1. Vandhu vakawanda vakavhujwa kuitenyi ngo vajiji va Jesu?

VANDHU vakawanda, vanarume no vanakaji, vakaita hwendo kwenda Jerusarema. Ivona vaivha kunyika jakasiyana-siyana i vaibhuya ndumi jakasiyana. Zviro zvinoshamaisa zvakaitika njiku yondhoyo. Cikwata co Vajudha vacizivi kujija, cakatanga kubhuya ndimi yo vandhu vonyikanja. Izvi zvakashamaisa vandhu vese, asi zvaibhuyari Vajudha ava no zvakabhuya mupostori Pedhru kwavari, zvakava zvicikanganiki. Vandhu ava vakazwisisa kuti, kudari vecida kuponeswa vaidikana kutenda Jesu Kristu. Vandhu vese vakabaiwa maningi mwoyo ngo masoko aya. Ngo kubaiwa mwoyo kovakaitwa, vakavhunjisa kudari: “Toitenyi wari?” Pedhru wakavapingura kuti: “Umwe nga umwe wenyu ngaabhabhatijwe.”—Mabasa o Vapostori 2:37, 38.

2. Tinozojijenyi pa musoro uno? (Vonanyi foto yo pa kapa.)

² Zvakaitika tevere zvinoshamaisa maningi. Mutengo unokwana kuita zviuru zvitatu wakabhabhatijwa pa njiku imwe, vova vajiji va Kristu. Uku kwakava kutanga ko basa guru ro kuita vajiji kwakananga Jesu kuti kwaizoitwa ngo vateveri vake. Basa iri ricaitwa ngo vajiji vake mbhera na nyamasi. Nyamasi atikwanisi kujijisa mundhu pa nguva shomani woguma pa kubhabhatijwa. Zvingatoita mweji kana gore kana mukuvo wakareba kuti mujiji agume pa kubhabhatijwa. Zvinotoda kushanda ngo simba kuti tibesere mundhu kuti agume pakuva mujiji wa Kristu. Pa musoro uno, tinozojija kuti tingaitisa kudini kuti tibesere mujiji wedu wo Bhaibheri kuti agume pa kubhabhatijwa.

3. Inga zvinonangwa pana Mateu 28:19, 20, zvicinyi zvinodikana kuitwa ngo vajiji vo Bhaibheri kuti vagume pa kubhabhatijwa?

³ Mujiji wo Bhaibheri, acito abhabhatijwa anodikana kushandisa zvaari kujija mu Bhaibheri. (Verenganyi Mateu 28:19, 20.)  Mujiji paanoshandisa zvaari kujija, anova “mundhu wakangwara” wakanangwaya pa muezaniso wa Jesu kuti wakavaka nyumba yake pa buwe. (Mateu 7:24, 25; Ruka 6:47, 48) Tingabeseresa kudini mujiji wo Bhaibheri kuti ashandise zvaari kujija? Ngativone zviro zvitatu.

4. Tingaitenyi kuti tibesere mujiji kuti ashande ngo simba kuti agumire pa kubhabhatijwa? (Vonanyi bhokiso rinoti: “ Beseranyi Mujiji Wenyu kuti Azive Zvaanodikana Kuita no Kuzvikwanirisa.”)

⁴ Beseranyi mujiji wenyu wo Bhaibheri kuti azive zvaanodikana kuita. Ngenyi munodikana kuita zvondhozvo? Inga muezaniso, kudari muri kuita hwendo hwakakura maningi, imwimwi mungasana kuzorora pa ndau yakaseja maningi. Amuzoperi simba ngo kurangarira kuti kwamuri kuendaro i ndhambo maningi. Kudari mujiji wo Bhaibheri akaziva zvaanodikana kuita pa mukuvo mushomani, anozovona kuti anokwanisa kuva no cido cokubhabhatijwa. Shandisanyi divi rinoti “Ejanyi kuita izvi” rinowanika mu bhuku Mungadakara Kwenda no Kwenda! kuti mubesere mujiji wenyu kuti aenderere mberi. Pakupera ko cijijo cimwe nga cimwe, bhuisananyi no mujiji wenyu kuti ngenyi akaziva zvaanodikana kuita zvinozomubesera kuti ashandise zvaajijaro. Kudari imwimwi muno zviri zvese kuti mujiji wenyu azvishandise, mungazvitara pa ndau yakatahwa kuti “Zvimweni.” Mukuvo wese bhuisananyi no mujiji wenyu ngo zviro zvaanodikana kuita kuti azvikwanirise pa mukuvo mushoma kana pamukuvo wakareba.

