1. Jehovha wakaitenyi kuno umwe na umwe wedu?

JEHOVHA wakatikwevera kwaari. (Johani 6:44) Amborangariranyi kuti izvi zvinorevenyi. Jehovha paakasota zviuru no zviuru zvo vandhu pasi pano, iyena wakavona kuti imwimwi muno mwoyo wakanaka i munomuda—izvo zvinosisira maningi kuna Jehovha. (1 Kronike 28:9) Jehovha anomuziva, anomuzwisisa, anomuda. Zvokadi kamare, izvi zvinovangisa maningi.

2. Jesu wakaita muezaniso wapi kuti atibesere kuzwisisa kuti Jehovha anotida?

² Jehovha anomuda maningi. Cimwenizve, anodazve maningi hama no hambzaji jenyu jo Cikristu. Kuti munase kuzwisisa fundo iri, vonanyi kuti Jesu, wakaezanisa Jehovha no muhavisi. Zvicinyi zvaizoita muhavisi ano mavhuta anokwana kuita 100, rimwe rosvejeka? Iyena anozosiya “makumapfumbamwe na mapfumbamwe pa dundhu, woenda koopsaka vhuta rimwe rasvejekaya.” Paanowana vhuta rimwe iri, muhavisi aanyangajwi na irona. Kusiyapo zvondhozvo, anodakara. Tinojijenyi? Mavhuta ese anosisira kuna Jehovha. Jesu wakati: “Asipi kuda ka Baba wangu vari kudenga kuti umwe wo vana vadoko ava asvejeke.”—Mateu 18:12-14.

3. Zvicinyi zvatinozovona pa jijo iyi?

³ Narini, itusu atidi kuita kuti hama no hambzaji jedu jigare jakasuruvara. Waro tingaitisa kudini kuti titame kukhugunya vamweni? Cimwenizve, zvicinyi zvatingaita kudari ari wese akatinyangajisa? Tinozodavira muvhunjo iji pa jijo iyi. Asi pakutanga, ngatende tivone zvizinji ngo pamusoro po umwe o vana vadoko ava vanonangwari pana Mateu cipauko 18.

4. “Umwe wo vana vadoko ava” mbhaani?

⁴ “Umwe vo vana vadoko ava,” i vajiji va Jesu vo ndanga yese. Azvinenyi kuti vano makore mangana, ivona i “vana vadoko”  ngokuti vanoda kujijiswa ndi Jesu. (Mateu 18:3) Pikija vanovha mu nyika jakasiyana siyana, vano mugariro jakasiyana siyana, mavonero akasiyana no undhu wakasiyana, vese vanotenda Kristu. Ngo ndava yazvo, Kristu anovada maningi.—Mateu 18:6; Johani 1:12.

5. Jehovha anozwa kudini paanovona ari wese eciita zviri zvese zvinokhugunya kana zvinokhuvaza vashandiri vake?

⁵ “Umwe wo vana vadoko ava,” vanosisira maningi kuna Jehovha. Kuti tizwisise mazwiro ake, ngatirangarire zvatinozwa itusu ngo pamusoro po vana vadoko. Ivona vanosisira maningi kwatiri. Itusu tinoda kuvajivirira ngokuti ivona avana simba, avazivi zviro zvakawanda inga zvinoita madhodha. Itusu tinonyangajwa patinovona mundhu ari wese ecitambuja mundhu umweni. Asi tinonyangajwa maningi patinovona ari wese ecitambuja mwana mudoko. Mukufananavo, Jehovha anoda kutingwarira. Iyena anonyangajwa maningi paanovona ari wese eciita zviri zvese zvinokhugunya kana zvinokhuvaza vashandiri vake.—Isaia 63:9; Marko 9:42.

6. Mukuzwirana no 1 VaKorinte 1:26-29, vajiji va Jesu vanovoniwa kudini ngo nyika?

⁶ Ngoyapi njira imweni yo kuti vajiji va Jesu vanoezaniswa no “vana vadoko”? Ngovapi vandhu vanovoniwa ngo nyika kuti vanosisira maningi? Ndi vaya vakakhupuka, vano nduma na vaya vano simba. Mukusiyana, vajiji va Jesu vanovoniwa kuva vandhu vacikasisiri, vacina mutengo uri wese, “vana vadoko.” (Verenganyi 1 VaKorinte 1:26-29.) Asi Jehovha aavavoni kudaro.

