1-2. Ngozvapi zvinoita kuti vashandiri va Mwari vave vakadakara? (Jakobo 1:​22-25)

 JEHOVHA no Mwana wake anodiwa vanoda kuti tive takadakara. Nduyo 119:2 inonanga kudari: “Vanodakara vaya vanozwira zviceukijo zvake, vaya vanomupsaka ngo mwoyo wese.” Jesu wakapa cigondiso cimweni eciti: “Vanodakara nga vaya vanozwa Soko ra Mwari no kuita zvarinonanga.”—Ruka 11:28.

² Inga vanamati va Jehovha, itusu tiri vandhu vakadakara. Ngenyi? Tino mathangwe akawanda, asi atidikani kukanganwa kuverenga Bhaibheri njiku jese no kuvangisira kuti tishandise zvatinongaro tajija.—Verenganyi Jakobo 1:​22-25.

3. Tinobesereka kudini patinoshandisa zvatinojija mu Soko ra Mwari?

³ Pano njira jakawanda jatingabesereka ndijona kudari tikava vandhu “vanoita zvinonanga Soko.” Ngo divi rimweni, tinozviziva kuti iyi ndi njira yaushoni yo kudakajisa Jehovha. Kuziva izvi, kunotiita kuti tidakare. (Mucumaeri 12:13) Patinoshandisa zviya zvatinoverenga mu Soko rakafemehwa ndi Mwari, tinoitisa nane upenyu hwedu pa mbhuri no kuitisa nane ushamwari hwedu no hama no hambzaji jedu. Kangaije makavona kuti izvi ndizvonadi zvinoitika. Kusiyapo izvo, atisongani no zvineso zvinosonganaya no vaya vacikateveri ndhungamiriro ja Jehovha. Ngo kudaro, tinotenderana no zvaakananga Mambo Dhavhidhi. Pasure po kunanga pa ndumbo yake ngo pamusoro po mutemo, ndhungamiriro no matongero a Jehovha, iyena wakaipejisa ngo kunanga kudari: “Kumateveja kunoviisa mupfupo wakakura maningi.”—Nduyo 19:​7-11.

4. Ngenyi i cineso kuita zvinonangwa ngo Bhaibheri?

 ⁴ Kunasa kunanga, azvizivi kureruka mukuwo wese kuita zvinonanga Soko ra Mwari. Pikija no kubatikana pa kuita zviro, tinodikana kuwana nguva yo kuverenga no kujija Bhaibheri kuti tizwisise kuti Jehovha anoda kuti tiitenyi. Ngo kudaro, ngativone mazano amweni anozotibesera kuti tiverenge Bhaibheri njiku jese. Cimwenizve, tinoda kuvona kuti zvicinyi zvinozotibesera kuti tirangarijisise zvotaperaro kuverenga no kuvona manera atingazvishandisa mu upenyu hwedu.

PSAKANYI NGUVA KUTI MUVERENGE SOKO RA MWARI

5. I zviro zvapi zvinotitorera mukuwo wakawanda?

⁵ Kazinji, vandhu va Mwari vano upenyu wakabatikana maningi. Tinopeja mukuwo muzinji teciita zviro zvedu, zvinonangwa ngo Bhaibheri kuti zvinosisira. Inga muezaniso, vazinji vedu, tinoshanda njiku jese kuti tijisapote no kusapota mbhuri jedu. (1 Timoti 5:8) Makristu mazinji, ndivona vanotaja ukama hwavo uri kuhwaja no waavasharuka. Itusu tese, tinotora nguva kuti titaje uhomi hwedu. Kusiyapo zvese izvi, tino mabasa amweni okuita mu ungano. Basa rimweni rinosisira ratinodikana kuita ngo ro kucumaera. No mabasa ese aya, mungaitenyi kuti muwane nguva yo kuverenga Bhaibheri njiku jese, kurangarijisisa no kushandisa zvomaverengaro?

