Patinonga tecinasirira kuti tijije, tingajivhunjisa kudari: ‘Ngozvapi zvandiri kuda kujija?’ Ngo kudaro, tinodikana kuceukija kuti, pikija tikakheta kujija zviri zvese, izvi azvirevi kuti apana zviro zvipsa zvaanoda Jehovha kuti tijije. Tingaitisa kudini kuti tijije zviro zvipsa patinonga teciita jijo yo Bhaibheri?

Itanyi mukumbiro mecikumbira uzivi. Kumbiranyi Jehovha kuti amubesere kuzwisisa kuti ngozvapi zvaanoda kuti mujijire wari. (Jakobo 1:5) Ngwariranyi kuti mutame kubatisisa zwisiso yamainga nayo kare.—Mazwi Akangwara 3:​5, 6.

Reremejanyi simba rino Soko ra Mwari Bhaibheri. “Soko ra Mwari arifi.” (Vahebheru 4:12) “Soko” ra Mwari ‘ricikafi’ ringativangisa ngo njira jakasiya-siyana patinoriverenga basi kudari tikava takanasiririka kuti tizwisise zvatinongaro tecijija.

Bongeseranyi ngo zvese zvinoshandiswa ndi Jehovha kuti atijijise. Zvokuha zvake zvokumujimu zvakadari inga “mabuso o zvokuha zvakanaka.” (Isaia 25:6) Mucasiya kuverenga musoro jamunorangarira kuti amuzojidakariri. Kudari mukaita izvi, Jehovha anozomubesera kuti muve mundhu waushoni ngo kudaro, munozodakarira kujija.