5. Inga zvinonangwa pana Marko 10:17-22, Jesu wakavhunja mukhupuki kuti aitenyi, ngenyi?

⁵ Beseranyi mujiji wenyu kuti aite cinjo mu upenyu hwake. (Verenganyi Marko 10:17-22.) Jesu waizviziva kuti zvaizonesa maningi kuti mukhupuki atengese zviro zvake zvese. (Marko 10:23) Asi Jesu wakavhunja mukhupuki wiya kuti aite cinjo mu upenyu  hwake. Ngenyi? Ngokuti Jesu waimuda maningi. Nguva jimweni, zvinganesa kuvhunja vajiji vedu kuti vashandise zvavari kujija, ngokuti tinorangarira kuti avangakwanisi kuita cinjo. Zvinotora nguva yakareba kuti mundhu aite cinjo mu upenyu hwake no kuva no maponero mapsa. (Vakorose 3:9, 10) Asi mukakasika kuvhunja mujiji wenyu ngo pamusoro po cinjo jaanodikana kuita, iyena anozotanga kuita cinjo jondhojo ngo kukasikavo. Mukaita kudaro, munokhombija kuti imwimwi munomuda.—Nduyo 141:5; Mazwi Akangwara 27:17.

6. Ngenyi tinodikana kuti muvhunjo jinoita kuti mujiji wedu anange mavonero ake?

⁶ Kuita muvhunjo jinoita kuti mujiji wenyu anange mavonero ake, zvinosisira maningi pa kupsaka kuziva zvaanorangarira ngo zvamuri kujijaro. Izvo zvinozomubesera kuti munase kuvona zviro zvaanonasa kuzwisisa no kutenda. Kudari mukaita izvi nguva jese, munozokwanisa kubhuisana ngo pamusoro po zviro zvamunovona kuti zvinonesa kuti iyena azvitende. Bhuku rinozwi Mungadakara Kwenda no Kwenda! rino muvhunjo jinobesera mujiji kuti anange mavonero ake. Inga muezaniso, cijijo co cirongomuna cino muvhunjo unoti: “Munovona kuti Jehovha anojizwa kudini pamunoshandisa zina rake?” Cijijo cocifumbhamwe, cino muvhunjo unoti: “Izviro zvapi zvamaida kukumbira ngo pamusoro pazvo?” Pakutanga mujiji wenyu angada kupuwa nguva padoko kuti akwanise kuwana manera o kudavira muvhunjo iji. Imwimwi mungamubesera kuti arangarire ngo pamusoro po vhesi no foto jinowanika mu bhukuro.

7. Tingashandisa kudini zviro zvakaitikadi mu njira inobudirira?

⁷ Mujiji wenyu paanonasa kuzwisisa zvaanodikana kuita, shandisanyi zvakaitika kuti mumubesere kuti aitevo zvondhozvo. Inga muezaniso, kudari mujiji wenyu aaviyi kumusongano, imwimwi mungamutatija vhidhiyo inoti: Jehovha Wakandikorondha inowanika pa cijijo co gumi na rongomuna pa divi rinoti, “Zivanyi zvimweni”. Pa zvijijo zvizinji zvo bhuku rinozwi Mungadakara Kwenda no Kwenda! imwimwi mungawana zviitiko izvi pa divi rinoti “Nasanyi kupsakisisa” kana pa divi * rinoti “Zivanyi zvimweni.” Asi ngwariranyi kuti mutame kuezanisa mujiji wenyu no ariwese hake ngo kunanga kuti “Kudari iyena wakakwanisa kuita izvi, iwewe ungakwanisavo kuzviita.” Siyani mujiji wenyu agume ega pa mbhejiso iyi. Kusiyapo zvondhozvo, nanganyi zviro zvakabesera mundhu wanangwaya pa vhidhiyo kuti ashandise zviro zvinonangwa mu Bhaibheri. Kangaije mungananga mafundo manganani o vhesi akabesera hama iya. Zvecikwanisika weya, gogomejeranyi manera aakabeswa ndi Jehovha.

