndava yo mugariro watinonga tinawo tingagumira pakutama kuva no cicunge. Ngenyi? Ngokuti tingagumira pa kuthya inga zvakaithwa ndi Pedhru. Pausiku Jesu acito afa, Pedhru wakaramba kuti iyena wainga umwe wo vateveri va Jesu wogumira pakuramba Jesu. (Mateu 26:69-75) Pedhru wakakwanisa kunyisa kuthya kwake zvoita kuti pakufamba ko nguva atare no kukhohwa kwese kuti: “Mucathya  zvavanothya nee amudikani kucamwa.” (1 Pedhru 3:14) Zvakanangwari ndi Pedhru zvinotikhohwesavo kuti itusu tingakwanisa kunyisa kuthya.

8. Zvicinyi zvingatibesera kuti tinyise kuthya vandhu? (1 Pedhru 3:15)

⁸ Zvicinyi zvingatibesera kunyisa kuthya kwatinoita vandhu? Pedhru wakati: “Mu mwoyo mwenyu, cenesanyi Kristu Mambo.” (Verenganyi 1 Pedhru 3:15.) Izvi zvinobatanija kurangarijisisa ngo cigaro no simba rina Mambo wedu Jesu Kristu. Kudari mukava no mukana wo kucumaera masoko o Umambo motanga kuthya kana kunyangajwa, ceukijanyi Mambo wedu. Ejanyi kuvona Mambo wedu wakagara pa kadera yake yo Umambo wakatendenejwa ngo zviuru no zviuru zvo ngirozi. Ceukijanyi kuti iyena wakapuwa ‘simba rese mudenga no pasi’ nokutizve iyena wakananga kuti “zivanyi kuti ndina imwimwi mbhera pa kupera ko nyika.” (Mateu 28:18-20) Pedhru anotingwaja kuti mukuvo wese “tigare takanasiririka kuitira kujivirira rutendo hwedu.” Imwimwi maidakarira kucumaera mudoni wo kubasa kana wokucikora kana kumwenivo? Rangariranyi shwiro yamungabhuya no manera amungazvibhuya ndiwona. Itanyi mukumbiro mecikumbira cicunge no kuthemba kuti Jehovha anozomubesera kuti mukwanise kunyisa kuthya kwamunoita vandhu.—Mabasa o Vapostori 4:29.

9. Pavhaza imweni, kuitisa kudini Pedhru wakakonehwa kukhombija rudo? (Vonanyi foto.)

⁹ Pedhru wakajijira manera o kukhombijira rudo. Iyena wakazwa Jesu ecinanga kuti: “Ndiri kumupa mupango mupsa, kuti mudisane ngocenyu; inga zvandakamuda, imwimwivo disananyi ngocenyu.” (Johani 13:34) Pikija zvakadaro, pakufamba ko nguva Pedhru wakaramba kuha no hama no hambzaji jainga jicikaripi Vajudha. Mupostori Pauro wakatonanga kuti zvakaithwari ndi Pedhru kwainga ‘kucengeja.’ (Vagaratiya 2:11-14) Pedhru wakatendera mbhangiro yaakapuwari, wojijira ndizvona. Mu karata mbiri jaakatarari wakananga kuti Makristu aadikani basi kunanga kuti anoda hama no hambzaji javo asi anodikana kukhombija izvi ngo zviito.

10. Zvicinyi zvingatibesera kuti tikwanise kuda hama ‘ticikacengejeri?’ Sananguranyi. (1 Pedhru 1:22)

¹⁰ Pedhru wakananga kuti tinodikana kuda hama no hambzaji jo mu ungano ‘ticikacengejeri.’ (Verenganyi 1 Pedhru 1:22.) Kuti tide hama no hambzaji jedu tinodikana kuzwira “cokwadi.” Cokwadi ici cinokhombija “kuti Mwari aakheti.” (Mabasa o Vapostori 10:34, 35) Aticaizokhombijepi kuti tiri kuzwira mupango wa Jesu kudari tikava vandhu vanokheta mu ungano. Ngozvokadi kuti tingava no ushamwari wakavanga maningi no vandhu vamweni kusiyapo vamweni, inga zvakaithwa ndi Jesu. (Johani 13:23; 20:2) Pedhru anoticeukija kuti tinodikana ‘kuda hama’ inga manera atinoda vandhu vo pa mbhuri pedu.—1 Pedhru 2:17.

