1. Rutongeso hwapi unozoitika sambiri pano?

 ITUSU, tiri kupona pa mukuvo wokunesa. Sambiri pano, Jesu anozotonga vandhu vese vari kurarama pasi pano. Jesu wakavonesa kuti mugumo waaphedo ngo kupa vajiji vake ‘citatijo’ co kuviya kwake no “cokupera ko nyika ino.” (Mateu 24:3) Citatijo ici cakatahwa pa bhuku ra Mateu cipauko 24 na 25 no mu zviitiko zvinowanika pana Marko cipauko 13 na Ruka cipauko 21.

2. Ngozvapi zvatiri kuda kuvona mu cijijo cino, ngenyi zvondhozvo zvinozotibesera?

² Jesu wakashandisa muezaniso iji kuti atibesere kuti tive takanasiririka. Ngo kudaro, muezaniso iji jinoshanda inga ngwajo kwatiri. Muezaniso iji ngo jo mavhuta, mbuji, mbhandwe jainga jakangwara no jainga marethe no matarenta. Muezaniso iji jinozotibesera kuzwisisa kuti Jesu anozotonga mundhu umwe nga umwe mukuzwirana no zviito zvake. Patinonga tecisotesesa muezaniso iji, tinozovona zvijijo zvatinowana no manera atingazvishandisa. Muezaniso wokutanga watiri kuda kuvona, ngo wo mavhuta no mbuji.

MAVHUTA NO MBUJI

3. Ndirini Jesu paanozotonga mavhuta no mbuji?

³ Pa muezaniso wo mavhuta no mbuji, Jesu wakananga kuti waizotonga vandhu mukuzwirana no manera ovakadavira masoko akanaka no kubesera hama jo kuzojwa. (Mateu 25:​31-46) Mukati mo “dambujiko guru,” Jesu anozosana ngoapi mavhuta, ngojapi mbuji, ozoita rutongeso Armagedhoni icito yatanga. (Mateu 24:21) Inga muhavisi anoparajanisa mavhuta no mbuji, Jesu anozoparajanisa vaya vakabesera Makristu okuzojwa no vaya vacizivi kubesera.

4. Mukuzwirana na Isaia 11:​3, 4, ngenyi tingava no cokwadi cokuti Jesu anozotonga vandhu ngo njira yo ururami? (Vonanyi fo yo )

 ⁴ Ciporofita co mu Bhaibheri cinovonesa kuti Jesu inga mutongi wakasanwa ndi Jehovha, anozotonga ngo njira yo urungami. (Verenganyi Isaia 11:​3, 4.) Jesu anozosotesesa no kungwarira kwese mugariro wo mundhuwo, zvaanoita no zvaanobhuya. (Mateu 12:​36, 37; 25:40) Jesu anozoziva kuti ndiyani wakabesera hama jake jokuzojwa pa basa ravo. a Njira imwe ingabesera ndiyona mavhuta hama ja Kristu, ngo yo kucumaera masoko akanaka. Vaya vakapa besero iri, vanozotongwa inga “varurami” no kuzova no “upenyu hucikaperi” pa nyika. (Mateu 25:46; Apokaripsi 7:​16, 17) Vaya vanoenderera mberi vakagondeka, vanozowana mupfupo unoshamaisa maningi. Vaya vanozoenderera mberi vakagondeka mukati mo dambujiko guru, mazina avo anozotahwa mu “bhuku ro upenyu.”—Apokaripsi 20:15.

5. Tinojijenyi kuvha ku muezaniso wo mavhuta no mbuji, ndivanaani vanobesereka ngo muezaniso uwu?

⁵ Ivanyi makagondeka. Muezaniso wa Jesu wo mavhuta no mbuji unonangira maningi-ningi vaya vano vetero yo kuzorarama pasi pano. Vanovonesa rutendo hwavo haiwa basi pa kubesera hama ja Kristu mu basa ro kucumaera asi ngo kutendera kutungamirihwa ngo cikwata cidoko co hama jo kuzojwa jakagajwa ndi Jehovha. (Mateu 24:45) Vaya vano vetero yo kuzorarama kudenga vanodikana kunasa kupurukira ushoni ngwajo iri pa muezaniso wo mavhuta no mbuji. Ngenyi? Ngokuti Jesu, anosotesesa mufambiro wavo, zvavanoita no zvavanobhuya. Cimwenizve, ivona vanodikanavo kukhombija kuti vakagondeka. Ngo divi rimweni, Jesu wakabhuyavo ngo muezaniso muviri jino ngwajo kuitira basi Makristu okuzojwa. Muezaniso uwu, tinouwana mu bhuku ra Mateu cipauko 25. Wari tiri kuda kubhuya ngo pamusoro po mbhandwe jainga jakangwara no jainga marethe.