8. Tingabeseresa kudini mujiji wedu kuti ade Jehovha?

⁸ Beseranyi mujiji wenyu kuti ade Jehovha. Mungazviitisa kudini? Psakanyi mukana wo kubesera mujiji wenyu kuti ajije ngo pamusoro po mugariro ja Jehovha. Beseranyi mujiji wenyu kuti avone Jehovha inga Mwari wakadakara, uwo anobesera vaya vanomuda. (1 Timoti 1:11; Vahebheru 11:6) Tatijanyi kuno mujiji wenyu kuti iyena anozobesereka ngo zvaanojijaro no kumubesera kuvona kuti zvondhozvo zvinovonesa kuti Jehovha anomuda. (Isaia 48:17, 18) Rudo wo mujiji wenyu kuna Jehovha paaunovanga maningi, zvinozomuita kuti iyena aite cinjo jinodikana.—1 Johani 5:3.

9. Mukuzwirana na Marko 10:29, 30, zvicinyi zvingabesera mundhu kuti asiye zvimweni kuti agume pa kubhabhatijwa?

⁹ Kuti mujiji wenyu wo Bhaibheri aenderere mberi mbhera kubhabhatijwa, anodikana kusiya zviro zvimweni. Inga mwanarume mukhupuki wanangwaya pakutanga, vajiji vamweni vo Bhaibheri vanodikana kusiya zviro zvokunyama. Kudari basa ravanoita arizwirani no ndhungamiriro jo Bhaibheri, kangaije ivona vangatodikana kupsaka basa rimweni. Vandhu vazinji vakatodikana kusiya shamwari jicikadi Jehovha. Kuveni vamweni vakasiiwa ngo ukama hwavo ucikadakariri Zvapupu zva Jehovha. Jesu waizviziva kuti zvaizonesera maningi vandhu vamweni kuita zviro izvi. Asi iyena wakagondesa kuti vandhu vaya vaizomutevera avacaizosuruvarepi. Ivona vanozokomborehwa ngo ukama hwakakura maningi hwo umwari. (Verenganyi Marko 10:29, 30.) Mungaitisa kudini kuti mubesere mujiji wenyu wo Bhaibheri kuti abesereke ngo ukama uhu?

10. Ngozvapi zvamajija ngo zvakaitikira hama Manuwere?

¹⁰ Ivanyi shamwari yo mujiji wenyu. Zvinosisira maningi kutatija kuti imwimwi munoneseka ngo mujiji wenyu. Ngenyi? Vonanyi basi zvakanangwa ndi hama Manuwere vanogara ku Meshiko. Veciceukija pavainga mujiji wo Bhaibheri ivona vakati: “Ticito tatanga jijo yedu yo Bhaibheri, mujijisi wangu waindivhunjisa dangani ndiri ushoni. Iyena waindibesera kuti ndijizwe ushoni, izvo zvaindiita kuti ndikwanise kubhuya ngo pamusoro po shwiro jimweni. Ndaikwanisa kuvona kamare kuti iyena waineseka ndini.”

