1. Ngenyi vashandiri vamweni va Jehovha vangajizwa vari voga nguva jimweni?

VAZINJI vedu vanojizwa vari vega nguva jimweni. Kuno vamweni mazwiro awo, aapeji mukuvo wakareba. Kuveni vamweni vanopeja mukuvo wakareba kamare vano mazwiro ondhoo. Vamweni vanotojizwa vari voga, pikija vari pa ndau ino vandhu vakawanda. Vamweni vanovona zvecinesa kuwana shamwari mu ungano. Kuveni vamweni vari pa mbhuri yo kuti vanoita zviro zvizinji vari vese, pikija zvakadaro, vanojizwa vari vega. Vamweni vanomadandha o kuvona kana kubhuya no ukama hwavo hwakatamika. Makristu amweni, maningi-ningi vaya vajija wari cokwadi, vanojizwa vari vega pavanonyenywa kana pavanoteverehwa ngo shamwari no ukama ucikaripi Zvapupu zva Jehovha.

2. Tinozodavira muvhunjo japi?

² Jehovha anoziva i anozwisisa zvese zvinotiitikira. Patinojizwa tiri toga, iyena anoziva mazwiro edu i anoda kutibesera. Waro Jehovha anotibeseresa kudini? Zvicinyi zvatingaita kuti tikwanise kujibesera pacedu? Pejisire, zvicinyi zvatingaita kuti tikwanise kubesera vamweni mu ungano vanojizwa vari voga? Ngatende tivone mupinguro wo muvhunjo iji.

3. Jehovha wakakhombijisa kudini kuti waitaja Eriya?

³ Jehovha anoda kuti vanamati vake vese vadakare. Iyena ari phedo no umwe nga umwe wedu i anokwanisa kuvona patinonga takasuruvara. (Nduyo 145:18, 19) Vonanyi kuti Jehovha wakatajisa kudini muporofita wake Eriya. Mwanarume uwu wakagondeka wakapona mu mukuvo wokunesa maningi  mu Iziraeri. Vanamati va Jehovha vainga veciteverehwa maningi pa mukuvo uwu, Eriya wainga ecida kuuraiwa ngo vavengi va Mwari. (1 Majimambo 19:1, 2) Cimwenizve, Eriya wainga ecirangarira kuti ndiyena ega wainga wasara inga muporofita ecishandira Jehovha. Izvo zvakamuita kuti asuruvare maningi kamare. (1 Majimambo 19:10) Ngo kukasika, Jehovha wakaita ciri cese kuti amubesere. Jehovha wakatumira ngirozi kuti ivangise muporofita uwu, kuti iyena aacaingepi ega, kwainga kucino Vaiziraeri vakawanda vaishandira Jehovha.—1 Majimambo 19:5, 18.

4. Kuitisa kudini Marko 10:29, 30, inovonesa kutaja kunoita Jehovha vashandiri vake varuza kubeswa ngo ukama no shamwari?

⁴ Jehovha anozwisisa kuti patinosana kumushandira, itusu tinosiya zviro zvakawanda sure. Zviro zvondhozvo zvinobatanija kuruza besero ro ukama no shamwari jicikashandiri Jehovha. Kangaije ngo ndava yo kuthimwa-thimwa, mupostori Pedhru wakavhunjisa Jesu kudari: “Itusu takasiya zviro zvese tomutevera; waro ngo zvapi zvatinozowana?” (Mateu 19:27) Jesu wakagondesa vajiji vake kuti ungano yaizodari inga mbhuri kwavari. (Verenganyi Marko 10:29, 30.) Jehovha, Baba wedu vo mugore, vanogondesa kuti vanozobesera vese vanoda kuvashandira. (Nduyo 9:11) Ngatende tivone zviro zvinganani zvamungaita kuti mukwanise kubesehwa ndi Jehovha pa kunyisa mazwiro o kujizwa muri mwega.

5. Ngenyi zvaushoni kurangarira manera atinobesehwa ndi Jehovha?

⁵ Rangariranyi ngo manera amuri kubesehwa ndi Jehovha. (Nduyo 55:23) Izvi zvinozomubesera kuti mutame kujizwa muri moga. Hambzaji imweni inodanwa Karori, * ukama hwayo ucikaripi Capupu yakati: “Ndikasota sure, ndovona manera ondakabesehwa ndi Jehovha pondaisongana no zvineso, zvokadi kamare, izvo zvakandibesera kuti nditame kujizwa ndiri ndoga. Izvo zvakandikhohwesa kuti Jehovha nguva jese anozondibesera.”

