1. Ngenyi mupostori Pauro wakangwaja maKristu okutanga o Cihebheru kuti aengejere kuvangisana kwavo umwe no umweni?

MUZANA ro kutanga ro makore, mupostori Pauro wakapa ngwajo ii ku maKristu o Cihebheru: “Ngatirindisane umwe no umweni, pa basa ro kudisana no kuita bziro bzakanaka, Ticaxwa kuenda ku musongano wedu, inga bzo vanoroveja kuita vamweni. Kaveta imwimwi vangisananyi mwoyo ngocenyu, meciziva kuti njiku yo kuvia kwa Tenji yaaphedo.” (Vaheberi 10:24, 25) Hama jaida kuziva kuti ngenyi Pauro wakavabvunja kuti vaengejere kuvangisana kwavo umwe no umweni. No papera makore mashanu basi, thangwe rimwe rakatanga kuvoneka. Pa nguva yondhoyo, vakavona kuti njiku yo kuti Jehovha atonge Jerusarema yainga yaaphedo. Vakazviziva kuti vaidikana kutiza mudhorobha inga zvavainga vakabvunjwa ndi Jesu kuti vaiite. (Luka 21:20-22; Maitiro o Vapostori 2:19, 20)  Njiku ya Jehovha yakaguma mu gore ro 70, vaRoma pavakaparaja Jerusarema.

2. Ngenyi tinodikana kurangarira maningi ngo pamusoro po kuvangisana umwe no umweni nyamasi uno?

² Nyamasi uno, tiri pa mugariro wakaezana. “Njiku . . . , huru, yokuthisisa,” ya Jehovha yaaphedo. (Joel. 2:11) Magama o muporofita Sofonia anoshandavo mu nguva jedu jino: “Njiku huru ya Tenji yaa phedo, yaa phedo, inovia ngo kukasika.” (Sofonia 1:14) Ngo iyo ndava, tinodikana kurindisana “umwe no umweni, pa basa ro kudisana no kuita bziro bzakanaka.” (Vaheberi 10:24) Tinodikana kudakarira maningi hama jedu, ngokudaro, tingavavangisa mukuvo wese.

3. Mupostori Pauro wakanangenyi ngo pamusoro po kuvangisana? (Vonanyi pikica yo kutanga.)

³ “Bonezi ro mwoyo rinopeja simba; izwi rakanaka rinodakajisa.” (Mazwi Akangwara 12:25) Nguva jese, tese tinoda kuvangiswa. Pauro wakajekesavo kuti pikija vaya vano mutoro wo kuvangisa vamweni, vanodikanavo kuvangiswa. Iyena wakatara kudari ku hama jake jo Roma: “Mbzakadi, ndinodisisa kumuvona, kuti ndimutatije cipuo cimweni co mujimu co kumuvangisa. Kuti tivangisane ngo ndava yo kutenda kwedu: kwenyu no kwangu.” (VaRoma 1:11, 12) Nguva jimweni, mupostori Pauro waitodavo kuvangiswa.—Verenganyi VaRoma 15:30-32.

4, 5. Mbhaani vatingavangisa nyamasi uno, zve ngenyi?

⁴ Nyamasi uno, tingavangisa vese vaya vanoshandira Jehovha mu nguva yakazara, vakadari inga mapiyona akagondeka. Vazinji vavo vakasia zviro zvizinji zvaidakajisa upenyu hwavo kuti vave piyona. Izvi ndizvonavo zvondhozvo zvakaita mamisionario, maBheterita, vavonereri vo ndharaundha no vakaji vavo zve no vese vaya vanoshanda pa hofisi yo kusanduja iri ndhambo no Bheteri. Vese avo vanoita cinjo kuti vapeje nguva zinji ngo kushandira Jehovha. Ngokudaro, tinodikana kuvavangisa. Kuno vazinji vanotodavo kushandira mu nguva yakazara asi avacazvikwanisi. Ivona vaizobongesera maningi kudari vakavangiswa.

⁵ Ndianizve anofanera kuvangiswa? Tingavangisa hama no hambzaji zinji jinosana kugara jicizivi kucadha ngokuti jinoda kuzwira Jehovha no kucadha “basi . . . , mwa Tenji.” (1 VaKorinto 7:39) Vakaji vanovangiswa pavanobvunjwa ngo majimamuna avo kuti vanovada zve pavanobongesera ngo zvese zvavanoita. (Mazwi Akangwara 31:28, 31) MaKristu anocungirira paanoteverehwa kana kuhwaja, ngokudaro anodavo kuvangiswa. (2 VaTesalònika 1:3-5) Jehovha na Jesu vanoembezera vagondeki vese avo.—Verenganyi 2 VaTesalònika 2:16, 17.