11. Vajiji vedu vanobesereka kudini pavanopeja mukuvo na itusu?

¹¹ Pejanyi nguva no vajiji venyu inga zvakaitwa ndi Jesu. (Johani 3:22) Kudari zvecikwanisika, kokanyi mujiji wenyu ari kwenderera mberi kuti aviye kumuzi kwenyu komwa zviica, koocenga-cenga zviri zvese  kana kovona urongwa hwo mweji ngo mweji wo bhrodhikastingi. Iyena waizobongesera maningi ngo mukoka uu, maningi-ningi mu njiku jo maferiyadho, ngokuti ukama no shamwari unonga wakabatikana maningi ngo njiku iji. Hama Kazibwe vanogara Uganda, vakananga kudari: “Ndakavona kuti ndakajija zvizinji ngo pamusoro pa Jehovha ngo kupeja nguva no mujijisi wangu, inga zvotaiita pa kuita jijo. Ndakavona kamare kuti Jehovha anotaja vandhu vake, ivona vakadakara. Izvi ndizvona kamare zvandaida mu upenyu hwangu.”

12. Ngenyi tinodikana kwenda no vacumaeri vakasiyana-siyana koitisa jijo yo Bhaibheri?

¹² Kokanyi vacumaeri vamweni kuti muende navo ku jijo yenyu yo Bhaibheri. Nguva jimweni itusu tinozvivona zvakareruka kwenda toga ku jijo yedu yo Bhaibheri kana kukoka vacumaeri vondhovo vondhovo basi. Pikija zvakatirerukira kuita izvi, zvaizova zvakanaka kwenda no vacumaeri vakasiyana-siyana ku jijo yedu yo Bhaibheri. Hama Dhimitri vanogara Moridhovhiya vakananga kudari: “Mucumaeri umwe nga umwe waiviya pa jijo yangu, waisanangura zviro mu njira yakasiyana. Zvondhozvo zvakandibesera kuti ndikwanise kuvona njira jakasiyana-siyana jo kushandisa zviro zvandaijija. Zvakandibeserazve maningi kuti nditame kuva no nyowa pondakatanga kuva pa musongano, ngokuti ndainga ndaziva hama no hambzaji jakawanda.”

13. Ngenyi tinodikana kubesera mujiji wedu kuti aviye kumusongano?

¹³ Beseranyi mujiji wenyu kuti aviye kumusongano. Ngenyi? Jehovha anoda kuti vashandiri vake vasongane pamwepo kuti vamunamate. (Vahebheru 10:24, 25) Mukuengejera, hama no hambzaji jo mu ungano jakadari inga mbhuri yedu. Patinonga pamusongano na ivona zvakadari inga tiri pa muzi umweo, teciha zvokuha zvaushoni. Pamunobesera mujiji wenyu kuti aviye kumusongano, munonga mecimubesera kuti aite ciro cinosisira maningi kuti agume pa kubhabhatijwa. Asi zvingamunesera maningi kuti atange ega kuviya kumusongano. Waro bhuku Mungadakara Kwenda no Kwenda! ringabeseresa kudini mujiji wenyu kuti anyise cineso ciri cese?

14. Zvicinyi zvingabesera mujiji wedu kuti aviye kumusongano?

¹⁴ Shandisanyi cijijo co cigumi co bhuku Mungadakara Kwenda no Kwenda! kuti mukwanise kubesera mujiji wenyu. Bhuku iri ricito rabudiswa, vacumaeri vamweni vakakumbihwa kuti vashandise cijijo ici no vajiji vavo. Ivona vakananga kuti izvo zvakashanda kamare ngokuti vakakwanisa kubesera vajiji vavo kuti vaviye kumusongano. Ndizvona kuti amudikani kuvetera kuti mugume pa cijijo co cigumi kuti mukoke mujiji wenyu kuti aviye kumusongano. Zvecikwanisika mukokenyi ngo kukasika i endereranyi mberi meciita zvondhozvo. Zivanyi kuti mujiji umwe nga umwe, anosongana no zvineso zvakasiyana-siyana. Ngo kudaro, nasanyi kusotesesa zvineso zvinosongana no mujiji wenyu no kupsaka manera okumubesera ndiwona. Mucadoremba pamunovona kuti iyena aaripi kuviya pa musongano. Ivanyi mundhu anosengerera, moenderera mberi mecimukoka basi.