7. Jehovha anoda kuti tivone kudini hama no hambzaji jedu?

⁷ Jehovha anoda vashandiri vake vese. Azvinenyi dangani ivona vaano makore akawanda vecimushandira kana vajija wari cokwadi. Hama no hambzaji jedu jese jinosisira maningi kuna Jehovha. Ngo kudaro, ijona jinodikanavo kuva vandhu vanosisira kwatiri. Itisu tinodikana kuda “hama jo munyika yese,” kuciripi nganani basi. (1 Pedhru 2:17) Tinodikana kuva no cido co kuda kuvangwarira no kuvakorondha. Kudari tikavona kuti tanyangajisa ari wese, itusu atidikani kuita inga kuti apana caitika kana kutorangarira kuti iyena anodikana kundiregerera kana kutozvikanganwa hake. Ngenyi vamweni vanoguma pakunyangajwa? Ngo ndava yo manera o vakarehwa, vamweni vanojivona inga kuti avasisiri kupinda hama jimweni. Kuveni vamweni, vajija wari cokwadi i vanovona kuti avadikani kuregerera vamweni pavanoshaishihwa. Azvinenyi kuti ngowapi mugariro wenyu, itusu tinodikana kuita zvese zvatinokwanisa kuti timusijire runyararo. Cimwenizve, mundhu anokasika kunyangajwa ngo zvinoithwa ngo vamweni, anodikana kuzwisisa kuti mugariro uwu asipi waushoni i anodikana kushanda ngo simba kuti ave no mugariro umweni. Akaita zvondhozvo, iyena anozova no mudakaro. Kusiyapo zvondhozvo, anozova no ushamwari hwaushoni no hama jake.

8. Ngowapi murangariro wainga no vandhu vazinji mu njiku ja Jesu, wakagumira pa kupsasa vajiji vake?

⁸ Ngenyi Jesu wakabhuya ngo pamusoro po “umwe wo vana vadoko ava”? Vajiji vake vakamuita muvhunjo uu, “Ndiyani mukuru mu Umambo hwo kumatenga?” (Mateu 18:1) Vajudha vazinji vaida kuti vamweni vavavone inga vandhu vanosisira maningi. Umwe mundhu anojija ngo zvo Bhaibheri wakananga kudari: “Vandhu vakapona voguma pa kufa, vecipsaka kureremejwa, kuva no zina raushoni no nduma.”

9. Vajiji va Jesu vaidikana kuitenyi?

⁹ Jesu waiziva kuti vajiji vake, vaidikana kushanda ngo simba kuti vavhise mujimu  wo kuphikizana mu mwoyo mavo, wainga no Vajudha vazinji. Iyena wakavavhunja kudari: “Mukuru pakati penyu ngaaite inga mudoko, anotungamirira ngaaitevo inga mushandiri.” (Ruka 22:26) Tinova inga “mudoko,” patinovona “vamweni inga vakuru” kupinda itusu. (Vafiripi 2:3) Patinosakurira mugariro uu, zvinozonesa maningi kuti tikhugunye vamweni.

10. Ngoyapi mbhangiro yakapa mupostori Pauro yatinodikana kushandisa?

¹⁰ Hama no hambzaji jedu i vakuru kupinda itusu ngo njira imwe kana imweni. Tinokwanisa kuzvivona izvi, patinobatikana pa kuvona mugariro javo jaushoni. Tinodikana kubatisisa maningi ngwajo yo mupostori Pauro, yaakapa ku ungano yo Korinto paakati: “Ndiyani wakakuita kuti usiyane no vamweni? Ngocapi caunaco caucizivi kupuwa? Kudari wakaita ngo kucipuwa, waro ngenyi unojikuja zvoita inga kuti auzivi kucipuwa?” (1 VaKorinte 4:7) Ngo kudaro, atidikani kuda kuti hama jitivone inga tinosisira maningi kupinda vamweni. Inga muezaniso, kudari hama inokwanisa ushoni kuita hurukuro kana hambzaji inokwanisa kutangisa jijo jo Bhaibheri, vanodikana kupa rukujo Jehovha ngo zvavanokwanisaro kuita.