6. Mungaitisa kudini kuti kuverenga kwenyu Bhaibheri kuve pakutanga? (Vonanyi foto.)

⁶ Kuverenga Bhaibheri ndi cimwe co zviro “zvinosisira maningi” mu upenyu hwedu inga Makristu. Ngo kudaro, tinodikana kukudira pakutanga mu upenyu hwedu. (Vafiripi 1:10) Ngo pamusoro po mundhu anodakara, nduyo cipauko cokutanga cinonanga kudari: “Asi anodakarira mutemo wa Jehovha, iyena anoverenga mutemo wa Mwari ngo izwi doko, usiku no masikati.” (Nduyo 1:​1, 2) Zvakanasa kujeka kuti zvinoda nguva kuti tiverenge Bhaibheri. Ngowapi mukuwo waushoni wo kuverenga Bhaibheri? Mupinguro wo muvhunjo uwu, ungava unosiyana ku umwe na umwe wedu. Asi cinosisira, ngo cokusana mukuwo unotibesera kuti tiverenge Bhaibheri njiku jese. Hama imweni inozwi Vhitori, yakananga kudari: “Ndinodakarira kuverenga Bhaibheri mangwanani matete, pikija andidakariri maningi kumukisa, asi  nguva iyi yakanaka ngokuti andiphingajiki. Mu murangariro mwangu munonga mucina zviro zvakawanda. Ngo kudaro, zvinondibesera kuti ndibatikane pandinonga ndeciverenga.” Pamugariro wenyu, munovona kuti kuita izvi zvingamubesera? Jivhunjisenyi kudari: ‘Ngowapi mukuvo waushoni kwandiri kuti ndiverenge Bhaibheri?’

RANGARIJISISANYI ZVAMAPERARO KUVERENGA

7-8. Ngozvapi zvingatiphinga kuti titame kubesereka patinonga teciverenga Bhaibheri? Ezanisiranyi.

⁷ Kazinji tinoverenga zviro zvakawanda maningi, asi totama kuzvirangarijisisa. Imwimwi makamboverenga zviri zvese perapo moceukija zviro zvidoko zvamaverenga? Itusu tese zvakambotiitikira izvi. Zvinosuruvarisa ngozvokuti izvi zvingaitikavo patinonga teciverenga Bhaibheri. Izvi zvinoitika ngokuti tino rista yatinayo yatakadira zvipauko zvatinoda kuverenga pa njiku. Izvi zvinobongwa. Tinodikana kuva no mutengo wo zvatinodaro kuverenga no kuvangisira kuti tizvikwanirise. (1 Vakorinte 9:26) Ngo kudaro, kuverenga Bhaibheri i kutangisa, i kutangisa kwaushoni, basi kutangisa. Asi zvinosisira maningi kudari tecida kubesereka patinonga teciverenga Soko ra Mwari.

⁸ Amborangariranyi ngo muezaniso uwu basi: Kazinji nvura painona, tinobesereka maningi. Asi painona maningi pamukuvo mudoko, pasi panozara. Izvi pazvinoitika nvura inonga icikaripi kubeserazve. Zvinosisira maningi nvura kuna padoko-padoko kuti mavhu akwanise kusvisvina kumwa iyi kuti ibesere zviro zvinongaya zvasimwa. Mu njira yakaezana, atidikani kuverenga Bhaibheri ngokukasikira zvoita kuti titame kurangarijisisa, kuceukija zvataverengaro no kuzvishandisa mu upenyu hwedu.—Jakobo 1:24.

9. Ngozvapi zvatingaita kudari tino cirovejeso co kuverenga Bhaibheri ngo kukasikira?

⁹ Imwimwi makambovona kuti nguva jimweni munoverenga Bhaibheri mecikasikira maningi? Ngozvapi zvamunodikana kuita? Verenganyi padoko-padoko. Vangisiranyi kuti murangarijisise ngo zvamuri kuverenga kana zvamaperaro kuverenga. Ici acidikani kuva cineso. Kudari kurangarijisisa kunomunesera kangaije imwimwi mungavona mazano ngo pamusoro po kurangarijisisa  ngo zvamapera kuverenga. Imwimwi mungasana kupeja mukuvo wakareba mecijija kuti muwane nguva yokurangarijisisa. Ngo divi rimweni, mungapungura mavhesi amunoda kuverenga kuti musare no nguva yokurangarijisisa. Hama Vhitori vambonangwaya, vakati: “Pandinoverenga Bhaibheri, ndinoverenga vhesi nganani kana cipauko cimwe.” “Zvecivoneka kuti ndinoverenga fumi comangwanani, zvinondibesera kuti ndikwanise kurangarijisisa pa njikuyo zvese zvandaverengaro.” Azvinenyi kuti ngoyapi njiku yamunoshandisa, asi zvinosisira maningi i kuverenga ngo izwi rinomubesera kuti mukwanise kujija zviri zvese pa zvamaverengaro.—Nduyo 119:97; vonanyi bhokiso rinoti: “ Muvhunjo Jamungajiita.”

