1-2. Tiri kubesereka kudini ngo kusikwa no mugariro unotiita kuti tidakare paya patinopa kusiyapo kuashira?

 JEHOVHA paakasika vandhu, iyena wakavasika no mugariro wokukwanisa kudakara ngo kupa kusiyapo kuashira. (Mabasa o Vapostori 20:35) Izvi zvinoreva kuti atingawani mudakaro patinoashira? Haiwa. Izvi tinonasa kuzviziva ngokuti patinoashira ciri cese tinodakara. Pikija zvakadaro, tinodakara maningi patinopa. Jehovha wakatiita mu njira iyi ngokuti waizviziva kuti ngozvaushoni. Ngenyi?

² Ngokutiita kwake ngo njira iyi, itusu tinokwanisa kuengejera mudakaro wedu. Tingaengejera mudakaro wedu ngo kupsaka njira jimweni kuti tipe. Zvinoshamaisa maningi kuziva kuti Jehovha wakatiita ngo njira yakadari.—Nduyo 139:14.

3. Ngenyi Jehovha anozwi ndi “Mwari wakadakara”?

³ Bhaibheri rinonanga kuti kupa kunovisa mudakaro. Ngo kudaro, azvitishamaisi Bhaibheri parinonanga kuti Jehovha ndi “Mwari wakadakara.” (1 Timoti 1:11) Iyena ndiyena wakatanga kupa vamweni. Apanazve ari wese angakwanisa kupa kupinda Jehovha. Mupostori Pauro wakananga kuti: “Ngo ndava yake, itusu tino upenyu, tinofamba no kurarama.” (Mabasa o Vapostori 17:28) Ngo kudaro, “cipo cese cakanaka no cipo cese cakakwana” cinovha kuna Jehovha.—Jakobo 1:17.

4. Zvicinyi zvinozotibesera kuva no mudakaro mukuru?

⁴ Itusu tese taizodakarira kuva no mudakaro uwu unoviyari ngo ndava yokupa. Tingazviita ngokutevejera kukova ka Jehovha. (Vaefeso 5:1) Pa jijo iyi, tinozojija ngo muezaniso waushoni wo kukova wa Jehovha no kuzovonazve kuti ngozvapi zvatingaita kudari tikajizwa kuti vandhu vamweni avaripi kubongesera ngo kukova kwedu. Zvatinozojijari, zvinozotibesera kuti tienderere mberi teciengejera mudakaro watinowana ngokupa.

 TEVEJERANYI KUKOVA KA JEHOVHA

5. Ngozvapi zviro zvimweni zvaanotipa Jehovha?

⁵ Ngojapi njira jimweni jaanoshandisa Jehovha kuti akhombije kukova? Ngativone muezaniso munganani jakona. Jehovha anotipa zviro zvatinoda. Asipi nguva jese tingava no zviro zvese zvatinoda, asi tingava no cokwadi cokuti Jehovha anozotitaja. Inga muezaniso, iyena angaita kuti tive no zvokuha, zvokusimira no pokugara. (Nduyo 4:8; Mateu 6:​31-33; 1 Timoti 6:​6-8) Kureva kuti Jehovha anovangirijwa kuti atipe zviro zvatinoda? Nee padoko. Icinyi cinoitisa kuti Jehovha atiitire zvondhozvo?

6. Tinojijenyi pa bhuku ra Mateu 6:​25, 26?

⁶ Kunasa kunanga, Jehovha anoita izvi ngokuti anotida. Vonanyi magama a Jesu anowanika pana Mateu 6:​25, 26. (Verenganyi.) Jesu wakashandisa muezaniso wo zvisikwa. Ecibhuya ngo pamusoro po shiri, Jesu wakati: “Ijona ajisimi mbeu, ajikotori, ajivigi ciro mu nyumbu.” Vonanyi zvaakazonangazve: “Asi Baba wenyu vo kumatenga vanojihisa.” Perapo Jesu wakavhunjisa kudari: “Imwimwi amusisiri kupinda ijona kani?” Tinojijenyi? Jehovha anovona vashandiri vake inga vanosisira maningi kupinda zvinyama no shiri. Jehovha anonasa kutaja zvinyama no shiri, tingavavo no cokwadi cokuti iyena anozonasa kutipa zviya zvatinoda. Kudari inga baba vanokwanisa kutaja ushoni mbhuri yavo, Jehovha anotajavo ushoni mbhuri yake ngo rudo.—Nduyo 145:16; Mateu 6:32.