6. Kuitisa kudini 1 Pedhru 5:9, 10, inovangisa vaya vari kujizwa vari voga?

 ⁶ Rangariranyi ngo manera ari kubesera Jehovha hama no hambzaji jinojizwa jiri joga. (Verenganyi 1 Pedhru 5:9, 10.) Hama Hiroshi vakapeja makore akawanda vari voga mu cokwadi pa mbhuri yavo, vakati: “Mu ungano, zvakareruka maningi kuvona kuti tese tino zvineso. Kuziva kuti tese tiri kuita zvatinokwanisa kuti tishandire Jehovha, zvingavangisa vaya vari voga mu cokwadi.”

7. Mukumbiro ungamubeseresa kudini?

⁷ Nguva jese itanyi mukumbiro, verenganyi Bhaibheri i endanyi kumusongano. Kuita mukumbiro, kunobatanija kuvhunja Jehovha zvese zvamuri kuzwa. (1 Pedhru 5:7) Hambzaji Masieri, vakati: “Ciro cimwe cinosisira maningi cakandibesera kuti nditame kujizwa ndoga i kuita mukumbiro kuna Jehovha ngo mwoyo wese.” Hambzaji iyi poyakatema civaringo co kuda kushandira Jehovha, iyona yakajizwa iri yoga ngokuti mbhuri yayo aicaishandira Jehovha. Ivona vakaengejera vaciti: “Jehovha wakadari inga Baba kamare kwandiri, ndinoita mukumbiro kwaari njiku jese pa vhaza jakawanda, kuti ndikwanise kumuvhunja zvandiri kuzwa.”

8. Kuverenga Bhaibheri no kurangarijisisa kunomubeseresa kudini?

⁸ Verenganyi Bhaibheri njiku jese, mecirangarijisisa ngo pamusoro po zviro zvinovonesa kuti Jehovha anomuda. Hambzaji Bhianka vakadikana kucungirira zviro zvicikabeseri zvainangwa ngo mbhuri yavo, vakati: “Kuverenga no kurangarijisisa zvinonangwa mu Bhaibheri no zviitiko zvo upenyu hwo Zvapupu zva Jehovha zvakasongana no mugariro wakafanana no wangu, kwakandibesera maningi.” Makristu amweni anodira mu musoro vhesi jinotondhoja jakadari inga Nduyo 27:10 na Isaia 41:10. Vamweni vanovona kuti kupurukira zviro zvakagaravhahwi, kunovabesera kuti vatame kujizwa vari voga pavanonga vecinasirira musongano kana pavanonga veciverenga Bhaibheri.

9. Musongano jingamubeseresa kudini?

⁹ Itanyi zvese zvamunokwanisa kuti muviye kumusongano. Imwimwi munozovangiswa ngo zvinojijwaro kundhono i munozokwanisa kuziva ushoni hama no hambzaji jenyu. (Vahebheru 10:24, 25) Hambzaji Masieri vanangwaya pakutanga, vakati: “Pikija ndainga maningi no nyowa, ndakatema civaringo co kwenda kumusongano jese no kupa mupinguro. Izvi zvakandibesera kuti ndijizwe phedo kamare no hama no hambzaji jangu mu ungano.”

10. Ngenyi zvinosisira kuva no ushamwari no Makristu akagondeka?

¹⁰ Ivanyi no ushamwari no Makristu akagondeka. Ivanyi no ushamwari no vandhu  vo ungano vamunoziva kuti vangamubesera ngo njira iri yese, azvinenyi dangani vaavasharuka, majaha kana vano zvirovejeso zvakasiyana no zvenyu. Bhaibheri rinoticeukija kuti uzivi unovha ‘ku vandhu vano invhi.’ (Jobe 12:12) Vasharuka mu ungano vangajijira zvakawanda kuvha kuno majaha akagondeka. Dhavhidhi wainga mujaha maningi kupinda Jonatani, asi zvondhozvo azvizivi kuita kuti ivona vatame kuva no ushamwari wo cike ndi cikevo. (1 Samueli 18:1) Dhavhidhi na Jonatani vakabesana kuti vakwanise kushandira Jehovha, pikija no zvineso zvavaisongana nazvo. (1 Samueli 23:16-18) Hambzaji Irina vari voga mu cokwadi pa ukama hwavo, vakati: “Hama no hambzaji jedu i ukama hwedu hwo ku divi ro umwari i Jehovha angavashandisa kuti ivona vakwanise kutibesera.”