10. Ipanyi muezaniso unovonesa manera amungashandisa zvamuri kujija? (1 Vatesaronika 5:​17, 18)

¹⁰ Azvinenyi kuti ndi mukuwo wapi wamunoverenga Bhaibheri, munopeja mukuwo wakadini, asi ivanyi no cokwadi cokuti muri kushandisa zviya zvamuri kuverenga mu Bhaibheri. Pamunoverenga pari pese mu Bhaibheri, jivhunjisenyi kudari: “Zvandaverengari, ndingazvishandisa kudini wari no kumbejiyo?” Inga muezaniso, ngatiti maverenga 1 Vatesaronika 5:​17, 18. (Verenganyi.) Pasure po kuverenga vhesi mbiri iji, imwimwi mungaima, morangarijisisa kuti ndi kangana munoita mukumbiro no manera amunouita. Kusiyapo izvo, imwimwi mungarangarira ngo zviro zvamungabongesera. Kangaije mungatema civaringo co kubonga Jehovha ngo zviro zvitatu zvaakamuitira. Kudari mukapeja nguva mecirangarijisisa zvamajija mu Bhaibheri, zvinozomubesera kuti muzwisise Soko ra Mwari no kuita zvarinonanga. Rangariranyi kuti munozobesereka kudini kudari mukaphinda kuita izvi njiku jese pamunoverenga mativi amweni o Bhaibheri. Hina, imwimwi munonga meciita zvinonangwa ngo Bhaibheri. Asi ngozvapi zvamungaita kudari mukava no zviro zvizinji zvokuita?

GAJANYI ZVIDO ZVAMUNOZOKWANIRISA

11. Ngenyi nguva jimweni mungavona zvecinesa kushandisa zvamunojija? Ipanyi muezaniso.

¹¹ Pamunoverenga Bhaibheri no kupsaka manera okuzvishandisa mu upenyu hwenyu, nguva jimweni zvinganesa. Amborangariranyi ngo muezaniso uwu: Ngatiti nyamasi kuverenga kwenyu Bhaibheri kunobatanija mazano o kutama kurerusa vamweni. (Jakobo 2:​1-8) Imwimwi munovona kuti munodikana kuitisa nane manera amunotaja vamweni. Ngo kudaro, munotema civaringo co kuita cinjo. Izvi zvakanaka maningi. Ngo kudaro, mangwana munoverenga divi rinobhuya ngo pamusoro po kusisira maningi ko kuvonerera zvamunobhuya. (Jakobo 3:​1-12) Perapo munovona kuti zvamunobhuya, azvivangisi. Ngo kudaro, munovona kuti mungazoitisa kudini kuti munozovangisavo vamweni pamunozobhuya navo. Kuverenga kwenyu Bhaibheri ko njiku inotevera,  kunobatanija ngwajo ngo pamusoro po kuita ushamwari no nyika. (Jakobo 4:​4-12) Pasure po jijo iyi, munovona kuti munodikana kungwarira maningi ngo zvamunovona, zvamunoverenga no zvamunozwa. Pa njiku yo cirongomuna, munovona kuti muno zviro zvizinji zvamunodikana kuitisa nane.

12. Ngenyi amudikani kusuruvara kudari mukajija Bhaibheri movona kuti munodikana kuita cinjo? (Vonanyi masoko o pasi.)

¹² Kudari mukavona kuti munodikana kuita cinjo iri yese kana kuitisa nane, mucasuruvara. Ngo kuzwisisa kwenyu kuti munodikana kuitisa nane, zvinovonesa kuti munojidodokesa, cimwenizve, muno cido co kuda kuita zviro zvaushoni. Mundhu anojidodokesa no wakagondeka pacake, anoverenga Bhaibheri no cinangwa co kuvona paanodikana kuitisa nane. a Ceukijanyi kuti kusimira “undhu hupsa,” ndi ciro cinondoramba ceciithwa. (Vakorose 3:10) Zvicinyi zvinozomubesera kuti muenderere mberi meciita zvinonangwa ngo Soko ra Mwari?