11. Jesu waida kujijisenyi paakaita muezaniso wa mambo no muranda wake?

¹¹ Jesu naapera kuvhunja vateveri vake ngo pamusoro po kutama kukhugunya vamweni, iyena wakaita muezaniso ngo pamusoro pa mambo no muranda wake. Mambo uu, wakaregerera magava ainga no muranda uu aaicakwanisa kupagari. Pakufamba ko nguva, muranda wondhowo wakaendavo kokhumbusa magava ainga no muranda wake. Pejisire, mambo wakadira muranda uu acina unyasha mukadheya. Tinojijenyi? Jesu wakati: “Baba wangu vo kumatenga vanozomuitiravo zvondhozvo kudari mukatama kuregerera hama yenyu ngo mwoyo wese.”—Mateu 18:21-35.

12. Kutama kwedu kuregerera, kunopsasisa kudini vamweni?

¹² Zvakaitari muranda uu zvakapsasa vamweni vaizvivona. Pakutanga, iyena aazivi kukhombija usizi kuno muranda doni wake, ngo “kumuendesa mu kadheya mbhera apeje kupagari magava ese.” Cocipiri, iyena wakaita kuti varanda vamweni vainga vacizvivona, vahwajihwe maningi ngo zvaakaitari. “Varanda doni vamweni pavakavona zvakaitika vakanyangajwa maningi ndizvona.” Mukuezanavo, zviito zvedu zvinopsasa vamweni. Kudari ariwese wakashaisha kutitaja, toramba kumuregerera zvicinyi zvaizoitika? Cokutanga, iyena waizohwajihwa maningi ngo kutama kwedu kumuregerera, ngo kuti zvaizodari inga itusu atimudi. Cocipiri, zvaizopsasavo vamweni mu ungano pavanovona kuti itusu atina runyararo no mundhu umweni.

13. Tinojijenyi no zvakaitika na hambzaji Kristina?

¹³ Patinoregerera hama no hambzaji jedu, tinojibesera pacedu no kubeseravo vamweni. Izvo ndizvona zvakaitika no hambzaji imweni inoshanda inga piyona yatingadana Kristina. Iyona yakanyangajiswa ngo hambzaji imweni yo ku ungano kwayo. Hambzaji Kristina vakati: “Magama ayaivereketa, aindihwaja zvokuti zvaidari inga ndiri kubaiwa ngo shipanga. Mu basa ro kucumaera andicaidakarirepi kuti ndibude naye. Ndakaguma pakuruza mudakaro wangu ndotama kuvangisirazve.” Hambzaji Kristina vaivona kuti vainga no mathangwe aushoni kuti vaite zvondhozvo. Asi ivona avazivi kunyangajwa no hambzaji iyi kana kubatisisa mazwiro avo. Ngo kujidodokesa kwese ivona vakashandisa mbhangiro inowanika mu Murindiri wa 15 wa Outubro wo 1999, pa musoro unoti: “Kanganwira No Mwoyo Wako Wese.” Ivona vakaregerera hambzaji iyi. Hambzaji Kristina  vakatizve: “Wari ndinozwisisa kuti tese tinovangisira kuti tiite cinjo, Jehovha wakanasiririka nguva jese kuti atiregerere. Ndakajizwa ndakasujunuka kamare. Ndakawanazve mudakakaro wangu.”