6. Pana Isaia 32:1, 2 tinojijenyi ngo basa ro vakuru?

⁶ Verenganyi Isaia 32:1, 2. Tiri kupona mu nguva inonesa maningi zve zvakareruka kusuruvara no kuvora mwoyo. Jesu Kristu anoshandisa hama jake jokuzojwa no “nduna” jakagondeka jo mabvuta amweni kuti vativangise. Vakuru avo vo ungano  asipi ‘majitenji’ o rutendo hwedu asi ‘vanoshanda pamwepo nesu’ kuitira kudakara kwedu. Ivona vanoda kutibesera kuti tive takadakara zve tirambe takagondeka.—2 VaKorinto 1:24, Shanduro yeNyika Itsva.

7, 8. Vakuru vangavangisa kudini vamweni ngo zvavanonga no zvovanoita?

⁷ Vakuru vangatevejera mupostori Pauro, uwo nguva jese waieja kuvangisa hama jake. Iyena wakatara kudari ku hama jo ku Tesaronika jainga jeciteverehwa: ‘Rudo hwedu hwakakura kudari kuti taizomupa, haiwa Vangeri ra Mwari basi, kaveta mwoyo yedu kamare, ngo kukura ko rudo hwedu.’—1 VaTesalònika 2:8.

⁸ Vakuru vangavangisa vamweni ngo zvavanonga. Asi izvi zvinokwana? Pauro wakananga kudari ku vakuru vo Efeso: “Ngo bzese, ndakamujijisa kuti mubate basa kudaro, mubese vatami, mecirangarira mazwi a Tenji, wakati: ‘Anodakara anopa, kupinda wiya anopuwa.’” (Maitiro o Vapostori 20:35) Pauro wainga no cido co ‘kupa bziro bzake; no kujipekejeravo, ku hama jake.’ Wakazvivonesa ngo zviito zvake kuti wainga no cido co kuvabesera. (2 VaKorinto 12:15) Mukufanana, vakuru avadikani kuvangisa vamweni basi ngo zvavanonanga asi ngo zvovanoita. Izvi zvinotatija kuti vanotitaja kamare.—1 VaKorinto 14:3.

9. Vakuru vangapekejesa kudini mbhangiro mu njira inovangisa?

⁹ Kuti vavangise hama, nguva jimweni vakuru vanodikana kupa mbhangiro. Vangajija kubvira mu Bhaibheri kuti vangazviitisa kudini mu njira inovangisa. Pasure po kufa kwake no kumuswa, Jesu wakagaja muezaniso wakanaka maningi ngo kupa mbhangiro paakatumira masoko ku ungano jo ku Azia Menori. Wainga no mbhangiro yakavanga maningi kuitira ungano jo Efeso, Pergamu no Tiatira. Asi, acito wapa mbhangiro, wakavasimba ngo zviro zvese zvaushoni zvavaiita. (Apokalipsi 2:1-5, 12, 13, 18, 19) Jesu wakananga kudari ku ungano yo Raodisea: “Inini ndinopangira no kukamisa vaya vo ndinodisa. Torai simba, utenderuke.” (Apokalipsi 3:19) Vakuru vedu vanoeja kutevejera Jesu pavanopa mbhangiro.

10. Tese tingavangisana kudini umwe no umweni?

¹⁰ Vakuru andivopi basi vanodikana kuvangisa vamweni. Pauro wakangwaja maKristu ese kuti averekete “pa ngari yokudikana, izwi rinonakira kuvaka, ngaripe unyaxa.” (VaEfeso 4:29) Umwe nga umwe wedu anodikana kuziva zvinodiwa zvo vamweni kuti avabesere. Pauro wakatara kudari ku maKristu o Cihebheru: “Musanyi mikono yakarembejeka! Vangisanyi makokobvi akatetepa, fambanyi mu makwanja akarungama, kuti ndiani anothobinya acadorea, kaveta aite wakavanga.” (Vaheberi 12:12, 13) Tese tingavangisana umwe no umweni ngo zvatinonanga, pikija tiri vadoko kamare.

11. Zvicinyi zvakabesera Marthe paainga wakasuruvara?

¹¹ Hambzaji inodanwa Marthe yainga yakasuruvara maningi. * (Vonanyi masoko o pasi.) Iyona yakatara kudari: “Njiku imweni dainga ndeciita mukumbiro kuti  ndiwane vangiso, ndakaziva imwe hambzaji yainga yaamusharuka yakanditatijira rudo zve usizi, zviro zvondaida pa nguva iya. Yakandiverengeravo zvakaiitikira no muejo jo vainga vari kusongana najo, andicaijizwazve ndega.” Hambzaji iyi kangaije aitozivi kuzwisisa kuti magama ayo akabesera kudini Marthe.

12, 13. Tingashandisa kudini ngwajo inowanika pana VaFilipi 2:1-4?