13. Ngoyapi njira yaushoni yo kushandisa zviya zvamajija? (Vonanyi foto.)

¹³ Kusiyapo basi kuda kushandisa zvese zvamajija pa mukuwo wondhowo, imwimwi mungaeja kushandisa ciro cimwe kana zviviri. (Mazwi Akangwara 11:2) Inga muezaniso, mungaeja kuita izvi: Itanyi rista yo zviro zvamunoda kuitisa nane. Perapo, tanganyi kuitisa nane ciro cimwe kana zviviri. Zvimwenizvo, mozozviitisa nane pa kufamba ko nguva. Mungatanga ngozvapi?

14. Ngozvapi zvamungatanga kuitisa nane?

¹⁴ Imwimwi mungatanga kuita zviya zvamunovona kuti zvakamurerukira. Kangaije mungatanga ngo zviro zvamunovona kuti munodikana kukasika maningi kuzviitisa nane. Pamunopera kusana zviro zvamunoda kutanga  kuitisa nane, ngo zvaushoni kupsakisisa mu mabhuku edu mecishandisa Índice das Publicações da Torre de Vigia kana kuti Bhuku ro Kupsakisisa ro Zvapupu zva Jehovha. Itanyi mukumbiro kuna Jehovha ngo pamusoro po zviro zvamunodaro kuitisa nane, mecikumbira “cido no simba ro kuita.” (Vafiripi 2:13) Perapo, shandisanyi zvamunongaro majija. Kudari muri kukwanisa kuitisa nane zviro zvokutanga, kangaije mungazojizwa mecivangiswa kuti muitise nane zviro zvimweni. Ngo zvokadi kuti kudari mukakwanisa kuitisa nane divi riri rese mu upenyu hwenyu hwo Cikristu kana mugariro wo Cikristu, kangaije mungazovona zvecireruka maningi kuitisa nane mugariro jimweni.

SOKO RA MWARI “RIRI KUMUCINJA”

15. Ngenyi vandhu va Jehovha vakasiyana no vandhu vamweni vaiverengavo Bhaibheri? (1 Vatesaronika 2:13)

¹⁵ Vandhu vamweni vakaverenga Bhaibheri ko vhaza jakawanda. Kureva kuti ivona vakathemba Bhaibheri? Kureva kuti vakashandisa zvovakaverengaro no kutendera kutungamirihwa ndirona mu upenyu hwavo? Zvinosuruvarisa ngozvokuti vamweni vakona avazivi kuita izvi. Inga Makristu o muzana rokutanga ro makore, itusu tinothemba Bhaibheri inga “Soko riri kuvha ka Mwari.” Kusiyapo izvi, tinovangisira kuti tikhombije kuti irona riri kucinja upenyu hwedu.—Verenganyi 1 Vatesaronika 2:13.

16. Ngozvapi zvinozotibesera kuti tive vandhu vanoita zvinonangwa ngo Soko ra Mwari?

¹⁶ Asipi nguva jese zvakareruka kuverenga no kushandisa zvatinojija mu Soko ra Mwari. Tingatova no zvineso kuti tiwane nguva yo kuverenga kana kuti tingaverenga Bhaibheri ngo izwi ro kukasika, tokonehwa kuzwisisa zvatinongaro taverenga kana tingavona zvecinesa ngo kuvona zviro zvizinji zvatinodikana kutisa nane. Azvinenyi kuti ndi cineso capi camungasongana naco, ici acingavi cineso cingamuita kuti mukonehwe kuverenga Bhaibheri. Ngo besero ra Jehovha, imwimwi mungakwanisa kucinyisa. Ngo kudaro, temanyi civaringo co kutendera besero ra Jehovha motama kuva vandhu vanozwa basi vokanganwa asi vanoita zvinonangwa ngo Soko ra Mwari. Pacina kukana-kana, patinoverenga Soko ra Mwari no kushandisa zvatajija mu upenyu hwedu, tinozova vakadakara.—Jakobo 1:25.