MBHANDWE JAINGA JAKANGWARA NO JAINGA MARETHE

6. Mbhandwe shanu jakakhombijisa kudini kuti jainga jakangwara? (Mateu 25:​6-10)

⁶ Pa muezaniso wo mbhandwe, Jesu wakabhuya ngo gumi ro mbhandwe jakaenda koashira mukwambo. (Mateu 25:​1-4) Jese jainga jecivetera kuperekeja mukwambo ku mabuso o mucadho wake. Jesu wakananga kuti, mbhandwe shanu “jaingwara” kuveni mbhandwe jimweni shanu jainga “marethe.” Mbhandwe jainga jakangwara jainga jakanasiririka no kugara jakarinda. Ijona jainga jakanasiririka jecivetera mukwambo pikija paaizoguma no usiku. Ijona jakavisa zvibani no mafuta kuti jibwakije pa ndau yainga no cidima. Kusiyapo basi mafuta ainga mu zvibani, ijona jainga jakaviya no amweni pa mutivi kutira kuti mukwambo akanonoka, jizoshandisa. Ngo kudaro, ijona jainga jakanasiririka kuti zvibani zvajo zvienderere mberi zvecibwaka. (Verenganyi Mateu 25:​6-10.) Mukwambo paakaguma, mbhandwe jainga jakangwara jakaenda naye ku mabuso o mucadho. Mukufananavo, Makristu okuzojwa akakhombija kuva akarinda no kugondeka mbhera kuviya ka Kristu, vanozovoniwa kuti vanofanera kuti vabatane pamwepo no mukwambo uwo ari Jesu mu Umambo hwake kudenga. b (Apokaripsi 7:​1-3) Zvicinyi zvakazoitika no mbhandwe shanu jaingaya marethe?

7. Ngozvapi zvakaitika no mbhandwe shanu jainga marethe, ngenyi?

 ⁷ Mukusiyana no mbhandwe shanu jakangwara, mbhandwe shanu jaingaya marethe ajicaingepi jakanasiririka mukwambo paakaguma. Zvibani zvajo zvainga zvooda kujima. Ijona ajicaingepi no mafuta amweni ainga akavigwa pa mutivi. Pojakaziva kuti mukwambo wainga woda kuguma, jakaenda kotenga mafuta. Mukwambo paakaguma, ijona jainga jicito javiya. Asi mbhandwe jaingaya jakanasiririka, jakanghwina naye pa mabuso o mucadho, musuvo wofungwa. (Mateu 25:10) Mbhandwe jaingaya marethe pojakaviya kotenga mafuta jogogoja musuvo kuti jinghwine, mukwambo wakajivhunja kudari: “Andimuzivi.” Mbhandwe iji ajicaingepi jakanasiririka kuitira mukuwo wese wojaizopeja jecivetera mukwambo. Vokuzojwa vanojijenyi?

8-9. Makristu o kuzojwa anojijenyi ngo muezaniso wo mbhandwe? (Vonanyi foto.)

⁸ Garanyi makanasiririka no kurinda. Jesu aacaidepi kunanga kuti kuno zvikwata zviviri zvo vokuzojwa, cimwe cinozova cakanasiririka pa kuvetera kupera ko nyika ino, cimweni cicizivi kunasiririka. Asi iyena wainga ecinanga kuti ngozvapi zvaizoitika no Makristu aya okuti aacaingepi akanasiririka kuti acungirire akagondeka mbhera kupera ko nyika. Pa mugariro wakadari, ivona avacaizoashirepi mupfupo wavo. (Johani 14:​3, 4) Izvi zvinosuruvarisa maningi. Azvinenyi dangani vetero yedu ngo yo kurarama pasi pano kana kudenga, tese tinodikana kunasa kubatisisa ushoni muezaniso uwu wo mbhandwe. Umwe na umwe wedu anodikana kuva akarinda no kunasiririka kuti acungirire mbhera ku magumo.—Mateu 24:13.

⁹ Pa kupera kubhuya ngo muezaniso wo mbhandwe, kuitira kuvonesa kuti tinodikana kuva takarinda, Jesu wakabhuya ngo muezaniso wo matarenta. Muezaniso uwu, unobhuya maningi ngo pamusoro po kuva vandhu vanoshanda ngo simba.