11. Zvicinyi zvamunodikana kuita kuti muve no ushamwari wo cike ndi cikevo no ari wese?

¹¹ Kuva no shamwari jipsa akuzivi kureruka, maningi-ningi kudari muno nyowa. Hambzaji Ratina vainga maningi no nyowa, vakajijira cokwadi pikija no kuteverehwa vakati: “Ndakazwisisa kamare kuti ndaida kubeswa ngo hama no hambzaji jangu mu ungano.” Zvinonesa maningi kuvhunja ari wese zvamuri kuzwa, asi pamunozviita mundhu wondhowo anova shamwari yenyu yo cike ndi cikevo. Shamwari jenyu jinoda kumubesera no kumuvangisa, asi imwimwi munodikana kuvavhunja manera avanodikana kuzviita ndiwona.

12. Kuitisa kudini kucumaera kunotibesera kuti tive no ushamwari hwaushoni?

¹² Njira imwe yakanakisisa yo kuwana ushamwari, ngo yo kucumaera no vamweni. Hambzaji Karori vanangwaya pakutanga, vakati: “Ndakakwanisa kuwana shamwari jaushoni ngo kupeja nguva no hambzaji pa kucumaera no kuita mabasa amweni o Umwari. Pa makore akawanda, Jehovha wakandibesera ngo kushandisa shamwari iji.” Nguva jese zvaushoni kuita ushamwari no Makristu akagondeka. Jehovha anoshandisa ushamwari wakadari kuti atibesere kuhwisana no mazwiro akashata, akadari inga okujizwa uri wega.—Mazwi Akangwara 17:17.

13. Ngowapi mutoro uno vese mu ungano?

¹³ Vese mu ungano vano mutoro wokukhombija rudo no runyararo, kuti patame kuwanika ari wese anojizwa ari ega. (Johani 13:35) Zvatinonanga no kuita zvinovangisa maningi vamweni. Vonanyi basi zvakananga hambzaji imweni: “Pandakajija cokwadi, ungano yakava mbhuri yangu. Andicaizova umwe wo Zvapupu zva Jehovha pacina besero ravo.” Waro, imwimwi mungabeseresa kudini vaya vari voga mu cokwadi kuti vajizwe kuti vanodiwa?

14. Mungaitisa kudini kuti muve shamwari yaushoni ku vamweni?

¹⁴ Tanganyi kuita ushamwari no vapsa. Mungazviita ngo kunasa kuvaashira mu ungano. (Varoma 15:7) Asi atidi basi kuvacungamija mu njira yo ushamwari, itusu tinoda kuva no ushamwari hwakavanga na ivona pa kufamba ko nguva. Ngokudaro, khombijanyi kuti munovadakarira. Kusiyapo kuvaita muvhunjo jinovasiya no nyowa, ejanyi kuzwisisa zvineso zvavari kusongana nazvo. Vamweni vanovona zvecinesa maningi kunanga mazwiro avo kuno vamweni, ngo kudaro, mucavavangirija kuti vadavire muvhunjo jamunovaita. Kusiyapo zvondhozvo, nasanyi kuita muvhunjo mu njira yakangwaririka no kunasa kupurukira mupinguro javanopa. Inga muezaniso, mungavhunjisa kuti vakajijisa kudini cokwadi.

15. Hama jakaivha ku divi ro umwari jinobeseresa kudini vamweni mu ungano?

 ¹⁵ Rutendo wo umwe nga umwe mu ungano unoguma pa kuvanga, patinokhombija kuti tinodisana ngocedu. Asi izvi zvinoitika maningi-ningi kudari vakuru no vamweni vakaivha ku divi ro umwari, pavanokhombija kuti vanodisana. Hambzaji Merisa vakarehwa ndi mai wavo mu cokwadi vakati: “Ndinobonga maningi hama jaidari inga baba kwandiri, ijona jaipeja nguva na inini no kuneseka ndini. Nguva jese jondaida kubhuya zviri zvese, ndainga no mundhu wokundipurukira.” Mujaha umweni anodanwa Maurisiyo, wakasuruvara maningi no kujizwa ari ega mujijisi wake wo Bhaibheri paakasiya cokwadi. Maurisiyo wakati: “Vakuru vakakhombija kuti ivona vaindida kamare. Izvo zvakandibesera maningi. Nguva jese ivona vaibhuya na inini. Ivona vaienda na inini kocumaera, vaindivhunja zvovajija pa jijo yavo yo Bhaibheri no kwenda kotamba bhora na inini.” Vese, hambzaji Merisa na hama Maurisiyo vari kushanda mu nguva yakazara.