15. Vajiji vedu vangathyenyi?

¹⁵ Mucaceukija kuthya kwamakava nako pamakava Capupu ca Jehovha here? Kangaije maithya kuti narini andizokwanisi kucumaera pakawanda vandhu. Kana maitothya kuti ukama no shamwari waizomuteverera. Ngo kudaro, imwimwi munokwanisa kuzwisisa mazwiro ano mujiji wenyu wo Bhaibheri. Jesu waizviziva kuti vandhu vamweni vaizova no kuthya kondhoko. Asi iyena wakangwaja vateveri  vake kuti vatame kutendera kuti kuthya kuvaite kuti vatame kushandira Jehovha. (Mateu 10:16, 17, 27, 28) Waro Jesu, wakabesera kudini vateveri vake kuti vatame kuthya? Imwimwivo mungatevera kudini muezaniso wake?

16. Tingabeseresa kudini mujiji wedu kuti avhunje vamweni zvaanotenda?

¹⁶ Beseranyi vajiji venyu kuti vavhunje vamweni zvavanotenda. Vajiji va Jesu kangaije vakathimwa-thimwa maningi povakatumwa kwenda kocumaera. Asi Jesu wakavabesera ngo kuvavhunja kovaidikana kwenda kocumaera no zvovaidikana kwenda konanga. (Mateu 10:5-7) Mungatevejeresa kudini muezaniso wa Jesu? Beseranyi mujiji wenyu kuti azive kwaanodikana kwenda kocumaera. Inga muezaniso, muvhunjisenyi dangani iyena anoziva ari wese waizobesereka ngo kujija cokwadi ciri cese ciri mu Bhaibheri. Perapo mubeserenyi kuziva zvaanodikana kunanga ngo kumuvhunja manera akareruka o kuvhunja mundhu wondhowo cokwadi condhoco. Kudari zvecidiwa, mungabhuisana naye mecishandisa divi rinoti, “Vandhu Vamweni Vanoti” no rimweni rinoti, “Kudari Mundhu Akati” anowanika mu bhuku Mungadakara Kwenda no Kwenda! Pamunoita zvondhozvo, batikananyi pa kubesera mujiji wenyu kuti anase kushandisa Bhaibheri kuti ape mupinguro wakareruka asi wozviita ngo nderemejo.

17. Tingashandisa kudini Mateu 10:19, 20, 29-31, patinonga tecibesera mujiji wedu kuti athembe Jehovha?

¹⁷ Beseranyi mujiji wenyu kuti athembe Jehovha. Jesu wakavhunja vajiji vake kuti Jehovha waizovabesera ngokuti iyena waivada. (Verenganyi Mateu 10:19, 20, 29-31.) Ceukijanyi mujiji wenyu kuti Jehovha anozomubeseravo. Mungabesera mujiji wenyu kuti athembe Jehovha ngo kuita mukumbiro naye kuti akwanise kuita zvaanoda. Hama Francisco vanogara Poroniya vakati: “Mujijisi wangu kazinji wainanga ngo zvandaida kukwanirisa pa mukumbiro jake. Pondakavona kuti Jehovha waidavira mukumbiro jaiitwa ngo mujijisi wangu, ngo kukasika ndakatangavo kuita mukumbiro. Ndakakwanisa kuvona besero ra Jehovha, pondakakumbira feriya ku basa rangu imbza kuti ndiende kumusongano no ku gungano.”

18. Jehovha anovona kudini basa riri kuitwa ngo hama no hambzaji pa kujijisa?

¹⁸ Jehovha anoda maningi vajiji vedu vo Bhaibheri. Iyena anoziva kuti hama no hambzaji jinovangisira maningi kuti vakwanise kubesera vandhu kuti vave shamwari jake. Iyena anovada maningi ngo kuita kwavo zvondhozvo. (Isaia 52:7) Kudari amuripi kuitisa jijo jo Bhaibheri wari uno, imwimwi mungabesera vajiji vo Bhaibheri vo vamweni kuti vaenderere mberi mbhera pa kubhabhatijwa ngo kwenda naivona ku jijo javo.