MATARENTA

10. Varanda vaviri vakakhombijisa kudini kugondeka? (Mateu 25:​19-23)

¹⁰ Pa muezaniso wo matarenta, Jesu wakabhuya ngo varanda vaviri vainga vakagondeka  kuna patarau wavo no muranda umwe wainga acizivi. (Mateu 25:​14-18) Varanda vaviri vakavonesa kugondeka ngo kushanda ngo simba kuti vaengejere matarenta ovainga vakapuwa ndi patarau wavo. Patarau wavo acito aita hwendo, wakavathemba wovapekeja mutengo wakawanda wo matarenta. Varanda vaviri ava vaingari vakagondeka vakashanda ngo simba no kushandisa mare ngo uzivi. Ngowapi wakava muviyo? Patarau wavo paakazoviya, ivona vainga no matarenta akawanda kupinda ovakasiihwaya. Patarau wavo wakavasimba, ‘vodakara pamwepo na patarau wavo.’ (Verenganyi Mateu 25:​19-23.) Muranda wocitatu, wakaitenyivo? Ngozvapi zvaakaitavo no tarenta rimwe raakapuwa ndi patarau wake?

11. Zvicinyi zvakaitika no muranda waingaya no “nungo,” ngenyi?

¹¹ Muranda wocitatu, wakapuwa tarenta rimwe, asi wakava no “nungo.” Kusiyapo izvo, iyena wakarifushira pasi. Patarau paakaviya, muranda uwu aacaingepi no matarenta akawanda kuti apekeje patarau wake kupinda rimwe raakapuwaya. Muranda uwu aacaingepi waushoni. Kusiyapo kukumbira kuregerehwa ngo kukonehwa kuengejera tarenta raaingaya akapuwa ndi patarau wake, muranda uwu, wakakhwederera patarau wake ovavhunja kuti: “Patarau, ndaizviziva kuti makacunga.” Muranda uwu aazivi kutendehwa ndi patarau wake. Kusiyapo izvo basi, wakatorehwa tarenta raaingaya naro wogogomehwa pamuzi pa patarau wake.—Mateu 25:​24, 26-30.

12. Varanda vaviri vaingaya vakagondeka vanoimirira ani nyamasi uno?

¹² Varanda vaviri ava vakagondeka, vanoimirira Makristu okuzojwa akagondeka. Jesu uwo ari patarau, anovakoka eciti: ‘Dakaranyi pamwepo na patarau wenyu.’ Ivona vanoashira mupfupo wavo wo kudenga ngo kumuswa. (Mateu 25:​21, 23; Apokaripsi 20:5b) Ngo divi rimweni, muezaniso wo muranda wakashata ano nungo, i ngwajo ku Makristu okuzojwa. Kuitisa kudini?

13-14. Vokuzojwa vanojijenyi ngo muezaniso wo matarenta? (Vonanyi foto.)

¹³ Khombijanyi kushanda kwenyu ngo simba no kuva makarinda. Pa muezaniso wo matarenta no muezaniso wo mbhandwe,  Jesu aacainangepi kuti vokuzojwa vaizova no nungo. Kusiyapo izvi, iyena wainga ecinanga kuti ngozvapi zvaizoitika kudari vakatama kuvangisira. ‘Kudanijwa kwavo no kusanwa kwavo [akucaizovepi] ko cokwadi.’ Cimwenizve, avacaizonghwina mu Umambo wo kumatenga.—2 Pedhru 1:10.

¹⁴ Muezaniso ja Jesu ngo pamusoro po mbhandwe no matarenta, jinonasa kujekesa kuti Makristu ese okuzojwa anodikana kuramba akarinda no kunasiririka kusiyapo basi kushanda ngo simba no kuvangisira. Kureva kuti Jesu wakananga ciro cimweni caizoshanda inga ngwajo ku Makristu okuzojwa? Hina, iyena wakananga. Magama ake anowanika pana Mateu 24:​40, 41, anobhuya ngo pamusoro po kutongwa kokupejisira ko vokuzojwa.

NDIYANI “ANOZOTOHWA”?

15-16. Mateu 24:​40, 41 inobeseresa kudini Makristu okuzojwa kuti agare akarinda?

¹⁵ Acito abhuya ngo muezaniso mutatu, Jesu wakabhuya ngo pamusoro po kutongwa kokupejisira ko vokuzojwa kwaizovonesa kuti ndiyani waizofanera kutohwa. Iyena wakabhuya ngo vanarume vaviri vainga ku maminda no vanakaji vaviri vanokwiya pa gwiyo. Pa muezaniso jese jo muviri zvinovoneka kuti vari kuita mabasa akaezana, asi Jesu wakananga kuti “umwe anozotohwa umweni wosiiwa.” (Verenganyi Mateu 24:​40, 41.) Tevere, wakangwaja vateveri vake kuti: “Garanyi makarinda, ngokuti amuizivi njiku yaanozoviya Mambo wenyu.” (Mateu 24:42) Jesu wakanangavo zvakafanana paakapera kunanga ngo muezaniso wo mbhandwe. (Mateu 25:13) Zvakanangari Jesu zvakabatana papi? Makristu okuzojwa akagondeka, ndiwona basi “anozotohwa” no kuashihwa ndi Jesu mu Umambo wo kumatenga.—Johani 14:3.