14. Mukuzwirana na Mateu 18:21, 22, cineso capi cakasongana no mupostori Pedhru, tinojijenyi ngo zvakadavira Jesu?

¹⁴ Tinozviziva kuti tinodikana kuregerera, izvi ndizvona zvakanaka kuti tiite. Asi nguva jimweni zvinotinesera kuregerera. Mupostori Pedhru waijizwavo kudaro nguva jimweni. (Verenganyi Mateu 18:21, 22.) Zvicinyi zvingabesera? Cokutanga, rangariranyi manera anomuregerera Jehovha. (Mateu 18:32, 33) Itusu atifaneri kuregerehwa ndi Jehovha, asi iyena anotiregerera ngo mwoyo wese. (Nduyo 103:8-10) Pa nguva yondhoyo, itusu “tinodikana kudisana ngocedu.” Kuregerera uku asipi kuregereravo hako. Ngo kudaro, itusu tinodikana kamare kuregerera hama no hambzaji jedu nguva jese. (1 Johani 4:11) Cocipiri, rangariranyi zvinoitika patinoregerera. Tinobesera mundhu watishaishiraya, tinobesera kuti ungano ive yakabatana, tinongwarira ushamwari wedu na Jehovha, tevere tinojizwa takasujunuka. (2 VaKorinte 2:7; Vakorose 3:14) Pejisire, tinodikana kuita mukumbiro kuna Wiya anotivhunja kuti tiregere. Mucatendera kuti Sathana apwanye ushamwari wamunahwo no hama no hambzaji jenyu. (Vaefeso 4:26, 27) Tinoda besero ra Jehovha kuti tive no runyararo mu ungano.

15. Mukuzwirana na Vakorose 3:13, zvicinyi zvatinodikana kuita kudari tikanyangajwa ngo zvakaita hama kana hambzaji yedu?

¹⁵ Zvicinyi zvamaizoita kudari hama kana hambzaji yakaita zviro zvamucikadakariri? Vangisiranyi kuti murambe muno runyararo. Vhunjanyi Jehovha mazwiro enyu. Kumbiranyi Jehovha kuti akomborere mundhu wamushaishiraya. Kumbiranyizve kuti  iyena amubesere kuvona mugariro jaushoni jo mundhu wiya, no mugariro jaanodakarira Jehovha kwaari. (Ruka 6:28) Kudari zvikamunesera kukanganwa zvaakamuitiraro, rangariranyi njira yaushoni kuti mukwanise kubhuya naye. Zvakanaka maningi kurangarira kuti hama yenyu aizivi kumushaishira ngo cabomo. (Mateu 5:23, 24; 1 VaKorinte 13:7) Pamunobhuya naye, vonesanyi kuti iyena acaidepi kumukhungunya. Waro zvicinyi zvamaizoita kudari iyena acikadi kuita runyararo? “Endereranyi mberi mecicungirirana.” Ivanyi anosengerera no hama yenyu. (Verenganyi Vakorose 3:13.) Cinosisira maningi pa zvese, ikutama kuviga bundu kuti mutame kuphwanya ushamwari hwenyu na Jehovha. Narini, mucatendera kuti ciri cese haco cimukhugunye. Mukaita kudaro, munokhombija kuti imwimwi munoda maningi Jehovha kupinda ciricese haco.—Nduyo 119:165.

16. Ngowapi mutoro una umwe na umwe wedu?

¹⁶ Itusu tinobongesera maningi ngo kushandira kwatinoita Jehovha pamwepo no hama no hambzaji jedu inga “mushambi umwe” tecitungamirihwa ngo “muhavisi umwe”! (Johani 10:16) Bhuku Takarongwa Kuti Tiite Kuda ka Jehovha, pheji 165 rinoti: “Zvecivoneka kuti imwimwi muri kubeserekavo ngo rubatano uhu, imwimwi muno muthwaro wo kubesera kuti uenderere mberi uripo.” Ngo kudaro, tinodikana “kuenderera mberi teciva no ushamwari wo runyararo no mudakaro pakati po hama jedu ngo kujivona inga manera ajinovoniwa ndi Jehovha.” Kuna Jehovha itusu tese tiri “vana vanosisira.” Ngo kudaro, imwimwi munodikana kuvona hama no hambzaji jenyu kuva vanosisira. Jehovha anovona no kureremeja zvatinoitira hama no hambzaji jedu.—Mateu 10:42.

17. Tasunga kuitenyi?

¹⁷ Itusu tinoda vatinonamata navo. Ngo kudaro, “ngative takasunga kuti titame kudira buwe rinokhugunya kana ciro cinophingaija hama yedu.” (Varoma 14:13) Tinovona hama no hambzaji jedu kuva vakuru kupinda itusu, cimwenizve tinoda kuvaregerera ngo mwoyo wese. Kusiyapo zvondhozvo, itusu atitenderi kuti vamweni vatikhugunye. Cimwenizve, tinopsaka “zviro zvinovisa runyararo no zviro zvinovangisana.”—Varoma 14:19.