11. Kuda vamweni “ngo mwoyo wese” kunorevenyi?

¹¹ Pedhru anotivangisa kuti “tidisane ngo cedu ngo mwoyo wese.” Kuda ngo mwoyo wese zvinoreva kuda mundhu pikija pazvinonga zvecinesa kuti mukhombije kuti munomuda. Inga muezaniso, ngozvapi zvamaizoita kudari hama ikamukhugunya yoita zviro zvokuti imwimwi amuzivi kuzvidakarira? Kangaije zviro zvataizoita kumuhwirijira ngo njira yondhoyo kusiyapo kumukhombijira rudo. Asi Pedhru wakajijira ndi Jesu kuti mugariro jakadari ajidakajisi Jehovha. (Johani 18:10, 11) Pedhru wakatara kuti: “Mucahwirijira ushaishi ngo ushaishi, kutukwa ngo kutuka. Asi pa ndau pazvo komboreranyi.” (1 Pedhru 3:9) Kudari mukada hama ngo mwoyo wese munozovataja ushoni pikija pavanomunyangajisa.

12. (a) Kuda vamweni ngo mwoyo wese kunotibesera kuti tiitenyi? (b) Mukuzwirana no vhidhiyo inoti, Batisisanyi Cipo Cinosisira co Rubatano, munodikana kuvangisira kuti muitenyi?

¹² Pakarata yake yo kutanga, Pedhru wakashandisa gama ro kuti “disananyi maningi.” Rudo wakadari unotibesera kuti tiregerere kuciripi basi zvishaishi zvishoma asi “zvishaishi zvakawanda.” (1 Pedhru 4:8) Kangaije Pedhru wakaceukija zvaainga akajijiswa ndi Jesu ngo pamusoro po kuregerera. Pamukuvo uwu, kangaije Pedhru wairangarira kuti iyena wainga eciva mundhu wakanaka paakananga kuti hama yake inodikana ‘kumuregerera kanomwe.’ Asi Jesu wakajijisa Pedhru pamwepo na itusu kuti tinodikana kuregerera ko vhaza jinokwana “makumanomwe na runomwe” kana kuti pese pazvinokwanisika weya. (Mateu 18:21, 22) Kudari munovona kuti zvinonesa kushandisa mbhangiro iyi, mucadoremba. Ngo ndava yo kuva kwedu vandhu vacikazivi kukwana tinonesehwa maningi kuregerera nguva jimweni. Cinosisira maningi i kuregerera hama yenyu no kuita runyararo nayo. c

13. Zvicinyi zvingaita kuti vakuru vakonehwe nguva yokuhavisa hama no hambzaji javo?

¹³ Zvokadi kamare, Pedhru narini aazivi kukanganwa zvaakavhunjwa ndi Jesu pasure po kumuswa kwake: “Havisai zvimavhuta zvangu.” (Johani 21:16) Kudari imwimwi muri mukuru munozviziva kuti magama aya anoshandavo kwamuri. Ndizvonadi kuti zvinganesa kuti mukuru awane nguva inokwana kuti akwanise kuita basa iri rinosisirari maningi. Pakutanga vakuru vanodikana kutaja mbhuri yavo kudivi ro kunyama, no kuvabesera kuti vave phedo na Jehovha. Kusiyapo zvondhozvo, vanodikana kugaja muezaniso waushoni pa basa ro kucumaera no kunasirira mativi avo no kumaita pa musongano no mu magungano. Vamweni vano mutoro wokushanda pa Cikwata co Dare Rinoshanda no Shipitari kuveni vamweni vanoshanda mu Bauhwa Rinovonerera Zvokuvaka. Pacina kukana-kana, vakuru vakabatikana maningi.