¹² Pauro wakatara kudari ku maKristu o Firipo: “Ngokudaro, ngo ndava yo simba ro kupona mwa Kristu, ngo ndava yo kunyarajwa kuri mu rudo, ngo ndava yo ruzwirano hwo mujimu no unyaxa hwo mu mwoyo menyu, ndinomukumbira kuti muzaje kudakara kwangu, mecizwirana ngocenyu, ngo kudisana kumweko: mwiha umwe no murangariro umwe. Mucaita ciricese ngo kuphikizana, nokuti kujikuja. Thivanyi mwoyo, mecivona vamweni inga vakuru, mucapsaka bzinomudakarisa basi, kaveta psakanyi bzinodakarisa vamweni.”—VaFilipi 2:1-4.

¹³ Tese tinodikana kupsaka manera okubeserana umwe no umweni. Tingapa ‘yarajo iri mu rudo,’ ‘ruzwirano hwo mujimu’ zve no ‘unyaxa hwo mu mwoyo menyu’ kuti tivangise hama no hambzaji jedu.

14. Ngoapi manera amweni o kupa vangiso?

¹⁴ Kuzwa kuti vese vaya vatakabesera kareko vari kuramba vakagondeka zvinotidakajisa maningi. Mupostori Johani wakatara kudari: “Andina rudakaro hukuru kupinda uhu, hwo kuziva kuti vana vangu  vanoteveja bzokadi.” (3 Jo. 1:4) Mapiyona mazinji anodakara paanovona kuti mundhu wovakabesera kujija cokwadi ari kwenderera mberi acishandira Jehovha wakagondeka, kangaije kutovavo piyona. Kudari mapiyona akajizwa akasuruvara, tingamaceukija zviro zvese zvaushoni zvaakaita kuti abesere vamweni.

15. Ngocapi ciro cimwe catingaita kuti tivangise vese vaya vanoshandira Jehovha vakagondeka?

¹⁵ Vavonereri vazinji vo ndharaundha vanonanga kuti ivona no vakaji vavo vanovangiswa pavanobongwa apo pavanopera kubvakacira ungano. Ndizvonavo zvondhozvo no vakuru, mamisionario, mapiyona no maBheterita, avo vanoshandira Jehovha vakagondeka. Ngo kuvabonga, tingavavangisa maningi.

16. Ngocapi ciro cidoko cingavangisa ariwese?

¹⁶ Kudari mukavona kuti zvinonesa kubvunja vamweni zvamunozwa ngo pamusoro pavo keni? Zvokadi kamare, azvinesi kuvangisa vamweni. Ejanyi kunyemwerera ariwese. Kudari akatama kunyemwereravo, zvingaita kuti ari kusongana no cineso zve anoda mundhu wo kubhuya naye. Mungamuembejera ngo kumupurukira.—Jakobo 1:19.

17. Zvicinyi zvakabesera imwe hama iri mujaha?

¹⁷ Imwe hama iri mujaha inodanwa Henri yainga yakasuruvara maningi apo ukama hwayo uzinji hwainga wasia kushandira Jehovha. Umwe wavo wainga baba wayo, avo vaishanda inga mukuru. Muvonereri wo ndharaundha wakavona kuti Henri wainga  wakasuruvara zve wakamukoka kwenda koomwa khofi naye. Wakanasa kupurukira Henri paainga ecinanga mazwiro ake. Henri wakazwisisa kuti njira imwe basi yaangaita kuti mbhuri yake ihwirire mu cokwadi i kuramba wakagondeka. Wakaembezehwazve ngo kuverenga Nduyo 46, Sofonia 3:17, na Marco 10:29, 30.

18. (a) Mambo Soromona wakatarenyi ngo pamusoro po kuvangisa? (b) Mupostori Pauro wakapa zano rapi?

¹⁸ Tingajijenyi kubvira ku muezaniso wa Marthe na Henri? Tese tingaembejera no kuvangisa hama no hambzaji jinoda kuvangiswa. Mambo Soromona wakatara kudari: “Mupinguro wa uxoni: kunaka kwawo! Jiso rakacena rinodakajisa mwoyo, soko rakanaka rinomusa simba.” (Mazwi Akangwara 15:23, 30) Munoziva ari wese wakavora mwoyo kana kusuruvara here? Ngenyi amuiti ciri cese, cakadari inga kumuveremgera Murindiri kana kumutatija site yedu? Cimwenizve, Pauro wakajijisa kuti kuimba ndumbo jo Umambo pamwepo zvingaita kuti tijizwe ushoni. Iyena wakatara kudari: “Jijisananyi no kupangirana ngo uzivi hwese. Ngo kubonga Mwari, mwoyo yenyu ngaiimbe ndumbo no ngoma bzakafemehwa ngo mujimu.”—VaKolosi 3:16; Maitiro o Vapostori 16:25.

19. Ngenyi sasambi wari, kuvangisana umwe no umweni kunozova kwecisisira maningi, zve tinodikana kuitenyi?

¹⁹ Patinonga tecikhwedera phedo no njiku ya Jehovha, zvinosisira maningi kuvangisana umwe no umweni. (Vaheberi 10:25) Tinozodakara maningi tingaita inga takangwajwa ndi Pauro: ‘Besananyi no kuvangisana, kudari ngo bzo munoita.’—1 VaTesalònika 5:11.