▪ Pauro wakatara kudari: “Ngo pamusoro po mutemo [ndakafa] kwauri, kuti ndive mundhu ari penye pamberi pa Mwari.”—Vagaratiya 2:19, masoko o pasi.

Zvakatarari Pauro zvainga zvicizwirana kamare no zvainga zveciitika ku ungano yo Ciroma provhinsiya yo Garasiya. Makristu amweni o kondhoyo ainga atanga kucengejwa ngo vajijisi vo kunyepa. Ivona vainga vacijijisa kuti mundhu aponeswe, waidikana kuzwira Mutemo wa Mosi maningi-ningi ngo pamusoro po kusokwa. Asi Pauro waizviziva kuti Mwari aicaidepi kuti vashandiri vake vasokwe. Iyena, wakaeja kubhuya navo no kuvakhombija kuti zvavaingaro vecijijisa zvainga zvokunyepa. Cimwenizve, wakavangisa hama kuti jive no rutendo ku muripo wa Jesu Kristu.—Vagaratiya 2:4; 5:2.

Bhaibheri rinonasa kujekesa kuti mundhu paanofa, apana caanoziva. (Mucumaeri 9:5) Pauro paakananga kuti: “Ngo pamusoro po mutemo [ndakafa] kwauri,” iyena waida kunanga kuti Mutemo wa Mosi aucaizopsasazve upenyu hwake. Iyena wainga no cokwadi cokuti, ngo rutendo waainga nao ngo pamusoro po muripo wa Jesu, waizova “ari penye pamberi pa Mwari.”

Mugariro wa Pauro hwakacinja “ngo pamusoro po mutemo.” Kuitisa kudini? Iyena wakasanangura kuti “mundhu aanangwi kuti mururami ngo kuzwira mutemo, asi basi ngo kutenda Jesu Kristu.” (Vagaratiya 2:16) Mutemo waishanda kuitira ciro cinosisira maningi. Pauro wakasanangurira Vagaratiya kuti mutemo “wakadihwa kuti uvonese ushaishi mbhera ugume mubarihwana wainga wakagondiswa.” (Vagaratiya 3:19) Hina, Mutemo wakavonesa pambhene kuti vandhu vacizivi kukwana kana vashaishi, avacaizokwanisa kuteveja Mutemo mukuperera, zvokuti vaida muripo wakakwana. Mutemo waibesera vandhu kuti vazive kuti Jesu ndiyena “mubarihwana” wakagondeswa. Mundhu akava no rutendo kuna Jesu Kristu, anovoniwa kuti wakarurama pamberi pa Mwari. (Vagaratiya 3:24) Pauro wakananga kudaro ngokuti wakava no rutendo kuna Jesu. Cimwenizve, Pauro wakafa “ngo pamusoro po mutemo” wova “penye pamberi pa Mwari.” Ngo kudaro, mutemo wa Mosi aucaizopsasazve upenyu hwake, asi waizopsaswa ndi Mwari.

Pauro wakananga zviro zvakaezana pa karata yaakatarira Makristu o ku Roma, paakati: “Waro hama jangu, imwimwi makafira Mutemo ngo pamusoro po muviri wa Kristu . . . Asi wari tasujunuhwa ku mutemo ngokuti aucatiphingizve.” (Varoma 7:4, 6) Pa vhesi iji japerari kunangwa no pana Vagaratiya 2:19, Pauro aacainanga ngo kufa ko mundhu wainga waita ciro cainangwa ngo Mutemo kuti cishaishi. Mukusiyana, Pauro wainga acinanga ngo kusujunuhwa. Mutemo aucaingazve ucipsasa Pauro no vamweni vakadari inga ndiyena. Ivona vainga vasujunuhwa ngo kutenda muripo wa Kristu.