7. Ngoyapi njira imweni yatingatevejera kukova kwa Jehovha? (Vonanyi foto.)

⁷ Inga ndi Jehovha, tingapavo vamweni zviro zvokunyama ngo rudo. Inga muezaniso, munoziva hama iri yese kana hambzaji inoda zvokuha no zvokusimira? Jehovha angamushandisa kuti mubesere hama kana hambzaji iyi. Vandhu va Jehovha vanozivika maningi ngo kukova kwavo paya panopera kuitika ngozi. Inga muezaniso, pa mukuvo wo korona vhiru, hama no hambzaji jakakwanisa kupa zvokuha, nguvo no zvimweni kuti vabeserevo vaya vainga vacina. Vazinji vakaitavo mupiro kuitira basa ro nyika yese. Mupiro iji jakabesera hama no hambzaji jese jaida besero mu nyika yese pasure pokuitika ngozi. Ivona vakabatisisa maningi magama anowanika pana Vahebheru 13:16 anoti: “Mucakanganwa kuita zvakanaka no kupekeja vamweni zvamunazvo. Ngokuti Mwari anodakara maningi ngo mupiro jakadaro.”

8. Jehovha anotipekeja simba ro kuitenyi? (Vafiripi 2:13)

⁸ Jehovha anopa simba. Jehovha anodakara maningi ngo kupa simba rake ricikaperi ku  vashandiri vake vakagondeka. (Verenganyi Vafiripi 2:13.) Imwimwi makamboita mukumbiro mecikumbira simba iri kuti mucungirire muejo unonesa maningi? Kangaije makaita mukumbiro mecikumbira simba kuti muite zviro zvamaida kuita pa njiku yese. Mukumbiro wenyu wokukumbira simba powakadavihwa kangaije imwimwi makanangavo magama akanangwa ndi mupostori Pauro kuti: “Ku zviro zvese, ndino simba ngo pamusoro pa wiya anondipa simba.”—Vafiripi 4:13.

9. I njira japi jatingatevejera ndijona Jehovha kuti tibesere vamweni? (Vonanyi foto.)

⁹ Pikija tiri vandhu vacizivi kukwana, tingakwanisa kutevejera kukova kaanoita Jehovha ngokutipa simba rake. Atingakwanisi kamare kupekeja vamweni simba redu, asi tingakwanisa kushandisa simba redu kuti tivabesere. Inga muezaniso, tingabesera hama no hambzaji jaavasharuka kana jiri kuhwaja ngokuita mabasa o pa muzi no kwenda koovatengera zviri zvese. Kudari mugariro wedu wecitendera, tingakwanisa kujipira kuti tibesere pakucenesa no kunasirira-nasirira Nyumba yo Umambo. Mashandisire atinoita simba redu anobesera hama no hambzaji jedu.

10. Tingavangisa kudini vamweni ngo zvatinobhuya?

¹⁰ Mucanganwa kuti zvamunobhuya zvino simba. Muri kurangarira ari wese anozobesereka kudari mukamusimba mecishandisa magama enyu? Munoziva ari wese anoda kuvangiswa? Kudari munomuziva, madini kuvonesa kuti munoneseka ndiyena? Imwimwi mungamuvhakacira, kumufonera kangaije kutomutumira karata kana mesajhi. Mucaneseka maningi ngo zvamunoda kuzobhuya. Asi kubhuya basi magama anovha mukati mo mwoyo, zvingatova zviro zvinotodiwa kamare ngo hama kana hambzajiyo kuti ienderere mberi yakagondeka no kuita nane pa mugariro wayo.—Mazwi Akangwara 12:25; Vaefeso 4:29.

11. Jehovha anoshandisa kudini uzivi hwake?

¹¹ Jehovha anopa uzivi. Mujiji Jakobo wakatara kudari: “Kudari pano mundhu acina uzivi pakati penyu, ngaaenderere mberi ecikumbira kuna Mwari, iyena anozomupa uzivi hwakawanda ngo mwoyo wese acikamuvereketeri.” (Jakobo 1:5) Izvi zvinovonesa kuti Jehovha anokova uzivi hwake. Ngo kukova kwese iyena anoupavo vamweni. Vonanyi kuti Jehovha anomupa uzivi hwake “acikamuverekeri.” Narini iyena aadi kuti titame kujizwa ushoni patinokumbira uzivi. Kunasa kunanga iyena anotivhunja kuti tiupsake.—Mazwi Akangwara 2:​1-6.