14. Zvicinyi zvingabesera vakuru kuti vahavise mushambi? (1 Pedhru 5:1-4)

¹⁴ Pedhru wakavhunja vakuru kudari: “Havisanyi mushambi wa Mwari.” (Verenganyi 1 Pedhru 5:1-4.) Kudari imwimwi muri mukuru, tinozviziva kuti munoda maningi hama jenyu no hambzaji no kuda kuvataja. Asi nguva jimweni mungatovona kuti imwimwi makaremba maningi, makabatikana kana amutokwanisi kuita basa renyu. Waro ngozvapi zvamungaita? Vhunjanyi Jehovha manera amuri kujizwa. Pedhru wakatara kudari: “Kudari mundhu ecishandira, ngaashandire ngo simba ra Mwari; kuti Mwari apuwe nduma.” (1 Pedhru 4:11) Kangaije hama no hambzaji jiri kusongana no zvineso zvokuti zviri kunesa kupera mu nyika ino yatiri kuponari. Asi ceukijanyi kuti “muhavisi mukuru” Jesu Kristu, anokwanisa kuvataja ushoni kupinda imwimwi. Iyena anokwanisa kuita zvondhozvo wari no mu nyika imbza. Mwari anokumbira basi kuti vakuru vade hama no kuvahavisa ushoni no kuva “muezaniso ku mushambi uwu.”

15. Hama imweni iri mukuru inovangisa kudini mavhuta? (Vonanyi foto.)

¹⁵ Hama Wiriyamu vari kushanda inga mukuru ko makore akawanda, vanozwisisa kuti kuhavisa hama kunosisira maningi. Mutungu wo korona vhiru pawakatanga, ivona no  vakuru vamweni vo mu ungano yavo vakatema civaringo co kubhuya no hama imwe nga imwe yo mucikwata cavo co mubasa ro kucumaera. Ivona vakasanangura kuti ngenyi vakaita izvi: “Hama zinji jainga jiri jega mu mamuzi majo, zvaizoreruka kuti jitange kurangarira zviro zvicikazivi kunaka.” Hama painonga yecihwisana no cineso ciri cese, hama Wiriyamu vanonasa kuipurukira no kuvona kuti vangaibesera ngo njira yapi. Perapo, vanoeja kupsaka mabhuku ari ese kana vhidhiyo kuti vakwanise kubesera hameyo. Ivona vakati: “Wari zvinosisira maningi kuhavisa hama kupinda kare. Itusu tinovangisira maningi kuti tibesere vandhu vacikazivi Jehovha. Ngo kudaro, tinodikana kuita zvakafanana pa kubesera hama jedu kuti jienderere mberi jiri mu cokwadi.”

16. Tingaitisa kudini kuti tishandise zvatajija mu karata mbiri ja Pedhru?

¹⁶ Mbhera apa tavona zvijijo zvinganani basi zvatinowana pakarata mbiri jakatahwari ndi Pedhru. Kangaije mavona ndau iri yese yamunodikana kuitisa nane. Inga muezaniso, maidakarira kurangarijisisa ko vhaza jakawanda ngo pamusoro po makomborero amunozowana mu nyika imbza? Kunanga kuti maidakarira kupa ucapupu kucikora, kubasa kana ku ndau imweni? Munokwanisa kurangarira ngo njira iri yese yamungakhombija ndiyona kuti munoda hama no hambzaji jenyu? Imwimwivo vakuru, makanasiririka kuti muhavise mavhuta a Jehovha ngo mwoyo wese? Kangaije mungatovona kuti munodika kuitisa nane mativi amweni, asi mucadoremba. “Mambo wakanaka,” iyena anozomubesera kuti mukwanise kuita cinjo jinodikana. (1 Pedhru 2:3) Pedhru anotigondesa kudari: “Mwari . . . anozopejisa kurovejwa kwenyu. Iyena anozomuvangisa, anozomupa simba, iyena anozomudira pa maambo akavanga.”—1 Pedhru 5:10.

17. Ngowapi unozova muviyo kudari tikasiya kuti Jehovha atijijise?

¹⁷ Pakutanga Pedhru wairangarira kuti acaifanera kugara na Jesu. (Ruka 5:8) Asi ngo besero ra Jehovha na Jesu, Pedhru wakakwanisa kucungirira inga muteveri wa Kristu. Muviyo wakava wokuti Jehovha wakatendera kuti Pedhru ave “mu nduma yo Umambo hwa Mambo no Muponesi wedu Jesu Kristu.” (2 Pedhru 1:11) Uwu wakava mupfupo unoshamaisa maningi. Inga ndi Pedhru, kudari mukatendera kushandiswa ndi Jehovha munozoashira mupfupo wo upenyu ucingaperi. Ngo njira iyi, munozokwanisa “kuwana ruponeso hwenyu ngo rutendo hwenyu.”—1 Pedhru 1:9.