16-17. Zvicinyi zvamungaita kuti mubesere vamweni?

¹⁶ Beseranyi mu njira inoshanda. (Vagaratiya 6:10) Hama Reo vanoshanda inga misiyonariyo ndhambo no ukama hwavo, vakati: “Kazinji, camunodikana kuita i kukhombija kunaka mwoyo pa nguva kwayo kamare. Ndinoceukija pandakaita asidhente ngo karu. Pondakaguma ku muzi ndainga ndakabararika hwiru. Asi varovorani vamweni vakandikoka kuti ndiende ku muzi kwavo kocenga-cenga zviri zvese. Andicaripi kuceukija zvondakaha, asi ndinoceukija kuti ivona vakanasa kundipurukira. Pakupejisira, ndainga ndecijizwa ushoni kamare.”

¹⁷ Tese tinodakara maningi patinonga tino hama no hambzaji tecibhuya ngo pamusoro po hurukuro jatazwa pa magungano. Asi hambzaji Karori vanangwaya pakutanga, vakati: “Ndinonesehwa maningi kwenda ku magungano.” Ngenyi? Ivona vakati: “Pikija ndinonga ndino mazana kana zviuru zvo hama no hambzaji, ivona vanonga vakagara no mbhuri javo. Pandinovavona ndinondojizwa ndiri ndoga basi.” Zvinonesa maningi  kuno vaya vafihwa kuti vaende ku magungano. Munoziva ari wese ari kusongana no zvineso zvakadari here? Ngenyi amumukoki kuti aviye pa kunamata kwenyu ko mbhuri kana kuita zviri zvese no mbhuri yenyu?

18. Tingashandisa kudini 2 VaKorinte 6:11-13, pakuashira varendo?

¹⁸ Pejanyi nguva no vamweni. Ejanyi kupeja nguva no hama no hambzaji jakasiyana-siyana, maningi-ningi jiya jinojizwa jiri joga. Itusu tinoda ‘kuzaura mwoyo,’ maningi-ningi kuno hama iji. (Verenganyi 2 VaKorinte 6:11-13.) Hambzaji Merisa vanangwaya pakutanga, vakati: “Tese tinodakara maningi patinokokwa ngo hama kana hambzaji kuti tiende ku muzi kwavo kobungaija.” Munoziva ari wese ku ungano kwenyuyo, wamaizokoka kuti aviye ku muzi kwenyu here?

19. Ndirini po kuti kupeja nguva no hama no hambzaji kunobesera maningi?

¹⁹ Pano mukuvo wo kuti hama no hambzaji jinobongesera maningi, patinobungaija na ivona. Vamweni vanovona zvecinesa kugara pamwepo no ukama hwavo mu njiku jo maferiyadho. Kuveni vamweni, vanohwajihwa maningi pavanoceukija njiku yakafa umwe wo ukama hwavo. Ngo kudaro, patinopeja nguva no hama no hambzaji jiri kusongana no zvineso izvi, tinonga tecikhombija kuti itusu tinovada maningi.—Vafiripi 2:20.

20. Kuitisa kudini zvakatahwa pana Mateu 12:48-50, zvinotibesera patinojizwa tiri tega?

²⁰ Kuno zviro zvizinji zvinoitisa kuti Makristu ajizwe ari oga. Asi atidikani kukanganwa kuti Jehovha anoziva mazwiro edu. Iyena anoshandisa hama no hambzaji kuti jitibesere pa zviya zvatinoda. (Verenganyi Mateu 12:48-50.) Tinokhombija kuna Jehovha kuti tiri kubongesera ngo ungano, patinoita zvese zvatinokwanisa kuti tibesere hama no hambzaji jedu. Azvinenyi kuti ngoapi mazwiro atinova nawo nguva jimweni, ativhiri kukanganwa kuti Jehovha nguva jese ana itusu.