12. Mukana japi jatinajo kuti tikovane no vamweni uzivi hwedu?

¹² Tingativo kudini na itusu? Kureva kuti tingatevejeravo Jehovha ngo kupa vamweni uzivi hwedu? (Nduyo 32:8) Vandhu va Jehovha  vano mukana jakawanda jo kuvhunjavo vamweni zvavanonga vajija. Inga muezaniso, tinoroveja vacumaeri vapsa mu basa ro kucumaera. Vakuru vo ungano no kusengerera kwese vanobesera vabeseri vo ungano no vakabhabhatijwa kuti vajijire kuita ushoni mativi avo mu ungano. Hama no hambzaji jino uzivi pa basa ro kuvaka no kunasirira-nasirira, jinobesera no kuroveja hama jimweni pakuita basa ro kuvaka ndau jinoshandiswa ngo sangano ra Jehovha.

13. Tingatevejeresa kudini Jehovha ngo manera aanopekeja vamweni uzivi?

¹³ Pamunonga meciroveja vamweni, tevejeranyi Jehovha ngo kupa uzivi hwenyu vamweni. Ceukijanyi kuti Jehovha anopa uzivi hwake ngokukova kwese. Mu njira yakaezana, tinodavo kukovana no vamweni zviya zvatinoziva. Atisiyi kujijisa vamweni ngo kuthya kuti vanozotinyisa. Cimwenizve, atinangi kuti: “Apana wakandijijisa.” Ngo kudaro, anodaro kujijiswa, ‘ngaajijevo ega.’ Vandhu vano murangariro jakadari, avana ndau mu mbhuri ya Jehovha. Kusiyapo izvo, tinojijisa ushoni vamweni haiwa basi ngo zviya zvatinoziva asi ngo kupa “upenyu hwedu” vaya vatinoroveja. (1 Vatesaronika 2:8) Tinovetera kuti ivona ‘vanozokwanisavo kujijisa vamweni.’ (2 Timoti 2:​1, 2) Kudari itusu tese tikapa ngo kukova kwese uzivi hwedu, itusu no vamweni tinozova no ungwaru pomwe no mudakaro.

VANDHU PAVANOVONESA KUTAMA KUBONGESERA KANA KUTOTAMA KUBONGA NGO KUKOVA KWEDU

14. Vandhu vazinji vanoitenyi patinovaitira zvaushoni?

¹⁴ Patinopa kana kuita ciri cese kuno vamweni, maningi-ningi kuno hama no hambzaji jedu, ivona kazinji vanobongesera. Vangatitumira mesajhi vecibongesera kana kutobongesera ngo njira jimweni. (Vakorose 3:15) Kubongesera uku kunotiita kuti tidakare.

15. Ngozvapi zvatinodikana kuceukija kudari vamweni avaripi kubongesera ngo zvatinonga tavaitira?

¹⁵ Kunasa kunanga, nguva jimweni, vandhu vamweni avabongi ngo zvatinovaitira. Nguva jimweni zvinoita inga kuti vandhu vamweni avabongi ngo zvese zvatinovaitira zvakadari inga nguva yedu, simba redu no mare yatinomosha kuti tivabesere. Kudari izvi zvikaitika, tingaitenyi kuti titame kuruza mudakaro wedu no kutama kusuruvara? Ceukijanyi magama ari pa vhesi yakacijikira cijijo ici, Mabasa o Vapostori 20:35. Mudakaro watinowana patinopa, aufiri pakuti tabongwa kana kuti haiwa. Tingatotema civaringo co kwenderera mberi tecipa pikija vandhu vamweni vatibongi. Kuitisa kudini? Vonanyi njira jatingazviita ndijona.

16. Zvicinyi zvingatibesera kuti tienderere mberi tecipa no mudakaro?

¹⁶ Batikananyi pa kutevejera Jehovha. Iyena anopa zviro zvaushoni ku vandhu, azvinenyi vanobonga kana kuti haiwa. (Mateu 5:​43-48) Jehovha anogondesa kuti kudari tikapa ‘ticikaveteri kuhwirijihwa, mupfupo wedu unozova mukuru.’ (Ruka 6:35) “Kuhwirijihwa,” kungabatanija kubongesehwa. Azvinenyi kuti tabongwa kana kuti haiwa, Jehovha anozotikomborera ngo zvese zvatinoita zvaushoni kuti tibesere vamweni no kuva “mundhu anopa akadakara.”—Mazwi Akangwara 19:17; 2 Vakorinte 9:7.