¹⁶ Ivanyi makarinda. Vokuzojwa vanonga vacizivi kwenderera mberi vakarinda, avazobatanijwi pamwepo no “vakasanwa.” (Mateu 24:31) Makristu ese, azvinenyi kuti vano vetero yo kurarama kudenga kana pasi pano, vanodikana kuvona zvakananga Jesu inga ngwajo kuti vaenderere mberi vakarinda no kugondeka.

17. Ngenyi atidikani kuneseka Jehovha paanokheta ari wese no kumuzoja ngo mujimu wake mucena?

¹⁷ Tinonasa kuziva ushoni Jehovha. Ndiyo ndava, tinothemba matongero ake. Atineseki dangani Jehovha ari kuzoja vandhu vakagondeka mazuva ano. c Tiri kuceukija zvakabhuya Jesu ngo pamusoro po vashandi vo nguva gumi na imwe vo pa muezaniso wake wo munda wo muuvha. (Mateu 20:​1-16) Vaya vakakokwa kuti vaviye koshanda mu munda wo muuvha vo pa nguva yo kupejisira, vakaashira mupocero wakaezana no wo vaya vakatanga kushanda. Mu njira yakaezana, azvinenyi kuti mundhu wazojwa nguva yapi, vokuzojwa vanozoashira mupfupo wavo wo kwenda kudenga kudari vakatongwa vovoneka kuti vakagondeka.

PURUKIRANYI NGWAJO

18-19. Tajijenyi pa muezaniso jese iji?

¹⁸ Ngozvapi zvatajija? Ku vaya vanoda kurarama pasi pano, muezaniso wa Jesu wo mavhuta no mbuji, unovonesa kuti zvinosisira maningi kwenderera mberi takagondeka kuna Jehovha kutangira wari no pa dambujiko guru riri kuviyari. Pa mukuwo uwu, Jesu anozotonga vakagondeka kuti vave no “upenyu hucikaperi.”—Mateu 25:46.

¹⁹ Tajijazve ngo muezaniso muviri jinoshanda inga ngwajo ku vokuzojwa. Muezaniso wa Jesu wo mbhandwe jainga jakangwara no  jainga marethe, shanu jakona jakakhombija kuva jakangwara. Ijona jainga jakanasiririka no kurinda kuti jivetere mukwambo pa mukuvo waidikanaro. Asi mbhandwe jainga marethe ajicaingepi jakanasiririka. Ngo kudaro, mukwambo wakaramba kuti vave pamwepo naye pa mabuso ake o mucadho. Ngo kudaro, itusuvo tinodikana kuva takanasiririka mbhera pa mukuvo wokuti Jesu apeje mugariro uno wo zviro. Kusiyapo izvo, pa muezaniso wa Jesu wo matarenta, tajija kuti varanda vaviri vainga vakagondeka vainga no uzivi no kushanda ngo simba. Ivona vakashanda ngo simba kuti vabesere patarau wavo no kutendehwa ndiyena. Asi muranda wainga no nungo aazivi kutendehwa. Tinojijenyi? Tinodikana kwenderera mberi takabatikana pa basa ra Jehovha mbhera ku magumo. Pejisire tajija kuti vokuzojwa vanodikana kwenderera mberi vakarinda kuti ‘vazotohwe’ ndi Jesu ku mupfupo wavo wo kudenga. No vetero yakakura, vandhu ava vari kuvetera ‘kuunganijwa’ ndi Jesu kudenga. Pasure po Armagedhoni, ivona vanozova inga murovohwi wa Jesu pa mabuso o mucadho wo Vhuta.—2 Vatesaronika 2:1; Apokaripsi 19:9.

20. Jehovha anozoitenyi na vaya vanonasa kuteya njeve ku ngwajo iji?

²⁰ Pikija rutongeso uri kukhwedera ngo kukasika, itusu atina mathangwe okuti tigare tecithya. Kudari tikaenderera mberi takagondeka Baba wedu vano rudo vokudenga vanozotipekeja “simba rinopindirija ro vandhu” kuti tikwanise ‘kupona pa zviro zvese . . . kuima pamberi po Mwana wo mundhu.’ (2 Vakorinte 4:7; Ruka 21:36) Azvinenyi kuti vetero yedu ngo yo kudenga kana kuti pasi pano, tese tinozodakajisa Baba wedu kudari tikateya njeve ku ngwajo jinowanika pa muezaniso ja Jesu. Ngo ndava yo unyasha ucikaezaniswi hwa Jehovha, mazina edu anozonga “akatahwa mu bhuku” ro upenyu.—Dhanyeri 12:1; Apokaripsi 3:5.