17. Ngorapi thangwe rinosisira rinotiita kuti tide kupa vamweni? (Ruka 14:​12-14)

¹⁷ Ciro cimweni cingatibesera kuti titevejere Jehovha ngo pamusoro po kupa, ngo co kushandisa zvakanangwa ndi Jesu pana Ruka 14:​12-14. (Verenganyi.) Azvizivi kushata kukoka vaya vanotikokavo kuti tihe navo. Waro kudari tikavona kuti tiri kupa ngo kuda kuzopuwavo, ngozvapi zvatinodikana kuita? Kudari zviri kuitika ejanyi kuita  zvakanangwa ndi Jesu. Tingakoka kana kupa vandhu vaya vatinoziva kuti avakwanisi kuzotiitira zvatinongaro tavaitira. Tinozova takadakara ngokuti tiri kutevejera Jehovha. Njira iyi inozotibesera kuti tienderere mberi takadakara vamweni pavanotama kutibonga ngo zvakanaka zvatinonga tavaitira.

18. Ngozvapi zvaticikadikani kuita, ngenyi?

¹⁸ Mucarangarira zvakashata ngo pamusoro po vamweni. (1 Vakorinte 13:7) Kudari vamweni avaripi kutibongesera, tingajivhunjisa kudari: ‘Ngozvokadi kamare kuti ivona avabongi kana vatokanganwa havo?’ Kangaije kuno mathangwe amweni avaitisa kuti vatame kubonga. Vamweni vangajizwa vecida maningi kubongesera, asi vanoneseka kuda kuzvinanga. Ivona vangava no nyowa jo kuda kuashira besero riri rese kudari pa mukuvo wakadarika vakambobeseravo vamweni. Kudari tikanasa kuda hama no hambzaji jedu atizorangariri zvakashata ngo pamusoro pavo. Cimwenizve, tinozoenderera mberi tecipa ngo mudakaro wese.—Vaefeso 4:2.

19-20. Ngenyi kusengerera kunosisira maningi patinopa vamweni? (Vonanyi foto.)

¹⁹ Ivanyi vanosengerera. Ngo pamusoro po kukova, Mambo Soromona wakati: “Khandirai pau yako mu kumwa, ngokuti pasure po mazuva akawanda iwewe unozoiwanazve.” (Mucumaeri 11:1) Inga manera ayananga vhesi, vazinji vangazotibonga “pasure po mazuva akawanda.” Ndizvona zvakaitika no hambzaji imweni.

²⁰ Pasure po makore akawanda, mukaji wo muvonereri wo ndharaundha wakatarira karata hambzaji imweni yainga yavha kubhabhatijwa eciivangisa kuti ienderere mberi yakagondeka. Pasure po makore masere, hambzaji iya yakatarihwaya karata, yakazobongesera yeciti: “Inini ndavona kuti ndaidikana kuita ngo kutara ndecibongesera ngo pamusoro po besero rese ramakandipaya pasure po makore akawanda imwimwi nomanditumira karata iyi.” Hambzaji iyi yakaenderera mberi yeciti: “Masoko ainga pakarata amakanditariraya, ainga aushoni iwona akapsasa mwoyo wangu cimwenizve  andizomakanganwi.” a Pasure pokusanangura zvineso zvimweni zvayakasongana nazvo, iyona yakati: “Nguva jimweni ndaitoda kusiya kuva umwe wo Zvapupu zva Jehovha. Asi kuceukija masoko amakanditariraya, zvaindipekeja simba kuti . . . ndienderere mberi ndakagondeka.” Iyona yakatizve: “Pasure po makore masere, apanazve ciro cimweni cakandivangisa kupinda magama amakanditariraya.” Rangariranyi mudakaro wakava no mukaji wo muvonereri wo ndharaundha paakaashira karata yokubongesera yecivha ku hambzaji iya yaaingaya akatarira “pasure po mazuva akawanda.” Izvi zvinovonesa kuti tingazobongwavo pasure po mazuva akawanda no taitira zvakanaka ku ari wese.

21. Ngenyi matema civaringo co kwenderera mberi mecitevejera kukova kwa Jehovha?

²¹ Inga zvapera kunangwa, Jehovha wakatisika no mugariro wakanaka maningi. Pikija tinodakariravo kuashira, asi tingava no mudakaro wakakura maningi paya patinopekejavo vamweni. Tinojizwa ushoni patinokwanisa kubesera hama no hambzaji jedu. Tinodakarazve maningi kudari ivona vakatibongesera. Ngo kudaro, azvinenyi kuti tabongesehwa kana haiwa, itusu tinodakara maningi ngokuti taita zviro zvaushoni. Mucadokanganwa kuti zvese zvamunopa, ‘Jehovha ndiyena anozomupa zvakawanda kupinda zvondhozvo.’ (2 Kronike 25:9) Imwimwi amuzokwanisi kupekeja ari wese zviro kupinda Jehovha. Makomborero atinoashira ecivha kuna Jehovha, anotiita kuti tidakare maningi. Tatema civaringo cokutevejera Baba wedu vo kudenga vanokova.